Bo Obediencia Ta di Gran Balor pa Jehova

“Sea sabi, mi yiu, y haci mi curason contento.”​—PROVERBIONAN 27:11.

1. Ki spirito ta reina den e mundo djawe?

DEN e mundo djawe ta reina un spirito di independencia y desobediencia. Apostel Pablo a splica e motibo den su carta na e cristiannan di Efeso. E di: “Boso tabata cana antes segun e curso di e mundo aki, segun e prins di e poder di laira, di e spirito cu ta obra awor den e yiunan di desobediencia.” (Efesionan 2:1, 2) Si, Satanas e Diabel, “e prins di e poder di laira”, a contagia henter e mundo, na moda di papia, cu e spirito di desobediencia. El a haci esei den prome siglo, y e ta haciendo esei mas intensamente ainda for di dia cu a sac’e for di shelo rond di Prome Guera Mundial.​—Revelacion 12:9.

2, 3. Ki motibonan nos tin pa obedece Jehova?

² Sinembargo, como cristian, nos sa cu Jehova Dios ta merece nos obediencia sincero pasobra e ta nos Creador, Esun cu ta sostene nos bida, e amoroso Señor Soberano y Esun cu ta libra nos. (Salmo 148:5, 6; Echonan 4:24; Colosensenan 1:13; Revelacion 4:11) E Israelitanan den tempo di Moises tabata sa cu Jehova tabata Esun cu a duna nan bida y a rescata nan. P’esei Moises a bisa nan: “Mira pa boso haci mescos cu SEÑOR boso Dios a ordena boso.” (Deuteronomio 5:32) Si, Jehova a merece nan obediencia. Sinembargo, no a tarda masha cu nan a desobedece nan Soberano.

³ Con importante nos obediencia na e Creador di universo ta? Wel, un biaha Dios a laga profeta Samuel bisa Rei Saul: “Obedece ta mihor cu sacrificio.” (1 Samuel 15:22, 23) Dicon ta asina?

Den Ki Sentido Obediencia “Ta Mihor cu Sacrificio”

4. Den ki sentido nos por duna algo na Jehova?

⁴ Como e Creador, Jehova ya caba ta doño di tur cos material cu nos tin. Siendo cu ta asina, tin algo cu nos por dun’e? Si, nos por dun’e algo masha valioso. Kico esei ta? Nos por saca e contesta for di e siguiente conseho: “Sea sabi, mi yiu, y haci mi curason contento, pa mi por contesta esun cu reprocha mi.” (Proverbionan 27:11) Nos por duna Dios nos obediencia. Maske nos circunstancia y antecedente ta diferente for di otro, dor di ta obediente, nos cada un por contesta e  ponencia malicioso di Satanas e Diabel di cu hende lo no keda fiel na Dios ora nan ta confronta prueba. Ki un gran privilegio esei ta!

5. Con desobediencia ta afecta e Creador? Ilustra esei.

⁵ Dios ta interesa den e decisionnan cu nos ta tuma. Si nos desobedec’e, esei ta afect’e. Den ki manera? E ta sintie masha tristo ora e ta mira un hende sigui un rumbo cu no ta sabi. (Salmo 78:40, 41) Por ehempel, supone cu un persona ta diabetico y e no ta tene su mes na e dieta saludabel cu su docter a prescribie pa su bon. E ta sigui come loke ta malo pa su salud. Con su docter cu ta interesa den su bienestar lo sintie? Nos por tin sigur cu Jehova ta sintie masha tristo ora hende ta desobedec’e, pasobra e sa kico ta e consecuencianan di keda sin haci caso di su recept pa bida.

6. Kico lo yuda nos obedece Dios?

⁶ Kico lo yuda nos individualmente pa ta obediente? Ta bon pa cada un di nos pidi Dios “un curason obedecido”, manera Rei Salomon a haci. El a pidi un curason asina ya e por a “discerni entre bon y malo” ora di husga e otro Israelitanan. (1 Reinan 3:9, NW) Nos tin mester di “un curason obedecido” si nos kier discerni entre bon y malo den un mundo caminda ta reina e spirito di desobediencia. Dios a percura varios cos pa yuda nos cultiva “un curason obedecido”, por ehempel su Palabra, publicacionnan pa studia Bijbel, reunionnan cristian y ancianonan cariñoso den congregacion. Nos ta haciendo bon uzo di e percuracionnan amoroso aki?

7. Dicon Jehova ta enfatisa obediencia mas cu sacrificio?

⁷ En conexion cu esaki, corda cu den pasado Jehova a revela na su pueblo di antiguedad cu obediencia tabata asta mas importante cu sacrificio di bestia. (Proverbionan 21:3, 27; Oseas 6:6; Mateo 12:7) Dicon tabata asina, siendo cu ta Jehova mes a manda su pueblo ofrece e sacrificionan ei? Wel, kico tabata e motivacion di e persona cu a ofrece e sacrificio? El a hacie pa agrada Dios? Of e tabata djis sigui un cierto ritual? Si un adorado di berdad kier a agrada Dios, lo el a percura pa obedece tur e mandamentonan di Dios. Dios no tin mester di sacrificio di bestia, pero nos obediencia si ta un cos di balor cu nos por dun’e.

Un Ehempel Cu Ta Sirbi Como Advertencia

8. Dicon Dios a rechasa Saul como Rei?

⁸ E relato den Bijbel tocante Rei Saul ta enfatisa e importancia di obediencia. Saul a cuminsa como un gobernante humilde y modesto, ‘chikito den su mes bista.’ Pero cu tempo, orguyo y rasonamento falso a cuminsa domina su decisionnan. (1 Samuel 10:21, 22; 15:17) Na un ocasion, Saul tabatin cu confronta e Filisteonan den bataya. Samuel a bisa e Rei pa ward’e yega pa ofrece sacrificio na Jehova y p’e duna e Rei mas instruccion. Sinembargo, Samuel no a bin na e ora cu nan a sper’e, y e pueblo a cuminsa plama for di otro. Ora Saul a mira esei sosode, el a “ofrece e ofrenda kima.” Jehova no a keda ni un tiki contento cu esaki. Ora cu finalmente Samuel a yega, e Rei a hustifica su desobediencia bisando cu ta pasobra Samuel tabata lat, el ‘a sinti su mes obliga’ di ofrece e ofrenda kima pa e haya Jehova su aprobacion. Pa Rei Saul, tabata mas importante pa ofrece e sacrificio ei cu obedece e instruccion cu el a haya pa warda pa Samuel ofrece e sacrificio. Samuel a bis’e: “Bo a actua na manera bobo; bo no a warda e mandamento di SEÑOR bo Dios cu el a ordena bo.” Saul a desobedece Jehova. Esei a pon’e perde su reinado.​—1 Samuel 10:8; 13:5-13.

9. Con Saul a desplega e mal custumber di desobedece Dios?

⁹ Acaso e Rei a siña un les for di e experencia aki? No! Mas despues, Jehova a manda Saul destrui e nacion di Amalek,  pasobra nan a yega di ataca Israel sin ningun provocacion. Saul no tabatin mag di spar ni sikiera nan bestianan domestico. El a obedece Jehova dor di “derota e Amalekitanan, for di Havila te yega Shur.” Ora Samuel a bin pa top’e, e Rei tabata sumamente contento cu e victoria y a bisa: “Cu SEÑOR bendiciona bo! Mi a cumpli cu e ordo di SEÑOR.” Sinembargo, contrario na e instruccionnan bon cla cu Saul y e pueblo a haya, nan no a mata Rei Agag ni “e mihornan di e carnenan, e bueynan, e bestianan gorda, e lamchinan y tur loke tabata bon.” Rei Saul a hustifica su proceder desobediente bisando: “E pueblo a spar e mihor di e carnenan y bueynan pa ofrece sacrificio na SEÑOR bo Dios.”​—1 Samuel 15:1-15.

10. Ki les Saul no a siña?

¹⁰ E ora ei Samuel a bisa Saul: “Acaso SEÑOR tin mes tanto delicia den ofrendanan kima y sacrificionan cu den obediencia na e bos di SEÑOR? Mira, obedece ta mihor cu sacrificio, y scucha ta mihor cu vet di carne chubato.” (1 Samuel 15:22) Ya cu Jehova a bisa di antemano cu mester a destrui e bestianan ei, nan no tabata aceptabel pa ofrece como sacrificio.

Sea Obediente den Tur Cos

11, 12. (a) Con Jehova ta mira nos esfuerso pa agrad’e den nos adoracion? (b) Con un persona lo por gaña su mes y kere cu e ta haciendo e boluntad di Dios mientras cu en realidad e ta desobedecido?

¹¹ Jehova ta keda masha contento ora e ta mira su sirbidornan fiel ta keda firme a pesar di persecucion, ta proclama e Reino a pesar cu mayoria di hende no ta interesa y ta asisti na reunionnan cristian a pesar cu nan ta bou di presion pa gana nan pan di cada dia. Nos obediencia den e aspectonan importante ei di nos bida spiritual ta haci su curason contento! Nos esfuersonan pa adora Jehova tin gran balor p’e ora nos ta hacie como muestra di nos amor. Hende kisas no ta ripara nos trabou duro, pero Dios si ta tuma nota di nos ofrendanan sincero y ta keda corda nan.​—Mateo 6:4.

¹² Sinembargo, pa nos agrada Dios plenamente, nos mester ta obedecido den tur faseta di nos bida. Nos no mester gaña nos mes nunca y pensa cu nos por desvia un poco for di e rekisitonan di Dios tanten cu nos ta ador’e den otro aspectonan di bida. Por ehempel, un persona lo por gaña su mes y kere cu si e ta cumpli superficialmente cu cierto rasgonan di adoracion djis pa formalidad, lo e por scapa castigo si e comete inmoralidad of participa den otro malecho serio. Esei ta un kibocacion grave!​—Galationan 6:7, 8.

13. Con nos obediencia na Jehova por ser poni na prueba den asuntonan priva?

 ¹³ Di acuerdo cu esei, nos por puntra nos mes: ‘Mi ta obedece Jehova den mi actividadnan diario, asta den cosnan cu aparentemente ta asuntonan priva?’ Hesus a declara: “Esun cu ta fiel den un cos masha chikito, ta fiel tambe den hopi; y esun cu ta inhusto den un cos masha chikito, ta inhusto tambe den hopi.” (Lucas 16:10) Nos ta ‘cana den e integridad di nos curason’ asta ‘den nos cas’, caminda otro hende no ta mira nos? (Salmo 101:2) Si, nos integridad por ser poni na prueba den nos cas. Den hopi pais caminda casi tur hende tin computer na cas, ta masha facil pa haya acceso na potretnan sumamente inmoral. Te cu un par di aña pasa, bo mester a drenta den un luga di entretenimento inmoral pa mira e tipo di cosnan ei. Acaso nos lo ta obedecido y tuma na pecho e palabranan di Hesus: “Ken cu wak un muher pa dese’e, ya caba el a comete adulterio cu ne den su curason”? Es mas, nos lo nenga di asta wak potretnan inmoral? (Mateo 5:28; Job 31:1, 9, 10; Salmo 119:37; Proverbionan 6:24, 25; Efesionan 5:3-5) Kico di programanan na television cu ta violento? Nos ta di acuerdo cu nos Dios, kende ta ‘odia esun cu ta gusta violencia’? (Salmo 11:5) Of kico di bebe demasiado alcohol den priva? Bijbel ta condena buracheria, pero tambe e ta spierta cristiannan pa nan no ta “sclabisa na biña.”​—Tito 2:3; Lucas 21:34, 35; 1 Timoteo 3:3.

14. Menciona algun manera den cua nos ta demostra nos obediencia na Dios den asuntonan di placa.

¹⁴ Nos mester ta alerta tambe den asuntonan di placa. Por ehempel, nos lo envolve nos mes den un proyecto pa bira rico lihe cu casi ta un forma di estafa? Nos ta sinti e tentacion pa recori na medionan ilegal pa keda sin paga belasting? Of mas bien nos ta obedece cuidadosamente e mandamento pa “duna tur hende loke boso debe nan: si boso ta debe belasting, paga belasting”?​—Romanonan 13:7.

Obediencia Motiva pa Amor

15. Pakico abo ta obedece e mandamentonan di Jehova?

¹⁵ Obediencia na e instruccionnan divino ta trece bendicion. Por ehempel, como cu nos ta abstene di uza tabaco, y nos ta hiba un bida moralmente limpi y ta respeta e santidad di sanger, nos por evita di bira victima di cierto malesa. Ademas, dor di biba na harmonia cu e berdad di Bijbel den otro aspectonan di bida, nos por beneficia economicamente, y tambe riba tereno social of den nos bida di famia. (Isaias 48:17) Nos por considera cualkier un di e beneficionan fisico ei corectamente como bendicionnan cu ta duna prueba cu e leinan di Dios ta practico. Pero toch e motibo principal pakico nos ta obedece Jehova ta pasobra nos stim’e. Nos no ta sirbi Dios pa motibonan egoista. (Job 1:9-11; 2:4, 5) Dios a duna nos e libertad di obedece ken cu nos kier. Nos ta scohe pa obedece Jehova como cu nos kier agrad’e y como cu nos ta trata di haci loke ta corecto.​—Romanonan 6:16, 17; 1 Juan 5:3.

16, 17. (a) Con Hesus a demostra obediencia na Dios motiva pa amor profundo? (b) Con nos por imita Hesus?

¹⁶ Hesus tabata e ehempel perfecto di obedece Jehova motiva pa un amor profundo p’e. (Juan 8:28, 29) Ora Hesus tabata riba Tera “el a siña obediencia dor di e cosnan cu el a sufri.” (Hebreonan 5:8, 9) Con asina? Hesus “a humilia su mes dor di bira obedecido te na morto”, asta morto na un staca di tormento. (Filipensenan 2:7, 8) Aunke Hesus tabata obedecido caba den shelo, su obediencia a ser poni na prueba mas ainda riba Tera. Nos por tin sigur cu Hesus ta bon cualifica den tur sentido pa sirbi como Sumo Sacerdote di su rumannan spiritual y tambe  pa otro personanan creyente.​—Hebreonan 4:15; 1 Juan 2:1, 2.

¹⁷ Kico di nos? Nos por imita Hesus dor di duna prioridad na obedece e boluntad di Dios. (1 Pedro 2:21) Nos por haya satisfaccion personal ora nos amor pa Dios motiva nos pa haci loke Jehova ta manda, asta na momentonan cu nos ta ser presiona of ta sinti e tentacion pa haci lo contrario. (Romanonan 7:18-20) Esaki ta ensera cu nos ta dispuesto pa obedece instruccion di e rumannan cu ta hiba delantera den adoracion berdadero, a pesar cu nan ta imperfecto. (Hebreonan 13:17) Nos obediencia na mandamentonan divino den nos bida priva ta di gran balor den bista di Jehova.

18, 19. Nos obediencia sincero na Dios ta resulta den kico?

¹⁸ Awe, nos obediencia na Jehova kisas ta ensera wanta persecucion afin di mantene nos integridad. (Echonan 5:29) Ademas, pa nos por obedece Jehova su mandamento di bai predica y siña hende nos mester persevera te na fin di e sistema aki. (Mateo 24:13, 14; 28:19, 20) Nos tin mester di perseverancia pa sigui reuni cu nos rumannan, a pesar cu kisas nos ta sinti e peso di e presion cu mundo ta pone riba nos. Nos Dios amoroso ta bon conciente di nos esfuerso pa obedec’e riba e terenonan ei. Sinembargo, pa nos ta plenamente obediente, nos tin cu lucha contra nos carni pecaminoso y aparta for di loke ta malo mientras cu a la bes nos ta cultiva aprecio pa loke ta bon.​—Romanonan 12:9.

¹⁹ Ora nos ta sirbi Jehova motiva pa amor y cu un curason gradicido, e ta bira pa nos “Esun cu ta recompensa esnan cu ta busc’e.” (Hebreonan 11:6) Sacrificionan apropia ta necesario y deseabel, pero loke ta agrada Jehova mas tanto ta pleno obediencia motiva pa amor p’e.​—Proverbionan 3:1, 2.

Con Lo Bo Contesta?

• Dicon nos por bisa cu nos tin algo pa duna Jehova?

• Ki erornan Saul a comete?

• Con bo por demostra cu bo ta kere cu obediencia ta mihor cu sacrificio?

• Kico ta motiva bo pa obedece Jehova?

[Preguntanan di Estudio]

[Plachi na pagina 26]

Con un docter cu ta interesa den e bienestar di su pashent lo sinti si e pashent no ta sigui su recomendacionnan?

[Plachi na pagina 28]

Dicon Rei Saul a perde Jehova su aprobacion?

[Plachi na pagina 30]

Abo ta obedece e mandamentonan di Dios den e privasidad di bo cas?