E Palabra di Jehova Ta Bibo

Puntonan Sobresaliente di e Buki di Lamentacionnan

PROFETA Jeremias a mira e cumplimento di e mensahe di huicio cu el a predica 40 aña largo. Con el a sinti ora cu personalmente el a mira e destruccion di su stad stima? “Jeremias a cai sinta na yoramento y a lamenta Jerusalem cu e lamentacion aki.” Asina e version Septuaginta na Griego ta bisa den su introduccion di e buki di Lamentacionnan. Jeremias a skirbi e buki di Lamentacionnan na aña 607 prome cu nos era, mientras cu tabata fresco den su memoria ainda con Babilonia a sitia Jerusalem pa 18 luna largo y despues a kim’e. E buki ta expresa na un manera bibo e angustia profundo cu e profeta a sinti. (Jeremias 52:3-5, 12-14) Hende no a yega di lamenta ningun otro stad den historia cu palabranan asina conmovedor.

E buki di Lamentacionnan ta un coleccion di cinco poesia masha expresivo. E prome cuaternan ta lamento; e di cinco ta un peticion of oracion. Na e idioma original e prome cuater canticanan ta den forma alfabetico. E alfabet Hebreo ta consisti di 22 letter. Pues, cada versiculo ta cuminsa cu un letter segun e orden di e alfabet ei. E di cinco cantica tambe tin 22 versiculo​—mescos cu e cantidad di letter di e alfabet Hebreo​—pero nan no ta den orden alfabetico.​—Lamentacionnan 5:1.

“MI WOWONAN TA FAYA PA MOTIBO DI LAGRIMA”

(Lamentacionnan 1:1–2:22)

“Esta solitario e ta keda, e stad cu un tempo tabata yen di hende! E stad cu un tempo tabata grandi entre e nacionnan a bira manera un viuda! E stad cu tabata un prinses entre e provincianan a bira un pagado di tributo [of, “catibo”, BPK]!” Asina e lamentacionnan di profeta Jeremias a cuminsa relaciona cu Jerusalem. El a duna e motibo di e calamidad aki, bisando: “[Jehova] a hacie sufri pa motibo di e multitud di su transgresionnan.”​—Lamentacionnan 1:1, 5.

Jerusalem, personifica como un viuda cu a perde su casa y su yiunan, a puntra: “Tin dolor manera e dolor cu a bin pisa riba mi”? Anto pa su enemigonan, el a pidi Dios: “Laga tur nan maldad bin bo dilanti; y trata cu nan manera bo a trata cu mi pa motibo di tur mi transgresionnan; pasobra mi kehamentonan ta hopi y mi curason ta desmaya.”​—Lamentacionnan 1:12, 22.

Profundamente afligi, Jeremias a bisa: “Den rabia ardiente [Jehova] a corta henter e forsa di Israel kit’afo; el a hala su man drechi bek for di dilanti di e enemigo. Y el a kima contra Jacob manera un candela tur na vlam cu ta caba cu tur cos cu tin rond di dje.” E profeta a indica con profundo su tristesa tabata ora el a lamenta: “Mi wowonan ta faya pa motibo di lagrima, mi tripanan ta troce di angustia; den mi amargura mi gal ta basha riba suela.” Asta e hendenan cu a cana pasa eibanda, a expresa asombro bisando: “Ta esaki ta e stad di cual nan a bisa: ‘E perfeccion di bunitesa, e goso di henter mundo’?”​—Lamentacionnan 2:3, 11, 15.

Contesta Riba Pregunta Biblico:

1:15​—Den ki sentido Jehova “a trapa e yiu muher birgen di Juda, manera ta  trapa den baki-di-pers-wendruif”? Ora e soldanan di Babilonia a destrui e stad, describi manera un birgen, nan a drama asina hopi sanger cu por a compara esei cu trapamento di wendruif den un baki-di-pers-wendruif. Jehova a bisa di antemano cu esaki lo tuma luga y a permitie sosode, p’esei por bisa cu ta el “a trapa e yiu muher birgen di Juda.”

2:1​—Den ki sentido ‘a tira e gloria di Israel riba Tera for di shelo’? ‘Shelo ta mas halto cu Tera.’ P’esei tin biaha ora Bijbel ta papia di rebaha cosnan eleva, e ta bisa cu ta ‘tira nan for di shelo riba Tera.’ “E gloria di Israel”​—e beyesa y poder cu Israel tabatin tanten cu e bendicion di Jehova tabata riba dje​—a ser tira abou ora Babilonia a destrui Jerusalem y a desola Juda.​—Isaias 55:9.

2:1, 6​—Kico ta ‘e banki pa Jehova su pia’ y su “tabernakel”? E salmista a canta: “Laga nos drenta den su luga di biba; laga nos adora na e banki pa su pianan.” (Salmo 132:7) Pues, e “banki pa su pia” na Lamentacionnan 2:1 ta referi na Jehova su cas di adoracion, esta, su tempel. E Babilonionan a ‘kima e cas di Jehova’ como si fuera e tabata djis un cunucu.​—Jeremias 52:12, 13.

2:17​—Cua ta e “palabra” cu Jehova a cumpli cu ne en conexion cu Jerusalem? Aparentemente e versiculo aki ta referi na Levitico 26:17, cu ta declara: “Lo mi pone mi cara contra boso, asina cu boso lo wordo derota dilanti di boso enemigonan; y esnan cu ta odia boso lo goberna riba boso, y boso lo hui sin cu ningun hende ta persigui boso.”

Les pa Nos:

1:1-9. Jerusalem a yora amargamente den anochi, y tabatin lagrima riba su cara. Su portanan a keda desola, y su sacerdotenan a suspira. Su birgennan tabata afligi y e mes tabata den amargura. Con bin? Pasobra Jerusalem a peca grandemente. Su impuresa tabata riba su saya. Pues, kibramento di lei no ta produci goso, sino lagrima, suspiro, afliccion y amargura.

1:18. Jehova semper ta husto y recto ora e ta castiga kibrado di lei.

2:20. E Israelitanan a haya e spiertamento di antemano cu si nan no scucha e bos di Jehova, nan lo a experencia maldicion. Esei a ensera cu nan lo a come ‘e carni di nan yiu hombernan y di nan yiu muhernan.’ (Deuteronomio 28:15, 45, 53) Pues, no ta ni un tiki sabi pa desobedece Dios!

“NO SCONDE BO HOREA PA MI SUSPIRO”

(Lamentacionnan 3:1–5:22)

Lamentacionnan capitulo 3 ta papia di e nacion di  Israel como un “homber.” A pesar di a experencia adversidad, e homber aki a canta: “SEÑOR ta bon pa esnan cu ta warda riba dje, pa e alma cu ta busc’e.” El a pidi e Dios berdadero den oracion: “Tende mi bos: ‘No sconde bo horea pa mi suspiro, pa mi sclamacion pa yudansa.’” Anto pidiendo Jehova pa presta atencion na e reproche di e enemigo, el a bisa: “Abo lo paga nan, o SEÑOR, di acuerdo cu e obra di nan mannan.”​—Lamentacionnan 3:1, 25, 56, 64.

Jeremias a desahoga su curason relaciona cu e efectonan teribel di e sitiamento di Jerusalem cu a dura 18 luna. El a lamenta: “E inikidad [of, “castigo”, BPK, nota na pia di pagina] di e yiu muher di mi pueblo ta mas grandi cu e [castigo pa e] pica di Sodoma, cu a wordo destrui den un momento, sin cu tabatin ningun man pa yud’e.” Jeremias a sigui bisa: “Esnan cu a muri pa medio di spada ta mas afortuna cu esnan cu a muri dor di hamber; pasobra pocopoco esakinan ta caba na nada pa falta di e frutanan di cunucu.”​—Lamentacionnan 4:6, 9.

E di cinco poesia ta haci como si fuera ta e habitantenan di Jerusalem tabata papia. Nan a bisa: “Corda, o SEÑOR, loke a sosode cu nos; wak, y mira nos reproche!” Segun cu nan a relata nan afliccionnan, nan a pidi: “Abo, o SEÑOR, ta reina pa semper; bo trono ta di generacion pa generacion. Haci nos bolbe cerca bo, o SEÑOR, y nos lo bolbe; renova nos dianan manera e dianan di prome aya.”​—Lamentacionnan 5:1, 19, 21.

Contesta Riba Pregunta Biblico:

3:16​—Kico e expresion, “el a kibra mi djentenan cu greis”, ta indica? Un buki di consulta ta declara: “Ora e Hudiunan tabata riba caminda pa exilio, nan a haya nan obliga ta horna pan den buraco coba den suela. Debi na esei nan pan tabatin greis mescla den dje.” Si un hende a come e pan aki, esei lo por a bula pida di su djente.

4:3, 10​—Dicon Jeremias a compara “e yiu muher di [su] pueblo” cu “avestrus den desierto”? Segun Job 39:16: “[Avestrus] ta trata su puyitonan cruel, como si fuera no ta di dje nan ta.” Por ehempel, despues cu e embra brui su webonan, e ta bandona su neishi y bai cerca e otro embranan. Ta e macho e ora ei ta asumi e responsabilidad di cuida e puyitonan. Kico ta pasa ora avestrus ta confronta peliger? Tanto e macho como e embra ta hui bai laga e neishi cu e puyitonan. Durante cu e soldanan di Babilonia a sitia Jerusalem, e hamber den e stad a bira asina pisa cu mamanan cu normalmente lo tabatin compasion a trata nan propio yiunan cu crueldad, mescos cu avestrus den desierto. Esaki tabata na contraste  skerpi cu e cuido materno cu chacal a demostra.

5:7​—Jehova ta tene hende responsabel pa e erornan di nan antepasadonan? No, Jehova no ta castiga hende directamente pa e picanan di nan antepasadonan. Bijbel ta bisa: “Cada un di nos lo duna cuenta di su mes na Dios.” (Romanonan 14:12) Sinembargo, e consecuencianan di eror por keda existi y generacionnan mas despues ta sinti nan. Por ehempel, e echo cu Israel di antiguedad a acudi na idolatria a pone cu tabata dificil asta pa e Israelitanan fiel cu a biba mas despues, pega na e caminda di husticia.​—Exodo 20:5.

Les pa Nos:

3:8, 43, 44. Durante e calamidad cu a bin riba Jerusalem, Jehova a nenga di scucha e grito pa yudansa di e habitantenan di e stad. Dicon? Pasobra e pueblo tabata desobedecido, y nan no a arepenti. Si nos kier pa Jehova contesta nos oracionnan, nos tin cu obedec’e.​—Proverbionan 28:9.

3:21-26, 28-33. Con nos por soporta asta sufrimento intenso? Jeremias ta bisa nos con. Nos no mester lubida nunca cu Jehova ta yen di misericordia y compasion. Corda tambe cu e echo so cu nos ta na bida ta suficiente motibo pa nos no perde speransa. Ademas, nos mester tin pasenshi y warda den silencio, sin keha, riba e salbacion di Jehova. Es mas, nos mester “pone [nos] boca den stof”, kiermen, somete nos mes humildemente na pruebanan cu nos ta confronta, y asina reconoce cu loke Dios ta permiti sosode ta pa un bon motibo.

3:27. Pruebanan di fe durante hubentud kisas ta ensera cu un hoben mester soporta dificultad y bofon. Pero ta “bon pa un homber carga yugo den su hubentud.” Dicon? Pasobra ora un persona siña carga un “yugo” di sufrimento mientras cu e ta jong, esei ta prepar’e pa trata cu problema ora e bira adulto.

3:39-42. No ta sabi pa “keha” ora nos ta sufri pa causa di nos picanan. En bes di keha pasobra nos ta cosecha e consecuencia di cosnan malo cu nos a haci, “laga nos samina y investiga nos camindanan, y laga nos bolbe cerca” Jehova. Lo ta sabi di nos parti pa nos arepenti y corigi nos camindanan.

Pone Pleno Confiansa den Jehova

E buki biblico di Lamentacionnan ta revela kico Jehova tabata pensa di Jerusalem y e tera di Juda despues cu e Babilonionan a kima e stad y a laga e tera desola. E palabranan den e buki caminda e hendenan ta reconoce nan pica, ta laga nos compronde cu for di Jehova su punto di bista ta e eror di e pueblo tabata e motibo pa e calamidad. E canticanan inspira di e buki aki ta contene tambe letranan cu ta expresa speransa den Jehova y e deseo di bolbe na e caminda corecto. Aunke esaki no tabata e sintimento di mayoria di hende den tempo di Jeremias, e palabranan ei a representa si e sintimento di Jeremias y di e resto cu a arepenti.

Jehova su evaluacion di e situacion di Jerusalem, manera el a keda expresa den e buki di Lamentacionnan, ta siña nos dos les masha importante. Di prome, e destruccion di Jerusalem y e desolacion di Juda ta impulsa nos pa obedece Jehova y ta sirbi como un spiertamento pa nos no keda sin haci caso di su boluntad. (1 Corintionan 10:11) E di dos les nos ta siña for di e ehempel di Jeremias. (Romanonan 15:4) Asta den un situacion cu a parce sin salida, e profeta profundamente afligi a acudi na Jehova pa salbacion. Pues anto, ta masha importante pa nos pone nos pleno confiansa den Jehova y den su Palabra!​—Hebreonan 4:12.

[Plachi na pagina 9]

Profeta Jeremias a mira e cumplimento di su mensahe di huicio

[Plachi na pagina 10]

E Testigonan Coreano aki su posicion na fabor di neutralidad cristian a yuda nan enfrenta pruebanan di fe cu exito durante nan hubentud