Incapasita y Toch Ansioso pa Sirbi

ORA bo topa Leonardo pa prome bes, kisas bo no ta mir’e como un hende cu ta traha den construccion. Un par di tempo pasa el a perde tur su dos mannan den un accidente di trabou. Sinembargo, a pesar di Leonardo su incapasidad, e tabata traha duro na un sitio di construccion na Acajutla, El Salvador, manera bo por mira riba e potret.

Pa e por a yuda den e proyecto di construccion ei, el a diseña su propio hermentnan. E ta hinca e parti dilanti di su brasa drechi den un renchi di metal pega na un shovel y na un manera habil e ta hisa tera benta den un garetia. Ya cu e no por gara e garetia den un forma normal na e mannan, el a pega renchi na esakinan di manera cu e mes por hala e garetia. Kico a motiva Leonardo pa yuda den e proyecto aki?

Leonardo kier a ‘duna un man’ den e construccion di un Salon di Reino, e luga di adoracion pa e congregacion local di Testigonan di Jehova. E tabatin varios motibo pa hustifica pakico lo e no por a yuda cu e trabounan di construccion. E tin un trabou full-time, e ta incapasita, y e ta sirbiendo caba den su congregacion como sirbidor ministerial. Ma e kier a haci tur loke tabata na su alcance pa sirbi Dios na e sitio di construccion tambe.

Bo ta sirbi Dios cu e mesun spirito? Leonardo, na luga di a uza su incapasidad como un excuse, a uza su facultadnan mental pa diseña su mes hermentnan pa e por a haci e trabou cu di otro manera lo no tabata posibel p’e. E ta sirbi Dios ‘cu henter su mente.’ (Mateo 22:37) E trahadonan cu ta participa den construccion di Salonnan di Reino di Testigonan di Jehova rond mundo, sea cu nan ta incapasita of no, tin un spirito voluntario. Nan reunionnan ta habri pa publico, y bo ta bonbini.