Sin Rumbo den un Mundo di Norma- y Balornan Cu Ta Cambiando

SEGUN un leyenda popular, Diogenes, un filosofo cu a biba na Atenas den siglo 4 prome cu nos era, tabata cana rond di dia cla cu un lanterna ta busca un hende recto. Maske cuanto el a busca, e no por a topa ni un.

Nos no por confirma si e leyenda ei ta berdad of no. Pero, si Diogenes tabata na bida awe, lo no tabata nada straño si e tabatin cu busca hopi mas ainda pa descubri un hende decente. Aparentemente, hopi hende no ta gusta e idea di biba segun normanan moral estableci. Hopi bes medionan di comunicacion ta duna informe di escandalonan​—den bida priva, den gobierno, na trabou, den deporte, den e mundo di comercio y den otro areanan. Awe no tin respet mas pa hopi di e norma- y balornan cu generacionnan di pasado a tene nan mes na dje. Hende ta reevalua normanan estableci y hopi bes ta rechasa nan. Of kisas nan ta haya cierto normanan masha bunita, pero no pa nan mes cumpli cu nan.

“E tempo cu tur hende tabata biba segun normanan moral estableci a pasa”, segun e sociologo di religion Alan Wolfe. El a bisa tambe: “Nunca den historia tabata reina e sintimento cu tin awe, esta, cu hende no por depende riba tradicion- y institucionnan pa haya guia moral.” Relaciona cu e ultimo 100 añanan, e corant Los Angeles Times ta comenta riba e remarca di e filosofo Jonathan Glover, kende a bisa cu e deterioro di religion y leinan moral universal a hunga un papel importante den e aumento mundial di violencia.

Sinembargo, e confusion ei tocante norma- y balornan comunmente acepta no a stroba algun hende di busca un codigo di norma moral. Algun aña pasa, Federico Mayor, exdirector general di UNESCO, a declara cu “awor mas cu nunca, e asunto di balornan moral ta un precupacion sumamente serio pa mundo completo.” Pero e echo cu mundo no ta biba segun balornan moral halto no ta nifica cu no ta existi norma- y balornan saludabel cu hende por y mester adopta.

 Pero, tur hende por bai di acuerdo tocante ki normanan nan mester adopta? Claro cu no. Y si no tin acuerdo riba cua ta e normanan di loke ta bon y loke ta malo, con un hende por evalua cua norma y balor e tin cu sigui? Ta e relativismo moral ei, un situacion den cua normanan no ta fiho, sino ta cambia dependiendo di e hende- of gruponan cu ta atene nan mes na nan, ta na moda awe. Ma bo por mira cu e actitud aki no a contribui realmente na mihor normanan moral en general.

E historiado Britanico Paul Johnson ta kere firmemente cu e filosofia aki di relativismo a yuda “debilita . . . e sintimento altamente desaroya di responsabilidad personal y di deber pa cu un berdadero codigo moral obhetivo y estableci” cu aparentemente tabata reina prome cu cuminsamento di siglo 20.

Ta posibel anto pa haya un “berdadero codigo moral obhetivo” of pa biba segun “leinan moral universal”? Tin un autoridad cu por provee norma- y balornan cu no ta cambia cu tempo y cu por duna nos bida mas stabilidad y un speransa pa futuro? E siguiente articulo lo contesta e preguntanan aki.