Pakico Tur Sufrimento Lo Caba Pronto
Pakico Tur Sufrimento Lo Caba Pronto
“E Baranca! Su obra ta perfecto.”—DEUTERONOMIO 32:4.
1, 2. (a) Pakico bo ta carga e speransa di biba pa semper? (b) Kico ta stroba hopi hende di kere den e Dios cu ta priminti cosnan maraviyoso pa futuro?
BO GUSTA imagina bo con bida den Paradijs lo ta? Kisas bo ta mira bo mes ta explora e planeta maraviyoso aki y siña tocante e variedad casi sin limite di cosnan bibo cu tin riba dje. Of talbes bo sa medita riba e satisfaccion cu lo bo sinti segun cu bo ta traha hunto cu otro hende pa cuida Tera y yuda transform’e den un parke mundial. Of podise bo sa pensa riba e talentonan cu lo bo por desaroya den arte, arkitectura, musica of otro actividadnan pa cua bo no tin tempo den e bida druk djawe. Sea cual sea e caso, bo ta carga e speransa di biba loke Bijbel ta yama e “bida berdadero”, esta, e bida cu Jehova tabata kier pa nos biba, cu eternidad na bista.—1 Timoteo 6:19.
2 Ta un placer y un privilegio precioso di por comparti e speransa biblico ei cu otro hende, no ta berdad? Sinembargo, hopi hende ta rechasa e speransa ei. Nan ta consider’e un ilusion, un soño irealista, bon pa hende ingenuo. Kisas ta asta duro pa nan kere den e Dios cu ta priminti bida eterno den Paradijs. Dicon? Un obstaculo pa algun persona ta loke hopi bes ta ser yama e problema di maldad. Nan ta haya cu si ta existi un Dios cu ta todopoderoso y amoroso, no por tin asina tanto maldad y sufrimento den e mundo aki. Nan ta rasona cu no por tin un Dios cu ta tolera maldad; of si e ta existi mes, sea e no ta todopoderoso of e no ta interesa den nos. Pa algun hende, e tipo di rasonamento aki ta zona combencente. Un cos ta sigur, Satanas a demostra di ta un experto den ciega mente di hende.—2 Corintionan 4:4.
3. Ki pregunta dificil nos por yuda hende contesta, y pakico nos ta den un posicion unico pa haci esei?
3 Como Testigo di Jehova, nos ta den un posicion unico pa yuda hende cu ta ser engaña pa Satanas y pa e sabiduria di e mundo aki. (1 Corintionan 1:20; 3:19) Nos ta compronde pakico hopi hende no ta kere den e promesanan di Bijbel. E cos ta cu nan no conoce Jehova. Kisas nan no sa su nomber ni loke e nomber ei ta nifica, y probablemente nan no sa nada of casi nada di su cualidadnan of di su reputacion como cumplido di su promesanan. Nos si ta bendiciona cu e conocemento ei. De bes en cuando, ta bon pa nos repasa con nos por yuda personanan—“tapa cu scuridad den nan comprondemento”—haya contesta riba un di e preguntanan di mas dificil cu hende sa haci: “Pakico Dios ta permiti maldad y sufrimento?” (Efesionan 4:18) Prome, nos lo considera con nos por pone e base pa contesta e pregunta ei na un manera satisfactorio. Despues nos lo considera con Jehova su cualidadnan ta sali na cla den e manera cu el a atende e asunto di maldad.
E Manera Corecto pa Contesta e Pregunta
4, 5. Kico ta e prome cos cu nos lo tin cu haci ora un persona puntra pakico Dios ta permiti sufrimento? Splica.
4 Ora un hende puntra pakico Dios ta permiti sufrimento, con nos ta contest’e? Kisas nos ta inclina na core dun’e un splicacion detaya, cuminsando cu loke a sosode den e hofi di Eden. Den algun caso, esei por ta bon. Pero un palabra di cautela ta na su luga. Talbes mester pone un base. (Proverbionan 25:11; Colosensenan 4:6) Laga nos considera tres punto cu nos lo por uza pa yuda un persona prome cu nos contesta e pregunta.
5 Di prome, si loke tin e persona hopi molestia ta e maldad cu ta reina den e mundo aki, probablemente e maldad ei a afecta sea e mes of su sernan keri personalmente. P’esei, kisas ta sabi pa cuminsa cu mustra berdadero empatia. Apostel Pablo a conseha cristiannan: “Yora cu esnan cu ta yora.” (Romanonan 12:15) Ora nos mustra empatia of “compasion”, nos por yega na curason di e persona. (1 Pedro 3:8) Si e sinti cu nos tin interes den dje, lo e ta mas inclina na scucha loke nos tin di bisa.
6, 7. Pakico ta na su luga pa laga un persona sincero sa cu ta bon cu el a haci un pregunta riba un topico biblico cu tin e molestia?
6 Di dos, nos por laga e persona sincero sa cu ta bon cu el a haci e pregunta aki. Algun hende ta pensa cu e echo cu e tipo di preguntanan aki ta molestia nan ta un indicacion cu nan no tin fe of cu nan ta falta respet pa Dios. Kisas esei ta asta loke un miembro di clero a laga nan compronde. Sinembargo, esei no necesariamente ta e caso. De echo, hende fiel den tempo biblico a haci e mesun tipo di pregunta. Por ehempel, e salmista David a puntra: “Pakico bo ta para leu asina, o SEÑOR? Pakico bo ta sconde bo mes den temponan di angustia?” (Salmo 10:1) Di igual manera, profeta Habacuk a puntra: “Te ki tempo, o SEÑOR, lo mi sclama pa yudansa, y abo no ta tende? Mi ta sclama na bo: ‘Violencia!’ Toch bo no ta salba. Pakico bo ta haci mi mira inikidad, y ta haci mi mira maldad? Si, destruccion y violencia ta mi dilanti; tin desunion y pleito ta lanta.”—Habacuk 1:2, 3.
7 Tabata trata aki di hombernan fiel cu tabatin un gran respet pa Dios. Acaso Dios a reprende nan pasobra nan a haci e preguntanan inkietante ei? Al contrario, Jehova tabata kier pa nan preguntanan sincero wordo registra den su Palabra. Awe, un persona cu ta sinti su mes molestia pa e maldad cu ta reina lo por tin asta un hamber spiritual; kisas e ta anhela pa haya contesta cu ta Bijbel so por duna. Corda cu Hesus a papia bon di hende cu tin hamber spiritual, of cu ta “conciente di nan necesidad spiritual.” (Mateo 5:3, NW) Ta realmente un honor pa yuda e personanan aki haya e felicidad cu Hesus a priminti!
8. Ki siñansanan confuso a pone hende kere cu ta Dios ta responsabel pa sufrimento, y con nos por yuda nan?
8 Di tres, kisas nos tin cu yuda e persona compronde cu no ta Dios ta responsabel pa e maldad cu ta reina den mundo. Hopi hende a ser siña cu ta Dios ta goberna e mundo aki, cu hopi tempo pasa Dios a predetermina tur loke ta sosode cu nos, y cu pa motibonan misterioso y inexplicabel el a trece sufrimento pa humanidad. E siñansanan aki ta falso. Nan ta deshonra Dios y ta lag’e parce como esun responsabel pa e maldad y sufrimento cu tin den mundo. Pues nos lo tin cu uza e Palabra di Dios pa rectifica esei. (2 Timoteo 3:16) No ta Jehova ta e gobernante di e sistema di cosnan corupto aki; ta Satanas e Diabel. (1 Juan 5:19) Jehova no ta predestina su criaturanan inteligente; e ta duna cada un e libertad y oportunidad pa scohe entre bon y malo. (Deuteronomio 30:19) Y Jehova hamas y nunca ta e fuente di maldad; e ta odia maldad y ta interesa den hende cu ta sufri inhustamente.—Job 34:10; Proverbionan 6:16-19; 1 Pedro 5:7.
9. Menciona algun herment cu “e esclabo fiel y prudente” a percura pa yuda hende compronde pakico Jehova Dios ta permiti sufrimento.
9 Unabes bo pone e base ei, lo bo ripara cu bo oyente ta dispuesto pa haya sa pakico te ainda Dios ta permiti sufrimento. Pa yuda bo den esei, “e esclabo fiel y prudente” a percura varios herment. (Mateo 24:45-47) Por ehempel, na e Congreso di Districto di aña 2005, “Obediencia na Dios”, a sali un tratado titula Pronto Tur Sufrimento Lo Caba! Nos kier anima bo pa bo familiarisa bo mes cu su contenido. E buki Kico Bijbel Ta Siña Realmente?, disponibel awor na 157 idioma, tambe ta dedica un capitulo na e pregunta importante aki. Haci bon uzo di e publicacionnan aki. Nan ta splica bon cla a base di Bijbel kico tin tras di e cuestion di soberania universal y pakico Jehova a atende e desafio ei den e forma cu el a hacie. Corda tambe cu segun cu bo ta considera e topico aki, bo ta revelando na bo oyente e campo di conocemento di mas importante cu ta existi. Esei ta e conocemento di Jehova y di su cualidadnan maraviyoso.
Enfoca Riba e Cualidadnan di Jehova
10. Pakico hopi hende no por caba di compronde e echo cu Dios ta permiti sufrimento, y ki conocemento por yuda nan?
10 Segun cu bo ta yuda hende compronde pakico Jehova a permiti hende goberna nan mes bou di influencia di Satanas, purba hala atencion na Jehova su cualidadnan maraviyoso. Hopi hende sa cu Dios ta poderoso; nan sa tende cu e ta wordo yama Dios Todopoderoso. Ma kisas nan no por caba di compronde pakico e no ta uza su gran poder pa pone fin na inhusticia y sufrimento mesora. Probablemente nan no conoce e otro cualidadnan di Jehova, manera su santidad, husticia, sabiduria y amor. Jehova ta desplega e cualidadnan aki na un manera perfecto y balansa. P’esei Bijbel ta bisa: “Su obra ta perfecto.” (Deuteronomio 32:4) Con bo por enfatisa e cualidadnan aki segun cu bo ta contesta preguntanan cu ta wordo haci hopi biaha tocante e cuestion aki? Laga nos considera un par di ehempel.
11, 12. (a) Dicon no tabata posibel pa Adam cu Eva haya pordon ora nan a peca? (b) Dicon Jehova lo no tolera pica pa semper?
11 Jehova no por a simplemente pordona Adam cu Eva? No, pordon no tabata posibel den nan caso. Como hende perfecto, Adam cu Eva a scohe deliberadamente pa rechasa e soberania di Jehova y, na luga di esei, a acepta e guia di Satanas. Pues, no ta nada straño cu e rebeldenan no a duna ningun señal di arepentimento. Sinembargo, ora hende puntra dicon Jehova no a pordona nan, de echo nan ta puntrando nan mes dicon Jehova no a simplemente baha su normanan y tolera pica y rebelion. E contesta ta ensera un cualidad esencial di Jehova su personalidad, esta, su santidad.
12 Masha hopi biaha Bijbel ta enfatisa e santidad di Jehova. Pero lamentablemente, masha poco hende den e mundo corupto aki ta compronde e cualidad ei. Jehova ta limpi, puro y separa for di tur loke ta pecaminoso. (Isaias 6:3; 59:2) Encuanto pica, el a percura un medio pa expia of elimina pica, pero lo e no toler’e pa semper. Si Jehova tabata dispuesto pa tolera pica pa semper, nos lo no tabatin ningun speransa pa futuro. (Proverbionan 14:12) Na Jehova su debido tempo, lo e trece henter creacion bek den un condicion santo. Nos por ta sigur di esei pasobra esaki ta e boluntad di Esun Santo.
13, 14. Pakico Jehova a opta pa no destrui e rebeldenan den Eden?
13 Jehova no por a simplemente destrui e rebeldenan den Eden y cuminsa di nobo? Sin duda e tabatin poder pa haci esei y pronto lo e uza e poder ei pa destrui tur malbado. Algun hende por puntra nan mes: ‘Dicon e no a haci esei ora tabatin solamente tres pecador den universo? Esei lo no a evita e pica—y tur e sufrimento cu nos ta mira den mundo—di plama?’ Pakico Jehova no a opta pa haci esei? Deuteronomio 32:4 ta bisa: “Tur su camindanan ta husto.” Jehova tin un sentido hopi fuerte di husticia. De echo, Jehova ta “stima husticia”, y pa e motibo ei e no a elimina e rebeldenan den Eden. (Salmo 37:28) Dicon?
14 E rebelion di Satanas a lanta un pregunta relaciona cu e rectitud di e soberania di Dios. Jehova su sentido di husticia a pone cu e desafio di Satanas mester a haya un contesta husto. Si Jehova a likida e rebeldenan mesora, aunke nan a merece esei, lo e no a duna un contesta basa riba husticia. Nan ehecucion lo a duna mas prueba cu Jehova tin poder supremo, pero e cuestion no tabata tocante ken tin mas poder. Ademas, Jehova a declara su proposito na Adam cu Eva. Nan mester a haya yiu y yena e Tera, y tambe somete e Tera y henter e creacion riba Tera. (Genesis 1:28) Si Jehova a djis destrui Adam cu Eva, su proposito expresa relaciona cu hende lo a keda na palabra vano so. E husticia di Jehova hamas lo a permiti esei, pasobra semper su proposito ta cumpli.—Isaias 55:10, 11.
15, 16. Ora hende bin cu otro “solucion” pa e cuestion cu a surgi den Eden, con nos lo por yuda nan?
15 Tin un persona den universo cu por a atende e rebelion na un manera mas sabi cu Jehova? Kisas algun hende ta bin cu nan mes “solucion” pa e rebelion den Eden. Pero ora nan haci esei, nan no ta insinuando cu nan sa mihor con pa atende e cuestion? Kisas nan no ta haci esei cu un mal motibo, pero nan no ta compronde Jehova y su sabiduria impresionante. Ora apostel Pablo a skirbi e cristiannan na Roma, el a bai hopi profundo pa loke ta trata e sabiduria di Dios, incluso e “secreto sagrado” [NW] relaciona cu Jehova su proposito pa uza e Reino Mesianico pa rescata hende fiel y pa santifica Su nomber santo. Kico Pablo a pensa di e sabiduria di e Dios cu a formula e proposito aki? E apostel a conclui su carta cu e palabranan aki: “Na e unico Dios sabi sea gloria pa medio di Hesucristo pa semper. Amen.”—Romanonan 11:25; 16:25-27.
16 Pablo a compronde cu Jehova ta “e unico Dios sabi”; e ta posee e plenitud di sabiduria den universo. Cua hende imperfecto por tribi di kere cu e tin un mihor manera pa atende cualkier asunto, te pa e sa con pa atende e desafio cu Satanas a lanta contra e rectitud di e soberania di Jehova? Pues anto, nos tin cu yuda hende haya e mesun respet profundo cu nos ta sinti pa e Dios cu ta “sabi di curason.” (Job 9:4) Mas mihor nos compronde e sabiduria di Jehova, mas plenamente nos lo confia cu su manera di atende asuntonan ta e mihor.—Proverbionan 3:5, 6.
Compronde Jehova Su Cualidad Predominante
17. Con un mihor comprondemento di Jehova su amor por yuda personanan cu ta sinti nan molestia pa e echo cu Dios ta permiti sufrimento?
17 “Dios ta amor.” (1 Juan 4:8) Cu e palabranan remarcabel ei, Bijbel ta identifica Jehova su cualidad predominante, esun di mas atractivo di tur su cualidadnan y esun cu mas ta consola hende cu ta sinti nan molestia pa motibo di e maldad cu ta reina. Jehova a mustra amor den tur aspecto di e manera cu el a atende e desaster grandi cu pica a causa den su creacion. Amor a motiva Jehova pa duna speransa na e yiunan pecaminoso di Adam cu Eva. (Genesis 3:15) Dios a permiti nan acerc’e den oracion y a habri caminda pa nan establece un relacion aproba cu ne. Amor a motiva Dios pa percura un rescate cu lo a habri caminda pa pordona hende completamente di nan picanan y restaura nan na un bida eterno y perfecto. (Juan 3:16) Y amor a motiv’e pa tene pasenshi cu humanidad, dunando mas tanto hende posibel e oportunidad pa rechasa Satanas y scohe Jehova como nan Soberano.—2 Pedro 3:9.
18. Nos a ser bendiciona cu ki comprondemento, y kico nos lo considera den e siguiente articulo?
18 Ora un pastor a papia cu un grupo di hende cu a bini hunto pa conmemora e aniversario di un atake terorista devastador, el a bisa: “Nos no sa pakico te ainda Dios ta permiti maldad y sufrimento.” Esta lamentabel no! Nos ta contento cu nos si ta compronde pakico esaki ta tumando luga, no ta berdad? (Deuteronomio 29:29) Y siendo cu Jehova ta sabi, husto y amoroso, nos sa cu pronto lo e pone fin na tur sufrimento. De echo, el a priminti di haci esei. (Revelacion 21:3, 4) Pero, kico di tur e personanan cu a muri atrabes di siglonan? Acaso Jehova su manera di atende e cuestion cu a surgi den Eden a laga nan sin speransa? No. Amor a motiv’e pa percura pa nan tambe, pa medio di e resureccion. Esei lo ta e topico di e siguiente articulo.
Con Lo Bo Contesta?
• Kico nos por bisa un persona cu ta puntra pakico Dios ta permiti sufrimento?
• Con e manera cu Jehova a atende cu e rebeldenan den Eden ta manifesta su santidad y su husticia?
• Pakico nos mester yuda hende haya un mihor comprondemento di Jehova su amor?
[Preguntanan di Estudio]
[Plachi na pagina 21]
Trata na yuda e personanan cu ta sinti nan molestia pa e sufrimento cu tin na mundo
[Plachi na pagina 23]
Hombernan fiel manera David y Habacuk a haci Dios preguntanan sincero