Laga e Congregacion Alaba Jehova

“Lo mi proclama bo nomber na mi rumannan, meimei di e congregacion lo mi canta bo alabansa.”​—HEBREONAN 2:12.

1, 2. Pakico e congregacion ta asina beneficioso, y kico ta su funcion principal?

TUR tempo hende a haya compañerismo y siguridad den e circulo di famia. Sinembargo, Bijbel ta identifica un otro circulo den cua masha hopi hende rond mundo awe ta disfrutando di un compañerismo y siguridad excepcional. Ta trata aki di e congregacion cristian. Sea bo ta parti di un famia uni den cua e miembronan ta apoya otro of no, bo por y mester aprecia loke Dios a percura mediante e areglo di congregacion. Naturalmente, si bo ta asocia caba cu un congregacion di Testigonan di Jehova, probablemente bo tambe por papia di e compañerismo caluroso cu bo ta disfruta di dje einan y e sentido di siguridad cu bo tin.

² E congregacion no ta djis un grupo social. E no ta un club of un asociacion den comunidad caminda hende cu tin e mesun antecedente of e mesun interesnan den cierto deporte of hobi ta bini hunto. Mas bien, e congregacion ta sirbi principalmente pa alaba Jehova Dios. Manera e buki di Salmonan ta enfatisa, pa hopi tempo caba esei tabata asina. Na Salmo 35:18, nos ta lesa: “Lo mi duna bo gradicimento den e congregacion grandi; lo mi alaba bo meimei di un multitud enorme.” Mescos tambe, Salmo 107:31 y 32 ta anima nos: “Laga nan duna gradicimento na SEÑOR pa su misericordia, y pa su maraviyanan na e yiunan di hende! Laga nan hals’e tambe den e congregacion di e pueblo.”

3. Segun Pablo, kico e congregacion ta?

³ Apostel Pablo a resalta un otro funcion esencial di e congregacion ora el a referi na “e cas di Dios, cu ta e iglesia [“congregacion”, NW] di e Dios bibo, e pilar y sosten di e berdad.” (1 Timoteo 3:15) Ta di cua congregacion Pablo tabata papia? Den ki sentido Bijbel ta uza e palabra “congregacion”? Y ki efecto esaki mester tin riba nos bida y nos speransa pa futuro? Pa haya sa esaki, laga nos analisa prome con e Palabra di Dios ta uza e expresion “congregacion.”

4. Den e Scritura Hebreo, na kico e palabra Hebreo pa “congregacion” ta referi generalmente?

⁴ E palabra Hebreo hopi biaha traduci como “congregacion” ta bini di un verbo cu ta nifica “reuni” of “convoca un asamblea.” * (Deuteronomio 4:10; 9:10) E salmista a uza e mesun palabra Hebreo aki relaciona cu e angelnan den shelo, y por uz’e tambe pa describi un grupo di hende malbado. (Salmo 26:5; 89:5-7) Sinembargo, e Scritura Hebreo ta aplic’e mas tanto biaha na e Israelitanan. Dios a indica cu Jacob lo a “bira un multitud di pueblonan”, y esei ta loke a sosode. (Genesis 28:3; 35:11; 48:4) E Israelitanan a ser yama, of scohi, pa ta “e asamblea di SEÑOR”, “e asamblea di Dios.”​—Numbernan 20:4; Nehemias 13:1; Josue 8:35; 1 Samuel 17:47; Mikeas 2:5.

5. Ki palabra Griego ta ser traduci generalmente como “congregacion”, y con por aplica e palabra aki?

⁵ E palabra corespondiente na Griego ta ek·kle·sí·a; e ta bini di dos palabra Griego cu ta nifica  “afo” y “yama.” Por aplic’e na un grupo cu ta reuni pa un proposito no religioso, manera “e reunion” cu Demetrio a lanta contra Pablo na Efesio. (Echonan 19:32, 39, 41) Pero por lo general Bijbel ta uz’e pa e congregacion cristian. Algun version, manera Beibel Santu, ta traduci e palabra aki como “iglesia”, pero The Imperial Bible-Dictionary ta bisa cu “nunca . . . e ta referi na e edificio mes den cua cristiannan tabata bini hunto pa rindi adoracion publico.” Pero ta interesante pa nota cu den e Scritura Griego Cristian e palabra pa “congregacion” tin por lo menos cuater diferente aplicacion.

E Congregacion Ungi di Dios

6. Kico David y Hesus a haci den e congregacion?

⁶ Apostel Pablo a aplica David su palabranan na Salmo 22:22 na Hesus. El a skirbi: “‘Lo mi proclama bo nomber na mi rumannan, meimei di e congregacion lo mi canta bo alabansa.’ P’esei [Hesus] mester a wordo haci igual cu su rumannan den tur cos, pa e por a bira un sumo sacerdote misericordioso y fiel den cosnan cu tin di haci cu Dios.” (Hebreonan 2:12, 17) David a alaba Dios meimei di e congregacion di Israel di antiguedad. (Salmo 40:9) Sinembargo, na kico Pablo tabata referi ora el a bisa cu Hesus a alaba Dios “meimei di e congregacion”? Cua congregacion?

7. Den e Scritura Griego Cristian, kico ta e sentido principal di e palabra “congregacion”?

⁷ Loke nos ta lesa na Hebreonan 2:12 y 17 ta hopi significante. E ta mustra cu Cristo mes tabata miembro di un congregacion caminda el a declara e nomber di Dios na su rumannan. Ken e rumannan ei tabata? Ta esnan cu ta forma parti di e simiña of “descendientenan di Abraham”, e rumannan di Cristo ungi cu spirito, “participantenan den un yamada celestial.” (Hebreonan 2:16–3:1; Mateo 25:40) Si, den e Scritura Griego Cristian e sentido principal di e palabra “iglesia” of congregacion ta e totalidad di siguidonan di Cristo ungi cu spirito. E 144.000 unginan aki ta forma e “iglesia [“congregacion”, NW] di e primogenitonan, kendenan ta inscribi den shelo.”​—Hebreonan 12:23.

8. Con Hesus a indica di antemano cu lo a bai forma e congregacion cristian?

⁸ Hesus a indica cu lo a bai forma e “congregacion” cristian aki. Mas o menos un aña prome cu su morto, el a bisa un apostel: “Abo ta Pedro, y riba e baranca aki lo mi edifica mi congregacion, y e portanan di Hades lo no domin’e.” (Mateo 16:18, NW) Tanto Pedro como Pablo a compronde corectamente cu ta Hesus mes tabata e baranca profetisa. Pedro a skirbi cu esnan cu ta ser edifica como “piedra bibo” di un cas spiritual riba e baranca, esta Cristo, tabata “un pueblo peculiar [pa] proclama e alabansanan” di Esun cu a yama nan.​—1 Pedro 2:4-9; Salmo 118:22; Isaias 8:14; 1 Corintionan 10:1-4.

9. Na ki tempo e congregacion di Dios a cuminsa forma?

⁹ Na ki tempo e “pueblo peculiar” aki, es decir, e pueblo pa un pocesion special, a cuminsa forma pa bira e congregacion cristian? Esei tabata na Pentecoste di aña 33 di nos era ora Dios a drama spirito santo riba e discipelnan cu a reuni na Jerusalem. Mas lat riba e dia ei, Pedro a duna un discurso impresionante na un  grupo di Hudiu y proselito. E morto di Hesus a conmove hopi di nan te den fondo di nan curason; nan a arepenti y a batisa. E relato historico ta mustra cu tres mil persona a haci esei, y asina nan a bira parti di Dios su congregacion nobo cu a sigui crece. (Echonan 2:1-4, 14, 37-47) El a crece pasobra mas y mas Hudiu y proselito a acepta e echo cu Israel como nacion no tabata e congregacion di Dios mas. Mas bien, cristiannan ungi cu a forma e “Israel [spiritual] di Dios” a bira e berdadero congregacion di Dios.​—Galationan 6:16; Echonan 20:28.

10. Ki relacion Hesus tin cu e congregacion di Dios?

¹⁰ Hopi bes Bijbel ta haci un distincion entre Hesus y e unginan, manera den e frase “tocante di Cristo y e iglesia.” Hesus ta Cabes di e congregacion aki di cristiannan ungi cu spirito. Pablo a skirbi cu Dios “a duna [Hesus] como cabes riba tur cos na e iglesia, cua ta su curpa.” (Efesionan 1:22, 23; 5:23, 32; Colosensenan 1:18, 24) Awe, ta solamente un resto chikito di e miembronan ungi di e congregacion aki tin riba Tera. Pero nos por ta sigur cu nan Cabes, Hesucristo, ta stima nan. Efesionan 5:25 ta describi kico e ta sinti pa nan: “Cristo tambe a stima e iglesia y a entrega su mes p’e.” E ta stima nan pasobra cu entusiasmo nan ta ofrece Dios “un sacrificio di alabansa, esta, e fruta di lipnan cu ta haci declaracion publico di su nomber”, mescos cu Hesus a haci tempo e tabata riba Tera.​—Hebreonan 13:15, NW.

“Congregacion” den Varios Otro Sentido

11. Den ki di dos sentido e Scritura Griego Cristian ta uza “congregacion”?

¹¹ Tin biaha Bijbel ta uza e palabra “congregacion” den un sentido mas limita, sin aplic’e na henter e grupo di 144.000 ungi cu ta forma “e congregacion di Dios.” Por ehempel, Pablo a skirbi un grupo di cristian: “Evita di bira causa di tropieso tanto pa Hudiu como pa Griego y pa e congregacion di Dios.” (1 Corintionan 10:32, NW) Obviamente, si un cristian den Corinto di antiguedad a haci algo malo, esei lo por a pone algun hende trompica. Pero esei lo por a pone delaster un Griego, Hudiu of cristian ungi for di e tempo ei te awe trompica? Claro cu no. Ta parce anto cu “e congregacion di Dios” den e versiculo aki ta aplica na cristiannan cu ta na bida na un cierto tempo. Mescos tambe, ora nos bisa cu Dios ta guia, sostene of bendiciona e congregacion, esei ta referi na tur cristian cu na e momento ei ta na bida, sin importa na unda nan ta riba e planeta aki. Of ora nos ta papia di e pas y felicidad cu ta reina den e congregacion di Dios awe, esei ta referi na henter e hermandad cristian.

12. Den ki di tres sentido Bijbel ta uza e palabra “congregacion”?

¹² Un di tres sentido den cua Bijbel ta uza e palabra “congregacion” ta aplica na tur cristian den un cierto area geografico. Por ehempel, nos ta lesa: “E iglesia den henter Judea y Galilea y Samaria tabatin pas.” (Echonan 9:31) Tabatin mas cu un grupo di cristian den e area extenso ei, pero Bijbel ta referi na tur e gruponan na Judea, Galilea y Samaria como “e congregacion.” En bista di e cantidad di cristian cu a batisa na Pentecoste di aña 33 y net despues di esei, por tabatin asta mas cu un grupo cu tabata reuni regularmente den e area di Jerusalem. (Echonan 2:41, 46, 47; 4:4; 6:1, 7) Herodes Agripa I a goberna Judea te na su morto na aña 44, y nos por compronde for di 1 Tesalonicensenan 2:14 cu por lo menos pa aña 50 tabatin un cantidad di congregacion na Judea. Pues, ora nos lesa cu Herodes ‘a maltrata algun hende di iglesia’, esaki por ta referi na mas cu un grupo so cu tabata reuni na Jerusalem.​—Echonan 12:1.

13. Den ki di cuater sentido, y mas comun, Bijbel ta uza e palabra “congregacion”?

¹³ Un di cuater sentido, un uzo mas limita ainda y mas comun di e palabra “congregacion”, ta referi na e cristiannan cu ta forma un solo congregacion local, manera den un cas. Pablo a menciona “e iglesianan di Galacia.” Tabatin mas cu un congregacion local den e  provincia Romano grandi ei. Dos biaha Pablo a uza e palabra plural “iglesianan” relaciona cu Galacia, locual lo a inclui esnan na Antiokia, Derbe, Lista y Iconio. Den e congregacionnan local aki tabata nombra ancianonan of superintendentenan cualifica. (1 Corintionan 16:1; Galationan 1:2; Echonan 14:19-23) Segun e Scritura, nan tur tabata “iglesianan di Dios.”​—1 Corintionan 11:16; 2 Tesalonicensenan 1:4.

14. Kico nos por compronde for di e manera cu un par di texto ta uza e palabra “congregacion”?

¹⁴ Den algun caso, e gruponan di cristian cu a reuni lo mester tabata chikito y lo por a pas den un cas priva. Pero toch a aplica e palabra “congregacion” na algun di e gruponan ei. Esnan cu nos sa di dje tabata e congregacionnan na cas di Akila y Pricila, Ninfas, y Filemon. (Romanonan 16:3-5; Colosensenan 4:15; Filemon 2) Esaki mester ta un fuente di estimulo pa e congregacionnan local djawe cu ta hopi chikito y cu kisas asta ta reuniendo regularmente den casnan priva. Jehova a reconoce e congregacionnan chikito ei den prome siglo, y siguramente e ta reconoce nan awe tambe, bendicionando nan mediante su spirito.

Congregacionnan Ta Alaba Jehova

15. Con spirito santo a obra riba algun cristian ungi y con esei a manifesta su mes den algun congregacion di prome siglo?

¹⁵ Nos a tuma nota cu Salmo 22:22 a cumpli ora Hesus a alaba Dios meimei di e congregacion. (Hebreonan 2:12) Su siguidonan fiel mester a haci mescos. Den prome siglo ora cristiannan berdadero a ser ungi cu spirito santo pa bira yiu di Dios y pues ruman di Cristo, spirito santo a cuminsa obra riba algun di nan na un manera adicional y special. Nan a ricibi donnan milagroso di spirito. E donnan ei a manifesta nan mes entre otro den forma di abla special di sabiduria of conocemento, poder pa cura of pa profetisa, of asta e capasidad pa papia den lenganan desconoci pa nan.​—1 Corintionan 12:4-11.

16. Kico tabata un di e metanan di e donnan milagroso di spirito?

¹⁶ Encuanto papiamento den lenga, Pablo a bisa: “Lo mi canta alabansa cu e don di e spirito, pero lo mi canta alabansa tambe cu mi mente.” (1 Corintionan 14:15, NW) El a realisa cu tabata importante pa otronan compronde su palabranan pa nan por a ricibi instruccion. Pablo su meta tabata pa alaba Jehova den  e congregacion. El a urgi otro cristiannan cu tabatin don di spirito: “Trata di abunda den esakinan pa edificacion di e iglesia”, referiendo anto na e congregacion local caminda nan a manifesta e don. (1 Corintionan 14:4, 5, 12, 23) Ta bon cla anto cu Pablo tabata interesa den e congregacionnan local, sabiendo cu den cada un di nan, cristiannan lo a haya oportunidad pa alaba Dios.

17. Pa loke ta e congregacionnan local awe, kico nos por ta sigur di dje?

¹⁷ Jehova ta sigui uza y sostene su congregacion. E ta bendicionando e grupo di cristian ungi riba Tera awe y nos por mira esei na e abundancia di alimento spiritual cu e pueblo di Dios ta ricibi. (Lucas 12:42) E ta bendicionando e hermandad mundial den su totalidad. Y e ta bendicionando e congregacionnan local, caminda nos ta alaba nos Creador pa medio di nos accionnan y comentarionan spiritualmente edificante. Ei nos ta ricibi instruccion y entrenamento pa asina nos por alaba Dios na otro ocasionnan, ora nos no ta na nos congregacion local.

18, 19. Kico cristiannan devoto den cualkier congregacion local kier haci?

¹⁸ Corda cu apostel Pablo a urgi e cristiannan den e congregacion local na Filipos, Macedonia: “Esaki ta mi oracion, cu boso [por ta] yena cu e fruta di husticia cu ta bin dor di Hesucristo, pa e gloria y alabansa di Dios.” Esei lo a nifica entre otro cu nan mester a papia cu otro hende​—hende pafo di e congregacion cristian​—tocante nan fe den Hesus y nan speransa maraviyoso. (Filipensenan 1:9-11; 3:8-11) Na harmonia cu esei, Pablo a urgi otro cristiannan: “Mediante [Hesus], laga nos semper ofrece na Dios un sacrificio di alabansa, esta, e fruta di lipnan cu ta haci declaracion publico di su nomber.”​—Hebreonan 13:15, NW.

¹⁹ Abo tin deleite den alaba Dios “meimei di e congregacion”, manera Hesus a haci, y den uza bo lipnan pa alaba Jehova dilanti di esnan cu ainda tin cu conoc’e y alab’e? (Hebreonan 2:12; Romanonan 15:9-11) Te na cierto grado nos contesta personal ta depende di kico nos ta pensa di e funcion di nos congregacion local den e proposito di Dios. Den e siguiente articulo, nos lo analisa con Jehova ta dirigi y uza nos congregacion local y ki papel e congregacion mester hunga den nos bida awe.

[Nota]

Bo Ta Corda?

• Con “e congregacion di Dios”, cu ta consisti di cristiannan ungi, a ser forma?

• Den ki tres sentido adicional Bijbel ta uza e palabra “congregacion”?

• Relaciona cu e congregacion, kico David, Hesus y e cristiannan di prome siglo kier a haci, y ki efecto esaki mester tin riba nos?

[Preguntanan di Estudio]

[Plachi na pagina 21]

Hesus tabata e fundeshi di cua congregacion?

[Plachi na pagina 23]

Gruponan local di cristian a reuni como ‘congregacionnan di Dios’

[Plachi na pagina 24]

Mescos cu e cristiannan na Benin, nos por alaba Jehova den congregacion