Speransa den un Mundo Yen di Angustia

“CIUDADANONAN tin mas poder pa contribui na bienestar publico y resolve problemanan comun cu nunca prome den historia humano.” Asina expresidente Bill Clinton a declara durante un conferencia na Ottawa, Canada, na maart 2006. El a yega na e conclusion cu for di dia di e tsunami di 2004 tin un tendencia internacional di bon boluntad y a agrega​—cu un toke di optimismo​—cu awor ta ‘un tempo cu rond mundo hende ta depende di otro mas cu nunca prome.’

Acaso nos por spera cu desasternan natural lo motiva hende na tur parti pa traha pa alcansa un mihor futuro? E echo cu ‘hende ta depende di otro mas cu nunca prome’ ta un base confiabel pa carga e speransa cu lo bin un futuro di berdadero pas y siguridad duradero?

Fuente di Berdadero Speransa

E historia largo di e esfuersonan cu humanidad a haci atrabes di mas cu seis mil aña ta demostra cu hende bes tras bes ta decepciona otro. Cu bon motibo anto, e Scritura inspira  ta conseha nos: “No confia den prinsnan, den yiu di hende, den kende no tin salbacion.” (Salmo 146:3) Si nos ta basa nos speransa riba e organisacionnan, cosnan material y soñonan di e mundo aki, esei lo hiba na decepcion so. Dicon? Pasobra “mundo ta pasa bai y su deseonan tambe.”​—1 Juan 2:17.

Sinembargo, atrabes di siglonan Dios tabata e speransa infalibel di hende husto. Bijbel ta yam’e e “speransa di Israel [di antiguedad]” y “e speransa di [Israel su] tatanan”, y ta contene tantisimo expresion mas di speransa y confiansa den Dios. (Jeremias 14:8; 17:13; 50:7) De echo, e Scritura ta anima nos pa ‘spera riba Jehova.’​—Salmo 27:14.

Proverbionan 3:5 y 6 ta urgi nos: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.” Bo tin tur motibo pa pone pleno confiansa den un promesa asina, pasobra Jehova Dios no ta cambia, e ta confiabel y semper ta cumpli cu su palabra. (Malakias 3:6; Santiago 1:17) E kier loke ta mihor pa bo, y si semper bo ta haci caso di loke ta ser bisa den su Palabra, Bijbel, lo e guia bo cu exito atrabes di e temponan spantoso aki.​—Isaias 48:17, 18.

Un persona cu di henter su curason ta sigui e guia di Dios por confia den e promesa aki: “No tene miedo, pasobra mi ta cu bo; no desmaya, pasobra mi ta bo Dios. Lo mi fortalece bo, si, lo mi yuda bo, si, lo mi sostene bo cu mi man drechi di husticia.” (Isaias 41:10) Hende cu realmente ta stima Jehova Dios ta haya gran consuelo ora nan ta haci oracion fervientemente y ta medita riba e promesa aki, pasobra esaki ta yuda nan trata cu circunstancianan dificil y ansiedad.

Considera e caso di Andrea, un Testigo di Jehova cu ta mama di dos yiu. E ta bisa: “Ta solamente dor di haci oracion y medita riba e promesanan di Jehova mi tin e fortalesa pa bolbe para riba pia ora periodonan di insiguridad surgi den mi bida. Si mi tene Jehova semper presente den mi bida, ta hopi mas facil pa mantene stabilidad.”

Fortifica Bo Speransa den Jehova

Enfatisando e importancia di pone nos speransa den Jehova, un salmista a bisa: “Esnan cu ta stima bo lei tin gran pas, y nada no ta haci nan trompica.” (Salmo 119:165) Un estudio sincero di e Palabra di Dios por yuda bo considerablemente pa yena bo mente y curason cu cosnan spiritual sano y positivo, cosnan cu ta ‘berdadero, honorabel, husto, puro, bunita, di bon fama, virtuoso y digno di alabansa.’ Si bo haci un esfuerso diligente pa tende, siña, ricibi y practica e cosnan ei, ‘e Dios di pas lo ta cu bo.’​—Filipensenan 4:8, 9.

John, a base di decadanan di experencia personal, a bisa: “Pa mi por a cambia mi sintimentonan tocante futuro, tabata importante pa mi siña cu mi mester a haci un cambio drastico den mi personalidad y manera di pensa prome cu mi por a spera di cultiva un relacion cu un Dios perfecto y invisibel. E unico manera cu mi por a forma e relacion ei tabata dor di bira un persona spiritual. Esaki a ensera haci un cambio pa ta mas orienta riba Dios, es decir, haya Dios su punto di bista di asuntonan dor di lesa su Palabra inspira y medita riba dje.”

Si bo ta bebe di e awa refrescante di e berdad cu tin den e Scritura, awa cu ta duna bida, lo bo ta uzando un remedi efectivo y comproba cu lo yuda bo contraresta e avalancha interminabel di cosnan malo cu ta ser presenta diariamente den medionan di comunicacion. Aplicando loke Bijbel ta bisa por fortifica tambe nos lasonan di famia y yuda reduci ansiedad. Es mas, Dios ta priminti cu e ta cla pa “sostene fuertemente esnan cu nan curason ta completamente di dje.” (2 Cronicanan 16:9) Lo e resolve asuntonan di tal manera cu realmente bo no tin nada di teme.

Phinehas, kende a pasa dor di guera y matansanan masal, a bisa: “Mi a siña pone mi bida den e mannan amoroso di Jehova. Algo  cu a spar mi di hopi problema ta cu mi a pega duro na principionan biblico.” Si di berdad bo ta confia den Jehova Dios, e por yuda bo bula over di tur muraya di adversidad. (Salmo 18:29) Un mucha chikito cu ta pega cu su mayornan ta siña confia nan plenamente y ta sinti su mes sigur bou di nan cuido asta ora e ta malo of den cualkier problema. Bo por tin un sintimento similar si bo haci e esfuerso pa acepta e invitacion pa pone bo speransa den Jehova.​—Salmo 37:34.

Un Fundeshi Solido pa Speransa

Hesucristo a bisa su siguidonan: “Haci oracion . . . asin’aki: ‘Nos Tata cu ta den shelo, bo nomber sea santifica. Cu bo reino bin. Cu bo boluntad sosode na Tera mescos cu den shelo.’” (Mateo 6:9, 10) Mediante e Reino celestial ei​—un gobierno den man di Hesucristo​—Dios lo expresa Su soberania legitimo riba Tera.​—Salmo 2:7-12; Daniel 7:13, 14.

E tantisimo motibonan di miedo cu ta afecta tur aspecto di bida awe ta un indicacion cla cu nos tin mester di intervencion divino. Felismente, e intervencion ei ta cerca! Hesucristo, kende Dios a entronisa awor como Rei Mesianico, a ser confia cu autoridad pa vindica Jehova su soberania y santifica Su nomber. (Mateo 28:18) Pronto e gobernacion di Reino lo dirigi su atencion na Tera pa elimina tur e causanan di miedo y ansiedad. Isaias 9:6 ta cita e credencialnan di Hesus pa mustra cu e ta un Gobernante digno cu por alivia nos di nos temornan. Por ehempel, e ta ser yama “Tata Eterno”, “Consehero Maraviyoso” y “Prins di Pas.”

Pensa riba e expresion di cariño “Tata Eterno.” Como tal, Hesus tin e poder y autoridad​—y tambe e deseo​—pa duna hende obediente e posibilidad di bida eterno riba Tera a base di e balor di su sacrificio di rescate. Esaki ta nifica cu nan porfin lo ser libra di pica y imperfeccion hereda di e prome homber pecaminoso, Adam. (Mateo 20:28; Romanonan 5:12; 6:23) Ademas, Cristo lo uza e autoridad cu Dios a dun’e pa resusita hopi hende cu a muri.​—Juan 11:25, 26.

Tempo cu Hesus tabata riba Tera, el a duna prueba di ta e “Consehero Maraviyoso.” Debi na su conocemento di e Palabra di Dios y su comprondemento extraordinario di naturalesa humano, Hesus tabata sa con pa soluciona e problemanan di bida diario. Despues cu Cristo a keda entronisa den shelo, el a sigui ta e “Consehero Maraviyoso”, sirbiendo como e personahe principal den Jehova su canal di comunicacion cu humanidad. Hesus su conseho, registra den Bijbel, semper ta sabi y perfecto. Si bo sa y ta kere esaki, lo bo por hiba un bida liber di insiguridad y miedo cu ta paralisa.

Isaias 9:6 ta identifica Hesus como e “Prins di Pas” tambe. Den e capasidad ei, Cristo pronto lo uza su poder pa elimina tur desigualdad riba tereno politico, social y economico. Con? Dor di pone humanidad bou di e solo gobernacion pacifico di e Reino Mesianico.​—Daniel 2:44.

Bou di gobernacion di Reino, pas duradero lo reina rond mundo. Dicon bo por ta sigur di esaki? E motibo ta ser revela na Isaias 11:9, caminda nos ta lesa: “Nan [e subditonan di e Reino] lo no causa daño ni destruccion den henter mi sero santo, pasobra Tera lo ta yen di e conocemento di SEÑOR, manera awa ta tapa lama.” Cu tempo, tur hende riba Tera lo tin conocemento exacto di Dios y lo obedec’e. E prospecto ei ta haci bo contento? Si ta asina, no tarda pa adkiri e precioso ‘conocemento di Jehova.’

Bo por haci uzo di e conocemento di Dios cu ta edifica fe y ta duna bida dor di analisa loke Bijbel ta siña realmente tocante e sucesonan di nos tempo y e futuro briyante priminti den Bijbel. P’esei nos ta urgi bo pa probecha di e programa di estudio di Bijbel gratis cu Testigonan di Jehova ta ofrece den bo comunidad. Esaki ta un manera pa kita miedo y haya berdadero speransa den un mundo yen di angustia.

 [Cuadro/​Plachi na pagina 7]

Con Bin e Gobierno di Reino Ta Inspira Speransa

Hesucristo, como Rei di e Reino di Dios, a ricibi e capasidad y derecho di eherce poder universalmente. (Mateo 28:18) Lo e restaura e ecologia di Tera na e balansa perfecto. E tin poder riba malesa y enfermedad tambe. E obranan poderoso cu Hesus a efectua riba Tera tabata pa duna un idea di e bendicionnan mas magnifico ainda cu lo bai tin bou di su gobernacion como un Rei perfecto y confiabel. Cua di e cualidadnan di e Rei Mesianico cu ta ser menciona akibou ta atrae bo mas?

▪ Acercabel.​—Marco 10:13-16.

▪ Rasonabel y imparcial.​—Marco 10:35-45.

▪ Responsabel y sin egoismo.​—Mateo 4:5-7; Lucas 6:19.

▪ Husto y recto.​—Isaias 11:3-5; Juan 5:30; 8:16.

▪ Atento, comprensivo y humilde.​—Juan 13:3-15.

[Plachi na pagina 4]

Loke por duna nos speransa den Jehova ta di lesa y medita riba Bijbel