Crueldad Lo Caba un Dia?

HOPI hende lo bai di acuerdo mesora cu e causa principal di crueldad den e mundo djawe ta egoismo. Decadanan pasa hende a cuminsa pone mas y mas enfasis riba un estilo di bida egoista, y esei awor a produci un sociedad den cua mayoria di hende ta precupa principalmente cu nan mes. Hopi hende lo haci loke sea ta necesario pa haya loke nan kier, y esei ta resulta hopi biaha den actonan cruel. Ta asina no solamente den caso di personanan individual sino tambe di nacionnan completo.

Aparentemente bida di otro hende no ta importante mas. Tin hende cu asta ta gusta haci cos cruel. Nan ta diberti nan mes cu esei, mescos cu e criminalnan cu ta confesa cu nan ta causa daño na otro hende djis pa sinti un kick. Anto kico di e miyones di hendenan cu ta gusta pelicula violento y cruel asina tanto te cu nan ta stimula e industria di cine pa traha mas di e tipo di peliculanan ei pa saca ganashi for di nan? Hopi hende a bira sin heful debi cu constantemente nan ta mira cosnan cruel den entretenimento y medionan di noticia.

Hopi biaha crueldad ta causa daño mental y emocional y ta pone cu e victimanan ta inclina na haci cu otro hende mescos cu a haci cu nan. Noemí Díaz Marroquín, kende ta duna les na e Universidad Nacional Autonomo di Mexico, a papia di e violencia cu crueldad ta fomenta. El a bisa: “Violencia ta un cos cu hende ta siña, e ta un cos di cultura ... Nos ta siña actua den maneranan violento ora nos ambiente ta permitie y ta stimul’e.” Pues, tin hopi chens cu personanan cu tabata victima di abuso ta bai abusa di otro hende, podise asta na e mesun maneranan cu a abusa di nan.

Den otro casonan, hende cu ta haci mal uzo di substancianan manera droga of alcohol, cu tempo por bai comporta nan mes den un forma cruel. Ademas, mester menciona tambe personanan cu ta malcontento cu nan gobierno pasobra e gobierno no ta satisface e necesidadnan di e pueblo. Tin di e personanan ei, dicidido pa laga hende sa nan punto di bista, ta recori na actonan cruel y ta fomenta terorismo, hopi biaha a costo di hende inocente.

Pero kisas bo ta puntra bo mes: ‘Ta di nan mes hende a siña actua cruel? Kico tin tras di e situacion actual?’

Ken Realmente Ta Tras di Crueldad?

Bijbel ta informa nos cu Satanas e Diabel ta eherce un influencia grandi riba e mundo aki, y ta yam’e “e dios di e mundo aki.” (2 Corintionan 4:4) E ta e persona mas egoista y cruel den universo. Hesus aptamente a describie  como “un matado” y “e tata di mentira.”​—Juan 8:44.

Humanidad ta bou di e influencia poderoso di Satanas desde cu Adam cu Eva a desobedece Dios. (Genesis 3:1-7, 16-19) Un 15 siglo despues cu e prome pareha humano a bira lomba pa Jehova, angelnan rebelde a bisti curpa humano, tene relacion cu hende muher y a produci un rasa hibrido cu na e idioma original a ser yama nefilim. Ki caracteristica distintivo nan tabatin? Nan nomber ta duna e contesta. Nefilim ta nifica “tumbadonan”, esta, “esnan cu ta pone otronan cai.” Evidentemente, nan tabata personanan violento cu a causa tal grado di crueldad y inmoralidad cu solamente un diluvio di origen divino por a pone un fin na dje. (Genesis 6:4, 5, 17) E Diluvio a destrui e nefilim, pero nan tatanan si a bai bek na e region di spirito como demoñonan invisibel.​—1 Pedro 3:19, 20.

E caracter cruel di e angelnan rebelde tabata bisto den e caso di e mucha posei pa demoño den tempo di Hesus. E demoño cada bes tabata pone e mucha haya stuipi, y tabata tir’e den candela y den awa den un intento pa destru’e. (Marco 9:17-22) Pues, ta bisto cu e “forsanan spiritual di maldad” ei ta refleha e personalidad sin misericordia di nan comandante cruel, Satanas e Diabel.​—Efesionan 6:12.

Awendia, e influencia di demoño ta sigui fomenta crueldad humano, manera Bijbel a profetisa: “Den e ultimo dianan temponan trabahoso lo bin. Pasobra hende lo ta stimado di nan mes, ... gabado, arogante, ... ingrato, impio, sin amor, ireconciliabel, cu mala lenga, sin dominio propio, grosero, odiado di loke ta bon, traidor, imprudente, soberbe, mas bien stimado di placer cu stimado di Dios; cu tin aparencia di ta religioso [en berdad], ma cu ta nenga su poder.”​—2 Timoteo 3:1-5.

Profesianan biblico ta revela cu specialmente nos tempo ta trabahoso pasobra despues cu e Reino di Dios den man di Cristo Hesus a keda estableci na aña 1914, Satanas y su ehersito di demoño a ser saca for di shelo. Bijbel ta declara: “Ai di Tera y lama, pasobra Diabel a baha bin cerca boso cu gran furia, sabiendo cu ta ked’e solamente un poco tempo mas.”​—Revelacion 12:5-9, 12.

Acaso esaki ta nifica cu e situacion no por drecha? Díaz Marroquín, cita anteriormente, a declara cu “hende por siña pa stop” cu comportacion indeseabel. Sinembargo, siendo cu e influencia di Satanas ta den tur skina di Tera awe, ta improbabel cu un hende lo siña pa stop cu violencia a menos cu e permiti un otro forsa, uno superior, influencia su manera di pensa y di actua. Cua forsa esei ta?

Cambio Ta Posibel​—Con?

Afortunadamente, e spirito santo di Dios ta e forsa mas poderoso cu ta existi, y e por supera cualkier influencia di demoño. E ta promove amor y e bienestar di hende. Pa ser yena cu e spirito di Dios, tur hende cu kier agrada Jehova tin cu evita comportacion cu ta asta parce cruel. Pa logra esaki nos mester transforma nos personalidad pa e ta conforme e boluntad divino. Anto kico ta e boluntad ei? Imita Dios su manera te caminda nos por. Esaki ta ensera mira otro hende manera Dios ta mira nan.​—Efesionan 5:1, 2; Colosensenan 3:7-10.

Un analisis di e manera cu Dios ta atende asuntonan lo combence bo cu Jehova nunca a mustra un falta di interes den otro hende. Nunca e no a trata ningun hende, y de echo ningun bestia, inhustamente. * (Deuteronomio 22:10; Salmo 36:7; Proverbionan 12:10) Jehova ta rechasa tur crueldad y ken cu ta practic’e. (Proverbionan 3:31, 32) E personalidad nobo cu Jehova kier pa cristiannan cultiva ta yuda nan cu nan por considera otro hende mas importante cu nan mes y respeta nan. (Filipensenan 2:2-4) E personalidad cristian  nobo ei ta inclui “un curason di compasion, cariño, humildad, mansedumbre y pasenshi.” Anto no mester pasa por halto di amor, pasobra e “ta e laso perfecto di unidad.” (Colosensenan 3:12-14) Bo no ta di acuerdo cu mundo lo tabata un luga hopi diferente si e cualidadnan ei tabata predomina?

Sinembargo, kisas bo ta puntra bo mes si di berdad hende por haci cambionan duradero den nan personalidad. Wel, considera un ehempel di bida real. Martín * tabatin custumber di grita su casa dilanti di nan yiunan y batie mal bati. Na un ocasion, e situacion a bira asina peligroso cu e muchanan mester a core bai busca yudansa cerca bisiña. Despues di varios aña, e famia a cuminsa studia Bijbel cu Testigonan di Jehova. Martín a siña ki clase di persona lo e mester ta y con lo e mester trata otro hende. El a logra cambia? Su casa a contesta: “Antes, mi esposo tabata bira un otro hende ora e rabia. Debi na esei nos bida tabata na werki pa hopi tempo. Mi no tin suficiente palabra pa gradici Jehova pa e echo cu el a yuda Martín cambia. Awor e ta un bon tata y un excelente esposo.”

Esaki ta apenas un caso. Rond mundo, miyones di hende cu a studia Bijbel cu Testigonan di Jehova a stop di ta cruel. Si, cambio ta posibel.

Fin di Tur Crueldad Ta Cerca

Den futuro cercano, e Reino di Dios lo eherce pleno autoridad riba Tera. E Reino ei ta un gobierno estableci awor den shelo cu un Gobernante compasivo, Cristo Hesus. Ya caba el a limpia den shelo y a saca Satanas, e fuente di tur crueldad, hunto cu su demoñonan. Pronto e Reino di Dios lo satisface e necesidadnan di su subditonan riba Tera cu ta stima pas. (Salmo 37:10, 11; Isaias 11:2-5) Esei ta e unico berdadero solucion pa e problemanan di mundo. Pero kico si mientras cu bo ta wardando riba e Reino aki, bo bira victima di crueldad?

 Si nos paga crueldad bek cu crueldad, esei no ta yuda. Lo e resulta den mas crueldad so. Bijbel ta invita nos pa confia den Jehova, kende na su debido tempo lo “duna cada un segun su conducta, segun e fruta di su echonan.” (Jeremias 17:10) (Wak e cuadro adhunto, “Con pa Reacciona Riba Crueldad.”) Ta berdad cu lo bo por sufri si bo bira victima di un crimen cruel. (Eclesiastes 9:11, NW) Sinembargo, Dios por elimina e resultadonan di cualkier crueldad, asta morto. Segun su promesa, e hendenan den su memoria cu a perde nan bida debi na actonan cruel lo bolbe na bida.​—Juan 5:28, 29.

Aunke e posibilidad di bira victima di crueldad ta existi te ainda, nos por haya consuelo si nos tin un relacion intimo cu Dios y fe firme den su promesanan. Considera e caso di Sara, kende sin yudansa di un casa a lanta dos yiu homber y a percura pa nan haya un bon educacion. Den su biehes, su yiunan a bandon’e, y no a dun’e ningun sosten material ni atencion medico. Sinembargo Sara, kende awor ta un cristian, a bisa: “Aunke mi no por yuda cu mi ta sinti mi tristo, Jehova no a bandona mi. Mi ta sinti su sosten mediante mi rumannan spiritual, kendenan semper ta cuida mi. Mi ta kere firmemente cu pronto lo e soluciona no solamente mi problemanan sino tambe problema di tur hende cu ta confia den su poder y cu ta haci loke e ta manda.”

Ken ta e rumannan spiritual aki cu Sara a referi na dje? Nan ta su compañeronan cristian, cu ta Testigo di Jehova. Nan ta forma un hermandad mundial di hende compasivo cu ta combenci cu pronto crueldad lo caba. (1 Pedro 2:17) Ni Satanas e Diabel, kende ta esun principalmente responsabel pa crueldad, ni ningun hende cu ta actua mescos cu ne lo keda. E “era di crueldad” aki, manera un escritor a yam’e, lo ta un cos di pasado. Pakico no siña tocante e speransa aki dor di tuma contacto cu un Testigo di Jehova?

[Nota]

[Cuadro na pagina 6]

Con pa Reacciona Riba Crueldad

E Palabra di Dios ta ofrece conseho practico tocante con pa trata cu crueldad. Pensa riba con bo por aplica e siguiente palabranan di sabiduria:

“No bisa: ‘Lo mi paga maldad bek’; spera riba SEÑOR y e lo salba bo.”​—Proverbionan 20:22.

“Si bo mira cu nan ta oprimi esun di poco recurso y cu violencia nan ta kita huicio y husticia ..., no keda straño pa e asunto, pasobra un cu ta mas halto cu esun halto ta vigilando.”​—Eclesiastes 5:8, NW.

“Felis ta esnan di genio suave, ya cu nan lo hereda e Tera.”​—Mateo 5:5, NW.

“Tur loke boso kier pa hende haci pa boso, haci mescos pa nan.”​—Mateo 7:12.

“Nunca paga malo cu malo na ningun hende. Respeta loke ta corecto den bista di tur hende. Si ta posibel, asina leu cu ta depende di boso, sea na pas cu tur hende. Nunca no venga boso mes, stimanan, ma laga luga pa e furia di Dios, pasobra ta para skirbi: ‘Ta di mi vengansa ta, ami lo paga bek’, Señor ta bisa.”​—Romanonan 12:17-19.

“Cristo tambe a sufri pa boso, lagando un ehempel pa boso, pa boso sigui den su pasonan ... ora cu el a wordo zundra, e no a zundra bek; ora cu el a sufri, e no a menasa, ma a confia su mes na esun cu ta husga cu husticia.”​—1 Pedro 2:21-23.

[Plachi na pagina 7]

Jehova a siña hopi hende pa stop di ta cruel