Tabata aña 59 di nos era. Un cantidad di prizonero, bou di vigilancia di soldaatnan agota di un biahe largo, a cana drenta Roma via Porta Capena. Riba Sero Palatino, nan por a mira e palacio di Emperador Nero, cu tabata ser vigila pa soldaatnan pretoriano kendenan tabatin nan spada scondi bou di nan toga oficial. * E centurion Julio y su prizoneronan a cana pasa dilanti di e Foro Romano y subi Sero Viminal. Nan a pasa un hardin cu tabatin hopi altar dedica na diosnan Romano y tambe banda di un tereno grandi cu e Romanonan tabata uza pa entrenamento y desfile militar.

Apostel Pablo tambe tabata entre e prizoneronan. Algun luna prome, ora e tabata riba un barco cu a ser asota pa un tormenta fuerte, un angel di Dios a bis’e: “Bo tin cu presenta dilanti di Cesar.” (Echo. 27:24) Acaso esaki tabata e momento pa esey tuma luga? Segun cu Pablo tabata cana y observa e capital di e Imperio Romano, sin duda el a corda loke Señor Hesus a bis’e algun aña prome na e Toren di Antonia na Jerusalem. Hesus a bis’e: “Tene curashi! Pasobra mescos cu bo a duna un testimonio cabal tocante mi na Jerusalem, asina tambe lo bo tin cu duna testimonio na Roma.”—Echo. 23:10, 11.

Podise Pablo a hasta para un rato pa contempla e Castra Praetoria (e campamento pretoriano), un forti grandi cu toren y muraya halto traha di baksteen cora. E forti por a acomoda 12.000 soldaat di e Guardia Pretoriano (kendenan tabata sirbi como bodyguard di e emperador) y tambe  varios mil soldaat cu a sirbi como polis, incluso e soldaatnan di ehercito riba cabay. E forti aki a pone e pueblo corda cuanto poder e emperador tabatin. Como cu ta e Guardia Pretoriano tabata responsabel pa e prizoneronan cu a bin di otro parti di e Imperio Romano, Julio a hiba e prizoneronan aki e campamento pretoriano. Despues di un biahe peligroso cu a dura varios luna, e prizoneronan porfin a yega nan destino.—Echo. 27:1-3, 43, 44.

Varios acontecimento asombroso a tuma luga durante nan biahe pa Roma. Ora nan tabata riba lama, nan a haya nan cu un tormenta fuerte. Pablo a profetisa cu e barco lo a ser destrui, pero cu tur hende lo a sobrevivi. Riba e isla di Malta, un colebra venenoso a pica Pablo, pero el a keda bon bon. Despues cu el a cura hende malo eynan, algun hende a cuminsa bisa cu e tabata un dios. Podise otro miembronan di e Guardia Pretoriano a tende di e cosnan aki y tabata papia di nan.

Prome cu Pablo a yega Roma, ya el a topa cu varios ruman di Roma cu a bay ‘contr’e na Tres Taberna y na e Plasa di Apio.’ (Echo. 28:15) Pero awor, siendo un prizonero na Roma, con e por a cumpli cu su deseo di sigui predica e bon noticia? (Rom. 1:14, 15) Tin hende ta kere cu e prizoneronan tabata ser entrega prome na e capitan, of hefe, di e Guardia. Si esey tabata e caso, probablemente nan lo a hiba Pablo cerca e Hefe di e Guardia Pretoriano, Afranio Burro, kende kisas tabata e di dos na mando despues di e emperador. * Awor, en bes di a laga un centurion sigui vigila Pablo, nan a pone un simpel soldaat pretoriano vigil’e. Ademas, nan a permiti Pablo huur su propio luga di biba y e tabatin mag di ricibi bishita y predica na nan “sin ningun strobacion.”—Echo. 28:16, 30, 31.

Kisas Burro a interoga apostel Pablo—sea na e palacio of na e campamento pretoriano—prome cu el a entreg’e den man di Nero. Sin duda, Pablo a probecha di e oportunidad unico aki pa ‘duna testimonio na grandi y chikito.’ (Echo. 26:19-23) Nos no sa si Burro a haya Pablo culpabel of no, pero loke si nos sa ta cu e no a laga cera Pablo den e prizon di e campamento pretoriano. *

 E cas cu Pablo a huur tabata suficiente grandi cu e por a ricibi “e hombernan principal di e comunidad Hudiu” y hasta ‘un grupo mas grandi ainda cu a bin cerca dje.’ Y el a duna nan tur testimonio. E soldaatnan pretoriano tambe a haya testimonio. Nan tabata scucha segun cu Pablo tabata duna e Hudiunan “testimonio cabal” tocante e Reino y Hesus, “for di mainta te atardi.”—Echo. 28:17, 23.

Tur dia, un otro trupa di soldaat pretoriano tabata vigila e palacio, y nan tabata cambia warda alrededor di 2 or di merdia. Kisas tur dia tambe un otro soldaat tabata bin vigila Pablo. Esey a habri caminda pa hopi di e guardianan haya testimonio. Durante e dos añanan cu Pablo tabata bou di aresto den su mes cas, hopi soldaat a tend’e dicta e cartanan dirigi na e cristiannan di Efeso, Filipo, Colosas y tambe na e Hebreonan. Nan a mira tambe ora e mes tabata skirbi un carta pa un cristian cu yama Filemon. Aunke Pablo tabata prizonero, el a dedica tempo tambe na Onesimo, un esclavo cu a huy; Pablo “a bira manera un tata p’e”, pero despues el a manda Onesimo bek cerca su doño. (Flm. 10) Sin duda, Pablo a mustra interes tambe den e soldaatnan cu tabata vigil’e. (1 Cor. 9:22) Nos por imagina con e tabata haci un soldaat pregunta tocante cada pieza di su armadura pa e por a sa kico  ta nan uzo. Despues, el a uza e informacion aki pa duna un bunita ilustracion.—Efe. 6:13-17.

E encarcelacion di Pablo a contribui na “adelanto di e bon noticia.” Tur e miembronan di e Guardia Pretoriano y tambe otro hende a tende e bon noticia. (Flp. 1:12, 13) E habitantenan di e Castra Praetoria tabatin contacto cu hende den henter e Imperio Romano, incluso cu e emperador, su famia, su sirbidornan y su esclavonan. Algun di e hendenan di e cas di e emperador a bira cristian. (Flp. 4:22) Pablo su ehempel a duna e rumannan na Roma curashi “pa papia e palabra di Dios sin miedo.”—Flp. 1:14.

Su ehempel ta anima nos tambe pa ‘predica e palabra den tempo faborabel y den tempo dificil.’ (2 Tim. 4:2) Algun di nos kisas no por sali for di cas, ta biba den cas di cuido, ta encarcela pa motibo di nos fe of ta den hospital. Sea loke sea nos situacion, nos por predica na e personanan cu nos ta haya contacto cu ne. Kisas nos por papia cu e personanan cu ta cuida nos of cu ta bin duna nos cualkier servicio. Ora nos ta probecha di tur oportunidad pa predica e bon noticia sin miedo, nos mes lo comproba cu ‘e palabra di Dios no ta na cadena.’—2 Tim. 2:8, 9.