Laga e Congregacion Ser Edifica

“E congregacion ... a drenta den un tempo di pas, siendo edifica.”​—ECHONAN 9:31, NW.

1. Ki preguntanan por lanta tocante “e congregacion di Dios”?

RIBA e dia di Pentecoste di aña 33 di nos era, Jehova a acepta un grupo di discipel di Cristo como un nacion nobo, “e Israel di Dios.” (Galationan 6:16) E cristiannan ungi cu spirito aki a bira tambe loke Bijbel ta yama “e congregacion di Dios.” (1 Corintionan 11:22, NW) Ma kico esei a ensera? Con “e congregacion di Dios” lo a ser organisa? Con lo el a funciona riba Tera, sin importa unda su miembronan tabata biba? Y ki efecto e tin riba nos bida y felicidad?

2, 3. Con Hesus a indica cu e congregacion lo tabatin un structura?

² Manera e articulo anterior a trece dilanti, Hesus a predeci cu un dia e congregacion aki di su siguidonan ungi lo a cuminsa existi, ora el a bisa apostel Pedro: “Riba e baranca aki [Hesucristo] lo mi edifica mi congregacion, y e portanan di Hades lo no domin’e.” (Mateo 16:18, NW) Ademas, tempo cu Hesus tabata hunto cu su apostelnan ainda, el a indica ki funcion e congregacion aki​—cu pronto lo a ser estableci​—lo tabatin y con lo el a ser organisa.

³ Hesus a mustra cu palabra y echo cu algun cristian den e congregacion lo a hiba delantera. Nan lo a haci esei sirbiendo e otro cristiannan den nan grupo. Cristo a bisa: “Boso sa cu esnan cu ta reconoci como gobernantenan di e paganonan tin dominio riba nan; y nan shonnan ta eherce autoridad riba nan. Ma entre boso no ta asina, ma ken cu kier bira grandi entre boso lo ta boso sirbidor; y ken cu kier ta esun di prome entre boso lo ta esclabo di tur.” (Marco 10:42-44) Ta obvio anto cu “e congregacion di Dios” lo no tabata djis un grupo di persona plama y isola, sin ningun forma di organisacion. Mas bien, lo tabatin un structura den cua miembronan di e congregacion lo a traha y comunica cu otro.

4, 5. Con nos por sa cu e congregacion lo mester a haya instruccion spiritual?

⁴ Esun cu lo a fungi como Cabes di e “congregacion di Dios” ei a indica cu su apostelnan y otro personanan cu a siña for di dje lo a haya responsabilidadnan specifico pa cu e resto di e congregacion. Pa nan haci kico? Un encargo importante lo tabata pa duna e miembronan di e congregacion instruccion spiritual. Corda cu despues cu Hesus a resusita, el a bisa Pedro den presencia di algun di e otro apostelnan: “Simon yiu di Juan, bo ta stima mi?” Pedro a contest’e: “Si, Señor, bo sa cu mi tin cariño pa bo.” Hesus a bis’e: “Alimenta mi lamchinan ... Pastorea mi carne chikitonan ... Alimenta mi carne chikitonan.” (Juan 21:15-17, NW) Esei si tabata un encargo hopi importante!

⁵ Nos por mira for di e palabranan di Hesus cu por compara e personanan cu ta ser reuni den e congregacion cu carne den un tou. Lo mester alimenta e carnenan aki​—homber, muher y mucha cristian​—den sentido spiritual y pastorea nan apropiadamente. Ademas, siendo cu Hesus a manda tur su siguidonan pa siña otro hende y haci discipel, cualkier hende nobo cu ta bira su carne lo tin cu ser entrena pa cumpli cu e encargo divino ei.​—Mateo 28:19, 20.

6. Ki areglonan tabatin den e “congregacion di Dios” recien estableci?

⁶ Despues cu “e congregacion di Dios” a ser  forma, esnan cu tabata parti di dje a reuni regularmente pa ricibi instruccion y animacion mutuo: “Nan tabata dedica nan mes continuamente na e siñansa di e apostelnan y na e comunion cu otro, na e kibramento di pan y na oracion.” (Echonan 2:42, 46, 47) Un otro detaye notabel den e registro historico ta cu a apunta algun homber cualifica pa yuda atende cierto asuntonan practico. No a selecta nan pa motibo cu nan tabatin hopi scol of habilidad tecnico. E hombernan aki tabata “yen di spirito santo y di sabiduria.” Un di nan tabata Esteban, y e relato ta hala atencion na e echo cu e tabata “yen di fe y di spirito santo.” Debi cu e cristiannan tabata organisa den forma di congregacion, un resultado di esei tabata cu “e palabra di Dios a sigui plama; y e cantidad di discipel a sigui aumenta masha hopi mes na Jerusalem.”​—Echonan 6:1-7.

Hombernan Cu Dios A Uza

7, 8. (a) Como kico e apostelnan y ancianonan den Jerusalem a sirbi entre e prome cristiannan? (b) Ora a manda instruccion pa medio di e congregacionnan, kico tabata e resultado?

⁷ Manera bo por spera, ta e apostelnan a hiba delantera den e congregacionnan di prome siglo, pero nan no tabata e uniconan. Na dado momento, Pablo y su compañeronan a regresa Antiokia di Siria. Echonan 14:27 ta bisa: “Ora nan a yega y a yama e iglesia hunto, nan a conta tur loke Dios a haci [pa medio di] nan.” Mientras nan tabata cu e congregacion local ei, a lanta un pregunta tocante si mester a circuncida creyentenan no Hudiu. Pa resolve e asunto, nan a manda Pablo cu Barnabas “bai Jerusalem cerca e apostelnan y e ancianonan”, kendenan claramente tabata sirbi como un cuerpo gobernante.​—Echonan 15:1-3.

⁸ E anciano cristian Santiago, mitar ruman di Hesus pero no un apostel, a dirigi e reunion ora “e apostelnan y e ancianonan a bin hunto pa papia riba e asunto aki.” (Echonan 15:6) Despues di a delibera riba dje y cu yudansa di spirito santo, nan a yega na un conclusion na harmonia cu e Scritura. Nan a manda esaki por escrito pa e congregacionnan local. (Echonan 15:22-32) Esnan cu a ricibi e informacion aki a acept’e y aplic’e. Cu ki resultado? Esei a stimula y anima e rumannan. Bijbel ta informa: “Asina e iglesianan tabata wordo  fortifica den fe, y tabata bira cada dia mas hopi.”​—Echonan 16:5.

9. Den ki funcion hombernan cristian cu ta cumpli cu rekisitonan biblico ta sirbi?

⁹ Pero con e congregacionnan local mester a funciona riba un base diario? Tuma, por ehempel, e congregacionnan riba e isla di Creta. Aunke hopi hende cu tabata biba einan tabatin un mal reputacion, algun a cambia y a bira cristian berdadero. (Tito 1:10-12; 2:2, 3) Nan tabata biba den varios stad, y tur tabata keda hopi leu for di e cuerpo gobernante na Jerusalem. Sinembargo, esei no tabata un problema grandi pasobra, mescos cu na otro luganan, a nombra hombernan cu tabata ‘anciano’ den sentido spiritual den cada un di e congregacionnan local na Creta. E hombernan ei a cumpli cu e rekisitonan cu nos ta haya registra den Bijbel. Nan a ser nombra como anciano, of superintendente, cu por a “exhorta cu doctrina sano y refuta esnan cu ta contradeci.” (Tito 1:5-9; 1 Timoteo 3:1-7) Otro hombernan spiritual a cumpli cu e rekisitonan biblico necesario pa yuda den e congregacionnan como diacono, of sirbidor ministerial.​—1 Timoteo 3:8-10, 12, 13.

10. Segun Mateo 18:15-17, con mester a resolve problemanan serio?

¹⁰ Hesus a indica cu un structura asina lo a existi. Corda e relato na Mateo 18:15-17, caminda el a remarca cu tin biaha por surgi dificultad entre dos sirbidor di Dios, ora esun peca contra e otro. Esun cu a keda perhudica mester a acerca e otro y “mustr’e su falta” den priva, esta, entre nan dos so. Si e paso ei no a resolve e asunto, kisas por a pidi un of dos otro persona cu tabata na haltura di e echonan pa yuda. Y si esei ainda no a resolve e asunto, kico mester a haci? Hesus a bisa: “Si e nenga di scucha nan, bisa iglesia esaki; y si e nenga di scucha asta na iglesia, lag’e ta pa bo manera un pagano y un publicano.” Tempo cu Hesus a bisa esei, ainda “e congregacion di Dios” tabata e nacion Hudiu, pues na prome instante su palabranan a aplica na nan. * Sinembargo, unabes a establece e congregacion cristian, e instruccion di Hesus lo a aplica na dje. Esaki ta un otro indicacion cu e pueblo di Dios lo tabatin un structura di congregacion pa edifica y guia cada cristian.

11. Ki papel ancianonan mester a hunga den resolve problema?

¹¹ E ancianonan, of superintendentenan, tabata esnan indica pa representa e congregacion local ora di atende of resolve problema of ora di trata casonan di pica. Esei ta cuadra cu e cualificacionnan di anciano menciona na Tito 1:9. Ta berdad cu e ancianonan local tabata hombernan imperfecto, mescos cu Tito, kende Pablo a manda na e congregacionnan pa corigi of “regla loke [tabata] falta.” (Tito 1:4, 5) Awe, e rumannan cu ta ser evalua pa keda nombra como anciano mester ta demostrando nan fe y devocion pa un tempo caba. Esei ta duna otro rumannan den e congregacion motibo pa pone confiansa den e guia y direccion cu nan ta ricibi atrabes di e areglo aki.

12. Ki responsabilidad ancianonan tin pa cu e congregacion?

¹² Pablo a bisa e ancianonan den e congregacion di Efeso: “Presta atencion na boso mes y na henter e tou, den cua e spirito santo a nombra boso como superintendente, pa pastorea e congregacion di Dios, cua el a cumpra cu e sanger di su propio Yiu.” (Echonan 20:28, NW) Awe tambe ta nombra superintendentenan di congregacion “pa pastorea e congregacion di Dios.” Nan mester haci esei cu amor, sin domina e tou. (1 Pedro 5:2, 3) E superintendentenan mester haci esfuerso pa edifica y yuda “henter e tou.”

 No Aleha di e Congregacion

13. Tin biaha, kico por sosode den un congregacion y dicon?

¹³ E ancianonan y tambe tur otro miembro di e congregacion ta imperfecto, pues de bes en cuando por presenta un problema of mal comprondemento, manera a sosode den prome siglo tempo cu ainda algun di e apostelnan tabata na bida. (Filipensenan 4:2, 3) Kisas un superintendente of un otro persona ta bisa algo cu ta parce ofensivo, sin consideracion of no completamente berdad. Of kisas nos ta pensa cu algo cu ta bai contra di principionan di Bijbel ta tumando luga, pero ta parce cu aunke e ancianonan local ta na haltura di e asunto, nan no ta corigie. Podise debidamente e ancianonan a atende of ta atendiendo e asunto na harmonia cu e Scritura y a base di echonan di cua nos no ta na haltura di dje. Pero asta si e situacion ta manera nos ta pensa, considera esaki: Pa un tempo tabata existi un malecho serio den e congregacion di Corinto. Jehova tabatin e interesnan di e congregacion ei na pecho y cu tempo el a percura pa atende e malecho na un manera corecto y firme. (1 Corintionan 5:1, 5, 9-11) Nos por puntra nos mes: ‘Si ami tabata biba na Corinto e tempo ei, con lo mi a reacciona tanten cu no a resolve e asunto?’

14, 15. Pakico algun persona a stop di sigui Hesus, y ki les esei ta siña nos?

¹⁴ Considera un otro cos cu por pasa den e congregacion. Supone cu un persona ta haya un siñansa biblico dificil pa compronde y acepta. Kisas el a haci investigacion den Bijbel y den publicacionnan disponibel via e congregacion y a busca yudansa di otro cristiannan maduro, asta ancianonan. Pero e tin problema pa capta of acepta e punto. Kico e por haci? Algo similar a tuma luga mas o menos un aña prome cu Hesus a muri. El a bisa cu e tabata “e pan di bida” y cu pa un hende haya bida eterno e tabatin cu “come e carni di e Yiu di hende y bebe su sanger.” Esei a shock algun di su discipelnan. En bes di busca un splicacion of simplemente warda cu fe den Jehova, hopi discipel ‘no a cana cu Hesus mas.’ (Juan 6:35, 41-66) Un biaha mas, si nos tabata einan, kico nos lo a haci?

¹⁵ Den nos tempo, algun persona a stop di asocia cu e congregacion local, pensando cu nan por sirbi Dios riba nan mes. Podise nan ta duna como motibo cu nan a ser ofendi, of nan ta pensa cu e ancianonan no ta corigiendo un  malecho of cu nan no por acepta cierto doctrina. Nan manera di actua ta rasonabel? Aunke en berdad cada cristian mester tin un relacion personal cu Dios, nos no por nenga cu e ta uzando un congregacion mundial, manera el a haci den tempo di e apostelnan. Ademas, Jehova a uza y a bendiciona e congregacionnan local den prome siglo, y a percura pa tin anciano y sirbidor ministerial cualifica pa beneficia e congregacionnan. Esei ta e caso awe tambe.

16. Si un persona ta hunga cu e idea di bandona e congregacion, riba kico e mester pensa?

¹⁶ Si un cristian ta sinti cu e por depende riba su relacion cu Dios sin tin nodi asocia cu un congregacion, de echo e ta rechasando un areglo cu Dios a establece, esta esun di tanto e congregacion mundial como e congregacionnan local di e pueblo di Dios. Kisas e persona ta dal bai riba su mes of ta asocia cu djis algun otro individuo, pero unda e areglo di anciano di congregacion y di sirbidor ministerial a keda? Ta bon pa nota cu ora Pablo a skirbi e congregacion na Colosas y a manda nan lesa e carta na Laodicea tambe, el a bisa nan pa nan ta hancra of ‘araiga y edifica den Cristo.’ E miembronan di e congregacionnan ei, no individuonan cu a separa nan mes for di nan, lo a beneficia di esaki.​—Colosensenan 2:6, 7; 4:16.

Pilar y Sosten di e Berdad

17. Kico 1 Timoteo 3:15 ta siña nos tocante e congregacion?

¹⁷ Den e prome carta cu apostel Pablo a skirbi e anciano cristian Timoteo, el a menciona e rekisitonan cu anciano y sirbidor ministerial den congregacionnan local mester cumpli cu ne. Un poco despues di esei, Pablo a menciona “e iglesia di e Dios bibo”, bisando cu esaki ta “e pilar y sosten di e berdad.” (1 Timoteo 3:15) Henter e congregacion di cristian ungi sigur a demostra di ta un pilar asina den e prome siglo. Y sin duda e manera principal cu e cristiannan individual por a ricibi e berdad ei tabata via e congregacion local. Ei ta caminda nan por a tende con e rumannan a presenta y defende e berdad, caminda nan por a ser edifica.

18. Pakico e reunionnan di congregacion ta sumamente importante?

¹⁸ Mescos tambe e congregacion mundial di cristiannan ta e cas di Dios, “pilar y sosten di e berdad.” Un manera principal den cua nos ta ser edifica, fortaleci den nos relacion cu Dios, y prepara pa haci su boluntad ta ora nos ta asisti regularmente na e reunionnan di nos congregacion local y ta participa den nan. Tempo cu Pablo a skirbi e congregacion na Corinto, el a enfoca riba loke nan a papia na e reunionnan ei. El a skirbi cu el a desea pa loke nan a papia na nan reunionnan tabata cla y comprendibel pa asina esnan cu a asisti na dje por a ser “edifica.” (1 Corintionan 14:12, 17-19) Awe, si nos ta reconoce cu ta Jehova Dios a autorisa e areglo pa congregacionnan local y ta sosteniendo esaki, nos tambe por ser edifica.

19. Dicon bo mester ta gradicido na bo congregacion?

¹⁹ Pues, si nos ta desea di ser edifica como cristian, nos mester keda den e congregacion. Pa hopi tempo caba el a resulta di ta un proteccion contra siñansa falso, y Dios ta uzand’e pa percura pa e bon nobo di su Reino Mesianico ser declara rond mundo. Sin duda, Dios a logra hopi cos pa medio di e congregacion cristian.​—Efesionan 3:9, 10.

[Nota]

Bo Ta Corda?

• Pakico nos mester spera cu Dios ta uzando congregacionnan riba Tera?

• Kico ancianonan, a pesar cu nan ta imperfecto, ta haci pa e congregacion?

• Con bo congregacion ta edifica bo?

[Preguntanan di Estudio]

[Plachi na pagina 26]

E apostelnan y ancianonan den Jerusalem a sirbi como un cuerpo gobernante

[Plachi na pagina 28]

Anciano- y sirbidornan ministerial ta ricibi instruccion pa nan por cumpli cu nan responsabilidadnan pa cu e congregacion