Hende di Edad Ta un Bendicion pa Hobennan

“Asta ora mi bira bieu, cu cabei blanco, o Dios, no bandona mi, te ora mi declara bo poder na e generacion aki, bo poder na tur esnan cu ta bin.”​—SALMO 71:18.

1, 2. Kico sirbidornan di Dios di edad mester realisa, y kico nos lo bai considera?

UN ANCIANO cristian na West Africa a bishita un ruman homber ungi di edad y a puntr’e: “Con ta bai cu ruman?” E ruman a contest’e: “Mi por core y mi por bula riba dos pia y asta riba un pia.” Y segun cu e tabata bisa esei, el a purba mustra con. Caba el a agrega: “Pero mi no por bula manera parha.” E anciano a compronde kico e ruman tabata kiermen, esta: ‘Loke mi por haci, mi ta keda contento pa haci, pero loke mi no por haci, mi no ta haci.’ E anciano cu a haci e bishita ei awor tin riba 80 aña, y e tin grato recuerdo di e ruman di edad ei su sentido di humor y su lealtad.

² Ora un persona di edad ta desplega cualidadnan cu ta agrada Dios, esei por causa un impresion duradero riba otro hende. Claro cu edad riba su mes no ta produci sabiduria ni e cualidadnan cu Cristo a desplega. (Eclesiastes 4:13) Bijbel ta declara: “Cabei blanco ta un corona digno, cu bo ta gana ora bo biba segun Dios su palabra.” (Proverbionan 16:31, BPK) Si bo ta un persona di edad avansa, bo ta realisa ki bon influencia loke bo ta bisa y haci por tin riba otro hende? Considera algun ehempel biblico cu ta mustra te con leu personanan di edad tabata un berdadero bendicion pa personanan mas hoben.

Fe Cu Tabatin Efecto di Largo Alcance

3. Con Noe su fieldad ta beneficia tur hende na bida awe?

³ E fe y firmesa di Noe a produci beneficio  cu hende ta sinti te awe. Noe tabatin casi 600 aña ora cu el a traha e arca, trece e bestianan hunto y predica na su prohimo. (Genesis 7:6; 2 Pedro 2:5) Noe su temor di Dios a influencia e manera cu el a actua, y debi na esei e cu su famia a sobrevivi e gran Diluvio y a bira e antepasado di tur hende riba Tera awe. Ta berdad cu Noe a biba tempo cu hende por lo general tabata biba mas largo. Sinembargo, asta ora e tabata di edad mas avansa, el a keda fiel y esei a resulta den bendicionnan di gran balor. Den ki manera?

4. Ki cualidadnan Noe a demostra cu ta bale la pena pa sirbidornan di Dios djawe imita?

⁴ Noe tabatin casi 800 aña di edad ora Nimrod a cuminsa construi e Toren di Babel, locual tabata contrario na Jehova su mandamento pa ‘yena e Tera.’ (Genesis 9:1; 11:1-9) Pero Noe no a participa den e rebelion di Nimrod. Pues, probablemente Noe si a keda cu su idioma ora cu Jehova a confundi idioma di e rebeldenan. Un cos ta sigur, ta bale la pena pa sirbidornan di Dios di tur edad imita e fe y firmesa di Noe. E cualidadnan ei tabata bisto no solamente durante su biehes sino durante henter e bida largo cu e tabatin.​—Hebreonan 11:7.

Influencia Riba Famia

5, 6. (a) Kico Jehova a manda Abraham haci ora e tabatin 75 aña? (b) Con Abraham a reacciona riba e ordo di Dios?

⁵ Pues, for di e bida di e patriarcanan cu a biba despues di Noe, nos por mira ki influencia personanan di edad por tin riba e fe di nan miembronan di famia. Abraham tabatin mas o menos 75 aña ora cu Dios a bis’e: “Sali for di bo tera, y for di bo famianan y for di cas di bo tata, bai na e tera cu lo mi mustra bo; y lo mi haci bo un nacion grandi, y lo mi bendiciona bo.”​—Genesis 12:1, 2.

⁶ Imagina bo cu un persona manda bo bandona bo cas, bo amigonan, bo pais natal y e siguridad di bo famianan cerca, y pa bo bai na un pais cu bo no conoce. Ta precies esei Dios a bisa Abraham. Anto el ‘a sali bai manera Jehova a papia cu ne’, y pa e resto di su bida el a biba den tent como stranhero den e pais di Canaan, biahando di un luga pa otro. (Genesis 12:4; Hebreonan 11:8, 9) Aunke Jehova a bisa cu Abraham lo a bira “un nacion grandi”, el a muri hopi prome cu su descendientenan a bira un multitud grandi. Su casa, Sara, a haya un yiu so, Isaak. Anto esei tabata despues cu ya Abraham tabatin 25 aña den e Tera Priminti. (Genesis 21:2, 5) Sinembargo, Abraham no a cansa y bai bek na e stad for di caminda el a bin. Un excelente ehempel di fe y perseverancia!

7. Ki efecto Abraham su perseverancia tabatin riba su yiu Isaak, y cu ki resultado pa humanidad?

⁷ E perseverancia di Abraham tabatin un gran influencia riba su yiu Isaak, kende a pasa henter su bida​—180 aña​—como stranhero den e pais di Canaan. Isaak su perseverancia tabata basa riba fe den e promesa di Dios, fe cu su mayornan di edad avansa a inculca den dje y cu despues a ser reforsa pa e palabra cu Jehova mes a papia cu ne. (Genesis 26:2-5) Isaak su firmesa a hunga un papel clave den e cumplimento di Jehova su promesa cu un “simiña” of descendiente for di e famia di Abraham lo a trece bendicion pa henter humanidad. Cientos di aña despues, Hesucristo, e parti principal di e “simiña” ei, a habri e caminda pa tur cu eherce fe den dje por ser reconcilia cu Dios y disfruta di bida eterno.​—Galationan 3:16; Juan 3:16.

8. Con Jacob a demostra fe fuerte, y cu ki resultado?

⁸ Isaak na su turno a yuda su yiu Jacob cultiva un fe fuerte cu a sosten’e te den su biehes. Jacob tabatin 97 aña ora cu el a lucha henter anochi cu un angel pa e haya un bendicion. (Genesis 32:24-28) Prome cu Jacob a muri na edad di 147 aña, el a uza tur su forsa pa bendiciona cada un di su 12 yiunan. (Genesis 47:28) E palabranan profetico cu el a expresa​—skirbi na Genesis 49:1-28​—a resulta berdad y ta cumpli te ainda.

9. Kico nos por bisa di e influencia cu rumannan di edad spiritualmente madura tin riba nan famia?

 ⁹ Ta bisto anto cu fiel sirbidornan di Dios di edad avansa por tin un influencia sano riba nan miembronan di famia. Instruccion biblico combina cu e bos di experencia y un ehempel di perseverancia por ta un gran yudansa pa un hoben crece cu fe solido. (Proverbionan 22:6) Rumannan di edad no mester balota nunca e tremendo influencia positivo cu nan por tin riba nan famia.

Influencia Riba Otro Sirbidor di Jehova

10. Ki ordo Jose ‘a duna tocante di su wesonan’, y ki efecto esei tabatin?

¹⁰ Personanan di edad por tin un bon influencia tambe riba otro sirbidor di Jehova. Jacob su yiu homber Jose, den su biehes a haci algo simpel cu a demostra su fe y cu tabatin un efecto profundo riba miyones di adorado berdadero cu a biba despues di dje. E tabatin 110 aña ora el “a duna ordo tocante di su wesonan.” E tabata kier pa ora cu porfin e Israelitanan a bandona Egipto, pa nan a bai cu su wesonan. (Hebreonan 11:22; Genesis 50:25) E ordo ei a sirbi como un rayo di speransa pa Israel durante e tantisimo añanan di sclabitud pisa cu a sigui despues di Jose su morto y a duna nan e siguransa cu nan liberacion lo a bin.

11. Ki influencia Moises, di edad avansa, probablemente tabatin riba Josue?

¹¹ Un di esnan cu a haya gran estimulo for di e expresion di fe di Jose tabata Moises. Na edad di 80 aña, el a haya e privilegio di bai cu e wesonan di Jose for di e tera di Egipto. (Exodo 13:19) Rond di e tempo ei el a conoce Josue, kende tabata hopi mas jong cu ne. Durante e 40 añanan cu a sigui, Josue a fungi como Moises su sirbidor personal. (Numbernan 11:28) El a compaña Moises te na mitar di caminda ora el a subi Sero Sinai y tabat’ei presente pa topa Moises ora el a baha for di e sero cu e tablanan di Testimonio. (Exodo 24:12-18; 32:15-17) Moises, como un persona di edad avansa, lo mester tabata un fuente di sabiduria y conseho maduro pa Josue!

12. Con Josue a demostra di tabatin un bon influencia riba e nacion di Israel te na su morto?

¹² Josue na su turno tabata un fuente di animacion pa e nacion di Israel te na su morto. Huesnan 2:7 ta bisa nos: “E pueblo a sirbi SEÑOR tur e dianan di Josue, y tur e dianan di e ancianonan cu a biba mas cu Josue, cu a mira henter e gran obra di SEÑOR cu El a haci pa Israel.” Sinembargo, despues cu Josue y e otro ancianonan a muri, a cuminsa un periodo di 300 aña di vasilacion entre adoracion berdadero y falso cu a dura te na e dianan di profeta Samuel.

Samuel A “Efectua Husticia”

13. Kico Samuel a haci pa “efectua husticia”?

¹³ Bijbel no ta bisa con bieu Samuel tabata ora el a muri, pero e sucesonan den e buki di Prome Samuel ta abarca mas o menos 102 aña, y Samuel tabata testigo di mayoria di nan. Na Hebreonan 11:32 y 33 [NW] nos ta lesa cu huesnan y profetanan husto a  “efectua husticia.” Si, Samuel a influencia algun di e hendenan di su tempo y a pone cu nan a evita of stop di haci malo. (1 Samuel 7:2-4) Con el a logra esei? E tabata fiel na Jehova durante henter su bida. (1 Samuel 12:2-5) E no tabatin miedo di duna conseho fuerte ni sikiera na e rei. (1 Samuel 15:16-29) Ademas, ora Samuel tabata ‘bieu y cu cabei blanco’, el a duna prueba di ta un bon ehempel den haci oracion pa otro hende. El a declara cu e no a pensa mes ‘di peca contra Jehova dor di stop di haci oracion’ pa e otro Israelitanan.​—1 Samuel 12:2, 23.

14, 15. Con rumannan di edad awe lo por imita Samuel den e asunto di oracion?

¹⁴ Tur esaki ta enfatisa un manera masha importante cu rumannan di edad por tin un bon influencia riba otro sirbidor di Jehova. A pesar di limitacion causa pa problema di salud y otro circunstancianan, esnan di edad avansa por haci oracion pa otro hende. Rumannan di edad, boso ta realisa cuanto boso oracionnan ta beneficia e congregacion? Debi na boso fe den e sanger cu Cristo a drama, boso tin un posicion aproba dilanti di Jehova, y debi na boso registro di perseverancia, boso a duna “prueba di boso fe.” (Santiago 1:3; 1 Pedro 1:7) No lubida esaki nunca: “E oracion efectivo di un hende husto por logra hopi.”​—Santiago 5:16.

¹⁵ Pues, nos tin mester di boso oracionnan na fabor di e trabou di predica y e funcionamento di e congregacion. Algun di nos rumannan ta den prizon pa motibo di nan neutralidad cristian. Otro rumannan ta victima di desaster natural, guera y conflictonan civil. Ademas tin otronan, den nos propio congregacion, cu ta confronta tentacion y oposicion. (Mateo 10:35, 36) E rumannan cu ta hiba delantera den e trabou di predica y ta supervisa e congregacionnan tambe tin mester di boso oracionnan regular na nan fabor. (Efesionan 6:18, 19; Colosensenan 4:2, 3) Pues, ta bon cu boso ta menciona e rumannan den fe den boso oracionnan, mescos cu Epafras a haci!​—Colosensenan 4:12.

Siña e Generacion Cu Ta Bin

16, 17. Kico Salmo 71:18 a profetisa, y con esaki a cumpli?

¹⁶ Cristiannan cu ta forma parti di e “otro carnenan” tin e speransa di biba pa semper riba Tera. Nan a haya entrenamento sumamente importante dor di asocia cu rumannan fiel di e “tou chikito”, kendenan tin e yamada celestial. (Lucas 12:32; Juan 10:16) Salmo 71:18 a profetisa esaki, bisando: “Asta ora mi bira bieu, cu cabei blanco, o Dios, no bandona mi, te ora mi declara bo poder na e generacion aki, bo poder na tur esnan cu ta bin.” Rumannan ungi cu spirito santo ta ansioso pa entrena nan compañeronan​—e otro carnenan​—pa carga mayor responsabilidad, prome cu nan bai laga nan pa ser glorifica hunto cu Hesucristo.

¹⁷ Lo por aplica e principio di Salmo 71:18 tocante siña “esnan cu ta bin” tambe na e otro carnenan cu a haya instruccion for di e unginan di Dios. Esta, den e sentido cu Jehova a confia rumannan di edad cu e privilegio di duna testimonio di dje na e hendenan cu awor ta acepta adoracion berdadero. (Joel 1:2, 3) E otro carnenan ta sinti nan bendiciona cu loke nan a siña for di e unginan y ta ser motiva pa comparti nan educacion biblico cu otro hende cu ta desea di sirbi Jehova.​—Revelacion 7:9, 10.

18, 19. (a) Ki informacion valioso hopi sirbidor di Jehova di mas edad por comparti? (b) Cristiannan di edad por ta sigur di kico?

 ¹⁸ Tin sirbidor di Jehova di mas edad na bida awe​—tanto ungi como otro carne​—cu a experencia sucesonan historico importante. Un par di nan tabat’ei na e prome presentacionnan di e “Foto-Drama di Creacion.” Algun di nan tabata conoce personalmente e rumannan cu tabata hiba delantera y cu a ser encarsela na aña 1918. Otro rumannan di edad a participa den transmisionnan di e emisora di radio di Watchtower, WBBR. Hopi di nan por conta tocante e tempo cu a bringa casonan huridico relaciona cu e libertad religioso di Testigonan di Jehova den e tribunalnan di mas halto. Tambe tin otronan cu a para firme pa adoracion berdadero tempo nan a biba bou di regimennan di dictadura. Si, rumannan di edad por conta con e comprondemento di e berdad a ser revela progresivamente. Bijbel ta anima nos pa beneficia di e abundancia di experencia aki.​—Deuteronomio 32:7.

¹⁹ Nos ta urgi cristiannan di edad avansa pa nan ta un bon ehempel pa cristiannan mas hoben. (Tito 2:2-4) Podise boso no ta mira awor di biaha e efecto cu boso perseverancia, oracion y conseho tin riba otronan. Noe, Abraham, Jose, Moises y otronan no por tabata sa e pleno impacto cu nan fieldad lo tabatin riba e generacionnan cu a sigui. Sinembargo, nan registro di fe y integridad tabatin un gran impacto; y boso ehempel por tin mesun efecto awe.

20. Ki bendicionnan ta spera esnan cu mantene nan speransa firme te na fin?

²⁰ Sea cu boso sobrevivi e “gran tribulacion” of boso ta bolbe na bida mediante e resureccion, lo ta masha dushi pa experencia “loke ta bida berdadero”! (Mateo 24:21; 1 Timoteo 6:19) Imagina boso e tempo durante Cristo su Reinado di Mil Aña ora cu Jehova lo anula e efectonan di biehes. En bes di experencia e degeneracion implacabel di nos curpa, nos lo lanta cada dia y ripara cu pocopoco nos curpa ta bai dilanti: mas energia, wowonan mas skerpi, horeanan cu ta tende mas bon, mihor aparencia! (Job 33:25; Isaias 35:5, 6) E personanan bendiciona pa biba den Dios su mundo nobo semper lo ta jong, maske nan lo biba pa eternidad. (Isaias 65:22) P’esei laga nos tur mantene nos speransa firme te na fin y sigui sirbi Jehova di henter nos alma. Nos por tin sigur cu Jehova lo cumpli cu tur loke el a priminti y cu loke lo e haci lo surpasa tur nos expectativanan.​—Salmo 37:4; 145:16.

Con Lo Bo Contesta?

• Con e firmesa di Noe na edad avansa a resulta den bendicion pa henter humanidad?

• Ki efecto e fe di e patriarcanan tabatin riba nan descendientenan?

• Con Jose, Moises, Josue y Samuel, den nan biehes a fortalece otro sirbidor di Jehova?

• Ki registro rumannan di edad por laga atras?

[Preguntanan di Estudio]

[Plachi na pagina 26]

Abraham su perseverancia tabatin un gran efecto riba Isaak

[Plachi na pagina 28]

Moises su conseho maduro a anima Josue

[Plachi na pagina 29]

Bo oracionnan pa otro hende por logra hopi cos bon

[Plachi na pagina 30]

Hobennan ta beneficia dor di scucha rumannan fiel di edad