Di Rol pa Codex​—Con Bijbel A Haya Forma di Buki

DEN transcurso di siglonan, hende a conserva informacion den varios manera. Den pasado, escritornan a skirbi nan palabranan riba monumento, tabla di piedra of di palo, blachi di percament y otro material. Rond di e prome siglo, den Medio Oriente, e forma usual y estableci pa conserva palabra skirbi tabata e rol. Despues a bini e codex, locual cu tempo a remplasa e rol y a bira e medio comun pa warda informacion skirbi. Esei a contribui hopi tambe na e distribucion di Bijbel. Kico e codex tabata, y con hende a cuminsa uz’e?

E codex tabata e prototipo, of forma original, di loke awe ta buki. E tabata consisti di papel cu tabata ser dobla na dos, poni hunto y mara na otro den e dobla. Tabata skirbi na tur dos banda di e paginanan y proteha esakinan cu un kaft duro. E prome codexnan no tin masha paresido di e bukinan djawe; pero mescos cu mayoria di otro invento, nan a desaroy’e y adapt’e na e necesidadnan y preferencianan di e hende cu tabata uz’e.

Palo, Wax y Percament

Na principio, hopi bes nan tabata traha e codexnan di tabla di palo cubri cu wax. Na Herculano, un stad cu e erupcion di volcan Vesuvio a destrui hunto cu Pompei na aña 79 di nos era, nan a haya diferente poliptico, of tabla, cubri cu wax pega na otro den nan largura. Cu tempo, hende a remplasa e tablanan inflexibel cu blachi traha di material cu por a dobla. Na Latin, e codexnan, of bukinan aki tabata ser yama membranae, of percament, pa motibo di e cuero cu por lo general nan tabata uza como nan paginanan.

Algun codex cu a sobrevivi tabata traha di papiro. E codexnan cristian di mas bieu cu hende conoce, cu a keda conserva den e clima seco di cierto areanan di Egipto, tabata di papiro. *

Rol of Codex

Ta parce cu cristiannan tabata uza principalmente e rol, por lo menos te na cabamento di e  prome siglo di nos era. Den e periodo cu ta core for di e fin di e prome siglo te siglo 3 di nos era tabatin un bataya entre e hendenan cu a promove e codex y esnan cu a promove e rol. Esnan cu a pega na tradicion y cu a custumbra uza e rol, no tabata dispuesto pa pone esaki un banda. Pero pensa cuanto cos un hende mester a haci pa lesa un rol. Por lo general, un rol tabata consisti di un cantidad fiho di blachi di papiro of percament gelijm na otro pa forma un blachi largo cu despues nan tabata lora. Tabata skirbi e texto den columna na e banda ariba di e rol. Pa un hende por a lesa e rol, e mester a habrie pa haya e pasashi cu e tabata busca. Despues cu el a caba di les’e, e tabata lor’e bek atrobe. (Lucas 4:16-20, BPK) Hopi biaha, mas cu un rol tabata necesario pa un solo obra literario, locual a hacie asta mas fastioso pa uza. Aunke cristiannan for di siglo 2 aparentemente a prefera di copia e Scritura den forma di codex, toch nan a sigui uza e rol pa hopi siglo. Pero expertonan ta kere cu e echo cu cristiannan tabata uza e codex a pone cu el a wordo ampliamente acepta.

E bentahanan di e codex tabata obvio: tabatin mas espacio pa skirbi ariba, e tabata mas facil pa traha cu ne y pa carga. Aunke algun hende a mira e bentahanan aki for di un principio, e mayoria no kier a stop di uza e rol mesora. Sinembargo, den transcurso di siglonan, varios factor a contribui cu pocopoco pero sigur tur hende a cuminsa uza e codex.

Compara cu e rol, e codex tabata mas economico. Por a skirbi na tur dos banda di un pagina, y por a mara varios buki den e mesun volumen. Segun algun fuente, e echo cu por a haya pasashinan specifico facilmente den e codex a pone cu cristiannan y profesionalnan manera abogadonan a cuminsa uz’e ampliamente. Pa cristiannan, codexnan compacto​—of simplemente un lista practico di citanan di Bijbel​—tabata sumamente util pa e trabou di predica. Ademas, e codex tabatin un kaft, hopi biaha traha di palo, pues e tabata mas duradero cu e rol.

E codex tabata practico tambe pa un hende lesa. Pa fin di siglo 3, e Evangelionan den forma di percament tamaño chikito tabata circula entre e hendenan cu tabata yama nan mes cristian. For di e tempo ei, miyones y miyones di ehemplar di Bijbel of parti di dje a ser produci den forma di codex.

Awe, hopi herment a habri caminda pa bo haya acceso lihe y facil na e sabiduria di Dios cu Bijbel ta contene. Bo por hay’e riba computer, grabacion di zonido y pagina imprimi. Sea cual sea e formato di Bijbel cu bo ta prefera, cultiva amor pa e Palabra di Dios, y ocupa bo mes diariamente cu ne.​—Salmo 119:97, 167.

[Nota]

[Plachi na pagina 15]

E codex a contribui hopi na e distribucion di Bijbel