Saulo A Topa Amigo y Enemigo di Antes

SAULO, cu despues a bira conoci como apostel Pablo, lo mester tabata un poco nervioso ora el a regresa Jerusalem pa prome biaha desde cu el a comberti bira cristian. * Tres aña prome, el a bandona e stad yen di menasa y gusto pa mata e discipelnan di Hesus. E tabatin autorisacion pa aresta ken cu el a haya na Damasco cu tabata cristian.​—Echonan 9:1, 2; Galationan 1:18.

Unabes cu Saulo mes a bira cristian, el a declara su fe den e Mesias resusita cu tur frankesa. Como resultado, e Hudiunan na Damasco kier a mat’e. (Echonan 9:19-25) Acaso e por a spera un bonbini caluroso cerca su amigonan Hudiu di antes na Jerusalem? Sinembargo, loke tabata mas importante pa Saulo tabata pa haya contacto cu e siguidonan di Cristo na Jerusalem. Anto esei lo no tabata facil.

“Ora cu el a yega Jerusalem, e tabata kier ta hunto cu e discipelnan; ma nan tur tabatin miedo di dje y no tabata kere cu e tabata un discipel.” (Echonan 9:26) Esei ta di compronde. Ultimo biaha cu nan a tende di dje, e tabata un persiguido sin misericordia. P’esei  awor cu el a bin bek y a declara di ta cristian, esei lo por a parce un trampa pa infiltra den e congregacion. Pues, e cristiannan na Jerusalem kier a ten’e leu.

Pero toch un di nan a yuda Saulo. Bijbel ta bisa cu Barnabas a hiba e expersiguido aki “cerca e apostelnan” y a informa nan con Saulo a comberti y a predica na Damasco. Evidentemente, “e apostelnan” menciona aki a referi na Pedro y Santiago ruman di Hesus. (Echonan 9:27; Galationan 1:18, 19) Bijbel no ta splica con bin Barnabas a confia Saulo. Acaso nan dos tabata conoce otro caba, locual por a motiva Barnabas pa interoga Saulo y despues confirma su sinceridad? Of Barnabas tabata conoce algun cristian na Damasco y a tende di Saulo su transformacion? Sea cual sea e caso, Barnabas a yuda elimina e motibonan di desconfiansa den Saulo. Consecuentemente, Saulo a keda 15 dia cerca apostel Pedro.

Diescinco Dia Cerca Pedro

Manera Saulo a enfatisa den su carta na e Galationan, el a haya su encargo directamente for di Hesus sin tabatin mester di ningun aprobacion humano. (Galationan 1:11, 12) Pero Saulo sin duda a mira e importancia pa ta bon informa tocante e ministerio di Hesus. Su estadia cerca Pedro (Cefas) lo a dun’e basta chens pa haci esei. (Lucas 24:12; 1 Corintionan  15:3-8) Saulo lo tabatin hopi cos di puntra Pedro cu Santiago, y nan tambe lo tabatin pregunta pa haci Saulo tocante su vision y su encargo.

Con Saulo A Scapa di Amigonan di Antes?

Esteban a ser yama e prome martir cristian. E hendenan cu Esteban a yega di discuti cu ne tabata di “e asina yama Snoa di e Libertinonan, di e Sirenonan y e Alehandrinonan y di esnan for di Cilicia y Asia.” Awor Saulo tabata “argumenta cu e Hudiunan Griego”, y a duna nan testimonio cu tur frankesa. Con nan a reacciona? Nan kier a mat’e.​—Echonan 6:9; 9:28, 29.

Di mes Saulo lo kier a splica e cambio radical cu a tuma luga den su bida y lo el a haci esfuerso pa siña su amigonan di antes tocante e Mesias. Sinembargo, e Hudiunan Griego aki a desplega malicia contra e homber cu nan a considera un traidor.

Saulo tabata conciente di e gran peliger cu e tabata aden? Nos ta lesa cu segun cu e tabata haci oracion den tempel, el a bai den un trans y a mira Hesus, kende a bis’e: “Haci lihe y sali umbes for di Jerusalem, pasobra nan lo no acepta bo testimonio tocante di mi.” Saulo a bisa: “Señor, nan mes sa cu mi tabata bai di snoa pa snoa y tabata sera den prizon y bati esnan cu tabata kere den bo. Y ora sanger di bo testigo Esteban tabata wordo drama, mi tambe tabata para einan y a aproba esei.”​—Echonan 22:17-20.

Tin hende ta haya cu e contesta di Saulo ta nifica cu el a reconoce e riesgo cu e tabata core. Otronan ta kere cu e tabata kiermen: ‘Mi tabata un persiguido mescos cu nan, y nan sa esei. Sigur nan lo mester tuma na serio e echo cu mi a comberti. Podise mi por yuda nan compronde.’ Ma Hesus tabata sa cu e Hudiunan ei lo no a haci caso di e testimonio di un hende cu nan a considera apostata. El a bisa Saulo: “Bai! Pasobra lo mi manda bo leu for di akinan cerca e paganonan.”​—Echonan 22:21, 22.

Ora e otro cristiannan a tuma nota di e peliger, nan a hiba Saulo mesora na e haf di Cesarea y a mand’e su stad natal, Tarso, un biahe di 500 kilometer. (Echonan 9:30) A dura varios aña prome cu Saulo a bolbe na Jerusalem.

Saulo su baimento pura asina kisas tabata un proteccion pa e congregacion cristian. E expersiguido su presencia tabatin e potencial di bira explosivo. Despues cu Saulo a bai, “e iglesia den henter Judea y Galilea y Samaria tabatin pas, y tabata wordo edifica; y canando den e temor di Señor y den e consuelo di spirito santo e iglesia a sigui aumenta.”​—Echonan 9:31.

Algun Les pa Ta Cauteloso

Mescos cu den prome siglo, awe por surgi situacionnan caminda ta apropia pa demostra cautela. Nos no mester ta mucho desconfia di hende desconoci. Sinembargo, tabatin biaha cu personanan sin escrupulo a purba uza e pueblo di Jehova sea pa ganashi personal of cu e intencion di perhudica e congregacion. Pues, nos ta uza discernimento pa asina nos no bira victima di e engaño di impostor.​—Proverbionan 3:27; 2 Timoteo 3:13.

Saulo su reaccion riba e predicacion den Jerusalem ta ilustra un otro manera cu cristiannan por demostra cautela. Dunamento di testimonio den cierto barionan of na cierto personanan, incluso na amigonan di antes, por ta peligroso; tanto den sentido fisico, spiritual of asta moral. Ta na su luga pa tuma e debido precaucion, por ehempel, dor di ta selectivo pa loke ta e ora y luga di predica.​—Proverbionan 22:3; Mateo 10:16.

Nos por ta sigur cu e bon nobo di e Reino di Dios lo ser predica prome cu fin di e sistema malbado aki yega. Saulo a pone un excelente ehempel den esei, “y tabata papia cu tur frankesa den e nomber di Señor”, asta cu amigo y enemigo di antes!​—Echonan 9:28.

[Nota]

[Plachi na pagina 16]

Ora Saulo a yega Jerusalem, el a predica cu tur frankesa na e Hudiunan Griego