No Separa Loke Dios A Uni

“Nan no ta dos mas, sino un carni. P’esei loke Dios a uni, no laga ningun hende separa.”​—MATEO 19:6.

1, 2. Pakico ta biblico y realistico pa spera cu de bes en cuando parehanan casa lo haya nan cu problema?

IMAGINA bo cu bo ta cla pa cuminsa un biahe largo cu auto. Bo por haya bo cu dificultad na caminda? Lo bo ta ingenuo pa pensa cu nada lo no por pasa! Por ehempel, bo por haya bo cu mal weer, y p’esei lo bo tin cu baha velocidad y core cu mas cuidou. Dado momento bo por haya bo cu un problema di motor cu abo mes no por soluciona, y p’esei lo bo tin cu hala cant’i caminda y busca yudansa. Acaso e situacionnan ei mester pone bo conclui cu tabata un kibocacion pa cuminsa e biahe y cu bo mester bai laga e auto? No. Ora bo ta biaha un distancia largo, bo ta spera problema y cu sano huicio bo ta busca un manera pa soluciona nan.

² Mescos ta conta pa matrimonio. Problema ta inevitabel, y si un pareha cu ta plania pa casa ta kere cu nan lo hiba un bida di puro felicidad, nan lo ta basta ingenuo! Na 1 Corintionan 7:28, Bijbel ta bisa francamente cu esposo y esposa lo tin “tribulacion den e bida aki.” Pakico esaki ta e caso? Simplemente pasobra esposo y esposa ta imperfecto, y nos ta bibando den “temponan trabahoso.” (2 Timoteo 3:1; Romanonan 3:23) P’esei, asta un pareha compatibel, cu inclinacion spiritual, de bes en cuando lo haya nan cu problema.

3. (a) Con hopi hende di mundo ta mira matrimonio? (b) Pakico cristiannan ta haci esfuerso pa conserva nan matrimonio?

³ Den e mundo moderno aki, ora algun pareha haya problema cu otro, nan prome reaccion ta pa kibra e matrimonio. Den hopi pais, e cifranan di divorcio ta aumentando drasticamente. Sinembargo, cristiannan berdadero ta enfrenta problema en bes di core pa nan. Pakico? Pasobra nan ta mira matrimonio como un regalo sagrado di Jehova. Relaciona cu parehanan casa, Hesus a bisa: “Loke Dios a uni, no laga ningun hende separa.” (Mateo 19:6) Ta berdad cu no ta semper facil pa biba segun e principio ei. Por ehempel, hopi bes famia y otro personanan​—incluso algun consehero di matrimonio​—cu no ta reconoce principionan di Bijbel ta anima parehanan pa separa of divorcia sin cu nan tin un base biblico. * Pero cristiannan sa cu ta mucho mas mihor pa haci esfuerso pa mehora y conserva nan matrimonio cu core kibr’e. Si, ta masha importante pa for di cuminsamento nos ta determina pa haci cosnan segun e camindanan di Jehova​—no segun e conseho di hende.​—Proverbionan 14:12.

Vence Dificultad

4, 5. (a) Ki dificultadnan por presenta den un matrimonio? (b) Dicon e principionan cu nos por haya den e Palabra di Dios realmente ta duna resultado, asta ora surgi problema den un matrimonio?

⁴ Den tur matrimonio sa pasa cosnan cu mester di atencion. Den mayoria caso, esei lo ensera resolve desacuerdonan menor. Pero den algun matrimonio kisas tin dificultadnan mas serio cu ta menasa e fundeshi di e relacion. Tin biaha lo bo tin cu busca yudansa  di un anciano cristian casa cu tin experencia. Sinembargo, e echo cu boso ta pasa den e situacionnan aki no ta nifica cu boso matrimonio ta un fracaso. Simplemente nan ta enfatisa e importancia di pega firmemente na principionan di Bijbel ora di busca solucion.

⁵ Como esun cu a crea hende y establece e areglo di matrimonio, Jehova sa mihor cu cualkier otro persona kico nos mester haci pa por tin un matrimonio exitoso. E pregunta ta: Nos lo scucha e conseho haya den su Palabra y obedec’e? Si nos haci esei, lo e beneficia nos sigur. Jehova a declara na su pueblo di antiguedad: “Mara bo a pone atencion na mi mandamentonan! E ora ei bo pas lo tabata manera un riu, y bo husticia manera ola di lama.” (Isaias 48:18) Ora nos ta pega na e guia cu Bijbel ta duna, nos por tin exito den matrimonio. Laga nos considera prome ki conseho Bijbel ta duna esposonan.

“Sigui Stima Boso Esposa”

6. Ki conseho Bijbel ta duna esposonan?

⁶ E carta cu apostel Pablo a skirbi e Efesionan ta contene un guia cla pa esposonan. Pablo a skirbi: “Esposonan, [“sigui”, NW] stima boso esposa, mescos cu Cristo tambe a stima e iglesia y a entrega su mes p’e. Asina esposonan tambe mester stima nan esposa manera nan mes curpa. Esun cu ta stima su esposa ta stima su mes; pasobra nunca ni un hende no a odia su mes carni, ma ta aliment’e y ta cuid’e, mescos cu Cristo tambe ta haci cu e iglesia. Asina anto, laga cada un di boso tambe stima su esposa manera su mes.”​—Efesionan 5:25, 28, 29, 33.

7. (a) Kico mester ta un parti importante di e fundeshi di un matrimonio cristian? (b) Con esposonan ta sigui stima nan esposa?

⁷ Pablo no ta papia di tur posibel problema cu por surgi entre un esposo y un esposa. Mas bien, e ta yega na esencia di e asunto dor di indica kico mester ta un parti importante di e fundeshi di tur matrimonio cristian: amor. De echo, e versiculonan cita anteriormente ta menciona e verbo “stima” seis bes. Ripara tambe cu Pablo ta bisa esposonan: “Sigui stima boso esposa.” Sin duda, Pablo a reconoce cu ta mucho mas facil pa cuminsa stima un persona cu pa mantene e stimacion ei. Esaki ta e caso specialmente den “e ultimo dianan” aki ora cu hopi hende ta “stimado di nan mes” y “ireconciliabel.” (2 Timoteo 3:1-3) E cualidadnan negativo ei ta caba cu hopi matrimonio awe, pero un esposo amoroso lo no laga e caracteristicanan egoista di e mundo aki influencia su manera di pensa y actua.​—Romanonan 12:2.

Con Bo Por Percura pa Bo Esposa?

8, 9. Den ki maneranan un esposo cristian ta percura pa su esposa?

⁸ Si bo ta un esposo cristian, con bo por resisti tendencianan egoista y desplega  berdadero amor pa bo esposa? Den su palabranan na e Efesionan cita anteriormente, Pablo a identifica dos cos cu bo tin cu haci​—percura pa bo esposa y cuid’e mescos cu bo ta cuida bo mes curpa. Con bo por percura pa bo esposa? Un manera pa haci esei ta den sentido material, es decir, percura pa e necesidadnan fisico di bo esposa. Pablo a skirbi Timoteo: “Si un hende no provee pa su mes hendenan, y specialmente pa esnan di su cas, el a nenga e fe y ta piyo cu un incredulo.”​—1 Timoteo 5:8.

⁹ Sinembargo, esei ta ensera mas cu djis percura cuminda, paña y dak riba cabes. Dicon? Pasobra podise un esposo ta percura hopi bon pa e necesidadnan material di su esposa pero e no ta satisface su necesidadnan emocional y spiritual. Ta esencial pa e esposo percura pa su esposa den e sentidonan aki tambe. Ta berdad cu hopi homber cristian ta sumamente ocupa cu asuntonan relaciona cu e congregacion. Pero e echo cu un esposo tin responsabilidadnan di peso den e congregacion no ta motibo pa e neglisha e obligacionnan cu Dios a dun’e como cabes di famia. (1 Timoteo 3:5, 12) Algun aña pasa e revista aki a comenta lo siguiente riba e asunto aki: “Na harmonia cu rekisitonan biblico, nos por bisa cu ‘pastoreo ta cuminsa na cas.’ Si un anciano neglisha su famia, e por pone su nombramento na peliger.” * P’esei ta imperativo pa bo percura pa bo esposa fisicamente, emocionalmente y, mas importante cu tur, spiritualmente.

Kico Kiermen Cuida Bo Esposa?

10. Con un esposo por cuida su esposa?

¹⁰ Si bo ta cuida bo esposa, bo ta percura bon p’e pasobra bo ta stim’e. Bo por haci esaki den varios manera. Na prome luga, dedica suficiente tempo na bo casa. Si bo neglisha bo casa den e sentido aki, su amor pa bo por fria. Tene cuenta tambe cu loke abo ta kere cu bo esposa tin mester pa loke ta tempo y atencion kisas no ta loke e ta sinti cu e tin mester. No ta simplemente un asunto di bisa cu bo ta cuida bo esposa. Ta bo esposa mester sinti cu e ta wordo cuida. Pablo a skirbi: “No laga ningun hende busca su mes interes, sino esun di su prohimo.” (1 Corintionan 10:24) Como un esposo amoroso, bo kier haci sigur cu bo ta compronde e necesidadnan real di bo esposa.​—Filipensenan 2:4.

11. Ki efecto e trato cu un esposo ta duna su casa tin riba e esposo su relacion cu Dios y riba e congregacion?

¹¹ Un otro manera pa mustra cu bo ta cuida bo casa ta dor di trat’e cu cariño, tanto cu palabra como accion. (Proverbionan 12:18) Pablo a skirbi e Colosensenan: “Esposonan, stima boso esposanan, y no sea amarga contra nan.” (Colosensenan 3:19) Di acuerdo cu un  buki di consulta, por traduci e ultimo parti di Pablo su declaracion como “no trat’e manera un cria di cas” of “no hacie un esclabo.” Un esposo cu ta un tirano​—sea ora e ta su so cu su casa of den publico​—sigur no ta demostra cu e ta cuida su casa. Si e trata su esposa na un manera bruto, esei por afecta su relacion cu Dios. Apostel Pedro a skirbi esposonan: “Biba cu boso esposanan cu comprension, manera cu un vaso mas delicado, como cu e ta hende muher; y dun’e honor como coheredero di e gracia di bida, pa boso oracionnan no wordo stroba.” *​—1 Pedro 3:7.

12. Kico un esposo cristian por siña for di e manera cu Hesus a trata e congregacion cristian?

¹² Nunca pensa cu di mes bo esposa ta stima bo. Semper lag’e sinti cu bo ta stim’e. Hesus a pone un ehempel pa esposonan cristian den e manera cu el a trata e congregacion cristian. E tabata suave, bondadoso y cla pa pordona​—asta ora cu bes tras bes su siguidonan a manifesta caracteristicanan negativo. P’esei Hesus por a bisa otro hende: “Bin cerca mi . . . pasobra mi ta manso y humilde di curason; y boso lo haya sosiego [“refrescamento”, NW] pa boso alma.” (Mateo 11:28, 29) Un esposo cristian cu ta imita Hesus ta trata su esposa na e mesun manera cu Hesus a trata e congregacion. Un homber cu di berdad ta cuida su esposa, mustrando esaki cu palabra y accion, lo ta un fuente di berdadero refrescamento p’e.

Esposanan Cu Ta Biba Segun Principionan di Bijbel

13. Ki principio biblico por yuda esposanan?

¹³ Bijbel ta contene tambe principionan cu por yuda esposanan. Efesionan 5:22-24, 33 ta declara: “Esposanan, sea sumiso na boso mes esposo, manera na Señor. Pasobra e esposo ta cabes di e esposa, mescos cu Cristo tambe ta cabes di e iglesia, e mes siendo salbado di e curpa. Ma mescos cu e iglesia ta sumiso na Cristo, asina tambe e esposanan mester ta sumiso na nan esposo den tur cos . . . E esposa percura pa e respeta su esposo.”

14. Pakico e principio biblico di sumision no ta rebaha hende muher?

¹⁴ Nota e enfasis cu Pablo a pone riba sumision y respet. E ta recorda e esposa pa ta sumiso na su esposo. Esaki ta na harmonia cu e areglo di Dios. Tur criatura bibo den shelo y riba Tera ta sumiso na un persona. Asta Hesus ta sumiso na Jehova Dios. (1 Corintionan 11:3) Naturalmente, ora un esposo ta cumpli cu su papel como cabes na un manera apropia, ta bira mas facil pa su esposa keda sumiso na dje.

15. Cua ta algun conseho cu Bijbel tin pa esposanan?

¹⁵ Pablo a declara tambe cu un esposa mester “respeta su esposo.” Un esposa cristian mester manifesta un “spirito suave y keto”, locual ta ensera no cuestiona cu arogancia e autoridad di su esposo ni actua independiente di dje. (1 Pedro 3:4) Un esposa devoto na Dios ta traha duro pa e bienestar di su famia y  ta honra su cabes. (Tito 2:4, 5) Lo e haci su best pa papia bon di su esposo y no haci nada cu por pone otro hende falta respet p’e. Ademas, lo e duna di su parti pa e decisionnan di su esposo por tin exito.​—Proverbionan 14:1.

16. Kico esposanan cristian por siña for di e ehempelnan di Sara y Rebeca?

¹⁶ E echo cu un muher cristian tin un spirito suave y keto no ta nifica cu e no tin opinion of cu su manera di pensa no ta importante. Muhernan devoto di antiguedad, manera Sara y Rebeca, a tuma iniciativa pa expresa nan precupacion tocante cierto asuntonan, y e registro di Bijbel ta mustra cu Jehova a aproba nan accionnan. (Genesis 21:8-12; 27:46–28:4) Esposanan cristian tambe por duna di conoce kico nan ta sinti. Sinembargo, nan mester haci esaki cu consideracion, y no cu un tono di menosprecio. Probablemente nan lo ripara cu tal forma di expresa nan mes lo ta mas agradabel y eficas.

E Importancia di Compromiso

17, 18. Kico esposo y esposa por haci pa resisti e intentonan di Satanas pa kibra e union matrimonial?

¹⁷ Matrimonio ta un compromiso di bida largo. P’esei tanto esposo como esposa mester tin un deseo sincero pa nan matrimonio funciona. Falta di comunicacion franco por laga problema cria pus y baster. Demasiado biaha, parehanan ta stop di papia cu otro ora surgi problema, y esaki ta causa rencor. Algun asta ta busca manera pa pone fin na e relacion, podise dor di crea interes romantico den un persona cu no ta nan casa. Hesus a spierta: “Ken cu wak un muher pa dese’e, ya caba el a comete adulterio cu ne den su curason.”​—Mateo 5:28.

¹⁸ Apostel Pablo a conseha tur cristian, incluso matrimonionan cristian: “Rabia, ma no haci pica; no laga solo baha riba boso rabia, y no duna Diabel oportunidad.” (Efesionan 4:26, 27) Satanas, nos enemigo principal, ta purba probecha di e desacuerdonan cu por surgi entre cristiannan. No dun’e chens! Ora surgi problema, investiga kico Bijbel ta bisa tocante e pensamentonan di Jehova riba e asunto, cu yudansa di publicacionnan biblico. Papia di e desacuerdonan na un manera calmo y franco. Haci esfuerso pa no solamente haya sa kico ta e normanan di Jehova, sino realmente cumpli cu nan tambe. (Santiago 1:22-25) Ora ta trata di boso matrimonio, sea determina pa sigui cana cu Dios como pareha, y no laga ni un hende ni nada separa loke el a uni!​—Mikeas 6:8.

[Nota]

Bo Ta Corda?

• Pakico asta den matrimonionan cristian por tin problema?

• Con un esposo por percura pa su casa y mustra cu e ta cuid’e?

• Kico un esposa por haci pa mustra cu e ta respeta su casa?

• Con esposo y esposa por fortalece nan sentido di compromiso?

[Preguntanan di Estudio]

[Plachi na pagina 20]

Un esposo mester percura bon pa su esposa, no solamente den sentido material sino tambe spiritual

[Plachi na pagina 21]

Un homber cu ta cuida su esposa ta un fuente di refrescamento p’e

[Plachi na pagina 23]

Cu respet esposanan cristian ta duna di conoce kico nan ta sinti