E Mundo Cruel Djawe

MARÍA tabatin 64 aña y tabata biba su so. Nan a hay’e morto den su cas. Desconocinan a batie y strangul’e cu un pida waya.

Un multitud violento y rabia a bati tres polis, acusando nan di a secuestra dos menor di edad. E multitud a basha gasolin riba dos di e polisnan, pega nan na candela y a kima nan mata. E di tres polis a logra scapa.

Un yamada telefonico anonimo a hiba na un descubrimento spantoso. Autoridadnan a haya restonan mortal di cuater homber cu tabata cu vakantie na e luga ei, dera den un hardin. Nan cara tabata tapa y nan mannan mara. Autopsia a revela cu a dera nan bibo.

E atrocidadnan aki no ta escenanan for di peliculanan di horor violento y cruel. E informenan aki tur ta sucesonan real cu no mucho tempo pasa tabata titular di noticia den un pais Latino Americano. Sinembargo, e pais ei no ta un excepcion den e mundo djawe.

Actonan cruel a bira cos di tur dia. Bombardeo, atake terorista, asesinato, atraco, tiramento y violacion sexual ta forma apenas un fraccion di e actonan di crueldad ei. Bes tras bes, medionan di comunicacion ta presenta reportahenan detaya di atrocidad, y hopi hende ya no ta keda geshock mas ora nan mira of tende di tal crueldad.

Podise bo ta puntra bo mes: ‘Kico ta pasando cu e mundo djawe? Acaso hende a perde tur consideracion pa sintimento di otro y no tin respet pa bida mas?’ Dicon nos tin cu biba den un mundo asin’aki?

Awor considera e caso di Harry, un homber di 69 aña cu anteriormente tabatin cancer. Su casa ta sufri di multiple sclerosis, pero bisiña- y amigonan ta duna nan un man. Harry a bisa: “Mi no sa kico nos lo a haci sin tur e hendenan aki cu ta yuda nos.” Na Canada, caminda Harry ta biba, un investigacion a revela cu mas di 50 porciento di persona cu ta duna cuido na hende grandi, ta yudando un hende cu no ta nan famia. Sin duda bo tambe conoce hendenan comun y coriente cu dia aden dia afo ta mustra bondad y ta cla pa yuda nan prohimo. Si, hende tin e potencial pa ser compasivo y bondadoso en bes di cruel.

Pues dicon tin tanto atrocidad anto? Kico ta haci hende actua na un forma cruel? E personanan cu ta trata otro hende cu crueldad por cambia? Crueldad lo caba un dia? Anto si ta asina, con y ki dia?

[Reconocemento pa Potret na pagina 3]

Trein: CORDON PRESS