Maldad A Sali for di Man?

Un hobensito curioso ta coi un obheto riba un tereno​—un mina​—cu ta explota y lag’e ciego y mancaron pa resto di su bida. Un mama ta bai laga su baby recien naci scondi entre sushi cant’i caminda. Un empleado cu nan a kita for di trabou ta bolbe bek caminda e tabata traha, tira tur hende cu e topa den su caminda, caba e ta mata su mes. Un ciudadano respeta ta abusa sexualmente di muchanan indefenso.

TA TRISTO pa mira con informe tocante e tipo di malechonan ei a bira masha comun den nos tempo. Loke ta mas tristo ainda ta cu hopi bes e informenan ei ta haya menos atencion cu noticianan [mas impactante] tocante genocidio y terorismo. Un editorial publica na 1995 a bisa: “Si nos husga e siglo aki a base di su aspectonan di mas piyo, nos por bisa cu esaki ta e era di Satanas. Den ni un otro epoca hende a yega di demostra un sed y capasidad asina grandi pa mata miyones di otro hende pa motibo di rasa, religion of clase social.”

Na mes momento, hende ta contamina aire, daña e Tera y caba cu tur su recursonan, poniendo cu awe hopi sorto di bestia ta na rand di extincion. Hende por elimina tur e maldad aki y drecha mundo, hacie mas sigur? Of un intento pa haci esei lo ta manera purba mop cu cranchi habri? Un profesor cu a skirbi extensamente riba e topico di maldad a bisa: “Mi tabata echt sinti cu mi mester a trece un cambio den e mundo aki pa drech’e. Pero ta bisto cu mundo no ta bayendo dilanti.” Talbes bo ta pensa mescos.

Nos por compara e direccion cu mundo ta bayendo cu un barco cu ta nabega den un lama cu dia pa dia ta bira mas bruto y mas peligroso. Aunke ni un hende no kier bai den e direccion ei, tur esfuerso pa cambia di rumbo ta fracasa. E barco ta sigui move stret den direccion di e tormenta mortifero, sin cu ningun hende por par’e.

Te na cierto grado, nos por atribui e situacion di deterioro aki na imperfeccion humano. (Romanonan 3:23) Pero maldad ta tuma luga na un escala asina grandi, asina extenso y asina cruel cu dificilmente por atribui esaki na e malicia di e ser humano so. Ta existi e posibilidad cu un forsa invisibel pero poderoso y maligno ta manipulando humanidad? Si ta asina, kico of ken e ta, y con nos por proteha nos mes contra dje? E siguiente articulo lo contesta e preguntanan aki.

[Reconocemento di Potret na pagina 3]

© Heldur Netocny/Panos Pictures