Bo Ta Corda?

Bo a disfruta di e edicionnan recien di E Toren di Vigilancia? Wel, wak si bo por contesta e siguiente preguntanan:

• Kico nos por siña for di Hesus su ilustracion di e anfitrion persistente? (Lucas 11:5-10)

E ilustracion aki ta mustra cu ki actitud nos lo mester haci oracion. Nos tin cu pidi cu persistencia, es decir, sigui pidi, specialmente pa haya e spirito santo di Dios. (Lucas 11:11-13)​—15/12, pagina 20-2.

• Ki les nos ta saca for di Hesus su ilustracion di un viuda y un hues? (Lucas 18:1-8)

E ilustracion ta enfatisa cu nos mester haci oracion. Distinto for di e hues, Jehova ta husto y kier yuda nos. Ademas, nos mester tin fe manera di e viuda den e ilustracion.​—15/12, pagina 26-8.

• Pakico apostel Pablo a bisa e cristiannan di Corinto pa ‘habri nan curason hancho’? (2 Corintionan 6:11-13)

Parce cu algun hende den e congregacion di Corinto tabata falta aprecio pa nan rumannan den fe. Nan curason tabata limita, nan no tabatin un curason generoso. Nos tin cu haci esfuerso pa cultiva berdadero aprecio pa nos rumannan, y asta purba sera amistadnan nobo.​—1/1, pagina 9-11.

• Kico ta e seyamento cu Revelacion 7:3 ta referi na dje?

Ora Dios ta ungi cristiannan cu spirito santo, nan ta haya nan prome seyamento. Pero Revelacion 7:3 ta referi na un seyamento final, ora cu e unginan ei ta haya confirmacion cu nan a demostra nan lealtad plenamente.​—1/1, pagina 30-1.

• Kico mayornan por siña for di loke Bijbel ta conta di Samuel?

Pa cuminsa, nan mester siña nan yiunan e palabra di Dios, manera e mayornan di Samuel sin duda a siñ’e. Ademas, nan tin cu anima nan yiunan pa haci e sirbishi di Jehova nan carera.​—15/1, pagina 16.

• Con nos por mustra cu nos ta felis di por warda riba Jehova?

Nos ta ‘sperando e dia di Jehova’, anticipando e alivio cu nos lo haya ora cu e elimina tur hende malbado. (2 Pedro 3:7, 12) Pero a pesar cu Jehova ta ansioso pa pone fin na tur maldad, e ta frena su mes pa e por trece salbacion pa cristiannan den un manera cu lo glorifica su nomber. Nos mester tin e confiansa cu Jehova sa cua ta e momento oportuno pa actua, y mientrastanto, nos mester sigui alab’e activamente. (Salmo 71:14, 15)​—1/3, pagina 17-18.

• Noe a bai den e arca cu shete di cada sorto di bestia limpi of shete par di cada sorto?

Jehova a bisa Noe: “Hiba cu bo shete shete di tur bestia limpi.” (Genesis 7:1, 2, NW) Na Hebreo, e expresion “shete shete”, literalmente e ripiticion di shete, no kiermen shete par, y otro textonan di Bijbel ta indica esei. Noe evidentemente a hiba shete di cada, esta, tres par plus un bestia mas cu despues e por a uza pa sacrificio. (Genesis 8:20)​—15/3, pagina 31.

• Pakico cristiannan mester “contempla” e resultado di e fe di e ancianonan, esta, di esnan cu ta hiba delantera?

Apostel Pablo ta invita nos pa “contempla”, of considera cuidadosamente, e resultado di e conducta fiel di e ancianonan y pa sigui e ehempelnan di fe ei. (Hebreonan 13:7) Nos ta haci esaki pasobra e Palabra di Dios ta manda nos hacie. Ademas, nos ta combenci cu e ancianonan tin tanto e interesnan di Reino como nos mihor interes na pecho.​—1/4, pagina 28.