Pega na Norma- y Balornan Cu No Ta Cambia

TUR sociedad humano ta biba segun un codigo moral. Bo no ta di acuerdo cu rond mundo hende ta balora cualidadnan manera honrades, bondad, compasion y altruismo, y cu mayoria di nos ta gusta nan?

Ken Su Norma- y Balornan?

Den e prome siglo di nos era, un homber bon educa cu tabata yama Saulo a biba meimei di tres cultura di hopi influencia, y cada un cu su mes balornan moral. Tabata trata aki  di e culturanan Hudiu, Griego y Romano cu a impone norma- y leinan complica riba hende. Saulo a discerni cu por lo general hende mes tambe ta nace cu un sentido moral cu ta guia nan. Esei ta nos consenshi. Despues cu Saulo a bira apostel Pablo, el a skirbi: “Ora paganonan, kendenan no tin lei, di naturalesa [“di instinto natural”, The New Testament in Modern Speech] ta haci e cosnan di lei, esakinan, aunke nan no tin lei, ta un lei pa nan mes, dor cu nan ta mustra e obra di lei cu ta skirbi den nan curason, nan consenshi dunando testimonio, y nan pensamentonan acusando of defendiendo nan.”​—Romanonan 2:14, 15.

Sinembargo, ora nos ta purba dicidi loke ta bon y loke ta malo, ta suficiente pa nos bai solamente tras di nos “instinto natural”? Manera bo por a ripara, historia humano ta yen di ehempel di esfuersonan individual y colectivo cu a resulta den fracaso. Esaki a combence hopi hende cu nos mester di guia for di un fuente superior pa por establece e mihor norma- y balornan cu mester dirigi nos bida. Hopi hende lo admiti cu e Creador di humanidad ta den e mihor posicion pa ofrece e normanan ei cu no ta mara na tempo. Den e buki The Undiscovered Self, e autor, dr. Carl Jung, a remarca: “E individuo cu no ta pega firmemente na Dios no por resisti e tentacionnan fisico y moral di mundo riba su mes forsa.”

E conclusion ei ta cuadra cu loke un profeta di leu den pasado a skirbi: “E caminda di hende no ta di dje mes; tampoco no ta keda na hende pa dirigi su pasonan.” (Jeremias 10:23) Nos Creador ta bisa: “Mi ta siña bo pa bo mes bon y ta mustra bo e caminda cu bo tin cu sigui.”​—Isaias 48:17, BPK.

Un Fuente Confiabel di Norma- y Balornan Confiabel

Bo por haya e palabranan cita ei den e fuente di balornan moral mas ampliamente distribui​—e Santo Scritura. Miyones di hende rond mundo, asta hende cu no ta cristian y personanan cu no ta religioso, a acudi na e Scritura pa haya discernimento y sabiduria. E poeta Aleman Johann Wolfgang von Goethe a skirbi: “Ami di mi parti, mi a stima y a duna hopi balor na [Bijbel], pasobra el a influencia gran parti di mi desaroyo como hende di principio.” Aparentemente, e lider hindu Mohandas Gandhi a yega di bisa: “Haci tur bo esfuerso pa bebe profundamente di e fuente cu bo a ricibi den e Sermon Riba Sero [parti di e siñansanan di Hesucristo cu bo por haya den Bijbel] . . . pasobra e siñansa di e Sermon tabata dirigi na cada un di nos.”

Apostel Pablo, cita anteriormente, a resalta e papel importante cu e Santo Scritura ta hunga den suministra balornan solido: “Tur Scritura ta inspira pa Dios y ta util pa siñansa.” (2 Timoteo 3:16) Esei ta realmente e caso?

Pakico bo no ta wak pa bo mes? Analisa e principionan menciona riba e siguiente pagina. Wak e balornan positivo cu nan ta promove. Medita riba con e ideanan cu e siñansanan aki ta contene tin e poder pa mehora e calidad di bo bida y di bo relacion cu otro hende.

Abo Lo Beneficia di Nan?

E principionan menciona ta djis un par di ehempel di e conseho practico cu bo por haya den e Santo Scritura. Ademas di esakinan, e Palabra di Dios ta contene hopi spiertamento contra pensamento y abla perhudicial, y tambe accionnan cu por tin un efecto negativo riba nos bida.​—Proverbionan 6:16-19.

Si, e siñansanan di Bijbel ta ofrece algo cu ta haci hopi falta den sociedad humano: conseho cu ta yuda hende desaroya e mihor normanan moral posibel. Esnan cu ta acepta y aplica e siñansanan aki ta pasa den un transformacion notabel. Nan ta bai dilanti den nan manera di pensa. (Efesionan 4:23, 24)  Nan ta haya mihor motivacion. E norma- y balornan di Dios cu Bijbel ta trece dilanti a yuda hopi hende elimina rasismo, prehuicio y odio for di nan curason. (Hebreonan 4:12) E Scritura y e norma- y balornan cu e ta promove a motiva hende pa bandona tur clase di violencia y maldad y bira mihor hende.

Si, e norma- y balornan di Bijbel a yuda miyones di hende vence custumber- y practicanan cu tabatin raiz profundo den nan y cu a ruina bida di hopi otro hende. (1 Corintionan 6:9-11) E siñansanan di Bijbel ta transformando e personanan ei​—no djis nan custumbernan sino nan curason, nan famia y nan  speransanan. Maske con atras mundo ta bayendo, hende rond mundo ta sigui drecha nan bida, y lo no tin fin na esaki, pasobra “yerba ta seca, flor ta marchita, ma e palabra di nos Dios ta permanece pa semper.”​—Isaias 40:8.

Sinembargo, abo personalmente lo beneficia di “e palabra di nos Dios”? Testigonan di Jehova lo ta contento pa mustra bo con bo por aplica e norma- y balornan di Bijbel pa bo mes bon. Si bo ta biba na harmonia cu nan, lo bo haya e aprobacion di Dios awor y hereda un bida eterno dirigi pa principionan divino y duradero.

[Cuadro/​Plachi na pagina 6]

PRINCIPIONAN CU NO TA CAMBIA

E Regla di Oro. “P’esei, tur loke boso kier pa hende haci pa boso, haci mescos pa nan, pasobra esaki ta e Lei y e Profetanan.”​—Mateo 7:12.

Stima bo prohimo. “Stima bo prohimo manera bo mes.” (Mateo 22:39) “Amor no ta haci daño na prohimo; p’esei amor ta e cumplimento di lei.”​—Romanonan 13:10.

Respeta otro. “Stima otro di curason, cu amor di ruman y sea esun prome pa respeta otro.”​—Romanonan 12:10, BPK.

Busca pas. “Tene pas cu otro.” (Marco 9:50) “Si ta posibel, asina leu cu ta depende di boso, sea na pas cu tur hende.” (Romanonan 12:18) “Laga nos busca e cosnan cu ta trece pas.”​—Romanonan 14:19.

Pordona otro. “Pordona nos nos debenan, mescos cu nos tambe ta pordona nos debedonan.” (Mateo 6:12) “Sea cariñoso cu otro, misericordioso, pordonando otro.”​—Efesionan 4:32.

Sea leal, fiel. “Keda fiel na bo esposa y duna bo amor na dje so . . . Sea felis cu bo esposa y haya bo goso cu e mucha muher cu bo a casa cu ne . . . Laga su encanto mantene bo felis; lag’e rondona bo cu su amor . . . Pakico bo tin cu duna bo amor na un otro hende muher? Pakico bo mester prefera e encanto di e esposa di un otro homber?” (Proverbionan 5:15-20, Today’s English Version) “Esun cu ta fiel den un cos masha chikito, ta fiel tambe den hopi; y esun cu ta inhusto den un cos masha chikito, ta inhusto tambe den hopi.” (Lucas 16:10) “Ta wordo rekeri di mayordomo cu cada un ta wordo haya fiel.”​—1 Corintionan 4:2.

Sea honrado. “Mi por hustifica balansa falso y un saco yen di peso engañoso?” (Mikeas 6:11) “Nos tin un consenshi honrado, ya cu nos ta desea na comporta nos mes honradamente den tur cos.”​—Hebreonan 13:18, NW.

Papia berdad, sea husto. “Odia maldad, stima bondad, y establece husticia den e porta di stad!” (Amos 5:15) “Papia berdad un cu otro; administra huicio, berdad y pas den boso portanan di stad.” (Zacarias 8:16) “Poniendo mentira un banda, cada un di boso papia berdad cu su prohimo.”​—Efesionan 4:25.

Sea diligente. “Bo ta mira un hende cu habilidad den su trabou? E lo para dilanti di reinan.” (Proverbionan 22:29) “No flakia den diligencia.” (Romanonan 12:11) “Tur loke boso haci, haci boso trabou di curason, como pa SEÑOR y no pa hende.”​—Colosensenan 3:23.

Sea manso, compasivo, cariñoso. “Bisti un curason di compasion, cariño, humildad, mansedumbre y pasenshi.”​—Colosensenan 3:12.

Vence malo cu bon. “Stima boso enemigonan . . . y haci oracion pa esnan cu ta maltrata boso y ta persigui boso.” (Mateo 5:44) “No laga malo vence bo, ma mas bien vence malo cu bon.”​—Romanonan 12:21.

Duna Dios lo mihor. “‘Stima SEÑOR bo Dios cu henter bo curason, y cu henter bo alma, y cu henter bo mente.’ Esaki ta e gran mandamento y e di prome.”​—Mateo 22:37, 38.

[Plachinan]

Si nos acepta norma- y balornan di Bijbel, nos lo por tin un matrimonio exitoso, vinculonan familiar felis y amistadnan placentero