E Resureccion Ta Real pa Bo?

“Siguramente lo tin un resureccion.”​—ECHONAN 24:15.

1. Pakico morto ta parce un cos sigur?

“DEN e mundo aki, e unico cosnan sigur ta morto y belasting.” Tin hende ta haya e comentario ei, cu e estadista Mericano Benjamin Franklin a skirbi na 1789, masha acerta. Sinembargo, hopi hende deshonrado ta evadi belasting. Morto ta parce mucho mas inevitabel. Riba nos mes, ningun di nos por evit’e. Tardi of tempran e ta haya nos na caminda. Cu un hamber insaciabel, Seol​—e graf comun di humanidad​—ta devora nos sernan keri. (Proverbionan 27:20) Pero laga nos considera un pensamento cu ta duna consuelo.

2, 3. (a) Dicon morto no ta dje inevitabel ei manera hopi hende ta kere? (b) Kico nos lo considera den e articulo aki?

² Jehova su Palabra ta duna e speransa sigur di resureccion, esta, cu hende lo ser lanta na bida atrobe. No ta trata aki di djis un soño, y ni un poder den universo por stroba Jehova di haci e speransa aki un realidad. Sinembargo, awe hopi hende no ta realisa cu pa algun persona morto no ta inevitabel. Dicon no? Pasobra un cantidad no specifica di hende​—un “multitud grandi”​—lo sobrevivi “e gran tribulacion” cu lo bini pronto. (Revelacion 7:9, 10, 14) Nan lo sigui biba despues di esei, cu e chens di haya bida eterno. Pues morto no ta algo inevitabel pa nan. Es mas, ‘morto lo wordo destrui.’​—1 Corintionan 15:26.

³ Nos mester ta mes sigur di e resureccion cu apostel Pablo tabata. El a bisa: “Siguramente lo tin un resureccion di tanto e hustonan como e malbadonan.” (Echonan 24:15) Laga nos considera tres pregunta relaciona cu resureccion. Di prome, kico ta haci e speransa aki asina sigur? Di dos, con abo personalmente por haya consuelo den e speransa di resureccion? Di tres, ki efecto e speransa aki por tin riba e manera cu bo ta biba aworaki?

E Resureccion Ta Algo Sigur

4. Con e resureccion ta para central den e proposito di Jehova?

⁴ Tin varios factor cu ta haci e resureccion algo sigur. Na prome luga, e ta para central den e proposito di Jehova. Corda cu ta Satanas a pone hende cai den pica, locual a hiba inevitablemente na nan morto. P’esei Hesus a bisa di Satanas: “E tabata un matado for di principio.” (Juan 8:44) Pero Jehova a priminti cu su organisacion den shelo semehante na un  esposa​—su “muher”​—lo a produci un “simiña” cu lo herida cabes di e “colebra di antiguedad”, likidando Satanas completamente. (Genesis 3:1-6, 15; Revelacion 12:9, 10; 20:10) Segun cu Jehova a revela gradualmente su proposito cu a envolve e Simiña Mesianico ei, a bira obvio cu e Simiña lo a bai mas aleu cu solamente destrui Satanas. E Palabra di Dios ta bisa: “E Yiu di Dios a aparece pa e proposito aki, pa e destrui e obranan di Diabel.” (1 Juan 3:8) Un di e obranan principal di Satanas cu Jehova tin intencion di elimina, of destrui, pa medio di Hesucristo ta morto causa pa e pica cu nos a hereda for di Adam. En conexion cu esaki, e sacrificio di rescate di Hesus y e resureccion ta sumamente importante.​—Echonan 2:22-24; Romanonan 6:23.

5. Pakico e resureccion lo glorifica e nomber di Jehova?

⁵ Jehova ta determina pa glorifica su nomber sagrado. Satanas a difama e nomber di Dios y a fomenta mentira. El a gaña ora el a bisa cu Adam cu Eva ‘sigur lo no a muri’ si nan a come di e fruta cu Dios a prohibi. (Genesis 2:16, 17; 3:4) Djei padilanti, Satanas a sigui fomenta e tipo di mentiranan ei, manera e doctrina falso cu un hende su alma ta sigui biba despues cu su curpa muri. Sinembargo, pa medio di e resureccion, Jehova lo expone tur e mentiranan ei pa loke nan ta. Lo e demostra di unabes pa semper cu ta e so por conserva y restaura bida.

6, 7. Kico ta Jehova su sintimentonan tocante e resureccion di hende, y con nos por sa esei?

⁶ Jehova ta anhela pa efectua e resureccion. Bijbel ta mustra bon cla kico ta Jehova su sintimentonan al respecto. Por ehempel, considera e palabranan inspira aki di Job, un homber fiel: “Si un hende muri, lo e bolbe biba? Tur e dianan di mi lucha [“sirbishi obligatorio”, NW] lo mi spera, te ora mi liberacion bin. Abo lo yama, y ami lo contesta bo; lo bo anhela na e obra di bo mannan.” (Job 14:14, 15) Kico e palabranan ei ta nifica?

⁷ Job tabata sa cu ora e muri, lo e tabatin cu warda pa un tempo drumi den morto. El a mira esei como un “sirbishi obligatorio”, un periodo di tempo cu lo el a haya su mes obliga ta warda te ora su liberacion bini. Pa Job, e liberacion ei tabata un cos sigur. E tabata combenci cu su alivio lo bini. Dicon? Pasobra e tabata sa di Jehova su sintimentonan. Jehova lo a “anhela” pa mira su fiel sirbidor atrobe. Si, Dios tin masha deseo di trece tur persona husto bek na bida. Ademas, Jehova lo duna otro hende tambe un oportunidad pa biba pa semper den Paradijs riba Tera. (Lucas 23:43; Juan 5:28, 29) Siendo cu ta Dios su boluntad pa cumpli cu e proposito ei, ken por par’e?

8. Con Jehova a duna “un garantia” di nos speransa pa futuro?

⁸ E resureccion di Hesus ta un garantia di nos speransa pa futuro. Ora Pablo a duna un discurso na Atenas, el a declara: “[Dios] a fiha un dia den cua e lo husga mundo cu husticia pa medio di un homber, kende el a apunta, dunando prueba [“un garantia”, NW] na tur hende dor di lant’e for di e mortonan.” (Echonan 17:31) Algun di e hendenan cu tabata scucha Pablo a haci bofon ora nan a tende di un resureccion. Pero tabatin otronan cu a bira creyente. Podise e idea cu tabatin un garantia tras di e speransa aki a hala nan atencion. Ora Jehova a resusita Hesus, El a efectua e milager di mas grandi cu a yega di tuma luga. El a lanta su Yiu for di morto como un spirito poderoso. (1 Pedro 3:18) Hesus resusita tabata asta mas poderoso ainda cu prome cu el a bira hende. Siendo un persona inmortal y cu solamente Jehova como mas poderoso cu ne, Hesus awor ta den un posicion pa cumpli cu e asignacionnan maraviyoso cu su Tata ta dun’e. Hesus ta e medio cu Jehova ta uza pa efectua tur otro resureccion, sea ta pa bida den shelo of pa bida riba Tera. Hesus mes a bisa: “Ami ta e resureccion y e bida.” (Juan 5:25; 11:25) Dor di resusita su Yiu, Jehova a garantisa e speransanan ei pa tur hende fiel.

9. Con e registro biblico ta confirma cu e resureccion ta un realidad?

 ⁹ Tabatin testigo ocular di casonan di resureccion y esakinan ta registra den e Palabra di Dios. Bijbel ta contene descripcionnan detaya di ocho resureccion di personanan cu a ser lanta bek como hende riba Tera. E milagernan aki no a tuma luga den secreto sino publicamente, hopi bes den presencia di testigo ocular. Hesus a resusita Lazaro, kende tabata morto pa cuater dia, dilanti un multitud di hende cu tabata yora su morto. Sin duda, entre nan tabatin Lazaro su famia-, amigo- y bisiñanan. E evidencia aki di cu ta Dios a manda Hesus tabata asina combencente cu Hesus su enemigonan religioso nunca no a nenga cu e resureccion ei a tuma luga. Mas bien, nan a traha complot pa mata no solamente Hesus sino tambe Lazaro! (Juan 11:17-44, 53; 12:9-11) Si, nos por tin confiansa cu e resureccion ta algo sigur. Dios a duna nos un registro di resureccionnan di pasado pa consola nos y edifica nos fe.

Haya Consuelo den e Speransa di Resureccion

10. Kico lo yuda nos haya consuelo for di e relatonan biblico di resureccion?

¹⁰ Bo ta anhela pa haya consuelo ora bo ta confronta morto? E relatonan biblico tocante resureccion por ta un fuente sigur di consuelo pa bo. Ora bo lesa e relatonan ei, medita riba nan y visualisa e sucesonan, e speransa di resureccion por bira mas real pa bo. (Romanonan 15:4) Nan no ta djis un par di cuenta. Ta cosnan cu di berdad a sosode cu hende mescos cu nos, cu a biba den un tempo y un luga cu di berdad a existi. Laga nos enfoca brevemente riba un di nan, e prome resureccion registra den Bijbel.

11, 12. (a) Ki tragedia un viuda di Sarepta a hay’e cu ne, y con el a reacciona na prome instante? (b) Jehova a duna su profeta Elias poder pa haci kico pa e viuda?

¹¹ Imagina bo e escena. Profeta Elias tabatin algun siman como huespet di un viuda di Sarepta. E tabata keda den un camber ariba. Tabata un tempo di tristesa. Secura y hamber a asota e region, y hopi hende tabata muriendo. Pa recompensa e fe di e viuda humilde aki Jehova ya a uza Elias pa haci un milager cu a extende pa un periodo largo. E viuda cu su yiu homber chikito tabata a punto di cuminsa  sufri di hamber, ya cu nan tabatin net suficiente pa un ultimo cuminda. Ma Dios a duna Elias poder pa haci un milager di manera cu nan suministro di hariña y azeta no a caba. Pero awor e viuda a hay’e cu un tragedia. Diripiente su yiu a bira malo y un poco despues a stop di hala rosea. E viuda a keda tur kibra! Ta hopi dificil caba pa biba sin e fortalesa y apoyo di un esposo, anto awor el a perde su unico yiu. Den su tristesa el a asta culpa Elias y esaki su Dios, Jehova! Kico e profeta lo a bai haci awor?

¹² Elias no a reprende e viuda pa su acusacion falso. En bes di esei, el a bis’e: “Duna mi bo yiu.” Despues cu Elias a carga e mucha morto hiba den e camber ariba, el a pidi Dios bes tras bes den oracion pa bida di e mucha bolbe den dje. Finalmente, Jehova a actua! Imagina bo e goso riba cara di Elias ora el a mira e mucha su pecho ta move atrobe pa hala rosea. Wowonan di e mucha a habri y tabata briya cu bida. Elias a baha cu e mucha, a hib’e cerca su mama y a bis’e: “Mira, bo yiu ta bibo!” No tabatin palabra pa describi e viuda su goso. El a bisa: “Awor mi sa cu bo ta un homber di Dios, y cu e palabra di SEÑOR den bo boca ta berdad.” (1 Reinan 17:8-24) Su fe den Jehova y den su representante a bira mas fuerte cu nunca.

13. Pakico e relato caminda Elias a resusita e yiu di un viuda ta duna nos consuelo awe?

¹³ Ora bo medita riba e relato ei, sigur e ta duna bo un gran consuelo. Ta hopi bisto cu Jehova tin poder pa derota nos enemigo morto! Djis imagina bo e dia ora cu miles y miles di hende mas sinti e goso di e viuda ei durante e resureccion general di e mortonan! Den shelo tambe lo tin gran goso ora Jehova gustosamente dirigi su Yiu pa efectua resureccion na escala mundial. (Juan 5:28, 29) Bo a perde un ser keri den morto? Ta ki maraviyoso pa sa cu Jehova por y lo trece e mortonan bek na bida!

Bo Speransa y Bo Manera di Biba Awor

14. Ki efecto e speransa di resureccion por tin riba bo bida?

¹⁴ Ki efecto e speransa di resureccion por tin riba e manera cu bo ta biba aworaki? Ora bo haya bo cu contratiempo, dificultad, persecucion of peliger, e speransa aki por fortalece bo. Satanas kier pa bo tin asina tanto miedo di morto cu lo bo ta dispuesto pa sacrifica bo integridad pa algun promesa bashi di siguridad. Corda cu Satanas a bisa Jehova: “Tur loke un hende tin e lo duna pa su bida.” (Job 2:4) Ora Satanas a bisa esei, el a calumnia nos tur; abo tambe. Di berdad lo bo stop di sirbi Dios si bo bida ta na peliger? Ora bo medita riba e speransa di resureccion, bo por fortifica bo  determinacion pa sigui haci e boluntad di bo Tata celestial.

15. Con e palabranan di Hesus na Mateo 10:28 por duna nos consuelo ora di peliger?

¹⁵ Hesus a bisa: “No tene miedo di esnan cu ta mata e curpa, ma cu no por mata e alma; ma mas bien tene miedo di esun cu por destrui tanto alma como curpa den [“Gehena”, NW].” (Mateo 10:28) Nos no tin nodi teme Satanas ni su representantenan humano. Ta berdad cu kisas algun di nan tin e poder pa causa daño, asta morto. Sinembargo, asta e piyo cos cu nan por haci lo ta solamente temporal. Jehova por y lo elimina cualkier daño causa na su sirbidornan fiel; si mester, lo e resusita nan. Ta Jehova so ta digno di nos temor, gran admiracion y respet profundo. E so tin e poder pa kita bida y tur speransa pa bida den futuro, destruyendo tanto alma como curpa den Gehena. Felismente, Jehova no kier pa esei sosode cu bo. (2 Pedro 3:9) Pa motibo di e speransa di resureccion, nos como sirbidor di Dios por ta semper sigur cu nos ta safe. Tanten cu nos ta fiel, nos tin bida eterno nos dilanti, y no tin nada cu Satanas of su compinchinan por haci pa stroba esei.​—Salmo 118:6; Hebreonan 13:6.

16. Ki efecto nos punto di bista tin riba e prioridadnan cu nos ta fiha?

¹⁶ Si e speransa di resureccion ta real pa nos, e por cambia nos manera di mira bida. Nos ta realisa cu ‘sea nos biba of nos muri, ta di Jehova nos ta.’ (Romanonan 14:7, 8) P’esei ora nos ta fiha prioridad, nos ta aplica e conseho di Pablo: “No sea conforme e mundo aki, ma sea transforma pa medio di e renovamento di boso mente, pa boso por comproba kico ta e bon y agradabel y perfecto boluntad di Dios.” (Romanonan 12:2) Hopi hende ta trata freneticamente di satisface tur deseo, tur ambicion, tur antoho. Den nan bista, bida ta masha cortico y p’esei nan ta parce casi desespera den nan buskeda di placer. Te na ora mes nan tin un forma di adoracion, sigur e no ta na harmonia cu e “perfecto boluntad di Dios.”

17, 18. (a) Con e Palabra di Jehova ta reconoce cu bida humano ta cortico, pero kico Dios kier pa nos? (b) Kico ta motiva nos pa alaba Jehova tur dia?

¹⁷ En berdad, bida ta cortico. “Un djis el a pasa, y nos ta bula bai”, podise den un 70 of 80 aña asina. (Salmo 90:10) Hende ta bini y bai manera yerba berde, manera un sombra cu ta pasa, manera un rosea. (Salmo 103:15; 144:3, 4) Pero e proposito di Dios no tabata pa nos pasa un par di decada pa crece y gana cierto sabiduria y experencia, pa despues pasa e siguiente par di decadanan bayendo atras, bira malo y muri. Jehova a crea hende cu e deseo di biba pa semper. Bijbel ta bisa nos cu “el a pone eternidad den nan curason.” (Eclesiastes 3:11) Acaso Dios ta asina cruel pa duna nos e deseo ei y despues stroba nos di cumpli cu ne? No, pasobra “Dios ta amor.” (1 Juan 4:8) Lo e uza e resureccion pa haci bida eterno posibel pa hende cu a muri.

¹⁸ Debi na e speransa di resureccion, nos por tin un futuro sigur. Nos no tin nodo di ansha, pura lihe pa alcansa nos pleno potencial aworaki. Nos no tin nodi “haci uzo completo” di e mundo moribundo aki. (1 Corintionan 7:29-31; 1 Juan 2:17) Distinto di hende cu no tin berdadero speransa, nos tin e maraviyoso bendicion di sa cu si nos keda fiel na Jehova Dios, nos lo tin henter eternidad pa alab’e y disfruta di bida. Laga nos haci tur nos esfuerso anto pa tur dia alaba Jehova, kende ta haci e speransa di resureccion un cos sigur!

Con Lo Bo Contesta?

• Con nos lo mester mira e resureccion?

• Ki factornan ta haci e speransa di resureccion un cos sigur?

• Con bo por saca consuelo for di e speransa di resureccion?

• Ki efecto e speransa di resureccion por tin riba e manera cu bo ta biba?

[Preguntanan di Estudio]

[Plachi na pagina 28]

Job tabata sa cu Jehova ta anhela pa resusita e hustonan

[Plachi na pagina 29]

“Mira, bo yiu ta bibo!”