Storia di Bida

E Trabou di Haci Discipel A Forma Mi Bida

Segun e relato di Lynette Peters

Soldanan di marina Mericano a bin pa evacua nos. Tabatin un francotirado riba dak di e edificio. Tabatin solda drumi plat abou den yerba cu nan scopetnan cla pa tira. Segun cu ami y e otro misioneronan a core bai den direccion di e helicopter cu tabata warda nos e diadomingo mainta ei, nos a forsa nos mes pa keda trankil. Den un kinipi di wowo nos tabata den laira. Dies minuut despues, nos a baha sano y salvo riba un barco militar cu tabata mara dilanti di costa.

ESIGUIENTE mainta, nos a tende cu e rebeldenan a bombardia e hotel caminda nos a bai busca refugio e anochi prome. E añanan di disturbio civil na Sierra Leone finalmente a escala den un guera completo. Tur stranhero, incluso nos, a haya nan obliga ta hui for di e pais casi di un momento pa otro. Pa splica con bin mi tabata den e situacion ei, laga mi cuminsa for di principio.

Mi a lanta na Guyana Britanico, conoci como Guyana for di aña 1966. Mi hubentud den e decada di 1950 tabata masha dushi y sin ningun precupacion. Mayoria di mayor tabata duna masha hopi balor na educacion, y tabata spera di hobennan cu nan ta siña bon na scol. Mi ta corda cu un biaha un trahado di banco a puntra mi tata: “Pakico bo ta paga asina tanto placa na scol pa e educacion di bo yiunan?” Mi tata a contest’e: “Ta e mihor educacion so por garantisa nan exito.” E tempo ei, e tabata pensa cu nos lo a haya e mihor educacion na scolnan prestigioso. Pero poco despues su punto di bista a cambia.

Ora cu mi tabatin 11 aña, mi mama a cuminsa studia Bijbel cu Testigonan di Jehova. El a bishita un Salon di Reino hunto cu un bisiña.  Loke nan a tende e anochi ei a combence nan tur dos cu nan a haya e berdad. Mas despues, mi mama a conta un otro bisiña loke nan a trata na e reunion. Despues di poco tempo nan tur tres tabata studia cu e misioneronan Daphne Harry (cu despues a bira Baird) y Rose Cuffie. Den menos cu un aña, mi mama cu su dos amiganan a batisa. Cinco aña despues, mi tata a kita for di Iglesia Adventista di Shete Dia y a batisa como un Testigo di Jehova.

Na hoben, ami cu dos di mi ruman muhernan​—nos tabata e prome tresnan di dies yiu​—a pasa hopi ora felis na e cas di misionero caminda Daphne cu Rose tabata biba. Na ocasionnan asina nos tabata scucha e experencianan di sirbishi di veld cu nan a conta. E misioneronan aki tabata briya di goso segun cu nan a traha incansablemente na fabor di e bienestar spiritual di otro hende. Nan ehempel a lanta den mi e deseo di bira misionero.

Pero kico a yuda mi keda enfoca riba e meta di sirbishi di tempo completo meimei di famia y compañeronan di scol cu tabata enfoca riba carera? Tabatin asina tanto oportunidad atractivo; lo mi por a dedica mi mes na studia lei, muzik, medicina of cualkier otro cos. E excelente ehempel di mi mayornan a duna mi e guia necesario. Nan a aplica e berdad den nan bida, a studia Bijbel diligentemente y a dedica nan mes na yuda otro hende siña tocante Jehova. * Es mas, regularmente nan tabata invita sirbidornan di tempo completo na nos cas. E goso y satisfaccion cu e rumannan aki a desplega a fortalece mi deseo pa laga e trabou di haci discipel forma mi bida.

Mi a batisa na edad di 15 aña. Anto asina cu mi a caba scol secundario, mi a cuminsa traha pionero di tempo completo. Philomena, un trahado na hospital, tabata e prome persona cu mi a yuda progresa te na dedicacion y bautismo. E goso di mir’e siña stima Jehova a reforsa mi deseo di sigui den e sirbishi di tempo completo. Poco despues, mi a haya e oferta di un mihor trabou den servicio di gobierno caminda mi tabata traha como secretaria. Mi a nenga e oferta y a scohe en bes di esei pa sigui traha pionero.

Mi tabata biba na cas ainda, y misioneronan a sigui bishita nos. Mi tabata gusta scucha nan experencianan! Tur esaki a reforsa mi deseo di ta un misionero, a pesar cu e posibilidad di logra esei a parce masha chikito. E tempo ei nan tabata manda misionero na Guyana y te ainda nan ta hacie. Un dia na aña 1969, mi a keda sorprendi pero felis di haya e invitacion pa asisti na e Scol Biblico di Galaad di Watchtower na Brooklyn, New York.

 Un Asignacion Cu Mi No A Spera

Tabatin 54 studiante for di 21 pais den e di 48 klas di Galaad. Nos tabata 17 ruman muher soltero. Aunke esei tabata 37 aña pasa, ainda mi ta corda e cinco lunanan ei cla cla. Tabatin masha hopi cos di siña, anto no solamente berdadnan biblico sino tambe sugerencianan practico y conseho pa e bida como futuro misionero. Por ehempel, mi a siña pa sigui instruccion, pa ser balansa den sigui loke ta na moda y pa persevera a pesar di circunstancianan desfaborabel.

Mi mayornan semper a enfatisa e importancia di asisti cu regularidad na reunion. Ken cu tabata mucho malo pa asisti na reunion riba diadomingo no por a bira bon diripiente pa e asisti na un recital di piano of un concierto e siguiente anochi. Sinembargo, durante un periodo na Scol di Galaad, mi asistencia na reunion a bai atras. Un diabierna anochi, mi a purba hustifica mi ausencia na Don cu Dolores Adams, un pareha di Betel cu tabata hiba mi reunion. Ai, mucho hopi huiswerk, hopi raport! Con mi ta logra bai Scol di Ministerio Teocratico y Reunion di Sirbishi? Despues di a rasona cu mi pa un rato, Ruman Adams di: “Laga bo consenshi guia bo.” Mi a tuma su conseho y no a falta reunion e anochi ei ni ningun otro anochi despues di esei. Atrabes di añanan, mi no a permiti nada stroba mi di asisti na reunionnan cristian, cu excepcion di circunstancianan extremo.

Mas o menos na mitar di e scol, e studiantenan a cuminsa specula ki asignacion nos lo haya. Den mi mente, ami semper a pensa cu nan lo a manda mi Guyana, caminda tabatin mester di hopi yudansa den e trabou di predica. Imagina bo e sorpresa cu mi a haya ora mi a tende cu lo mi no bai bek einan. Na luga di esei, mi a haya e asignacion pa bai Sierra Leone, West Africa. Esta gradicido mi tabata na Jehova cu porfin mi deseo pa ta un misionero leu for di cas a cumpli!

Masha Hopi Cos di Siña

“Pintoresco” ta e palabra cu mihor ta expresa mi prome impresion di Sierra Leone, cu su tantisimo sero- y seritonan, bahia- y beachnan. Sinembargo, e berdadero beyesa di e pais west Africano aki ta su habitantenan, kende nan amor y bondad ta laga asta hende stranhero sinti nan mes na cas. Esaki ta un gran yudansa pa misioneronan nobo por supera nan heimwee. E hendenan di Sierra Leone gusta papia tocante nan custumbernan y cultura y specialmente nan gusta yuda hende nobo siña papia Krio, e lingua franca di e pais.

E hendenan cu ta papia Krio tin hopi dicho bibo. Por ehempel, macaco ta traha anto babun ta come, ta nifica cu no ta tur biaha ta esun cu sembra ta cosecha. Ki un bon descripcion di e inhusticia cu ta reina den mundo!​—Isaias 65:22.

E trabou di predica y haci discipel tabata un placer. Masha poco biaha bo tabata haya un hende cu no tabata interesa den Bijbel. Atrabes di añanan, e misioneronan y sirbidornan di Jehova di hopi tempo a yuda tanto hende jong como hende grandi di tur nivel di bida y tribu acepta e berdad.

 Erla St. Hill, mi prome compañera misionero, tabata un trahado incansabel. E diligencia cu e tabatin den atende su debernan na e cas di misionero tabata casi mes grandi cu su entusiasmo den e ministerio. El a yuda mi compronde e importancia di hopi cos. Por ehempel, e importancia di siña conoce e bisiñanan, bishita Testigonan y hende interesa cu ta malo y asisti na entiero ora ta posibel. Tambe el a inculca den mi e importancia di nunca bai for di un teritorio despues di sirbishi di veld sin pasa, maske ta djis un rato, pa cuminda e rumannan cu ta biba den e area. Haciendo e cosnan aki, mi a haya den corto tempo hopi mama, ruman homber, ruman muher y amiga, y mi asignacion a bira mi hogar.​—Marco 10:29, 30.

Mi a forma tambe lasonan fuerte di amistad cu e misioneronan excelente cu a sirbi hunto cu mi. Entre nan tabatin mi compañera di cuarto Adna Byrd, cu a sirbi na Sierra Leone di 1978 pa 1981, y Cheryl Ferguson, kende ta mi compañera di cuarto pa e ultimo 24 añanan.

Guera Civil Ta Trece Prueba

Na 1997, mas o menos un luna despues di e dedicacion di e facilidadnan nobo di sucursal na Sierra Leone, guera a obliga nos evacua for di e pais, manera mi a conta na principio. Seis aña prome cu esei, nos a keda impresiona cu e fe di e Testigonan di Liberia cu a hui bin Sierra Leone pa scapa di guera na Liberia. Algun di nan a yega sin nada. A pesar di e situacion dificil, nan tabata sali den sirbishi tur dia. Tabata masha conmovedor pa mira nan amor pa Jehova y pa hende.

Awor cu nos mes tabata refugiado den e pais di Guinea, nos a sigui e ehempel di e rumannan di Liberia y a sigui confia den Jehova y pone interesnan di Reino na prome luga. Un aña despues, nos por a regresa Sierra Leone, pero denter di shete luna, bringamento a cuminsa atrobe y nos tabatin cu bolbe evacua bai Guinea.

Poco despues nos a tende cu miembronan di un di e gruponan den e guera a bai biba den nos cas di misionero na Kissy y cu nan a plunder of destrui tur nos pertenencianan. En bes di sinti nos desanima, nos tabata simplemente gradicido cu nos ta na bida. Nos a keda cu masha tiki pertenencia, pero nos a logra trata cu e situacion.

 Despues di nos segundo evacuacion, ami cu mi compañera di cuarto Cheryl, a keda Guinea. Esaki a nifica cu nos mester a siña Frances. Mesora algun di e otro misioneronan a cuminsa uza e Frances cu nan a siña, y nan no tabata worry masha cu e foutnan cu nan tabata haci. Pero ami no a gusta e idea ni un tiki di papia un idioma malo, pues mi tabata papia Frances solamente ora cu tabata absolutamente necesario. Tur esei tabata hopi doloroso. Mi mester a recorda mi mes tur dia pakico mi tabata na Guinea, esta, pa yuda otro hende conoce Jehova.

Pocopoco mi a haci progreso dor di studia, dor di scucha hende cu tabata papia e idioma bon y dor di busca yudansa di e muchanan den congregacion, ya cu nan ta bisa bo e cosnan stret. Anto inesperadamente, un yudansa oportuno a bin for di e organisacion di Jehova. For di september 2001, Nos Ministerio di Reino ta duna sugerencia pa presenta e revistanan, banda di e ideanan con pa ofrece buki y foyeto na hende di varios creencia religioso. Awor mi tin mas confiansa ora mi ta participa den sirbishi, asta si mi no por expresa mi mes bon manera mi ta hacie na mi lenga materno.

E echo cu mi a lanta den un famia grandi siguramente a yuda mi ahusta na biba cu hopi hende, cu pa un tempo a ensera biba cu 17 misionero den un cas. Durante mi 37 añanan di sirbishi como misionero, mi a biba cu mas di 100 misionero den cas. Ki un gran privilegio di por a siña conoce asina tanto hende, cada un cu un otro personalidad y toch trahando hunto pa alcansa e mesun meta! Anto ta ki un goso di por colabora cu Dios y participa den yuda hende acepta e berdad di Bijbel!​—1 Corintionan 3:9.

Atrabes di añanan, mi a perde hopi evento grandi den bida di mi propio miembronan di famia, manera casamento di mayoria di mi rumannan mas chikito. Ademas, mi no a mira mi subrino- y subrinanan mes tanto cu mi tabatin gana di mira nan. Tabata un sacrificio pa mi y pa mi famia, kende amorosamente a anima mi pa keda den e trabou di misionero.

Sinembargo, loke mi a perde na cas, mi a haya den mi sirbishi di misionero. A pesar cu mi a scohe pa keda soltera, mi tin hopi yiu spiritual, no solamente esnan cu mi a studia cu ne sino tambe esnan cu mi a sera amistad intimo cu ne. Es mas, mi a mira nan yiunan crece, casa y lanta nan propio yiunan den e caminda di e berdad. Algun di nan tambe, mescos cu mi, a laga e trabou di haci discipel forma nan bida.

[Nota]

[Mapa na pagina 15]

(Pa e texto den su formato completo , wak e publicacion)

Mi a ser asigna na Sierra Leone, West Africa

GUINEA

SIERRA LEONE

[Plachi na pagina 13]

Mi dos ruman muhernan, kendenan hunto cu mi a pasa hopi ora felis cerca e misioneronan den decada di 1950

[Plachi na pagina 14]

Ami cu e otro studiantenan di e di 48 klas di Galaad

[Plachi na pagina 16]

Dedicacion di e sucursal na Sierra Leone