Pregunta di Lector

Un cristian mester evita di come y bebe cos cu ta contene cafeina?

Bijbel no ta prohibi un cristian di bebe cofi, te, chuculati, maté (te di paisnan Sur Americano) y refresco cu ta contene cafeina. Loke si nos ta haya den e Scritura ta principionan cu por yuda nos tuma decisionnan sabi. Laga nos considera prome pakico algun hende ta evita di come y bebe cos cu ta contene cafeina.

Un di e motibonan principal ta cu cafeina por ser considera como un droga cu ta causa cambio den hende su estado di animo, ya cu e tin un efecto stimulante riba e mente. E por causa adiccion tambe. Un buki di consulta basico pa boticario ta declara: “Consumo prolonga di hopi cafeina por pone e curpa custumbra cu ne y cuminsa depende psicologicamente di dje. Si e curpa stop di haya e stimulante diripiente, esei por causa dolor di cabes, iritacion, nerviosismo, ansiedad y biramento di cabes.” Autornan di e buki Diagnostic and Statistical Manual of Mental Disorders (Manual Diagnostico y Estadistico di Trastornonan Mental) a pensa di menciona e sintomanan cu sa presenta ora e curpa stop di haya cafeina, hunto cu e sintomanan cu sa presenta ora hende stop di uza otro droga. P’esei, ta di compronde cu kisas algun cristian no ta haya ta corecto pa come y bebe cos cu ta contene cafeina ya cu nan kier evita tur loke por crea adiccion y nan ta desea di desplega dominio propio.​—Galationan 5:23.

Tin hende ta kere cu cafeina por afecta un persona su salud of esun di un mucha cu no a nace ainda. Cristiannan mester stima Dios ‘cu henter nan alma’, pues nan no ta haci nada cu por causa nan morto prematuro. Y siendo cu Bijbel ta manda nan tambe pa stima nan prohimo, nan ta evita tur loke por causa daño na un yiu cu no a nace ainda.​—Lucas 10:25-27.

Tal precupacionnan encuanto salud ta hustifica? Aunke algun experto ta pretende cu cafeina por causa varios enfermedad, no ta tur ta di acuerdo cu esaki. Algun asta ta bisa cu cofi ta saludabel. Na 2006, e revista Time a informa: “E prome estudionan a indica [cu cafeina] por causa cancer na blas, presion halto y otro enfermedad. Investigacion mas recien no solamente a refuta mayoria di e pretensionnan ei sino tambe a descubri algun beneficio significativo. Aparentemente cafeina tin un of otro efecto cu ta sirbi como proteccion contra daño na higra, malesa di Parkinson, diabetes, Alzheimer, piedra na gal, depresion y kisas asta algun forma di cancer.” Tocante uzo di cafeina, un revista di noticia a bisa: “E clave ta moderacion, y esei no ta un sorpresa.”

Cada cristian lo mester tuma su mes decision a base di loke e ta compronde di e informacion cu tin actualmente disponibel tocante cafeina y e principionan biblico cu por tin di aber cu e asunto. Por ehempel, un cristian cu ta na estado por dicidi di no come ni bebe nada cu ta contene cafeina durante su embaraso si e ta pensa cu esei lo por afecta e yiu cu no a nace ainda. Si un cristian ripara cu e ta bira crepchi of un poco malo ora e no gasta nada cu ta contene cafeina manera ta su custumber, kisas ta consehabel pa e abstene di cafeina, por lo menos pa un tempo. (2 Pedro 1:5, 6) Otro cristiannan mester respeta un decision asina y no impone nan punto di bista.

Sea cual sea e decision cu bo tuma relaciona cu cos di come y di bebe cu ta contene cafeina, corda e spiertamento di Pablo: “Sea cu boso ta come of bebe of kico cu boso ta haci, haci tur pa e gloria di Dios.”​—1 Corintionan 10:31.