E Fuente di Maldad Desenmascara!

DEN e prome siglo, hopi Hudiu tabata spera yegada di e Mesias priminti. (Juan 6:14) Ora Hesus a bini na Tera, el a trece consuelo y iluminacion spiritual. El a cura e enfermonan, alimenta hende cu hamber, calma mal tempo y asta lanta morto. (Mateo 8:26; 14:14-21; 15:30, 31; Marco 5:38-43) Tambe el a “papia e palabranan” di Jehova y a presenta e promesa di bida eterno. (Juan 3:34) Cu echo y palabra Hesus a demostra cabalmente cu e tabata e Mesias, esun cu mester libra humanidad for di pica y tur su consecuencianan desastroso.

Logicamente, e lidernan religioso Hudiu lo mester tabata e promenan pa ricibi Hesus, scuch’e y acepta su guia gustosamente. Pero nan no a hacie. En bes di esei, nan a odi’e, persiguie y uni pa mat’e!​—Marco 14:1; 15:1-3, 10-15.

P’esei Hesus tabatin bon motibo pa a condena e hombernan culpabel ei. (Mateo 23:33-35) Sinembargo, el a reconoce cu tabatin un persona mas cu mester a culpa pa e maldad cu tabatin den nan curason. El a bisa nan: “Boso ta di boso tata e Diabel, y boso kier haci e deseonan di boso tata. E tabata un matado for di principio, y no [a] para den e berdad, pasobra no tin berdad den dje. Ki ora cu e papia un mentira, e ta papia for di su mes naturalesa, pasobra e ta un gañado y e tata di mentira.” (Juan 8:44) Aunke Hesus a reconoce cu hende ta capas di haci malo, el a indica ken ta e fuente mes di maldad: Satanas e Diabel.

Ora Hesus a bisa cu Satanas “no a para den e berdad”, el a revela cu un tempo e criatura spiritual aki tabata un fiel sirbidor di Dios pero cu el a desvia for di e caminda recto ei. Dicon Satanas a lanta contra Jehova? El a cuminsa sinti su mes asina importante cu el a cudisha e adoracion cu ta pertenece solamente na Dios. *​—Mateo 4:8, 9.

E rebelion di Satanas a keda manifesta den e hofi di Eden na momento cu el a engaña Eva y pon’e come e fruta prohibi. Ora el a papia e prome mentira ei, locual tabata un calumnia contra Jehova, Satanas a haci su mes “e tata di mentira.” Ademas, dor di hinca Adam cu Eva den tentacion pa desobedece Dios, el a pone nan cai den e gara di pica. Y finalmente esaki a causa tanto nan morto como e morto di futuro generacionnan. Pues, Satanas a haci su mes tambe “un matado”​—si, e matado di mas repugnante di tur tempo!​—Genesis 3:1-6; Romanonan 5:12.

E influencia malbado di Satanas a alcansa asta e region di spirito, caminda el a instiga otro angelnan pa uni cu ne den su rebelion. (2 Pedro 2:4) Mescos cu Satanas, e spiritonan malbado aki a mustra un interes inapropia den hende. Sinembargo, den nan caso, esei tabata  un interes sexual perverso, cu consecuencianan desastroso.

Maldad A Reina Riba Tera

Bijbel ta bisa nos: “Ora hende a cuminsa multiplica ... y a haya yiu muhernan, e yiu hombernan di Dios a mira cu e yiu muhernan di hende tabata bunita; y nan a tuma esposanan pa nan mes, esun cu nan tabata kier a scohe.” (Genesis 6:1, 2) Ken e “yiu hombernan di Dios” ei tabata? Nan no tabata hende, sino criaturanan spiritual. (Job 1:6; 2:1) Con nos por sa esei? Un motibo ta cu hende tabatin 1.500 aña caba ta casa cu otro y p’esei no tabatin nodo di haci mencion special di esei. Pues dor di hala atencion na e echo cu “e yiu hombernan di Dios” a tuma curpa humano y a casa cu “e yiu muhernan di hende”, e relato ta referi claramente na algo fuera di lo normal.

E tipo di yiu cu e unionnan aki a produci ta confirma cu esaki tabata abnormal. Den e idioma original di Bijbel nan tabata yama nefilim. Nan tabata yiunan mescla cu a crece bira gigante. Ademas, nan tabata hende sumamente violento. De echo, e palabra “nefilim” ta nifica “esnan cu ta pone otro cai.” E Palabra di Dios ta describi e salbahenan aki como “hombernan poderoso y balente di temponan aya, hombernan di fama.”​—Genesis 6:4.

Bou di influencia di nefilim y nan tatanan, e mundo di e tempo ei a bira mas malbado cu nunca. Segun Genesis 6:11, “Tera tabata corumpi den bista di Dios y ... yen di violencia.” Si, otro hende tambe a cuminsa practica violencia y corupcion mescos cu e elementonan aki cu tabata meimei di nan.

Pero den ki manera nefilim y nan tatanan a eherce un mal influencia asina poderoso riba hende? Esei tabata dor di stimula hende su inclinacion y deseonan pecaminoso. Cu ki resultado? “Tur carni a corumpi nan caminda riba Tera.” Finalmente, Jehova a trece un Diluvio mundial cu a destrui e mundo ei. Ta husto Noe y su famia so a scapa. (Genesis 6:5, 12-22) Sinembargo, e angelnan materialisa a regresa e region di spirito den un condicion desaproba. Como demoñonan degrada, nan a sigui opone Dios y su famia husto di angelnan leal. Aparentemente, for di e tempo ei padilanti Dios a prohibi e spiritonan malbado aki di tuma curpa humano. (Judas 6) No obstante, te ainda nan tin influencia poderoso riba hende.

E Malbado Ta Completamente Desenmascara!

Prome Juan 5:19 ta duna nos un idea di con leu e influencia malbado di Satanas a yega. “Henter mundo ta bou di control di e malbado.” Diabel ta manipula humanidad hibando nan den un tormenta di mas y mas calamidad. De echo, e ta mas dicidido cu nunca pa causa desaster. Dicon? Pasobra el a ser saca for di shelo hunto cu e demoñonan despues cu e Reino di Dios a ser estableci na 1914. Relaciona cu e expulsion aki, Bijbel a profetisa: “Ai di Tera ..., pasobra Diabel a baha bin cerca boso cu gran furia, sabiendo cu ta ked’e solamente un poco tempo mas.” (Revelacion 12:7-12) Pero con Satanas ta eherce su influencia riba humanidad awe?

E ta haci esei principalmente dor di fomenta un spirito cu ta dirigi e manera cu hende ta pensa y actua. P’esei mes, Efesionan 2:2 [NW] ta bisa cu Diabel ta “e gobernante di e  autoridad di aire, e spirito [of, actitud dominante] cu awor ta obra den e yiunan di desobediencia.” En bes di anima hende pa teme Dios y haci bon, e “aire” demoniaco aki ta instiga hende pa bai contra Dios y su normanan. Asina Satanas y su demoñonan ta promove e maldad cu hende ta comete y ta pone cu esaki ta bira cada bes mas piyo.

“Warda Bo Curason”

Un manifestacion di e “aire” aki ta e plaga di pornografia, cu ta lanta deseo sexual inapropia den hende y haci comportacion abnormal parce atractivo. (1 Tesalonicensenan 4:3-5) Violacion sexual, sadismo, violacion sexual na grupo, sex cu bestia y abuso sexual di mucha ta algun di e cosnan cu pornografia ta presenta como entretenimento. Asta e formanan menos dañino di pornografia por crea un adiccion fuerte, afectando esnan cu ta wak e of lesa di dje di tal manera cu nan ta crea e custumber di wak e. * E ta un bicio cu ta daña tanto bo relacion cu otro hende como bo relacion cu Dios. Pornografia ta refleha e mentalidad degrada di e demoñonan cu ta promov’e, esta, e rebeldenan kende nan deseonan sexual inapropia ta data for di tempo di Noe den e mundo prome cu e Diluvio.

E homber sabi Salomon tabatin bon motibo anto pa spierta hende: “Warda bo curason riba tur cos, pasobra e ta e fuente di bida.” (Proverbionan 4:23) Den practica, pa bo warda bo curason for di e trampa di pornografia, lo bo tin cu cambia canal di television of paga bo computer ora escenanan cu contenido sexual presenta. Y ta importante pa bo actua mesora, sin basila! Imagina bo cu bo ta un solda cu ta purba rechasa un misil lansa den direccion di bo curason. Satanas ta mik riba bo curason figurativo​—bo centro di motivacion y deseo​—y ta trata di corumpi esaki.

Tambe bo tin cu proteha bo curason pa e no cuminsa gusta violencia, pasobra Diabel sa cu “esun cu ta gusta violencia [Jehova] ta odia.” (Salmo 11:5) Ripara cu Satanas no tin nodi haci bo un criminal feros pa bo bira enemigo di Dios; tur loke e tin cu haci ta pon’e bo cuminsa gusta violencia. P’esei no ta un coincidencia cu medionan di comunicacion ta satura cu violencia, hopi bes asta cu temanan tocante cosnan sobrenatural. Nefilim a muri y no t’ei mas, pero nan caracteristicanan y comportacion si t’ei keto bai! Bo escohencia di entretenimento ta mustra cu bo ta resisti e trikinan di Satanas?​—2 Corintionan 2:11.

 Con pa Resisti Satanas Su Influencia Malbado

E forsanan di maldad por parce hopi dificil pa lucha cu ne. Bijbel ta mustra cu hende cu ta haci esfuerso pa agrada Dios tin cu “lucha” no solamente contra nan mes carni pecaminoso sino tambe “contra e forsanan spiritual di maldad.” Pa nos por gana den e lucha y haya e aprobacion di Dios, nos tin cu probecha di tur e provisionnan di Dios.​—Efesionan 6:12; Romanonan 7:21-25.

E provisionnan aki ta inclui Dios su spirito santo, e forsa di mas poderoso den universo. Apostel Pablo a skirbi e cristiannan di prome siglo: “Nos a ricibi, no e spirito di mundo, sino e spirito cu ta bin di Dios.” (1 Corintionan 2:12) Hende cu ta laga e spirito di Dios guia nan ta siña stima loke Dios ta stima y odia loke e ta odia. (Amos 5:15) Con bo por haya spirito santo? Principalmente pa medio di oracion, estudio di Bijbel​—siendo cu Bijbel mes ta un producto di spirito santo​—y asociacion saludabel cu hende cu di berdad ta stima Dios.​—Lucas 11:13; 2 Timoteo 3:16; Hebreonan 10:24, 25.

Ora bo ta probecha di e provisionnan di Dios aki, bo ta cuminsa bisti “e armadura completo di Dios”, e unico proteccion sigur contra “e trampanan di Diabel.” (Efesionan 6:11-18) Awor mas cu nunca ta urgente pa nos saca pleno probecho di e provisionnan aki. Con asina?

Fin di Maldad Ta Cerca!

Segun e salmista, “ora e malbado spruit manera yerba, y tur cu ta haci inikidad florece, ta pa nan wordo destrui pa semper.” (Salmo 92:7) Si, mescos cu den e tempo di Noe, e maldad cu ta reina awe ta un indicacion cu e huicio di Dios ta acercando rapidamente, no djis contra hende malbado sino tambe contra Satanas y su demoñonan, kendenan lo ser tira den un abismo di inactividad como preludio di nan destruccion final. (2 Timoteo 3:1-5; Revelacion 20:1-3, 7-10) Ken lo ehecuta e huicio ei? Esei lo ta Hesucristo mes, di kende nos ta lesa: “E Yiu di Dios a aparece pa e proposito aki, pa e destrui e obranan di Diabel.”​—1 Juan 3:8.

Bo ta anhela pa maldad yega na su fin? Si ta asina, bo por haya consuelo den e promesanan cu Bijbel ta contene. No tin ni un otro buki cu ta desenmascara e fuente mes di maldad, esta, Satanas. Tampoco no tin ni un otro buki cu ta mustra con tanto e como tur su obranan malbado lo ser destrui finalmente. Nos ta anima bo pa busca conocemento exacto di Bijbel awor pa bo proteha bo mes contra e influencianan malbado di Satanas y pa garantisa bo speransa di biba den un mundo liber di maldad.​—Salmo 37:9, 10.

[Nota]

[Cuadro/Plachi na pagina 6]

Leyenda cu un Rastro di e Berdad

Rond mundo bo por haya leyendanan antiguo tocante semidios, gigante y un diluvio catastrofico. Por ehempel, e Poema Epico di Gilgamesh na Acadio ta menciona un diluvio, un barco y sobreviviente. Gilgamesh mes a ser describi como un semidios​—mitar dios, mitar hende​—inmoral y violento. Leyenda Azteca ta papia di un mundo antiguo habita pa gigante y tambe di un diluvio grandi. Leyenda Norwechi ta describi un rasa di gigante y un homber sabi cu tabata yama Bergelmir cu a construi un boto grandi pa salba su mes y su esposa. E testimonio combina di tur e leyendanan ei ta confirma e testimonio cu Bijbel ta duna, esta, cu tur hende a bini di e sobrevivientenan di un diluvio cu a destrui un mundo malbado di antiguedad.

[Plachi]

Un tabla riba cua e Poema Epico di Gilgamesh ta graba

[Reconocemento]

The University Museum, University of Pennsylvania (neg. # 22065)

[Plachi na pagina 5]

Awe hende ta refleha caracteristica di nefilim

[Plachi na pagina 7]

Conocemento exacto ta duna nos fortalesa pa resisti influencianan malbado