Un Cunucu “Blanco pa Wordo Cosecha”

Na e punta mas noord di Sur America bo ta haya e Peninsula Guajira. E ta keda den noord di Colombia y den noordwest di Venezuela. E semidesierto aki ta sufri bou di un solo cu ta kima y debi na tiki awasero, caminda temperatura ta subi te na 43 grado Celsius. A pesar di e clima, e hendenan cu ta biba akinan ta traha duro den cunucu y ta productivo. E brisa constante for di lama y e biento di noordoost passaat ta haci bida soportabel, y ta permiti bishitante disfruta di paisahenan fascinante y beachnan bunita.

BONBINI na e pais di indjannan Guayu (of Wayuu). Tin alrededor di 305.000 Guayu, di cua 135.000 ta biba na Colombia. Hopi tempo prome cu e colonisacion Spaño, ya e tribu aki tabata biba akinan caba.

E pueblo Guayu ta biba principalmente di crio di bestia y agricultura. Tambe nan ta pisca y haci negoshi cu paisnan bisiña. E hende muhernan ta masha habil den weef tela na colornan briyante, y nan productonan ta popular cerca turista.

Indjannan Guayu ta conoci pa nan sinceridad y hospitalidad. Sinembargo, nan tambe ta bibando den “temponan trabahoso.” (2 Timoteo 3:1) Pobresa ta un di nan problemanan principal cu, na su turno, ta hiba na otro dificultad, manera analfabetismo, muchanan malnutri, falta di cuido medico y, den algun area, delincuencia.

Pa hopi aña, iglesianan di cristiandad a manda misionero pa biba entre e indjannan Guayu. Como resultado, mayoria di internat y scol pa entrena maestro ta bou di control di iglesia. Hopi Guayu a acepta e asina yama custumbernan cristian, manera adoracion di imagen y bautismo di yiu, pero nan no a bandona nan creencianan y ritonan cu ta hancra den supersticion y mitologia tradicional.

Por lo general, e indjannan Guayu ta teme Dios y ta reacciona faborablemente riba berdadnan biblico cu Testigonan di Jehova ta siña nan. Na principio di decada di 1980 tabatin shete Testigo Guayu so na Guajira, tres di nan tabata biba na Ríohacha, e capital. Fuera di e Testigonan indjan, tabatin 20 publicador mas cu tabata predica e bon nobo di Reino einan na Spaño.

E Mensahe na Nan Mes Idioma

Mayoria di Guayu cu ta biba na Ríohacha ta papia un tiki Spaño banda di nan idioma nativo, Guayunaiki. Na principio e Testigonan no tabatin masha exito den e predicacion di e mensahe di Reino. Aparentemente e indjannan tabata evita e arijunas, manera nan ta yama hende cu no ta Guayu. Ora cu e Testigonan tabata yama na nan cas, mayoria di Guayu tabata contesta den nan propio idioma, no na Spaño. E ora ei Testigonan simplemente a bai na e siguiente cas.

Sinembargo, na fin di 1994 e sucursal di Testigonan di Jehova a asigna un grupo di pionero special, esta predicadonan di tempo completo,  pa sirbi den Congregacion Ríohacha. E pioneronan a pidi un Testigo Guayu siña nan Guayunaiki. Despues di a siña algun presentacion simpel for di cabes, e pioneronan ei a bai den e teritorio y mesora a ripara un cambio remarcabel den e reaccion di e hendenan. A pesar cu e pioneronan special tabata papia Guayunaiki kibra, e doñonan di cas a haya esei un grato sorpresa y tabata dispuesto pa scucha, y tin biaha a sigui cu un combersacion anima den nan propio Spaño kibra.

“Blanco pa Wordo Cosecha”

Apostel Pablo a compara e trabou cristian di haci discipel cu cultivacion di un cunucu, un comparacion cu e pueblo Guayu cu ta biba principalmente di agricultura ta compronde bon. (1 Corintionan 3:5-9) Den sentido figurativo, e cunucu Guayu en berdad ta “blanco pa wordo cosecha.”​—Juan 4:35.

Neil, un indjan Guayu cu a biba na Manaure, tabata sufri di un defecto fisico for di ora el a nace. Neil tabata culpa Dios pa esaki, y tabata asina deprimi te cu el a purba di mata su curpa. Un Testigo tabata bishita varios pueblito en conexion cu su trabou y tabata probecha pa predica di cas pa cas. El a papia cu Neil tocante e Reino di Jehova. Neil tabatin apenas 14 aña. Tumando nota di Neil su interes, e Testigo a cuminsa un estudio di Bijbel cu ne. Neil tabata contento di por a siña tocante e personalidad amoroso di Jehova, y el a yega na e conclusion cu no ta Dios a causa su sufrimento. El a keda profundamente conmovi ora el a lesa tocante Dios su promesa di un paradijs riba Tera den cua lo no tin malesa mas!​—Isaias 33:24; Mateo 6:9, 10.

E tempo ei, e famia di Neil tabata den un pleito cu un otro famia. Den un intento pa garantisa nan propio proteccion, e famianan di Neil a haci cierto ritualnan di tribu. Neil a conta: “Na prome instante mi tabatin miedo di papia cu mi famia tocante mi fe nobo, specialmente cu e cabesnan di famia, cu ta ser altamente respeta.” E mayornan di Neil a rabia ora nan a haya sa cu lo e no sigui creencianan cu no ta di acuerdo cu Bijbel ni practica custumbernan relaciona cu spiritismo. Neil a bai biba na Ríohacha y a cuminsa asocia cu e congregacion einan. Mas despues el a batisa. Na 1993 el a cuminsa sirbi como sirbidor ministerial, y tres aña despues el a bira pionero regular. Anto na 1997 el a keda nombra como anciano di congregacion. Na aña 2000, el a expande su ministerio y a bira pionero special.

Considera tambe e caso di Teresa, un indjan Guayu cu a cuminsa studia Bijbel cu Testigonan di Jehova. Su compañero di bida, Daniel, tabata haci bofon di dje y maltrata e cu nan tres yiunan fisicamente. Aunke despues Daniel a bai di acuerdo pa studia Bijbel hunto cu Teresa, hopi biaha e tabata bai core paranda di bebemento cu su amigonan, tin bes pa cuater of cinco dia. El a laga su famia den miseria. Teresa a sigui studia fielmente y tabata asisti na reunionnan cristian. Esaki a yuda Daniel mira e importancia di studia Bijbel.  Anto un dia un di nan yiunan a cai accidentalmente den un weya di awa cu tabata herbe y a muri di kemaduranan severo. Fuera di e tristesa profundo debi na morto di su yiu homber, Teresa a hay’e cu presion di amigo- y bisiñanan pa cumpli cu custumbernan di entiero cu no tabata cuadra cu Bijbel.

Durante e periodo dificil ei, e pareha aki a haya animacion y consuelo for di miembronan di e congregacionnan den bisindario. Despues di entiero, nan a sigui haya bishitanan di consuelo di parti di e congregacion local di idioma Guayu. Ora cu Daniel a mira e amor cu e miembronan di e congregacionnan a demostra, el a sintie motiva pa haci progreso spiritual. El a stop di bebe y di maltrata Teresa. Daniel cu Teresa a casa, y Daniel a cuminsa traha duro pa mantene su famia. Nan a haci progreso spiritual y a batisa na 2003. Ambos ta conduci varios estudio di Bijbel. Debi na e bon testimonio cu Teresa a duna su famia, nan ta dispuesto pa scucha ora e Testigonan bishita nan. Un subrino di Daniel ta un publicador no batisa, y dos subrina ta studia Bijbel y asisti na reunionnan di congregacion. Teresa su cuña, kende tambe a perde un yiu den un accidente, y famia di e cuña tambe a mustra interes pa studia Bijbel.

Cuminda Spiritual na Idioma Guayunaiki

Na 1998 e foyeto chikito Disfruta di bida riba tera pa semper! * a sali na Guayunaiki. Esaki a bira un herment valioso pa cultiva e cunucu Guayu y pa conduci estudionan di Bijbel na cas. Na 2003 a haci areglo pa entrena varios ruman pa nan por traduci publicacionnan di Testigonan di Jehova na Guayunaiki. Gracias na e trabou duro di un grupo di traductor na Ríohacha, tin awor mas foyeto y esei a contribui na e crecemento spiritual di e discipelnan di abla Guayunaiki.

Desde aña 2001, ta traduci algun discurso di e programa di congreso di districto na Guayunaiki. Studiantenan di Bijbel ta ser stimula spiritualmente ora nan tende e programa na nan propio idioma. Nan ta spera cu anhelo pa den futuro cercano e dramanan biblico tambe keda presenta na Guayunaiki.

Un Cunucu Productivo

Uribia ta un pueblito cu ta keda un 100 kilometer noordoost di Ríohacha. Congregacion Uribia Guayu tin 16 publicador di Reino, y hopi di nan ta haciendo mas esfuerso pa predica na e indjannan cu ta biba den cunucu. Un di e ancianonan di congregacion a conta lo siguiente di un di e biahenan ei di predicacion cu nan a haci: “Nos a bishita un rancho cu a consisti di mas o menos diesdos cas cu tabatin dak no mucho halto y bentananan chikito. Dilanti di cada cas tabatin un dak plat traha di yotojolo, e palo cu tin parti paden di un stam di cactus. Bou di e dak ei, famia y bishitante ta haya proteccion for di e solo cu ta kima. Nos a keda contento di mira cu hopi hende a mustra gran interes, p’esei nos a haci areglo pa bin bek pa cuminsa studia Bijbel cu nan. Ora nos a bolbe, nos a ripara cu hopi no por a lesa ni skirbi. Nan a conta nos cu tabatin un edificio di scol pero cu el a ser bandona pa falta di placa. E persona encarga bondadosamente a duna nos permit pa uza un di e localnan di klas pa tene cursonan di alfabetisacion y pa conduci estudio di Bijbel. Seis indjan Guayu a siña lesa y skirbi y ta haciendo progreso den nan estudio di Bijbel. Nos ta profundamente conmovi pa e aprecio cu e hendenan ta demostra, p’esei nos tin pensa di cuminsa tene reunion na e rancho.”

Un cantidad di Testigo cu no ta indjan a siña Guayunaiki, y nan yudansa ta ser aprecia masha. Riba e Peninsula Guajira tin ocho congregacion y dos grupo cu awor ta uza e idioma aki.

Jehova su bendicion riba e esfuersonan aki ta bisto. Sin duda, lo por logra mas den e predicacion di e bon nobo entre e indjannan Guayu. Nos ta spera mas bon resultado segun cu esnan cu ta conciente di nan necesidad spiritual ta bira discipel cristian. Nos ta pidi pa Jehova manda mas predicado pa cultiva e cunucu aki cu ta “blanco pa wordo cosecha.”​—Mateo 9:37, 38.

[Nota]

[Mapa na pagina 16]

(Pa e texto den su formato completo , wak e publicacion)

VENEZUELA

COLOMBIA

LA GUAJIRA

Manaure

Ríohacha

Uribia

[Reconocemento pa Potret na pagina 16]

Campamento di Guayu akibou: Victor Englebert