En Busca di Contesta Corecto

Con mi por proteha mi salud?

Kico mi por haci pa mi bida di famia ta mas felis?

Kico por yuda mi keda cu mi trabou?

BO A yega di puntra bo mes un di e preguntanan ei? Bo a haya contesta cu ta realmente practico? Tur aña, ta sali alrededor di 2.000 buki nobo cu ta ofrece conseho riba e topiconan aki y otro topiconan importante. Na Gran Bretania so, lectornan ta gasta 80 miyon libra esterlina (mas o menos 150 miyon dollar Mericano) pa aña na buki cu ta ofrece conseho tocante con pa trata cu e problemanan di bida. Na Merca, benta di bukinan pa yuda bo mes ta produci alrededor di 600 miyon dollar pa aña. Pues definitivamente bo no ta e unico persona cu ta en busca di bon conseho pa trata cu bida di tur dia.

Un autor a bisa tocante conseho cu bo ta haya den e avalancha di publicacionnan aki: “Hopi buki nobo simplemente ta ripiti loke a yega di ser skirbi caba.” Esaki ta berdad, gran parti di e conseho cu nos ta haya den e bukinan aki simplemente ta un ripiticion di e sabiduria cu tin para skirbi den un di e bukinan di mas bieu na mundo. E buki aki sin duda ta e publicacion mas ampliamente distribui na mundo. El a ser traduci completo of en parte na alrededor di 2.400 idioma y en total a imprimi mas cu 4,6 mil miyon ehemplar di dje. Esaki no ta ningun otro buki sino Bijbel.

Bijbel ta declara bon cla: “Tur Scritura ta inspira pa Dios y ta util pa siñansa, pa reprendemento, pa coreccion, pa educa den husticia.” (2 Timoteo 3:16) Ta berdad cu Bijbel no a ser skirbi como un manual pa yuda bo mes. Su proposito principal ta pa revela kico ta e boluntad di Dios pa humanidad. Pero asina mes, Bijbel ta contene hopi informacion cu ta mustra con pa trata cu e problemanan cu nos tur ta confronta, y e ta priminti cu esnan cu sigui su guia lo siña saca beneficio. (Isaias 48:17, 18) Ora hende aplica su conseho practico, semper e ta resulta efectivo, sin importa un persona su antecedente etnico, su cultura of educacion. Pakico no considera e siguiente articulo y dicidi pa bo mes si loke Bijbel ta bisa di topiconan manera salud, famia y empleo ta practico?