Somete Bo Humildemente na Wardadonan Amoroso

“Sea obediente na esnan cu ta hiba delantera den boso y sea sumiso.”​—HEBREONAN 13:17, NW.

1, 2. Cua textonan ta mustra cu Jehova y Hesus ta Wardadornan amoroso?

JEHOVA DIOS y su Yiu, Hesucristo, ta Wardadornan amoroso. Isaias a profetisa: “Mira, Señor DIOS ta bin cu poder, y su brasa lo goberna p’e ... Manera un wardado di carne e lo cuida [“pastorea”, NW] su tou, e lo cohe e lamchinan den su brasa, y tene nan cerca di su curason; cu ternura e lo guia esnan cu tin yiu chikito.”​—Isaias 40:10, 11.

² E profesia ei di restauracion a cumpli pa prome biaha ora un resto Hudiu a regresa Juda na aña 537 prome cu nos era. (2 Cronicanan 36:22, 23) El a bolbe cumpli ora e Ciro Mayor, Hesucristo, a libra e resto ungi for di ‘Babilonia e Grandi’ na 1919. (Revelacion 18:2; Isaias 44:28) E ta e “brasa” di Jehova pa goberna, reuni e carnenan hunto y pastorea nan cu ternura. Hesus mes a declara: “Ami ta e bon wardado; y mi conoce esnan cu ta di mi, y esnan cu ta di mi, conoce mi.”​—Juan 10:14.

3. Con Jehova a mustra interes amoroso den e trato cu su carnenan ta ricibi?

³ E profesia di Isaias 40:10 y 11 ta enfatisa e ternura cu Jehova ta pastorea su pueblo cu ne. (Salmo 23:1-6) Durante Hesus su ministerio riba Tera, e tambe a demostra un interes tierno den su discipelnan y den hende en general. (Mateo 11:28-30; Marco 6:34) Tanto Jehova como Hesus a condena e manera sin heful cu e wardadonan, of lidernan, di Israel a trata e pueblo. Sin ningun berguensa nan a neglisha y manipula nan tounan. (Ezekiel 34:2-10; Mateo 23:3, 4, 15) Jehova a priminti: “Ami lo libra mi tou y nan lo no ta prooi mas; anto lo mi husga entre esun carne y e otro. E ora ei lo mi pone un wardado riba nan, mi sirbidor David, y e lo alimenta nan; e mes lo alimenta nan y lo ta nan wardado.” (Ezekiel 34:22, 23) Den e tempo di fin aki, Hesucristo, e David Mayor, ta esun “wardado” cu Jehova a nombra riba tur Su sirbidornan riba Tera, tanto e cristiannan ungi cu spirito como e “otro carnenan.”​—Juan 10:16.

 Donnan di Dios na e Congregacion

4, 5. (a) Ki don precioso Jehova a duna su pueblo riba Tera? (b) Ki don Hesus a duna su congregacion?

⁴ Dor di pone “un wardado”​—Hesucristo​—riba Su sirbidornan aki riba Tera, Jehova a duna e congregacion cristian un don of regalo precioso. E profesia di Isaias 55:4 a papia di e don aki den forma di un Lider celestial: “Mira, mi a hacie un testigo pa e pueblonan, un lider y comandante pa e pueblonan.” Tanto cristiannan ungi como miembronan di e “multitud grandi” ta ser recohi for di tur grupo nacional, tribu, pueblo y lenga. (Revelacion 5:9, 10; 7:9) Nan ta forma un congregacion internacional, “un tou”, bou di e liderato di “un wardado”, Cristo Hesus.

⁵ Hesus, na su turno, a duna un don precioso na su congregacion riba Tera. El a percura pa subwardadonan fiel cu, imitando e ehempel di Jehova y Hesus, ta pastorea e tou cu ternura. Apostel Pablo a papia di e don amoroso aki den su carta dirigi na e cristiannan na Efeso. El a skirbi: “‘Ora cu el a subi bai den haltura, el a hiba un ehersito di catibonan como catibo, y el a duna donnan [den] hende.’ . . . El a duna algun como apostel, y algun como profeta, y algun como evangelista, y algun como pastor [of wardado] y siñado, pa ekipa [“reahusta”, NW] e santonan pa e trabou di sirbishi, pa edifica e curpa di Cristo.”​—Efesionan 4:8, 11, 12.

6. Con Revelacion 1:16 y 20 ta describi e superintendentenan ungi cu a sirbi den cuerponan di anciano, y kico nos por bisa di ancianonan nombra cu ta di e otro carnenan?

⁶ E “donnan den hende” aki ta superintendente, of anciano, cu Jehova y su Yiu ta nombra pa medio di spirito santo, pa pastorea e tou cu ternura. (Echonan 20:28, 29) Den cuminsamento, tur e superintendentenan aki tabata hombernan cristian ungi. Revelacion 1:16 y 20 ta uza “streya” of ‘angel’ den Cristo su man drechi, esta bou di su control, pa simbolisa esnan cu tabata sirbi den cuerpo di anciano den e congregacion ungi. Sinembargo, den e tempo di fin aki, ya cu e cantidad di superintendente ungi riba Tera ta menguando keto bai, e mayoria inmenso di anciano cristian den e congregacionnan ta di e otro carnenan. En bista di cu ta representantenan di e Cuerpo Gobernante ta nombra e rumannan aki bou di guia di spirito santo, nos por bisa cu nan tambe ta den e man drechi (of, bou di guia) di e Gran Wardador, Hesucristo. (Isaias 61:5, 6) Siendo cu e ancianonan den nos congregacionnan ta somete nan na Cristo, Cabes di e congregacion, nan ta merece nos pleno cooperacion.​—Colosensenan 1:18.

Obediencia y Sumision

7. Ki conseho apostel Pablo a duna relaciona cu nos actitud pa cu superintendentenan cristian?

⁷ Nos Wardadornan celestial, Jehova Dios  y Hesucristo, ta spera cu nos ta obediente y sumiso na e subwardadonan cu nan a pone den posicionnan di responsabilidad den e congregacion. (1 Pedro 5:5) Apostel Pablo a skirbi bou di inspiracion: “Corda esnan cu ta hibando delantera entre boso, cu a papia e palabra di Dios cu boso, y segun boso ta contempla e resultado di nan conducta, imita nan fe. Sea obediente na esnan cu ta hiba delantera den boso y sea sumiso, pasobra nan ta vigila riba boso alma como esnan cu lo duna cuenta, pa nan haci esaki cu goso y no cu suspiro, pasobra esei lo ta perhudicial pa boso.”​—Hebreonan 13:7, 17, NW.

8. Kico Pablo ta invita nos pa “contempla”, y con nos mester ta “obediente”?

⁸ Tuma nota cu Pablo ta invita nos pa “contempla”, of considera cuidadosamente, e resultado di e conducta fiel di e ancianonan y pa sigui e ehempelnan di fe ei. Ademas, e ta conseha nos pa ta obediente y pa somete nos na e guia di e hombernan nombra aki. E erudito di Bijbel R. T. France ta splica cu den e idioma Griego original, e palabra traduci aki como “sea obediente” no ta “e termino usual pa obediencia, sino literalmente pa ‘ser persuadi’, locual ta ensera acepta nan guia di buena gana.” Pues, nos ta obedece e ancianonan no solamente pasobra e Palabra di Dios ta manda nos haci esei sino tambe pasobra nos ta combenci cu nan tin e interesnan di Reino y nos mihor interesnan na pecho. Si nos acepta nan guia di buena gana, sigur nos lo ta felis.

9. Ademas di ta obediente, pakico nos mester ta “sumiso”?

⁹ Pero kico nos mester haci si den un cierto caso nos no ta combenci cu e guia di e ancianonan ta e mihor manera di haci cosnan? Ei ta caminda nos sumision ta drenta den wega. Ta facil pa obedece ora tur cos ta bisto y nos ta di acuerdo, pero nos lo demostra cu nos ta berdaderamente sumiso si nos cede asta ora nos mes no ta compronde e motibo di cierto instruccion. Pedro, kende despues a bira apostel, a demostra e clase di sumision aki.​—Lucas 5:4, 5.

Cuater Motibo pa Coopera di Buena Gana

10, 11. Den ki manera superintendentenan “a papia e palabra di Dios” cu nan rumannan cristian den e prome siglo y awe?

¹⁰ Na Hebreonan 13:7 y 17, cita ariba, apostel Pablo ta duna cuater motibo pakico nos mester ta obediente y sumiso na superintendentenan cristian. E prome ta cu nan “a papia e palabra di Dios” cu nos. Corda cu e “donnan den hende” cu Hesus ta duna e congregacion ta pa “reahusta e santonan.” (Efesionan 4:11, 12) El a reahusta e manera di pensa y conducta di e cristiannan di prome siglo pa medio di subwardadonan fiel, di cua algun bou di inspiracion a skirbi cartanan na e congregacionnan. El a uza tal superintendentenan nombra pa medio di spirito santo pa guia y fortalece e prome cristiannan.​—1 Corintionan 16:15-18; 2 Timoteo 2:2; Tito 1:5.

¹¹ Awe, Hesus ta dirigi nos pa medio di “e esclabo fiel y prudente”, representa pa su Cuerpo Gobernante y e ancianonan nombra. (Mateo 24:45) Debi na nos respet pa “e wardado principal”, Hesucristo, nos ta sigui e conseho di Pablo: “Aprecia esnan cu ta traha diligentemente meimei di boso, y cu ta guia boso den Señor y ta spierta boso.”​—1 Pedro 5:4; 1 Tesalonicensenan 5:12; 1 Timoteo 5:17.

12. Con superintendentenan ta “vigila riba [nos] alma”?

¹² Un di dos motibo pakico nos mester coopera cu superintendentenan cristian ta cu “nan ta vigila riba [nos] alma.” Si nan detecta cualkier cos den nos actitud of comportacion cu por pone nos relacion cu Dios na peliger, nan ta cla pa duna nos e conseho necesario cu e meta pa reahusta nos. (Galationan 6:1) E palabra Griego traduci como “vigila” ta nifica  literalmente “keda sin drumi.” Segun un erudito di Bijbel, e ta “ensera e vigilancia constante di e wardado.” Fuera di cu ancianonan ta mantene nan vigilancia spiritual, nan por asta perde soño pa motibo cu nan ta precupa cu nos bienestar spiritual. Nos mester coopera di buena gana cu e subwardadonan amoroso ei, kendenan ta haci nan best pa imita e manera amoroso cu Hesucristo, “e gran Wardador di e carnenan”, ta cuida e tou, no ta berdad?​—Hebreonan 13:20.

13. Na ken y den ki manera superintendentenan y tur cristian tin cu duna cuenta?

¹³ Un di tres motibo pakico nos mester coopera di buena gana cu e superintendentenan ta cu nan ta vigila riba nos “como esnan cu lo duna cuenta.” Superintendentenan ta corda cu nan ta subwardadonan cu ta sirbi bou di e Wardadornan celestial, Jehova Dios y Hesucristo. (Ezekiel 34:22-24) Jehova ta Doño di e carnenan, cu “el a cumpra cu e sanger di su propio Yiu”, y superintendentenan nombra mester duna cuenta na dje pa e manera cu nan ta trata Su tou. E kier pa nan trata e tou “cu ternura.” (Echonan 20:28, 29, NW) P’esei, nos tur tin cu duna cuenta na Jehova pa e manera cu nos ta reacciona riba su guia. (Romanonan 14:10-12) Nos obediencia na ancianonan nombra ta duna evidencia tambe di nos sumision na Cristo, kende ta cabes di e congregacion.​—Colosensenan 2:19.

14. Kico lo por pone superintendentenan cristian sirbi “cu suspiro”, y cu ki resultado?

¹⁴ Pablo a duna un di cuater motibo pakico nos mester somete nos humildemente na superintendentenan cristian. El a skirbi: “Pa nan haci esaki cu goso y no cu suspiro, pasobra esei lo ta perhudicial pa boso.” (Hebreonan 13:17, NW) Cu nan responsabilidadnan di peso pa instrui, pastorea, hiba delantera den e trabou di predica, cria nan famia y atende problema den e congregacion, ancianonan cristian tin un trabou pisa. (2 Corintionan 11:28, 29) Si nos keda sin coopera cu nan, ta mas dificil so nos ta haci nan trabou. Esaki lo pone nan ‘suspira.’ Ora nos no ta gusta coopera, esei ta desagrada Jehova, locual por perhudica nos. Di otro banda, ora  nos ta mustra e debido respet y cooperacion, e ancianonan por cumpli cu nan debernan cu goso, y esaki ta contribui na union y participacion gososo den e obra di predica e Reino.​—Romanonan 15:5, 6.

Demostra Nos Sumision

15. Con nos por demostra nos obediencia y sumision?

¹⁵ Tin hopi manera practico den cua nos por coopera cu superintendentenan nombra. Cu e idea di adapta nos na circunstancianan nobo den e teritorio, e ancianonan a haci areglo pa tene reunionnan pa sirbishi di veld riba dianan y na oranan cu tin biaha ta rekeri cambionan den nos rutina? Laga nos haci esfuerso pa apoya e areglonan nobo aki. Nos lo por ricibi bendicionnan sorprendente. E superintendente di sirbishi ta bishitando nos Estudio di Buki di Congregacion? Laga nos participa mas tanto posibel den e trabou di predica e siman ei. Nos a ricibi un asignacion den e Scol di Ministerio Teocratico? Nos mester haci esfuerso pa ta presente y pa cumpli cu nos asignacion. E superintendente di Estudio di Buki di Congregacion a anuncia cu nos grupo ta na beurt pa limpia e Salon di Reino? Wel, te asina leu cu nos salud y forsa ta permiti, laga nos dun’e nos pleno apoyo. Den e maneranan aki y den hopi otro manera, nos ta demostra nos sumision na e hombernan cu Jehova y su Yiu a nombra pa cuida e tou.

16. Si un anciano no ta haci cierto cosnan segun instruccion, pakico esaki no ta motibo pa nos rebela?

¹⁶ Por sosode cu un anciano no ta haci cierto cosnan segun e instruccion di e clase di e esclabo fiel y su Cuerpo Gobernante. Si e sigui actua asina, lo e tin cu duna cuenta na Jehova, “e wardado y cuidado di [nos] alma.” (1 Pedro 2:25) Pero si un anciano comete un fayo of kibocacion, esei no ta motibo pa nos keda sin obedece. Jehova no ta bendiciona desobediencia ni rebeldia.​—Numbernan 12:1, 2, 9-11.

Jehova Ta Bendiciona Cooperacion di Buena Gana

17. Kico mester ta nos actitud pa cu nos superintendentenan?

¹⁷ Jehova Dios sa cu e hombernan cu el a nombra como superintendente ta imperfecto. Asina mes e ta uzando nan, y pa medio di su spirito, e ta pastorea su pueblo riba Tera. Loke ta conta pa anciano​—y pa nos tur​—ta cu “e poder mas aya di loke ta normal [ta] di Dios y no loke ta bini di nos mes.” (2 Corintionan 4:7, NW) P’esei nos mester gradici Jehova pa loke e ta logrando pa medio di nos superintendentenan fiel, y nos mester coopera cu nan di buena gana.

18. Kico nos ta haciendo en realidad ora nos somete nos na nos superintendentenan?

¹⁸ Superintendentenan ta haci nan best pa cumpli cu e descripcion cu Jehova a duna di wardadonan nombra riba su tou den e ultimo dianan, manera Jeremias 3:15 ta trece dilanti: “Lo mi duna boso wardadonan di carne segun mi curason, kendenan lo alimenta boso cu conocemento y comprondemento.” Siguramente e ancianonan den nos seno ta haciendo un excelente trabou di siña y proteha e carnenan di Jehova. Laga nos sigui demostra nos aprecio pa nan trabou duro dor di coopera cu nan di buena gana, obedece nan y somete nos na nan. Ora nos haci esei, nos lo demostra nos aprecio pa nos Wardadornan celestial, Jehova Dios y Hesucristo.

Como Repaso

• Con Jehova y Hesucristo a demostra cu nan ta Wardadornan amoroso?

• Ademas di obedece, pakico sumision ta necesario?

• Den ki maneranan practico nos por demostra nos sumision?

[Preguntanan di Estudio]

[Plachi na pagina 27]

Ancianonan cristian ta somete nan na e liderato di Cristo

[Plachi na pagina 29]

Tin hopi manera pa demostra nos sumision na e wardadonan nombra di Jehova