Victoria den e Corte Europeo di Derechonan Humano

DIA 11 di januari 2007, e Corte Europeo di Derechonan Humano na Strasburgo, Francia, a tuma un decision unanime na fabor di Testigonan di Jehova na Rusia den nan caso contra e Federacion Ruso. E decision a sostene e libertad di religion cu Testigonan di Jehova ta gosa di dje y e derecho cu nan tin di haya un audiencia imparcial. Laga nos considera kico a hiba na e caso.

Tin un congregacion di Testigo di Jehova den e stad di Chelyabinsk, Rusia, cu ta consisti principalmente di personanan sordo. Nan tabata tene nan reunionnan den un localidad cu nan a huur di un scol di formacion profesional. Diadomingo 16 di april di aña 2000, e presidente, of comisionado, di e Comision di Derechonan Humano di e region ei hunto cu dos polis di alto rango y un polis bisti na civil a interumpi nan reunion. Pa motibo di prehuicio, particularmente di parti di e comisionado, nan a para e reunion bou di e acusacion falso cu e Testigonan di Jehova tabata tene reunion sin un base legal. Pa 1 di mei 2000 e scol a kibra e contract di huur di e sala.

Testigonan di Jehova a entrega un keho cerca e fiscal di e stad di Chelyabinsk, pero sin resultado. Tanto e Constitucion di Rusia como e Tratado pa Proteccion di Derechonan Humano y Libertadnan Fundamental ta garantisa libertad di religion y libertad di asociacion. P’esei e Testigonan a entrega un keho civil na un corte di districto y despues nan a apela na un corte regional. Anteriormente, dia 30 di juli 1999, corte supremo a dicta den un otro caso cu “segun e Lei di Rusia tocante libertad di consenshi y asociacion religioso, e palabranan ‘sin obstruccion’ ta nifica cu no tin nodi pidi permit, of autorisacion di autoridadnan seglar pa efectua ceremonianan religioso na luganan cu ta fungi [pa e proposito ei].” (Haknan ta di nan.) A pesar di e precedente aki, e kehonan cu e Testigonan a entrega na e cortenan di districto y regional a ser poni un banda.

Dia 17 di december 2001, e Testigonan a presenta e caso na e Corte Europeo di Derechonan Humano. Dia 9 di september 2004 tabatin un audiencia. Lo siguiente ta algun cita for di e veredicto final cu e corte a dicta:

“Corte ta haya cu ora e oficialnan di Estado a para e reunion religioso di e demandantenan dia 16 di april 2000 prome cu e ora di termina, nan a interferi cu e demandantenan su derecho encuanto libertad di religion.”

“Claramente, no tabatin ni un base legal pa a para un evenemento religioso cu tabata tuma luga den un localidad cu e demandantenan a huur legitimamente pa e proposito ei.”

“[Corte] a tuma nota cu a base di otro casonan cu e Corte Supremo di Rusia a yega di trata, no tin nodi pidi permit adelanta di autoridadnan ni pone nan na haltura cu ta bai tene reunionnan religioso.”

“P’esei ora e comisionado y su assistentnan a stroba e demandantenan di tene nan reunion religioso dia 16 di april 2000, nan a viola Articulo 9 [libertad di religion] di e Tratado.”

“Corte ta haya cu e cortenan [di districto y regional di Rusia] a faya den nan deber . . . di demostra cu e partidonan a ser tendi na un manera imparcial y husto . . . Esei tabata un violacion di Articulo 6 [derecho riba un audiencia imparcial] di e Tratado.”

Testigonan di Jehova ta gradici Dios pa e victoria cu el a duna nan na e Corte Europeo di Derechonan Humano. (Salmo 98:1) E decision di e Corte lo bai tin un efecto grandi? Joseph K. Grieboski, presidente di e Instituto Riba Religion y Politica Publico, a bisa: “Esaki ta otro decision hopi importante cu lo tin su efecto riba libertad di religion den henter Europa, ya cu e decision lo tin su impacto riba derechonan religioso den tur estado cu ta cai bou di e Corte Europeo di Derechonan Humano.”