Con Mi Por Yuda Mi Yiunan pa Nan Ta Berdaderamente Educa?

BO POR compara educacion di yiu cu un biahe excitante, pero a la bes dificil. Ta un biahe cu abo cu bo yiunan ta haci hunto. Bo ta stimula nan y guia nan cu amor, y asina yuda nan progresa riba e caminda di bida. Nan tin masha hopi cos di siña!

Pa yiunan por ta realmente exitoso y felis den bida, nan mester desaroya norma- y balornan moral y spiritual, y siña distingui bon for di malo. Si nan siña conoce Jehova y stim’e, nan educacion lo ta berdaderamente beneficioso y e instruccion cu nan ta ricibi lo dura pa semper. Como mayor, bo ta hunga un papel importante den loke bo yiunan ta siña y con nan ta balora y interpreta loke nan ta siña.

E biahe aki ta trece su dificultadnan cu bo tin cu supera. Mucha ta wordo influencia facilmente, y pafo di e seno familiar nan por siña hopi cos cu ta leu for di saludabel. Nos ta biba den un mundo domina pa Satanas e Diabel. (1 Juan 5:19) E ta interesa den e educacion di bo yiunan, pero pa motibonan completamente diferente. Satanas ta un educado habil cu tin hopi experencia​—pero uno realmente malbado. Aunke e ta pretende di ta “un angel di lus”, e iluminacion cu e ta ofrece ta engañoso y contrario na e Palabra y boluntad di Jehova. (2 Corintionan 4:4; 11:14; Jeremias 8:9) Tanto Diabel como su demoñonan ta maestro den gañamento; nan ta promove egoismo, deshonestidad y degeneracion moral.​—1 Timoteo 4:1.

Kico bo por haci pa proteha bo yiunan pa nan no wordo engaña? Con bo por siña nan acepta loke ta bale la pena y berdadero? Un paso importante ta pa analisa bo mes. Abo tin cu pone un bon ehempel. Ta sumamente importante tambe pa bo cumpli cu bo responsabilidad di entrena bo yiunan y tuma e tempo necesario pa haci esei. Ma prome cu nos considera e puntonan aki, laga nos wak kico ta e fundeshi di un educacion cu ta bale la pena.

Fundeshi di un Berdadero Educacion

Nos por siña hopi for di Rei Salomon di Israel, un di e hombernan di mas sabi cu a yega di biba. Bijbel ta bisa nos: “Dios a duna Salomon sabiduria y discernimento grandi y grandesa di curason, manera e santo cu tin canto di lama. Y e sabiduria di Salomon tabata surpasa e sabiduria di tur e hombernan di oriente y tur e sabiduria di Egipto.” Salomon por “a papia tres mil proverbio y su canticanan tabata mil y cinco.” E tabatin un conocemento profundo di mata y bestia. (1 Reinan 4:29-34) Rei Salomon a dirigi tambe proyectonan di construccion den Israel, incluso construccion di e tempel magnifico di Jehova na Jerusalem.

Loke Salomon a skirbi, por ehempel den e buki di Eclesiastes, ta revela cu e tabatin un comprondemento profundo di naturalesa humano. Dios a inspir’e pa mustra kico ta e fundeshi di un berdadero educacion. Salomon a bisa: “E temor di [Jehova] ta e principio di conocemento.” E Rei sabi a bisa tambe: “E temor di SEÑOR ta e principio di sabiduria, y e conocemento di Esun Santo ta comprondemento.”​—Proverbionan 1:7; 9:10.

Si nos ta teme Dios, esei ta nifica cu nos tin respet y admiracion profundo p’e y ta tene cuidou pa no desagrad’e. Nos ta reconoce cu e ta Esun Supremo y cu nos tin cu duna cuenta  na dje. Esnan cu ta falta respet pa esun di ken nos bida ta depende kisas ta sabi den bista di hende, pero e sabiduria ei ta “bobedad dilanti di Dios.” (1 Corintionan 3:19) Bo yiunan tin mester di un educacion cu ta basa riba “e sabiduria di ariba.”​—Santiago 3:15, 17.

Temor di desagrada Jehova ta estrechamente liga cu amor p’e. Jehova ta desea pa su sirbidornan tem’e y stim’e. Moises a bisa: “Awor, Israel, kico SEÑOR bo Dios ta pidi di bo, si no ta pa teme SEÑOR bo Dios, pa cana den tur su camindanan y stim’e, y pa sirbi SEÑOR bo Dios cu henter bo curason y cu henter bo alma, y pa warda e mandamentonan di SEÑOR y su statutonan cu mi ta ordena bo awe pa bo mes bon?”​—Deuteronomio 10:12, 13.

Si nos inculca den nos yiunan temor di Jehova acompaña cu respet profundo, nos lo ta poniendo e fundeshi pa un educacion cu lo haci nos yiunan berdaderamente sabi. Segun cu nan ta traha riba e fundeshi ei, nan lo haya mas aprecio pa nan Creador, e Fuente di tur berdadero conocemento. Esaki lo yuda nos yiunan haya un comprondemento balansa di loke nan ta siña, sin yega na conclusionnan robes. Nan lo desaroya e capasidad di “discerni loke ta bon y loke ta malo.” (Hebreonan 5:14) Tal fundeshi lo yuda nan tambe pa keda humilde y evita di haci loke ta malo.​—Proverbionan 8:13; 16:6.

Bo Yiunan Ta Wak Riba Bo!

Pero con nos por yuda nos yiunan stima Jehova y tem’e? Nos ta haya contesta riba e pregunta ei den e Lei cu Jehova a duna e pueblo di Israel pa medio di profeta Moises. El a bisa mayornan Israelita: “Stima [Jehova] bo Dios cu henter bo curason, cu henter bo alma y cu tur bo forsa. E palabranan aki, cu mi ta ordena bo awe, mester ta riba bo curason. Siña nan cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.”​—Deuteronomio 6:5-7.

E textonan aki ta siña mayornan algun les importante. Un di nan ta esaki: Como mayor, bo tin cu pone un bon ehempel. Pa siña bo yiunan stima Jehova, abo mes mester ta stima Dios, y su palabranan mester ta riba bo curason. Pakico esaki ta asina importante? Pasobra abo ta e maestro principal di bo yiunan. Loke nan ta siña for di bo ehempel lo tin un efecto profundo riba nan. Y no tin nada cu tin mas influencia riba bida di un yiu cu ehempel di mayor.

Bo soñonan, bo idealnan, bo norma- y balornan y bo interesnan ta manifesta nan mes no solamente den loke bo ta bisa sino tambe den loke bo ta haci. (Romanonan 2:21, 22) For di infancia, mucha ta siña dor di observa nan mayornan cuidadosamente. Yiunan ta ripara loke ta importante pa nan mayornan, y esakinan ta e cosnan cu hopi bes ta bira importante pa nan tambe. Si di berdad bo ta stima Jehova, bo yiunan lo ripara esei. Por  ehempel, nan lo mira cu lesamento y estudio di Bijbel ta importante pa bo. Nan lo bin realisa cu bo ta pone interesnan di Reino na prome luga den bida. (Mateo 6:33) Bo presencia regular na e reunionnan cristian y participacion den e trabou di predica e Reino lo mustra nan cu rindi sirbishi sagrado na Jehova ta algo di sumo importancia pa bo.​—Mateo 28:19, 20; Hebreonan 10:24, 25.

Cumpli cu Bo Responsabilidad

Un les mas cu mayornan por siña for di Deuteronomio 6:5-7 ta esaki: Abo tin e responsabilidad di entrena bo yiunan. Den Jehova su pueblo di antiguedad, ta mayornan tabata percura pa e educacion di nan yiunan. Entre e cristiannan di prome siglo, mayornan a sigui hunga un rol importante den educacion di nan yiunan. (2 Timoteo 1:5; 3:14, 15) Ora apostel Pablo a skirbi su rumannan cristian, el a indica cu tatanan en particular mester a “lanta nan [yiunan] den e disciplina y instruccion di Señor.”​—Efesionan 6:4.

Debi na e presionnan di bida, trabou y otro actividadnan cu ta exigi tempo y energia, mayornan por tin e inclinacion di laga e educacion di nan yiunan den man di otro hende, manera maestronan di scol y personanan encarga cu cuido di mucha. Pero, ni un hende no por remplasa un mayor amoroso cu ta interesa den su yiunan. Nunca balota e importancia y influencia cu bo tin. Si bo mester di yudansa, wak bon for di unda bo ta busca esei, pero nunca laga bo deber sagrado den man di otro hende.

Dedica Tempo na Entrena Bo Yiunan

Un otro les cu mayornan ta siña for di Deuteronomio 6:5-7 ta esaki: Entrenamento di yiu ta exigi tempo y esfuerso. Mayornan Israelita mester a siña e berdad di Dios “cu tur diligencia” na nan yiunan. E palabra original na Hebreo traduci “cu tur diligencia” ta nifica “ripiti”, “bisa bes tras bes.” Mester a haci esaki henter dia, si, for di mainta te anochi, “den . . . cas” y “riba caminda.” Tempo y esfuerso ta necesario pa siña yiunan y pa forma nan actitud y comportacion pa nan por agrada Dios.

P’esei, kico bo por haci pa yuda bo yiunan pa nan ta berdaderamente educa? Bo por haci hopi cos. Siña nan stima y teme Jehova. Pone un bon ehempel. Cumpli cu bo responsabilidad di siña bo yiunan y tuma e tempo necesario pa entrena nan. Bo no ta perfecto, y na caminda lo bo comete fayo. Pero si bo ta haci esfuerso sincero pa cumpli cu e boluntad di Dios, cu tur probabilidad bo yiunan lo aprecia bo esfuersonan y lo beneficia for di nan. Proverbionan 22:6 ta bisa: “Instrui un mucha den e caminda cu e mester cana, y asta ora cu e bira bieu e lo no aparta su mes for di dje.”

Educacion ta un biahe cu ta dura henter un bida. Si tanto abo como bo yiunan ta stima Dios, e ta un biahe cu lo bo por disfruta di dje pa eternidad. Esei ta pasobra semper lo tin mas cos pa siña tocante Jehova y e manera cu nos por cumpli cu su proposito.​—Eclesiastes 3:10, 11.

[Plachi na pagina 15]

Bo ta lesa Bijbel pa bo yiunan?

[Plachi na pagina 16]

Tuma tempo pa siña bo yiunan tocante e Creador