Pregunta di Lector

Na ki tempo e yamada di cristiannan pa e speransa celestial ta stop?

Bijbel no ta duna un contesta specifico riba e pregunta ei. Loke si nos sa ta cu na aña 33 di nos era e discipelnan di Hesus a cuminsa ser ungi cu e speransa di haya nan herencia celestial. (Echonan 2:1-4) Ademas, nos sa cu despues di morto di e apostelnan, berdadero cristiannan ungi​—compara cu “trigo”​—a “crece hunto” cu cristiannan falso, compara cu “yerba shimaron.” (Mateo 13:24-30) Mas despues, cuminsando den e parti final di siglo 19, cristiannan ungi a bolbe bira notablemente activo. Na aña 1919 “e cosecha di tera” a cuminsa, y esei a inclui recohemento di e unginan.​—Revelacion 14:15, 16.

For di final di siglo 19 te cu 1931, e proposito principal di e trabou di predica tabata pa recohe e miembronan cu a resta di e curpa di Cristo. Na 1931 e Studiantenan di Bijbel a tuma e nomber biblico Testigonan di Jehova, y den E Toren di Vigilancia na Ingles di 15 di november 1933, nan a expresa e pensamento cu e nomber unico aki tabata e “denario” cu e parabola di Hesus na Mateo 20:1-16 ta referi na dje. Nan a kere cu e 12 oranan menciona den e parabola tabata coresponde cu e 12 añanan cu a transcuri di 1919 pa 1931. Pa hopi aña despues di esei, nan a kere cu e yamada pa e Reino celestial a termina na 1931 y cu esnan yama pa ta coheredero cu Cristo na 1930 y 1931 tabata “e ultimo grupo” yama. (Mateo 20:6-8) Sinembargo, na 1966 nan a presenta un comprondemento ahusta di e parabola ei, y a bira bisto cu e no tabatin nada di aber cu fin di e yamada di e unginan.

Na 1935 nan a compronde cu e “multitud grandi” di Revelacion 7:9-15 lo mester a consisti di e “otro carnenan”, esta, cristiannan cu tin un speransa terenal, kendenan lo a ser recohi durante “e ultimo dianan” y sobrevivi Armagedon como grupo. (Juan 10:16; 2 Timoteo 3:1; Revelacion 21:3, 4) Despues di e aña ei, e trabou di haci discipel a consentra principalmente riba recohemento di e gran multitud. P’esei, specialmente despues di 1966 nan a kere cu e yamada celestial a stop na 1935. Loke a parce di confirma esaki  tabata cu casi tur cristian cu a batisa despues di 1935 a sinti cu nan tin e speransa terenal. Despues di esei, nan a kere cu ken cu a haya e yamada pa e speransa celestial tabata pa remplasa cristiannan ungi cu a bira infiel.

No tin duda cu si un di e unginan cai for di e berdad sin arepenti, Jehova ta yama un otro persona pa tuma su luga. (Romanonan 11:17-22) Sinembargo, e cantidad di ungi berdadero cu a bira infiel probablemente no ta grandi. Di otro banda, segun cu tempo a pasa, algun cristian cu a batisa despues di 1935 a haya testimonio di spirito santo cu nan tin e speransa celestial. (Romanonan 8:16, 17) Pues, aparentemente nos no por fiha un fecha specifico cu e yamada di cristiannan cu e speransa celestial a termina.

Con nos mester mira un persona cu a determina den su curason cu awor e ta un ungi y ta cuminsa tuma di e emblemanan na Memorial? Nos no mester husg’e. E asunto ta entre e cu Jehova. (Romanonan 14:12) Sinembargo, berdadero cristiannan ungi no ta exigi atencion special. Nan no ta kere cu pasobra nan ta ungi esei ta duna nan comprondemento “special”, mas aya di loke asta algun miembro di e multitud grandi cu hopi experencia por tin. Nan no ta kere cu nan lo mester tin mas spirito santo cu nan compañeronan cu ta otro carne. Tampoco nan no ta spera un trato special ni pretende cu e echo cu nan ta tuma di e emblemanan ta pone nan den un puesto mas halto cu e ancianonan nombra den e congregacion. Humildemente nan ta corda cu algun homber ungi den prome siglo no tabata cualifica pa sirbi como anciano ni sirbidor ministerial. (1 Timoteo 3:1-10, 12, 13; Tito 1:5-9; Santiago 3:1) Algun cristian ungi tabata asta spiritualmente debil. (1 Tesalonicensenan 5:14) Anto e ruman muhernan, maske nan tabata ungi, no a duna siñansa den congregacion.​—1 Timoteo 2:11, 12.

Pues, cristiannan ungi hunto cu nan compañeronan, e otro carnenan, ta haci esfuerso pa keda spiritualmente fuerte. Nan ta cultiva e fruta di spirito y ta promove pas den e congregacion. Tur cristian, sea ungi of otro carne, ta traha duro den e trabou di predica e bon nobo y di haci discipel bou di direccion di e Cuerpo Gobernante. Cristiannan ungi ta keda satisfecho di por haci esaki tanten cu e boluntad di Dios ta pa nan keda riba Tera como sirbidor di Jehova.