“Señor, Dicon Bo A Keda Keto?”

ASINA Papa Benedicto XVI a puntra ora el a bishita e excampo di concentracion na Auschwitz, Polonia, dia 28 di mei 2006. Na e sitio caminda e Nazinan a mata cientos di miles di Hudiu y otro hende, el a bisa mas aleu: “E luga aki ta lanta masha hopi pregunta! Cada bes e pregunta ta presenta: Unda Dios tabata den e dianan ei? Dicon el a keda keto? Con e por a permiti e matansa sin fin aki, e triunfo aki di maldad? . . . Nos mester sigui sclama na Dios humildemente pero insistentemente: Haci algo! No lubida riba humanidad, bo creacion!”

E discurso di papa a causa reaccionnan fuerte. Algun hende a ripara cu deliberadamente el a evita di papia riba cierto temanan. Por ehempel, e no a menciona e prehuicio y odio contra Hudiu cu tabata liga cu e crueldadnan di Auschwitz. Otronan a interpreta su palabranan como un intento pa minimisa e pidimento di pordon di parti di Papa Juan Pablo II pa e picanan cu iglesia a comete. Un periodista catolico, Filippo Gentiloni, a remarca: “Pero tabata logico cu hopi comentarista, ora nan a haya nan confronta cu e pregunta dificil relaciona cu unda Dios tabata​—un pregunta sin contesta​—a pidi na su luga un contesta pa e pregunta mas facil: Unda Pio XII tabata?” E comentaristanan tabata referi na e silencio cu Papa Pio XII a mantene durante e Holocausto.

E Holocausto y tur e otro actonan di genocidio cu hende a comete atrabes di historia humano ta demostra cu “hende a eherce autoridad riba . . . otro hende pa su daño.” (Eclesiastes 8:9) Ademas, e Creador di hende no a keda keto en bista di asina tanto crueldad. Mediante e paginanan di Bijbel, el a revela pakico e ta permiti maldad. Tambe Dios a garantisa nos cu e no a lubida riba humanidad. De echo, pronto e periodo di tempo cu Dios a permiti hende goberna nan mes lo yega na su fin. (Jeremias 10:23) Abo kier sa mas tocante ki proposito Dios tin pa nos? Testigonan di Jehova gustosamente lo yuda bo haya e contesta cu Bijbel ta duna riba e preguntanan cu Papa Benedicto XVI no por a contesta.

[Reconocemento pa Potret na pagina 32]

Oświęcim Museum