Pregunta di Lector

E colebra cu a papia cu Eva tabatin pia?

Manera Genesis 3:14 ta indica, Jehova Dios a papia cu e colebra cu a gaña Eva den e hofi di Eden. Dios a bis’e: “Pasobra bo a haci e cos aki, maldiciona bo ta mas cu tur bestia di cria, y mas cu tur bestia di sabana; riba bo bariga lo bo lastra, y stof lo bo come tur e dianan di bo bida.” Bijbel no ta bisa specificamente cu e bestia cu a ser uza pa tenta Eva tabatin pia anto cu despues el a perde nan. Aunke e palabranan di Genesis 3:14 lo por pone algun hende pensa esei, en realidad, no tin motibo pa conclui cu prome cu e maldicion aki, colebra tabatin pia. Dicon no?

E motibo principal ta pasobra e huicio cu Jehova a dicta tabata en realidad contra Satanas, e spirito invisibel cu a haci mal uzo di e bestia inferior ei. Bijbel ta describi Satanas como “e tata di mentira” y “e colebra di antiguedad.” Ambos expresion ta referi aparentemente na e echo cu Satanas a uza como vocero un bestia visibel​—un colebra​—pa pone Eva desobedece e ordo di Dios.​—Juan 8:44; Revelacion 20:2.

Dios a crea colebra, y Adam aparentemente a duna colebra nomber prome cu Satanas a uza uno pa gaña Eva. E colebra cu a papia cu Eva, un bestia cu no por a rasona, no tabata esun culpabel. E colebra ei lo no tabata sa mes cu Satanas a manipul’e, y lo e no por a compronde e huicio cu Dios a dicta contra e personanan desobediente.

Dicon anto Dios a menciona e degradacion fisico di e colebra? Pasobra un colebra den su ambiente natural ta lastra riba su bariga y ta saca su lenga como si fuera e ta lembe stof. E comportacion aki aptamente a simbolisa e condicion degrada di Satanas. E tabatin anteriormente un posicion eleva como un di e angelnan di Dios, pero el a ser rebaha na e condicion baho di scuridad spiritual menciona den Bijbel.​—Judas 6.

Mas aleu, Satanas den su condicion degrada lo a ‘herida e hilchi’ di e ‘simiña’ di Dios mescos cu un colebra real lo por herida un hende su hilchi. (Genesis 3:15) E parti principal di e simiña ei a resulta di ta Hesucristo, kende a sufri temporalmente na man di e agentenan di Satanas. Pero na su debido tempo, Cristo y su compañeronan cristian ungi cu a ser resusita lo plecha cabes di e colebra simbolico permanentemente. (Romanonan 16:20) Pues, e maldicion cu Dios a expresa contra e colebra visibel a representa aptamente e degradacion y destruccion final di “e colebra [invisibel] di antiguedad”, Satanas e Diabel.