Pakico Asisti na Reunionnan Cristian?

CHRISTINE su esposo a bai lag’e inesperadamente despues di 20 aña casa. Christine a hay’e ta lanta shete yiu homber y un yiu muher su so. Nan tabatin entre 7 pa 18 aña. El a conta: “Awor ta ami so mester a tuma tur decision importante. E responsabilidad grandi ei a descurasha mi y mi tabatin masha gana di haya poco sosten y guia.” Unda el a haya e yudansa necesario?

Christine a declara: “E reunionnan cristian tabata un salbabida pa mi y pa mi famia. Na e reunionnan, nos a haya sosten di nos amigonan y guia for di e Palabra di Dios. Asistencia regular na e reunionnan a yuda nos den tur aspecto importante di nos bida di famia.”

Durante e “temponan trabahoso” aki, nos tur ta enfrenta varios prueba. (2 Timoteo 3:1) Kisas bo tambe, mescos cu Christine, ta mira e reunionnan di Testigonan di Jehova como un salbabida spiritual, un parti masha importante di bo adoracion na Jehova. Muy probablemente, e cinco reunionnan di congregacion programa semanalmente ta stimula bo amor pa Dios, ta fortifica bo speransa pa futuro y ta duna bo guia basa riba Bijbel pa trata cu varios prueba.

Sinembargo, pa algun ruman ta dificil pa asisti na e reunionnan cu regularidad. Nan ta morto cansa na final di dia, y e idea so cu nan tin cu bai bisti paña apropia y sali riba caya pa bai reunion ta parce demasiado. Otro rumannan ta constata cu hopi biaha nan orario di trabou ta stroba nan di asisti na reunion. Pa asisti na tur e reunionnan, nan lo tin cu conforma nan mes cu menos pago of core e riesgo di perde nan trabou. Podise algun ruman ta falta reunion pasobra nan ta haya cu cierto tipo di recreo lo ta mas refrescante cu asocia cu e congregacion.

Pues, ki motibonan combencente tin pa asisti na e reunionnan cristian? Con bo por haci e reunionnan ei personalmente refrescante? Pa yuda contesta e preguntanan aki, laga nos analisa Hesus su invitacion caluroso cu nos ta haya na Mateo 11:28-30. El a declara: “Bin cerca mi tur cu ta cansa y carga, y lo mi duna boso sosiego [of, “refrescamento”, NW]. Tuma mi yugo riba boso, y siña di mi, pasobra mi ta manso y humilde di curason; y boso lo haya sosiego pa boso alma. Pasobra mi yugo ta suave y mi carga ta lihe.”

“Bin Cerca Mi”

Hesus a bisa: “Bin cerca mi.” Un manera pa haci caso di e invitacion ei ta di asisti cu regularidad na e  reunionnan. Tin bon motibo pa ta presente, pasobra na un otro ocasion Hesus a declara: “Caminda dos of tres ta reuni den mi nomber, ei mi ta meimei di nan.”​—Mateo 18:20.

Den prome siglo, Hesus personalmente a invita varios hende pa siguie. El a duna nan pues e oportunidad di gosa di asociacion intimo cu ne. Algun a acepta mesora. (Mateo 4:18-22) Otronan a laga cosnan manera interes material stroba nan di acepta e invitacion ei. (Marco 10:21, 22; Lucas 9:57-62) Na esnan cu si a siguie, Hesus a expresa e siguiente garantia: “Boso no a scohe mi, ma ami a scohe boso.”​—Juan 15:16.

Despues di Cristo su morto y resureccion, e no tabata fisicamente presente mas cerca su discipelnan. Pero toch e tabata cu nan ainda den e sentido cu el a dirigi nan actividad y a observa nan reaccion riba su conseho. Por ehempel, un 70 aña despues di su resureccion, el a duna conseho y animacion na shete congregacion na Asia Menor. Su comentarionan a mustra cu e tabata bon na haltura di tanto e puntonan fuerte como esnan debil di e personanan den e congregacionnan ei.​—Revelacion 2:1–3:22.

Te awe Hesus ta profundamente interesa den cada un di su discipelnan. El a priminti: “Mira, mi ta cu boso semper, te na fin di mundo.” (Mateo 28:20) Nos ta bibando awor den e tempo di fin, y p’esei nos tin cu haci caso di e invitacion cu Hesus a extende pa siguie. Te na cierto grado, pa nos por haci esei nos mester asisti na reunion cu regularidad. Hesus kier pa nos scuch’e y “wordo siña den dje” mediante estudio- y discursonan basa riba Bijbel, locual ta un rasgo regular di e reunionnan. (Efesionan 4:20, 21) Abo ta haciendo caso di Hesus su invitacion: “Bin cerca mi”?

Boso “Cu Ta Cansa y Carga”

Un motibo masha importante pa asisti na e reunionnan cristian ta pa haya animacion. (Hebreonan 10:24, 25) Sin duda, hopi di nos ta “cansa y carga” den varios manera. Kisas bo ta carga cu precupacionnan personal, manera problema di salud. Na e reunionnan cristian, bo por disfruta di un intercambio di estimulo. (Romanonan 1:11, 12) Por ehempel, lo bo tende comentarionan spiritualmente edificante, lo bo ser recorda di bo speransa basa riba Bijbel, y lo bo observa e fe di otro rumannan cu ta wanta prueba. Tur esaki por yuda bo trata cu bo problemanan y mira nan den un manera balansa.

Considera e siguiente comentario di un ruman muher cristian cu tin un malesa cronico cu ta strob’e den su actividadnan. El a splica: “Mi malesa ta pone cu cada bes mi mester keda un par di dia den hospital. Despues di un estadia asina na hospital ta un poco dificil pa bai reunion, pero ei ta mi luga. E calor y amor di e rumannan ta restaura mi goso, y e siñansa y instruccion cu mi ta ricibi di Jehova y Hesus ta duna mi bida proposito.”

“Mi Yugo Ta Suave y Mi Carga Ta Lihe”

Tuma nota cu den e pasashi cu nos ta analisando, Hesus di: “Siña di mi.” Ora nos siña for di Hesus, nos ta bira su discipel, y ora nos haci un dedicacion na Dios y batisa, nos ta tuma su yugo. (Mateo 28:19, 20) Pa nos por keda discipel di Hesus ta masha importante pa nos participa cu regularidad den e reunionnan. Dicon? Pasobra ta na e reunionnan cristian nos ta siña tocante Hesus, su siñansanan y su metodonan.

Kico ta e carga cu Cristo kier pa nos tuma riba nos? Esei ta e carga cu e mes a tuma riba dje, esta, e privilegio di haci e boluntad di Dios. (Juan 4:34; 15:8) Nos tin cu haci esfuerso pa obedece e mandamentonan di Dios, pero e carga aki no ta mucho pisa. Lo e por parce pisa si nos ta purba carg’e riba nos mes forsa. Sinembargo, si nos ta pidi den oracion pa e spirito di Dios y ta alimenta nos  mes cu e cuminda spiritual presenta na e reunionnan, nos lo haya cerca Dios “e poder mas aya di loke ta normal.” (2 Corintionan 4:7, NW) Ora nos ta prepara pa e reunionnan y ta participa den nan, nos amor pa Jehova ta bira mas y mas grandi. Anto si nos ta ser motiva pa amor, e mandamentonan di Dios “no ta pisa.”​—1 Juan 5:3.

Hende en general ta confronta problemanan manera con pa gana nan pan di cada dia, con pa trata cu asuntonan di salud y problemanan personal. Sinembargo, pa trata cu nan exitosamente nos no ta steun simplemente riba sabiduria humano. E reunionnan di congregacion ta yuda nos pa stop di “precupa”, pasobra Jehova ta satisface nos necesidadnan y ta yuda nos trata cu exito cu problema. (Mateo 6:25-33) De echo, e reunionnan cristian ta un manera cu Dios ta expresa su amor pa nos.

“Mi Ta Manso y Humilde di Curason”

Hesus tabatin e custumber di bishita sinagoga, caminda nan a considera e Palabra di Dios. Na un ocasion asina, Hesus a tuma e rol di Isaias y a lesa: “E spirito di SEÑOR ta riba mi, pasobra el a ungi mi pa predica evangelio na e pobernan; el a manda mi pa proclama libertad na e presonan, y restauracion di bista na e ciegonan, pa duna libertad na esnan cu ta wordo oprimi, pa proclama e aña agradabel di SEÑOR.” (Lucas 4:16, 18, 19) Esta emocionante lo tabata pa tende Hesus aplica e palabranan ei bisando: “Awe e Scritura aki a keda cumpli boso dilanti”!​—Lucas 4:21.

Hesus e “wardado principal” ta manso, y te ainda e ta supervisa e cuido spiritual di su siguidonan. (1 Pedro 5:1-4) Bou di su guia, “e esclabo fiel y prudente” a nombra hombernan como wardado den e congregacionnan di Testigonan di Jehova rond mundo. (Mateo 24:45-47; Tito 1:5-9) E hombernan aki ta “pastorea e [congregacion] di Dios” cu suavidad y ta pone un bon ehempel dor di asisti na e reunionnan cu regularidad. Abo por demostra bo aprecio pa e ‘donnan den hende’ aki dor di ta presente na e reunionnan, caminda bo por anima otro rumannan cu bo presencia y participacion.​—Echonan 15:30-33; 20:28; Efesionan 4:8, 11, 12.

‘Boso Lo Haya Refrescamento pa Boso Alma’

Ora bo ta asisti na e reunionnan cristian, con bo por haci sigur cu e ocasionnan aki ta realmente refrescante? Un manera ta dor di aplica e conseho di Hesus: “Pone bon atencion con boso ta scucha.” (Lucas 8:18) Hende cu realmente tabata desea di siña a presta bon atencion na Hesus. Nan a pidie splica su ilustracionnan y, como resultado, nan a ser recompensa cu un comprondemento mas profundo.​—Mateo 13:10-16.

Bo por imita e personanan ei cu tabatin hamber den sentido spiritual dor di presta bon atencion na e discursonan na nos reunionnan. (Mateo 5:3, 6, NW) Pa bo por consentra bon, trata na sigui e liña di rasonamento di e orador. Mentalmente, haci bo mes preguntanan manera: ‘Con mi por aplica e informacion aki den mi bida? Den ki manera mi por uz’e pa yuda otro hende? Con mi por splica of ilustra e punto aki?’ Ademas, busca e textonan biblico cu e orador ta uza pa apoya e puntonan clave. Mas bo presta atencion na con bo ta scucha, mas refrescante e reunionnan lo bira.

Despues di reunion, papia tocante e programa cu otro hende. Enfoca riba e informacion y riba con lo bo por aplic’e. Combersacionnan edificante ta haci e reunionnan masha refrescante.

Definitivamente anto nos tin bon motibo pa reuni hunto. Despues di repasa e beneficionan cu nos a caba di trata, pakico no puntra bo mes: ‘Con ami ta haciendo caso di Hesus su invitacion: “Bin cerca mi”?’

[Plachi na pagina 11]

Otro actividadnan ta stroba bo di asisti na reunion?