E Poder di Lenga

LENGA di giraf por crece te 45 centimeter largo y tin suficiente forsa y flexibilidad pa ranca blachi for di rama di palo. Lenga di bayena blou ta pisa mes tanto cu un olifanti. Imagina bo e forsa cu un bayena mester tin pa djis move e lenga ei!

Lenga humano no ta nada na comparacion pa loke ta tamaño, peso y forsa. Sinembargo, e ta hopi mas poderoso. Bijbel ta bisa tocante e miembro chikito aki di e curpa humano: “Morto y bida ta den e poder di lenga.” (Proverbionan 18:21) En berdad, cuanto biaha nos no a tende con hende a uza e poder mortal di lenga pa inventa mentira y testimonio falso cu a ruina victimanan inocente of asta causa nan morto?

Asina tambe, hopi amistad bieu a kibra pa motibo di comentarionan ofensivo. Palabranan skerpi a yega di aplasta sintimentonan di hende. Job a ser calumnia masha pa su compañeronan, y el a sclama: “Cuanto tempo mas boso lo tormenta mi, y kibra mi na pida-pida cu palabra?” (Job 19:2) Discipel Santiago a duna un descripcion bibo di e poder destructivo di un lenga cu hende no frena: “E lenga ta un parti chikito di e curpa y toch e ta gaba di cosnan grandi. Mira con un mondi asina grandi ta wordo pega na candela dor di un chispa asina chikito! Y e lenga ta un candela.”​—Santiago 3:5, 6.

Di otro banda, e poder di lenga por duna bida tambe. Palabranan di consuelo y comprension a yega di yuda hende sali for di depresion y evita di mata nan curpa. Hopi drogadicto y criminal sin heful a scapa di un morto prematuro pasobra nan a haci caso di bon conseho. En berdad e fruta di un persona husto su lenga ta “un palo di bida”, y “un palabra papia na ora apropia ta manera un apel di oro den montura di plata.”​—Proverbionan 15:4; 25:11.

Sinembargo, e mihor uzo di lenga ta pa alaba Jehova, declara e bon nobo di e Reino di Dios y siña otro hende e berdadnan precioso di Bijbel. Dicon? Pasobra Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.”​—Juan 17:3; Mateo 24:14; 28:19, 20.