Con pa Prospera Spiritualmente Durante Biehes

“[Esnan] planta den e cas di SEÑOR ... asta den nan biehes nan lo duna fruta.”​—SALMO 92:13, 14.

1, 2. (a) Con hende hopi bes ta describi biehes? (b) Kico e Scritura ta priminti encuanto e efectonan di pica hereda for di Adam?

BIEHES. Riba kico bo ta pensa ora bo tende e palabra ei? Cuero yen di lachi? Horea cu no ta tende bon? Pianan suak? Of un otro aspecto di e “dianan malo” detaya na un manera bibo na Eclesiastes 12:1-7? Si ta asina, ta importante pa nos corda cu Eclesiastes capitulo 12 ta describi e cambionan cu ta tuma luga segun nos edad ta subi. Pero e cambionan aki no ta segun e proposito original di e Creador, Jehova Dios, sino debi na e efectonan di e pica di Adam riba e curpa humano.​—Romanonan 5:12.

² E echo cu hende su edad ta subi no ta un maldicion riba su mes, pasobra pa bo sigui existi, tempo tin cu pasa. En realidad, crecemento y madures ta caracteristicanan deseabel di tur cos bibo. Pero pronto e dañonan causa pa seis mil aña di pica y imperfeccion cu nos ta mira rond di nos lo pasa pa historia. E ora ei tur hende obediente lo disfruta di bida manera tabata Dios su proposito, sin e dolor di biehes y morto. (Genesis 1:28; Revelacion 21:4, 5) E tempo ei, “ningun habitante lo no bisa: ‘Mi ta malo.’” (Isaias 33:24) Personanan di edad lo bolbe tin nan ‘vigor di hubentud’, y nan carni lo “bira mas suave cu esun di mucha.” (Job 33:25) Pero mientrastanto, nan tur tin cu lucha cu e estado pecaminoso cu nan a hereda for di Adam. Sinembargo, sirbidornan di Jehova ta beneficia den maneranan special ora nan drenta nan añanan di biehes.

3. Menciona algun manera cu cristiannan por ‘duna fruta den nan biehes.’

³ E Palabra di Dios ta sigura nos cu esnan “planta den e cas di [Jehova] ... asta den nan biehes nan lo duna fruta.” (Salmo 92:13, 14) Cu palabranan figurativo e salmista a expresa e berdad fundamental cu fiel sirbidornan di Dios den sentido spiritual por sigui progresa, florece y prospera, asta si fisicamente nan curpa ta bai atras. Den Bijbel y den nos tempo tin hopi ehempel cu ta confirma esaki.

Semper Presente

4. Con e profetisa di edad, Ana, a demostra su devocion na Dios, y ki recompensa el a haya?

⁴ Laga nos considera profetisa Ana di prome siglo. Na edad di 84 aña, Ana ‘nunca no tabata sali for di tempel, y tabata sirbi di dia y anochi cu yunamento y oracion.’ Pero Ana no por tabata biba literalmente den tempel ya cu su tata tabata di “e tribu di Aser”, un tribu no Levita. Figura bo anto cuanto esfuerso lo e mester tabata haci pa e ta na e tempel tur  dia for di ora di e ofrenda di mainta te na ora di e ofrenda di anochi! Sinembargo, Ana a haya un gran recompensa pa su devocion. E tabatin e privilegio di ta na e tempel ora Jose cu Maria a trece Hesus como baby pa present’e na Jehova manera e Lei a manda pa haci. Ora Ana a mira Hesus, el “a cuminsa duna gradicimento na Dios, y a sigui papia di [e mucha] cu tur esnan cu tabata spera e redencion di Jerusalem.”​—Lucas 2:22-24, 36-38; Numbernan 18:6, 7.

5, 6. Cua ta algun manera cu hopi ruman di edad djawe ta desplega un actitud manera di Ana?

⁵ Awe tin hopi ruman di edad entre nos cu ta manera Ana. Nan ta asisti na reunion cu regularidad, ta suplica Jehova sinceramente pa e progreso di adoracion berdadero y tin e deseo ardiente di predica e bon nobo. Un ruman homber di 80 y pico aña cu ta asisti cu regularidad na e reunionnan cristian hunto cu su casa a bisa: “Nos a cultiva e custumber di bai reunion. Nos no kier ta ningun otro caminda. Caminda e pueblo di Dios ta, ei nos kier ta. Einan nos ta sinti nos dushi.” Esaki ta un ehempel cu ta anima nos tur!​—Hebreonan 10:24, 25.

⁶ E lema di Jean, un viuda cristian di 80 y pico aña ta: “Si tin cualkier cos cu ta envolve adoracion berdadero y mi por ta un parti di dje, mi kier hacie.” El a sigui bisa: “Claro cu mi tin mi momentonan di tristesa. Pero dicon tur hende rond di mi mester ta tristo ora ami ta tristo?” Anto su cara tabata briya ora el a conta con dushi ta pa bishita otro paisnan pa ocasionnan spiritualmente edificante. Durante un biahe cu el a haci recientemente, el a bisa e hendenan cu tabata biaha hunto cu ne: “Mi no kier mira mas kasteel; mi kier bai den sirbishi di veld!” Aunke Jean no por a papia e idioma local, toch el a logra lanta interes di algun hende den e mensahe di Bijbel. Ademas, pa varios aña el a traha hunto cu un congregacion cu tabatin mester di yudansa, maske esei a nifica cu e mester a siña un idioma nobo y biaha un ora pa bai reunion y un ora pa bin bek.

Maneranan pa Mantene e Mente Activo

7. Con Moises, na edad avansa, a expresa su deseo pa ta mas intimo ainda cu Dios?

⁷ Hende ta gana experencia di bida segun cu tempo ta pasa. (Job 12:12) Di otro banda, progreso spiritual no ta bin automaticamente segun cu edad ta subi. P’esei sirbidornan fiel di Dios no ta djis depende riba e conocemento cu nan a haya den pasado. Mas bien nan ta haci esfuerso pa “crece den siñansa” segun cu añanan ta pasa. (Proverbionan 9:9) Moises tabatin 80 aña ora Jehova a dun’e un encargo. (Exodo 7:7) Parce cu den su tempo nan a considera un hende di e edad ei algo inusual, pasobra e mes a skirbi: “E dianan di nos bida ta setenta aña, of si hende tin hopi forsa, ochenta aña.” (Salmo 90:10) Toch Moises no a sinti nunca cu e tabata mucho bieu pa siña. Despues di a sirbi Dios pa varios decada, y a disfruta di tantisimo privilegio, y a carga responsabilidadnan pisa, el a roga Jehova: “Laga mi conoce bo camindanan, pa mi conoce bo.” (Exodo 33:13) Moises semper tabatin e deseo pa ta mas intimo ainda cu Jehova.

8. Con Daniel a mantene su mente activo ora e tabatin 90 y pico aña, y cu ki resultado?

⁸ Profeta Daniel tabatin probablemente 90 y pico aña ora cu ainda e tabata samina cuidadosamente e scrituranan santo. Loke el a compronde for di su estudio di “e bukinan”​—esei posiblemente a inclui Levitico, Isaias, Jeremias, Oseas y Amos​—a motiv’e pa acudi na Jehova den oracion ferviente. (Daniel 9:1, 2) Como contesta riba e oracion ei el a haya informacion inspira tocante e binida di e Mesias y e futuro di adoracion puro.​—Daniel 9:20-27.

9, 10. Kico algun ruman a haci pa mantene nan mente activo?

⁹ Mescos cu Moises y Daniel, nos por haci esfuerso pa mantene nos mente activo dor di  consentra riba asuntonan spiritual te caminda nos por. Hopi ruman di edad ta haciendo esei caba. Worth, un anciano cristian di 80 y pico aña, ta haci esfuerso pa keda al dia cu e cuminda spiritual cu “e esclabo fiel y prudente” ta prepara y distribui. (Mateo 24:45) El a bisa: “Mi stima e berdad sin fin. Anto mi ta haya masha emocionante pa mira con e lus di e berdad ta bira mas y mas cla.” (Proverbionan 4:18) Fred tambe, kende a pasa mas cu 60 aña den sirbishi di tempo completo, ta haya un gran animacion spiritual ora e por tin combersacion tocante Bijbel cu e rumannan. El a bisa: “Mi tin cu tene e Bijbel bibo den mi mente. Bo mester por laga Bijbel haya bida, esta, mira su balor y proposito. Bo mester por mira con loke bo ta siña ta pas den e patronchi of ‘ehempel di palabranan sano.’ Si bo por haci e dos cosnan aki, e ora ei bo no tin simplemente pida pida informacion. Mas bien lo bo por mira con cada pida berdad ta briya manera stenchi den un hoya.”​—2 Timoteo 1:13.

¹⁰ E echo cu un hende ta di edad avansa no ta nifica cu nan no por siña ideanan nobo y dificil. Hende den careda di 60, 70 y asta 80 aña, a logra siña lesa y skirbi, of a siña idiomanan nobo. Tin Testigo di Jehova cu a haci esei cu e meta di comparti e bon nobo cu hende di diferente nacionalidad. (Marco 13:10) Harry cu su casa tabata riba 65 aña ora cu nan a dicidi di bai yuda den teritorio Portugues. Harry a bisa: “Laga nos ta franco. Cualkier tarea den bida ta bira mas dificil segun cu bo edad ta subi.” Pero cu esfuerso y persistencia, nan a logra dirigi estudionan di Bijbel na Portugues. Anto ya pa hopi aña caba Harry ta duna asta discurso di congreso di districto na Portugues.

11. Pakico considera e logronan di rumannan fiel di edad?

¹¹ Claro cu no ta tur hende tin e salud ni e circunstancia pa acepta e tipo di retonan ei. Pues pakico nos ta considera loke algun ruman di edad a logra? Un cos ta sigur, esaki no ta pa indica cu tur ruman di edad mester haci esfuerso pa logra mescos. Mas bien, esaki ta na harmonia cu loke apostel Pablo a skirbi e cristiannan Hebreo relaciona cu ancianonan fiel di congregacion: “Considerando e resultado di nan conducta, imita nan fe.” (Hebreonan 13:7) Ora nos ta contempla e ehempelnan ei di celo, nan por anima nos pa imita e fe fuerte cu ta motiva e rumannan di edad aki den nan sirbishi na Dios. Harry, cu awor tin 87 aña, a splica kico ta motiv’e: “Lo mi kier uza e añanan di bida cu a resta mi na un manera sabi y ser mas util posibel den e sirbishi di Jehova.” Fred, menciona un biaha caba, ta haya gran satisfaccion den cumpli cu su asignacion na Betel. El a bisa: “Bo tin cu busca pa sa cua ta e mihor manera pa bo sirbi Jehova y pega na esei.”

Devoto a Pesar di Cambio di Circunstancia

12, 13. Con Barzilai a desplega devocion na Dios a pesar cu su circunstancia a cambia?

¹² Tin biaha ta dificil pa acepta y trata cu cambionan fisico. Sinembargo, ta posibel pa demostra devocion na Dios a pesar di tal cambio. Barzilai e Galaadita tabata un excelente  ehempel den esaki. Na edad di 80 aña, el a demostra hospitalidad extraordinario na David y su ehersito. El a percura cuminda y luga di keda pa nan durante e rebelion di Absalon. Ora David tabata regresa Jerusalem, Barzilai a escolta henter e grupo te na Riu Jordan. David a ofrece Barzilai un puesto den su corte real. Con Barzilai a reacciona? “Mi tin ochenta aña awor ... Bo sirbidor por sinti smak di loke mi ta come of loke mi ta bebe? Of mi por tende ainda e bos di hombernan y muhernan cu ta canta? ... Ata bo sirbidor Kimam aki, lag’e crusa cu señor mi rei, y haci p’e loke ta bon den bo bista.”​—2 Samuel 17:27-29; 19:31-40.

¹³ A pesar cu Barzilai su circunstancia a cambia, el a haci loke e tabata por pa apoya e Rei nombra pa Jehova. El a reconoce cu su oido y sentido di sinti smak no tabata mescos cu antes mas, pero e no tabata amarga. Mas bien, Barzilai a laga mira ki tipo di persona e tabata ora cu generosamente el a recomenda pa Kimam ricibi e beneficionan cu David a ofrec’e. Mescos cu Barzilai, tin hopi ruman di edad awe cu ta mustra cu nan no ta egoista y cu ta desplega un actitud generoso. Nan ta haci loke nan por pa apoya adoracion berdadero, sabiendo cu “sorto di sacrificionan asina ta agrada Dios.” Ta ki un bendicion di tin rumannan leal entre nos!​—Hebreonan 13:16.

14. Con e edad avansa di David ta agrega nificacion na e palabranan di Salmo 37:23-25?

¹⁴ A pesar cu e circunstancianan di David a cambia hopi biaha atrabes di añanan, el a keda combenci cu e cuido di Jehova pa su sirbidornan leal no ta cambia nunca. Casi na final di su bida, David a compone e cantica conoci awe como Salmo 37. Djis imagina bo David den un estado di animo pensativo ta toca riba harpa y ta canta e palabranan aki: “E pasonan di un hende ta estableci dor di SEÑOR, y E tin delicia den su caminda. Maske e trompica, e lo no cai; pasobra SEÑOR ta sosten’e cu su man. Mi tabata jong, y awor mi ta bieu; ma nunca mi no a mira e husto desampara, ni su descendientenan ta pidi pan.” (Salmo 37:23-25) Jehova a haya cu ta bon pa inclui e referencia na David su edad den e salmo inspira aki. Esei ta agrega un sintimento profundo na e palabranan sincero ei!

15. Con apostel Juan a pone un excelente ehempel di fieldad a pesar di biehes y cambio di circunstancia?

¹⁵ Apostel Juan ta un otro excelente ehempel di fieldad a pesar di edad avansa y cambio di circunstancia. Despues di a sirbi Dios pa casi 70 aña, Juan a ser exilia pa e isla di Patmos “pa motibo di e palabra di Dios y e testimonio di Hesus.” (Revelacion 1:9) Sinembargo, su trabou no a caba. De echo, tur loke Juan a skirbi cu ta den Bijbel, el a skirbi den e ultimo añanan di su bida. Mientras e tabata na Patmos el a haya e vision impresionante di Revelacion, locual el a skirbi cuidadosamente. (Revelacion 1:1, 2) Historiadonan por lo general ta kere cu el a sali for di exilio durante e reinado di Emperador Romano Nerva. Despues di esei, rond di aña 98 di nos era, ora cu e tabatin probablemente 90 of 100 aña di edad, Juan a skirbi su Evangelio y e tres cartanan cu ta carga su nomber.

Un Registro Permanente di Perseverancia

16. Con rumannan cu ta limita den nan capasidad di comunica por demostra nan devocion na Jehova?

¹⁶ Limitacionnan por bin den varios forma  y na diferente grado. Por ehempel, tin persona cu a bira limita asta den nan capasidad di comunica. Sinembargo, te ainda nan tin grato recuerdo di Dios su amor y bondad inmereci. Maske nan ta limita den loke nan por bisa cu nan boca, den nan curason nan ta bisa Jehova: “O cuanto mi ta stima bo lei! E ta mi meditacion henter dia.” (Salmo 119:97) Jehova, di su parti, conoce esnan cu ta “pensa riba su nomber.” E ta aprecia cu nan ta masha distinto for di e gran mayoria di humanidad cu no ta ni un tiki interesa den su camindanan. (Malakias 3:16, NW; Salmo 10:4) Pues, ta un gran consuelo pa sa cu loke nos ta medita riba dje den nos curason ta haci Jehova contento!​—1 Cronicanan 28:9; Salmo 19:14.

17. Kico sirbidornan di Jehova di hopi tempo a logra cu ta realmente unico?

¹⁷ Un cos cu nos no mester pasa por halto ta e echo cu e rumannan cu a sirbi Jehova fielmente pa varios decada a logra algo cu ta realmente unico y cu nos no por haya na ningun otro manera. Esei ta un registro permanente di perseverancia. Hesus a bisa: “Dor di boso perseverancia boso lo gana boso alma.” (Lucas 21:19) Perseverancia ta esencial pa haya bida eterno. Boso cu a haci “e boluntad di Dios” y cu na boso manera di biba a duna prueba di boso lealtad por spera cu goso di ricibi “loke a wordo priminti.”​—Hebreonan 10:36.

18. (a) Kico Jehova ta keda contento di mira relaciona cu rumannan di edad? (b) Kico nos lo considera den e siguiente articulo?

¹⁸ Jehova ta duna gran balor na boso sirbishi di henter alma sin importa con hopi of con tiki boso por haci. A pesar di loke por ta pasando cu e “hende exterior” segun cu nos edad ta subi, e “hende interior” por ser renova dia tras dia. (2 Corintionan 4:16) No tin duda cu Jehova ta aprecia loke boso a logra den pasado, pero ta bisto tambe cu e ta aprecia loke boso ta haciendo aworaki pa su nomber. (Hebreonan 6:10) Den e siguiente articulo nos lo considera e efecto di largo alcance cu e tipo di fieldad ei tin.

Con Lo Bo Contesta?

• Ki excelente ehempel Ana a pone pa cristiannan di edad djawe?

• Dicon edad no necesariamente ta limita loke un hende por haci?

• Con rumannan di edad por sigui demostra devocion na Dios?

• Con Jehova ta mira e sirbishi cu rumannan di edad ta rindi na dje?

[Preguntanan di Estudio]

[Plachi na pagina 23]

Na edad avansa Daniel a compronde for di “e bukinan” e duracion di Juda su exilio

[Plachi na pagina 25]

Hopi ruman di edad ta ehemplar den asisti na reunion cu regularidad, den predica cu celo y den nan gran deseo pa siña