Adryana Su Deseo
Adryana Su Deseo
ADRYANA, un mucha muher di seis aña na Tulsa (Oklahoma, Merca), tabatin un deseo. Su deseo tabata casi mescos cu di e salmista David, kende a canta: ‘Un cos mi a desea di Jehova, esei lo mi busca: cu mi por keda den e cas di Jehova tur e dianan di mi bida, pa contempla e bunitesa di Jehova, y pa medita den su tempel.’—Salmo 27:4.
Ora Adryana tabatin apenas seis luna di edad, docternan a constata cu e tin neuroblastoma, un tumor maligno cu ta crece den cierto parti di e sistema nervioso. E enfermedad mortal aki a lag’e paralisa na ambos pia. Docternan a trata su malesa cu un cantidad di operacion y el a haya chemotherapie pa un aña largo.
E tata di Adryana, kende no tin e mesun conviccion religioso cu Adryana y su mama, a tuma contacto cu un fundacion pa pidi nan duna un man pa su yiu muher por bishita un parke di recreo mundialmente famoso. Prome cu e fundacion a cumpli cu e deseo, nan a entrevista Adryana. El a gradici nan pa e echo cu nan lo kier a haci algo p’e, pero el a bisa nan cu lo el a prefera di bishita Betel, e centro di actividad mundial di Testigonan di Jehova na New York. Despues cu Adryana a haya sa tocante e peticion di su tata, el a pidi Jehova den oracion pa dun’e un chens di bishita Betel. Aunke e fundacion na prome instante tabata un tiki precupa cu Betel kisas lo no ta un luga interesante pa un mucha, nan a cumpli cu Adryana su deseo ora cu su tata a indica cu e no tabatin problema cu loke Adryana a scohe.
Acompaña pa su mama, su ruman muher y un amiga, Adryana a biaha bai New York pa bishita Betel pa prome bes. El a bisa: “Jehova a contesta mi. Mi tabata sa cu lo el a duna nos un bonbini na Betel. Mi a mira con nan ta traha e bukinan, e revistanan y e Bijbelnan. Esaki ta mihor cu un parke di recreo.”
Adryana a ‘contempla e bunitesa di Jehova’ y a medita cu aprecio riba e funcionamento di e centro di actividad di e pueblo di Jehova djawe. Bo tambe ta bonbini pa bishita Betel. Fuera di e sede mundial di Testigonan di Jehova na New York, tin sucursal na varios parti di mundo.