Pregunta di Lector

Con nos tin cu compronde Pablo su palabranan ora el a bisa cu un viuda mester ta “esposa di un homber so” pa e por bini na remarca pa haya yudansa for di e congregacion cristian?​—1 Timoteo 5:9.

Siendo cu apostel Pablo tabata papiando di un viuda, e expresion “esposa di un homber so” obviamente mester ta referiendo na su situacion prome cu el a bira viuda. Acaso esaki ta nifica cu e viuda mester tabata casa un biaha so? Of e palabranan di Pablo lo por kiermen algo diferente? *

Tin hende ta supone cu Pablo tabata papiando di viudanan cu a yega di casa un biaha so. Ta berdad cu hopi cultura y comunidad ta mira un viuda cu no a bolbe casa como un persona hopi recto. Sinembargo, e punto di bista ei no ta cuadra cu loke Pablo a skirbi den otro carta. Por ehempel, el a splica e cristiannan Corintio cu aunke e mes a haya cu un viuda lo ta mas felis si e keda soltero, “e ta liber pa casa cu ken cu e ta desea, basta ta den Señor.” (1 Corintionan 7:39, 40; Romanonan 7:2, 3) Ademas, Pablo a bisa den su carta na Timoteo: “Mi kier pa e viudanan mas hoben casa.” (1 Timoteo 5:14) Pues, no tabata algo bergonsoso pa un viuda cu a desea esei bolbe casa.

Con anto nos tin cu compronde loke Pablo a skirbi Timoteo? E expresion “esposa di un homber so” ta aparece solamente den e versiculo aki. Den e idioma original, e ta nifica literalmente “muher di un homber so.” Ta interesante pa nota cu e expresion aki ta mescos cu esun cu Pablo a uza varios biaha den su cartanan, esta, “esposo di un esposa so”, of “esposo di un esposa”, den e idioma original. (1 Timoteo 3:2, 12; Tito 1:6) Pablo a uza e ultimo expresion aki ora el a menciona e cualificacionnan pa superintendente cristian y sirbidor ministerial. Den e contexto ei, e declaracion ta nifica basicamente cu pa un homber cualifica pa responsabilidad den e congregacion cristian, si e ta casa, e mester ta fiel y leal na su esposa, y e mester ta moralmente ireprochabel. * P’esei, aparentemente e expresion na 1 Timoteo 5:9 lo tin e mesun nificacion: Pa un viuda a bin na remarca pa haya yudansa for di e congregacion, e mester tabata un esposa dedica y leal cu tabata fiel na su esposo tempo esaki tabata na bida. Tambe e mester tabata moralmente ireprochabel. Tur e rekisitonan adicional cu Pablo a menciona ta señala exactamente na un persona asina.​—1 Timoteo 5:10.

[Nota]