Bo Tin Miedo di Futuro?

TIN hopi motibo pakico hende tin miedo. Por ehempel, algun hende tin miedo di loke ta spera planeta Tera. E revista Time di 3 di april 2006 a bisa: “Ola di calor, tormenta, inundacion, candela, dirtimento masal di gletsjer, tur ta duna indicacion cu e clima mundial a daña considerablemente.”

Na mei 2002, e Programa di Nacionnan Uni pa Medioambiente a publica un raport titula “Perspectiva di Medioambiente di Mundo-3.” Mas cu 1.000 hende a coopera pa traha e raport aki. Segun un informe di noticia, e raport a bisa: “E planeta ta na un punto crucial ya cu e escohencianan cu hende ta haci awe ta afectando seriamente selva, ocean, riu, sero, bida den naturalesa y otro sistemanan pa sostene bida riba cua e generacionnan actual y di futuro ta depende.”

E estado actual di e medioambiente di e planeta aki ta apenas un di e tantisimo causanan di ansiedad. Hende na tur parti di mundo ta biba awor cu miedo di atake terorista. E subdirector di e agencia di spionahe principal di Canada a bisa: “Nos ta perde soño anochi precupando pa e menasanan cu nos no sa di dje.” De echo, djis sinta wak noticia di anochi na television por ansha nos!

Hopi hende adulto cu ta traha duro tin miedo di perde nan empleo. Retironan, seramento di fabrica, competencia na trabou y demasiado exigencia di parti di doñonan di trabou por crea un clima di insiguridad laboral. Teenagernan tin miedo cu nan pareunan ta rechasa nan. Muchanan chikito podise tin miedo cu nan mayornan no ta echt stima nan. Anto kico nan ta pensa di e condicionnan den e mundo rond di nan? Un mama precupa a bisa:  “Pa mucha chikito y inocente, e mundo pafo di nan cas tin biaha mester ta parce un luga grandi spantoso.” Ademas, hopi mayor ta precupa pa e efecto cu e degeneracion moral di mundo tin riba nan sernan keri, specialmente nan yiunan.

Hende di edad hopi biaha tin miedo di cai for di trapi of di ser atraca riba caya. Si, nan “tin miedo di un luga halto y di terornan riba caminda.” (Eclesiastes 12:5) Hende tin miedo di haya un malesa grave. Informenan tocante virusnan mortal di griep, cancer y malesanan contagioso por duna nos miedo di haya un malesa nobo y straño cu lo por manca of mata nos of nos famia. De echo, ora nos mira hende salud y yen di energia bira malo y debil, ta dificil pa nos keda sin precupa cu e mesun cos lo por pasa cu nos of cu nos sernan keri. Anto esta tristo pa wak un persona enfermo den su cara y mira cu su wowonan no ta refleha ningun speransa!

Cu asina tanto motibo pa tene miedo, a sobra un motibo valido pa ta optimista tocante futuro? Tin algo cu por yuda nos mantene un punto di bista positivo? E siguiente articulo lo contesta e preguntanan aki.

[Reconocemento pa Potret na pagina 3]

© Jeroen Oerlemans/Panos Pictures