Ora Expectativanan No Cristalisa

DESILUSION por desaroya den cualkier matrimonio, asta si durante enamoracion a parce cu un pareha tabata pas bon cu otro. Pero con dos hende cu aparentemente tabata bai asina bon cu otro prome cu nan casa, por cambia y bira asina distinto despues?

Bijbel ta bisa cu hende cu casa lo tin “dolor y tristesa.” (1 Corintionan 7:28, The New English Bible) Hopi bes un grado di e tribulacion ei ta debi na imperfeccion humano. (Romanonan 3:23) Ademas, por ta asina cu un of ambos partner no ta aplicando principionan biblico. (Isaias 48:17, 18) Pero tin biaha tambe ta e homber of e muher ta drenta bida matrimonial cu expectativanan cu no ta realistico. Ora cu ta asina, mal comprondemento por hiba na problemanan serio.

Expectativanan Cu No Ta Realistico

Si bo ta casa, probablemente bo a drenta bida matrimonial cu varios expectativa; mayoria di hende ta haci esei. Tuma un momento pa reflexiona riba e clase di bida cu bo a spera cu lo bo tabatin. Bo matrimonio no ta loke bo a imagina? Si ta asina, no conclui cu bo problemanan ta sin solucion. Si bo aplica principionan biblico, esei por yuda bo corigi e situacion. * (2 Timoteo 3:16) Mientrastanto, ta bon pa bo analisa algun di e expectativanan cu bo tabatin tocante matrimonio.

Por ehempel, tin hende a pensa cu den bida casa semper lo a reina un ambiente romantico, manera bo ta lesa den sprookje. Of podise bo a pensa cu abo cu bo casa lo a pasa mayoria di boso tempo hunto of cu boso dos lo a resolve tur desacuerdo den un manera suave y madura. Hopi hende a kere cu unabes nan ta casa, nan lo no tabatin nodi eherce dominio propio mas den asuntonan sexual. Como cu tur e expectativanan comun aki no ta masha realistico, nan sigur lo laga algun hende keda decepciona.​—Genesis 3:16.

Un otro expectativa cu no ta realistico ta cu matrimonio riba su mes lo haci un persona felis. Claro cu ora bo tin un partner den bida, esei por ta un gran fuente di goso. (Proverbionan 18:22; 31:10; Eclesiastes 4:9) Pero acaso nos por spera cu matrimonio lo ta un cura milagroso pa tur desacuerdo? Pa hende cu ta pensa esei, un dia realidad lo por dal nan duro!

Expectativanan Cu No Ta Ser Expresa

No ta tur expectativa ta irealistico. Al contrario, algun di nan ta ensera deseonan cu ta na nan luga. Pero problema por surgi debi na cierto expectativa. Un consehero matrimonial a comenta lo siguiente: “Mi sa mira con parehanan ta rabia cu otro pasobra un di  nan ta warda pa e otro cumpli cu un cierto deseo, mientras cu e otro nunca tabata sa mes di e deseo ei.” Pa compronde con esaki por sosode, laga nos considera e siguiente senario.

Maria a casa cu David, kende tabata biba cientos di kilometer leu for di Maria su stad natal. Prome cu e casa, Maria a realisa cu lo no ta facil ora cu e bai biba den un area nobo, specialmente como cu di naturalesa e ta un persona timido. Sinembargo, e tabatin sigur cu David lo a yud’e adapta. Por ehempel, Maria a spera cu David lo a keda hunto cu ne y yud’e sera conoci cu David su amistadnan. Sinembargo, esaki no a sosode. David tabata bai combersa cu su tantisimo amigonan, y laga Maria cu a caba di yega, su so. Maria ta sinti su mes neglisha, asta un poco bandona. E ta puntra su mes: ‘Con David por ta sin consideracion asina?’

E expectativa di Maria ta irealistico? En realidad, no. Simplemente e kier pa su casa yud’e adapta na e ambiente nobo. Maria ta timido, y e no sa con e tin cu haci pa sera conoci cu tanto hende nobo asina. Pero echo ta cu Maria no a bisa David nunca con e ta sinti. Pues, David no tin e minimo idea di loke Maria ta pasando aden. Kico lo pasa si e situacion sigui asina? Maria su rencor lo por sigui crece, anto despues di tempo, lo e por pensa cu su esposo no tin cu nes cu su sintimentonan.

Podise bo tambe a yega di sinti bo decepciona y frustra ora cu bo casa aparentemente no ta reacciona riba loke bo tin mester. Si esei ta e caso, kico bo por haci?

Papia!

Expectativanan cu no cristalisa en berdad por causa afliccion. (Proverbionan 13:12)  Pero tin un cos cu bo por haci tocante e situacion. Un proverbio biblico ta bisa: “Bo por combence otronan si bo ta sabi y ta papia rasonablemente.” (Proverbionan 16:23, Contemporary English Version) Pues, si bo ta sinti cu bo tin un expectativa rasonabel y bo casa no ta cumpliendo cu ne, papia tocante e asunto cu bo casa.

Purba scohe e momento corecto, e ambiente corecto y e palabranan corecto pa expresa bo precupacionnan. (Proverbionan 25:11) Papia trankil y cu respet. Corda cu bo meta no ta pa acusa bo casa, sino pa inform’e di bo expectativanan y sintimentonan.​—Proverbionan 15:1.

Pero pakico lo bo tin cu haci esaki mes? Un casa comprensivo no mester por ripara ki necesidadnan bo tin? Wel, podise bo casa simplemente ta mira e asunto for di un otro angulo, pero gustosamente lo e tuma na cuenta bo necesidadnan si bo splic’e nan. Si bo tin cu expresa loke bo kier of tin mester, esei no ta nifica cu bo tin un mal matrimonio of cu bo casa no tin consideracion.

Pues, no basila pa papia tocante asuntonan cu bo casa. Por ehempel, den e situacion describi anteriormente, Maria lo por a bisa David: “Mi tin cu admiti cu ta un poco dificil pa mi pa sera conoci cu asina tanto hende nobo. Lo bo por yuda mi sera conoci cu tur hende te ora cu mi ta sinti mi un poco mas na cas?”

 “Lihe pa Tende”

Awor wak e asunto for di un otro angulo. Supone cu bo casa ta bin cerca bo, y ta bisa bo cu e ta sintie afligi pasobra bo no ta cumpliendo cu un expectativa rasonabel cu e tin. Si esaki sosode, scucha bo casa! Purba di no bira defensivo. Mas bien, sea “lihe pa tende, no lihe pa papia y no lihe pa rabia.” (Santiago 1:19; Proverbionan 18:13) Apostel Pablo a urgi cristiannan: “No laga ningun hende busca su mes interes, sino esun di su prohimo.”​—1 Corintionan 10:24.

Bo por haci esaki dor di pone bo mes den sapato di bo casa. Bijbel ta declara: “Boso, esposonan, biba cu boso esposanan cu comprension”, of manera e traduccion di J. B. Phillips ta bis’e, “boso, esposonan, purba di compronde e esposa cu boso ta biba cu ne.” (1 Pedro 3:7) Claro cu ta bon pa esposanan tambe haci e mesun esfuerso relaciona cu nan esposo.

Corda, maske con bon abo cu bo casa ta pas cu otro, boso no tin e mesun punto di bista riba tur asunto. (Wak e cuadro “Mesun Paisahe, Diferente Bista.”) En realidad esaki ta un bendicion, pasobra ta bon pa considera asuntonan for di e punto di bista di un otro hende. Abo cu bo casa cada un a bin cu expectativanan unico, basa riba cosnan manera antecedente di famia y cultura. Como resultado, boso por ta profundamente enamora di otro, pero toch boso no tin e mesun expectativanan.

Por ehempel, parehanan cristian ta bon na haltura di e principio biblico di hefatura. (Efesionan 5:22, 23) Pero con, specificamente, hefatura lo ser eherce den boso famia, y con sumision lo keda demostra? Boso dos ta laga e principio biblico aki guia boso, y boso ta haciendo berdadero esfuerso pa siguie?

Podise boso por tin ideanan distinto tambe relaciona cu otro asuntonan di bida diario. Ken lo atende cierto tareanan di cas? Ki ora boso lo bai bishita famia, y cuanto tempo lo dedica na esei? Con parehanan casa lo mustra cu nan ta poniendo interesnan di Reino na prome luga den nan bida? (Mateo 6:33) Pa loke ta asuntonan financiero, ta masha facil pa hinca boso curpa den debe, pues ta bale la pena pa boso ta economico y no dispidi. Pero kico precies kiermen ser economico y no dispidi? Boso tin cu papia abiertamente y respetuosamente tocante asuntonan asina, y esei lo trece gran beneficio.

E tipo di combersacionnan ei por yuda bo logra mas pas den bo matrimonio, asta si te cu awor algun di bo expectativanan no a cristalisa. De echo, lo bo ta den mihor posicion pa aplica e conseho di apostel Pablo: “Boso soporta otro y pordona otro, si un di boso tin un keho contra un otro.”​—Colosensenan 3:13.

[Nota]

[Cuadro/​Plachi na pagina 10]

MESUN PAISAHE, DIFERENTE BISTA

‘Imagina bo un grupo grandi di turista cu ta admira un paisahe bunita. Aunke henter e grupo ta mira e mesun paisahe, cada persona ta mir’e diferente. Pakico? Pasobra cada persona tin un punto di bista distinto. No tin dos persona cu ta para precisamente na e mesun sitio. Ademas, tur hende no ta enfoca riba e mesun seccion di e paisahe. Cada persona ta haya un aspecto diferente cu ta specialmente interesante. Mescos ta cierto den matrimonio. Asta ora e pareha ta pas masha bon hunto, nan dos no tin precisamente e mesun punto di bista di un asunto ... Comunicacion ta inclui haci esfuerso pa harmonisa e diferencianan den un relacion di un solo carni. Pa logra esaki ta necesario pa traha tempo pa papia.’​—E Toren di Vigilancia, 1 di augustus 1993, pagina 4.

[Cuadro na pagina 11]

LOKE BO POR HACI AWOR

• Bolbe analisa bo expectativanan. Nan ta realistico? Bo ta spera mas di bo casa di loke ta rasonabel?​—Filipensenan 2:4; 4:5, NW.

• Purba ahusta cualkier expectativa cu no ta realistico. Por ehempel, en bes di bisa “nunca nos lo no tin desacuerdo”, pone bo pa haci esfuerso pa resolve desacuerdo na un manera trankil.​—Efesionan 4:32.

• Combersa cu otro tocante boso expectativanan. Papiamento tocante un asunto ta un paso clave pa siña con pa mustra amor y respet pa otro.​—Efesionan 5:33.

[Plachi na pagina 9]

Sea “lihe pa tende” loke ta precupa bo casa