Ofrece Sacrificio Cu Ta Agrada Dios

“BIDA a bini di morto; esei ta loke e Aztecanan cu tabata practica sacrificio humano na gran escala den e parti zuid di Norte America tabata kere”, segun e buki The Mighty Aztecs (E Aztecanan Poderoso). E ta bisa mas aleu: “Segun cu e imperio tabata crece, e unico cos cu por a edifica confiansa den dje tabata sanger y mas sanger.” Un enciclopedia ta mustra cu pa aña e Aztecanan tabata efectua un 20.000 sacrificio humano.

Pa motibo di miedo y insiguridad of motiva pa sintimento di culpa y remordimento, atrabes di historia hende a ofrece un of otro sacrificio na nan diosnan. Di otro banda, Bijbel ta mustra cu Jehova mes, e Dios todopoderoso, a institui cierto sacrificio. P’esei, ta bon pa puntra: Ki tipo di sacrificio ta agrada Dios? Y ofrenda y sacrificio mester ta parti di e adoracion cu nos ta rindi na dje awe?

Ofrenda y Sacrificio den Adoracion Berdadero

Ora e nacion di Israel a ser forma, Jehova a duna e Israelitanan instruccion specifico encuanto e manera cu e tabata kier pa nan ador’e, y esaki a inclui ofrenda y sacrificio. (Numbernan, capitulo 28 y 29) Algun di e ofrendanan a consisti di loke tera a produci; otronan a ensera sacrificio di animal manera toro, carne, cabrito, porco y paloma. (Levitico 1:3, 5, 10, 14; 23:10-18; Numbernan 15:1-7; 28:7) Tabatin ofrenda kima cu mester a caba na nada den candela. (Exodo 29:38-42) Tambe tabatin ofrenda di pas of sacrificio di comunion, den cua e personanan cu a ofrece esakinan tabata participa dor di come for di loke nan a sacrifica na Dios.​—Levitico 19:5-8.

Tur e ofrenda- y sacrificionan cu e pueblo tabata presenta na Dios bou di e Lei di Moises a representa un forma pa adora Dios y reconoc’e como e Soberano di universo. Pa medio di e sacrificionan ei, e Israelitanan a expresa nan gratitud na Jehova pa su bendicion y proteccion y tambe a ricibi pordon di nan picanan. Tanten cu nan a cumpli fielmente cu e rekisitonan di Dios pa adoracion, Jehova a bendiciona nan ricamente.​—Proverbionan 3:9, 10.

E cos di mas importante pa Jehova tabata e actitud di e personanan cu a ofrece sacrificio. Mediante su profeta Oseas, Jehova a  bisa: “Mi tin delicia den lealtad mas cu den sacrificio, y den e conocemento di Dios, mas cu den ofrendanan kima.” (Oseas 6:6) Pues, ora hende a desvia for di e adoracion berdadero y a bai practica libertinahe y drama sanger inocente, e sacrificionan cu nan tabata presenta riba e altar di Jehova no tabatin balor. Pa e motibo ei, pa medio di Isaias, Jehova a bisa e nacion di Israel: “Di kico e multitud di boso sacrificionan ta sirbi mi? . . . Mi ta harta di boso ofrendanan kima di chubato y di e vet di bestianan gorda. Mi no ta hiba gusto den e sanger di bishe macho, lamchi of cabrito.”​—Isaias 1:11.

“Loke Mi No A Ordena”

Na contraste skerpi cu e Israelitanan, e habitantenan di Canaan tabata ofrece nan yiunan como sacrificio na nan diosnan, incluso na e dios Amonita yama Molek, conoci tambe como Milcom of Molok. (1 Reinan 11:5, 7, 33; Echonan 7:43) Halley’s Bible Handbook ta bisa: “E Cananeonan tabata rindi adoracion dor di practica inmoralidad sexual como un rito religioso, den presencia di nan diosnan: y despues, dor di mata nan prome yiu como un sacrificio na e mesun diosnan aki.”

E practicanan ei a agrada Jehova Dios? Claro cu no. Ora e Israelitanan tabata cla pa drenta e tera di Canaan, Jehova a duna nan e mandamento registra na Levitico 20:2 y 3: “Bo mester bisa e yiunan di Israel: ‘Cualkier homber for di e yiunan di Israel of for di e stranheronan cu ta keda biba pa un tempo na Israel cu duna un di su yiunan na Molok, mester wordo mata sigur; e pueblo di e tera mester piedr’e cu piedra. Tambe lo mi pone mi cara contra e homber ei y lo cort’e kit’e for di meimei di su pueblo, pasobra el a duna algun di su yiunan na Molok, pa contamina mi santuario y pa profana mi nomber santo.’”

Pa increibel cu por parce, algun Israelita cu a desvia for di adoracion berdadero a adopta e custumber demoniaco aki di sacrifica nan yiunan na dios falso. Relaciona cu esaki, Salmo 106:35-38 ta bisa: “Nan a mescla cu e nacionnan y a siña nan practicanan, y a sirbi nan idolonan, cuanan a bira un trampa pa nan. Asta nan tabata sacrifica nan yiu hombernan y nan yiu muhernan na demoñonan, y tabata drama sanger inocente, e sanger di nan yiu hombernan y nan yiu muhernan, cu nan tabata sacrifica na e idolonan di Canaan; y e tera a keda contamina cu sanger.”

Jehova a expresa su repudio contra e practica aki. Relaciona cu e yiunan di Juda, el a bisa mediante su profeta Jeremias: “Nan a pone nan cosnan repugnante den e cas cu ta wordo yama na mi nomber, pa  contamin’e. Y nan a lanta e luganan halto di Tofet, cu ta keda den Vaye di Ben-hinom, pa kima nan yiu hombernan y nan yiu muhernan den candela, loke mi no a ordena, ni a bin den mi pensamento.”​—Jeremias 7:30, 31.

Pa motibo cu e nacion di Israel a practica e cosnan repugnante ei, el a perde e aprobacion di Dios. Cu tempo su stad capital, Jerusalem, a ser destrui y e hendenan a ser hiba cautivo na Babilonia. (Jeremias 7:32-34) Ta bon cla anto cu e practica di ofrece ser humano den sacrificio no ta bini di e Dios berdadero ni no ta parti di adoracion puro. Tur forma di sacrificio humano ta bini di demoño, y berdadero adoradonan di Dios ta keda leu for di tur loke ta conecta cu e practica ei.

E Sacrificio di Rescate di Cristo Hesus

Sinembargo, un hende por puntra: ‘Dicon e Lei cu Jehova a duna e Israelitanan a inclui sacrificio di animal anto?’ Apostel Pablo a considera net e pregunta aki y a duna e siguiente contesta: “Ta pakico tin Lei anto? El a wordo añadi pa motibo di transgresionnan . . . te ora cu e simiña lo a bin, na kende e promesa a wordo haci . . . P’esei Lei a bira nos tutor pa guia nos na Cristo.” (Galationan 3:19-24) E sacrificionan di animal bou di e Lei di Moises a prefigura e sacrificio mas grandi cu Jehova Dios lo a percura na fabor di humanidad, esun di su Yiu Hesucristo. Hesus a referi na e acto amoroso aki ora el a bisa: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.”​—Juan 3:16.

Pa motibo di Hesus su amor pa Dios y pa humanidad, el a entrega su bida humano perfecto voluntariamente como un rescate pa e descendientenan di Adam. (Romanonan 5:12, 15) Hesus a bisa: “E Yiu di Hende no a bin pa wordo sirbi, ma pa sirbi, y pa duna su bida como prijs di rescate pa hopi.” (Mateo 20:28) Ni un otro persona riba Tera lo por rescata hende for di e gara di pica y morto, den cua Adam a hinca nan. (Salmo 49:7, 8) P’esei, Pablo a splica cu Hesus a drenta “no pa medio di e sanger di cabrito y bishe, ma pa medio di su mes sanger . . . den e luga santo un biaha pa semper, siendo cu el a obtene redencion eterno” pa nos. (Hebreonan 9:12) Ora Dios a acepta e sanger sacrifica di Hesus, el a “cansela e certificado . . . contra nos.” Cu otro palabra, Jehova a pone un banda e pacto di Lei, hunto cu su rekisitonan di ofrenda y sacrificio, y a remplas’e cu ‘e don di bida eterno.’​—Colosensenan 2:14; Romanonan 6:23.

Sacrificio y Ofrenda Spiritual

Ya cu sacrificio y ofrenda di animal no ta un rekisito mas den adoracion berdadero, esei ta nifica cu hende no tin nodo di haci ningun sacrificio mas awe? Toch si. Hesucristo a hiba un bida di sacrificio den su sirbishi na Dios y finalmente a ofrece su bida na fabor di humanidad. P’esei el a declara: “Si un hende kier bin mi tras, lag’e nenga su mes, y hisa su [“staca di tormento”, NW], y sigui mi.” (Mateo 16:24) Esaki ta nifica cu ken cu kier bira un siguido di Hesus mester haci cierto sacrificio. Ki sacrificio asina?

Un di e sacrificionan aki ta cu un berdadero siguido di Cristo no ta biba mas pa su mes  sino pa haci e boluntad di Dios. E ta somete su boluntad y deseonan personal na esnan di Dios. Ripara con apostel Pablo a expresa esei: “Mi ta roga boso, rumannan, pa medio di e misericordianan di Dios, pa presenta boso curpanan como sacrificionan bibo y santo, aceptabel pa Dios, locual ta boso sirbishi spiritual di adoracion. Y no sea conforme e mundo aki, ma sea transforma pa medio di e renovamento di boso mente, pa boso por comproba kico ta e bon y agradabel y perfecto boluntad di Dios.”​—Romanonan 12:1, 2.

Ademas, Bijbel ta indica cu nos por mira nos expresionnan di alabansa como un sacrificio na Jehova. Profeta Oseas a uza e frase “e toronan hoben di nos lipnan” pa mustra cu Dios ta considera e alabansa di nos lipnan como un di e sacrificionan di mas excelente. (Oseas 14:2, NW) Apostel Pablo a urgi e cristiannan Hebreo: “Ofrece continuamente un sacrificio di alabansa na Dios, esta, e fruta di lipnan cu ta duna gradicimento na su nomber.” (Hebreonan 13:15) Awe, Testigonan di Jehova ta hopi activo den e trabou di predica e bon nobo y haci hende di tur nacion discipel di Hesus. (Mateo 24:14; 28:19, 20) Rond mundo nan ta ofrece sacrificio di alabansa na Dios di dia y anochi.​—Revelacion 7:15.

Banda di e trabou di predicacion, un otro sacrificio cu ta agrada Dios ta consisti di haci bon na otro hende. Pablo a spierta cristiannan: “No laga di haci bon y di comparti cu otro; pasobra sorto di sacrificionan asina ta agrada Dios.” (Hebreonan 13:16) De echo, pa sacrificio di alabansa por agrada Dios, esnan cu ta ofrece nan mester tin un bon conducta. Pablo a exhorta: “Comporta boso na un manera digno di e evangelio di Cristo.”​—Filipensenan 1:27; Isaias 52:11.

Mescos cu den pasado, tur sacrificio cu hende ta haci na fabor di adoracion berdadero lo resulta den gran goso y bendicion for di Jehova. P’esei, laga nos haci nos best pa ofrece sacrificio cu di berdad ta agrada Dios!

[Plachi na pagina 18]

“Nan tabata sacrifica nan yiu hombernan y nan yiu muhernan ... na e idolonan di Canaan”

[Plachi na pagina 20]

Dor di predica e bon nobo y yuda hende den otro maneranan, cristiannan berdadero ta ofrece sacrificio cu ta agrada Dios