Circuncision Ta un Señal di Hombresa?

NA HOPI parti di mundo, hende ta circuncida babynan masculino pa motibonan di salud. Otro caminda si no tin e custumber di circuncida mucha homber, ni ora nan bira hende grandi. Den algun cultura, manera esnan Hudiu y Moslem, circuncision ta mas cu un medida di salud; e tin un nificacion religioso.

Sinembargo, den cierto paisnan, ora un mucha homber bira grandi, nan ta lag’e pasa den un proceso di circuncision. Por lo general, esaki ta ensera cu nan ta manda e mucha un scol tradicional, caminda nan ta circuncid’e y manten’e separa for di comunidad pa algun siman te ora e recupera di e operacion. Durante e tempo aki, e mucha homber mester participa den cierto ceremonianan specifico y nan ta siñ’e bira homber. E tipo di circuncision aki ta necesario pa proba cu un hobensito a bira homber? Laga nos considera kico Bijbel ta bisa tocante e punto di bista di Dios riba e asunto aki.​—Proverbionan 3:5, 6.

Con Dios Ta Mira Circuncision

Algun pueblo di pasado, manera e Egipcionan, a practica circuncision. Esaki a nifica cu nan tabata kita e prepucio (cuero na final) di e organo sexual masculino. Sinembargo, Abraham no a nace den un cultura asina. De echo, e mayor parti di Abraham su bida, e no tabata circuncida. Es mas, siendo incircuncida, el a demostra cu e tabata un homber balente. Cu un grupo chikito di homber, el a persigui y derota e ehersitonan di e cuater reinan cu a captura su subrino Lot. (Genesis14: 8-16) Rond di 14 aña despues, Dios a bisa Abraham pa e laga circuncida su mes y henter su famia. Pakico Dios a mand’e haci esei?

Esei sigur no tabata un señal cu ta e ora ei numa Abraham a bira homber, ya cu pa e tempo ei e tabatin 99 aña caba! (Genesis 17:1, 26, 27) Dios a duna e motibo pa e mandamento aki, bisando: “Boso mester laga circuncida e carni di boso prepucio, y esaki lo ta e señal di e aliansa entre ami y boso.” (Genesis 17:11) E aliansa ei cu Dios a sera cu Abraham a inclui Su promesa cu despues di tempo, pa medio di Abraham, lo el a bendiciona “tur e famianan di mundo.” (Genesis 12:2, 3) Pues, den bista di Dios, circuncision no tabatin nada di aber cu hombresa. Tabata circuncida hende homber pa indica cu nan a forma parti di e descendientenan Israelita di Abraham, cu a ‘wordo confia cu e palabra di Dios’, locual tabata un privilegio pa nan.​—Romanonan 3:1, 2.

Cu tempo e nacion di Israel a demostra cu nan no tabata digno di e confiansa ei ya cu nan a rechasa e berdadero Simiña di Abraham, Hesucristo. P’esei Dios a rechasa nan, y nan circuncision no tabatin ningun balor mas den bista di Dios. Sinembargo, algun cristian den e prome siglo di nos era a insisti cu ainda Dios tabata rekeri pa hende laga circuncida nan mes. (Echonan 11:2, 3; 15:5) Pa motibo di esaki, apostel Pablo a manda Tito pa “corigi loke tabata defecto” [NW] den varios congregacion. Tocante un di e defectonan ei, Pablo a skirbi Tito: “Tin hopi hende rebelde, hende cu ta papia pa papia, y gañadonan,  specialmente esnan di e circuncision, kendenan mester wordo silencia, pasobra nan ta trastorna famianan completo, siñando hende cosnan cu nan no mag siña nan, djis pa nan haya ganashi deshonesto.”​—Tito 1:5, 10, 11.

Ainda Pablo su conseho ta valido. P’esei, for di e punto di bista biblico, siguramente no ta corecto pa un cristian berdadero recomenda otro hende pa laga circuncida nan yiu. En bes di “mete den asunto di otro” hende, un cristian ta laga e decisionnan personal ei den man di mayornan. (1 Pedro 4:15) Ademas, Dios a inspira Pablo pa skirbi tocante circuncision segun e Lei di Moises: “Tin hende cu a wordo yama, siendo circuncida? No lag’e bira incircuncida. Tin hende cu a wordo yama, siendo incircuncida? No lag’e wordo circuncida. Circuncision no ta nada, ni incircuncision no ta nada, ma loke si ta importante ta e cumplimento di e mandamentonan di Dios. Laga cada hende keda den e condicion cu el a wordo yama.”​—1 Corintionan 7:18-20.

Kico di “Scolnan di Circuncision”?

Kico di mayornan cristian cu ta dicidi di laga circuncida nan yiu hombernan? Ta biblicamente corecto pa nan manda nan yiunan e asina yama scolnan di circuncision describi anteriormente? Baimento di e scolnan ei ta ensera hopi mas cu djis un operacion pa kita e prepucio. E alumno lo pasa varios siman den asociacion estrecho cu otro mucha y maestronan cu no ta adorado di Jehova. Hopi cos cu nan ta siña na e scolnan aki ta bai contra e normanan moral halto di Bijbel. Bijbel ta spierta: “Mal compania ta daña bon custumber.”​—1 Corintionan 15:33.

Ta existi tambe un peliger fisico cu ta aumentando pa esnan cu ta asisti na e scolnan aki. Na 2003 e South African Medical Journal a duna e spiertamento: “E aña aki nos a bolbe tuma nota di casonan teribel di circuncision, cu informenan di morto y mutilacion cu tur e canalnan di noticia importante ta publicando rond mundo . . . Cu poco palabra, awe hopi di e asina yama ‘scolnan di circuncision’ ta engañoso y mortifero.”

Ademas di e posibel lesionnan fisico cu un hoben por sufri tin tambe un peliger spiritual mas grandi ainda. E siñansa- y practicanan na scolnan di circuncision ta estrechamente conecta cu spiritismo y adoracion di antepasado. Por ehempel, en bes di admiti cu operacion con cu ta y situacionnan antihigienico ta responsabel pa e lesionnan cu ta ser causa, hopi hende ta kere cu ta hacimento di bruha of e defunto antepasadonan mal contento ta causa e tragedianan aki. Relaciona cu conexion cu religion falso, Bijbel ta taha: “No uni boso mes den yugo desigual cu incredulonan, pasobra ki compañerismo husticia tin cu inhusticia, y ki comunion lus tin cu scuridad? . . . ‘P’esei, sali for di meimei di nan y separa boso mes’, SEÑOR ta bisa. ‘Y no mishi cu loke ta impuro; y lo mi ricibi boso.’” (2 Corintionan 6:14-17) En bista di e conseho aki, ta masha imprudente pa mayornan cristian manda nan yiu homber un scol di circuncision.

Kico Ta Haci un Cristian Homber?

Sea un homber cristian ta circuncida of no, esei no ta bisa nada di su hombresa. E interes principal di cristiannan berdadero ta pa agrada Dios, no pa “haci un bon impresion den carni.”​—Galationan 6:12.

Sinembargo, pa un cristian agrada Dios e mester ‘circuncida su curason.’ (Deuteronomio 10:16; 30:6; Mateo 5:8) E ta haci esei no dor di cort’e cu un cuchiu, sino dor di rechasa mal deseo y pensamentonan di orguyo, manera e creencia cu dor cu e ta circuncida den carni, esei ta hacie mas cu otro hende. Sea un homber cristian ta circuncida of no, e por demostra su hombresa ora e ta wanta prueba y para “firme den fe.”​—1 Corintionan 16:13; Santiago 1:12.