1, 2. (a) Kico e palabra “honor” of “gloria” ta nifica na Hebreo? (b) Ki preguntanan nos lo analisa den e articulo aki?

 ORA bo tende e palabra “honor”, of e palabra “gloria”, riba kico bo ta pensa? Riba e bunitesa di e creacion? (Sal. 19:1) Of riba e elogio y honor cu nan sa duna hende cu ta hopi rico of sabi of cu a logra cosnan extraordinario? Den Bijbel, e palabranan Hebreo pa “honor” y “gloria” ta mescos, y nan ta transmiti e idea di algo di peso. Den antiguedad—tempo nan tabata traha placa di metal, manera oro of plata—mas pisa e moneda tabata, mas balor e tabatin. Pesey, palabranan cu tabata expresa e idea di algo di peso por a referi tambe na algo valioso, magnifico of impresionante.

² Como hende, kisas nos ta keda impresiona cu e poder, posicion of reputacion di un persona. Pero kico Dios ta busca den un hende pa e dun’e honor? Proverbionan 22:4 ta bisa: “E recompensa di humildad y e temor di SEÑOR ta rikesa, honor y bida.” Y discipel Santiago a skirbi: “Somete boso humildemente na Jehova, y lo e halsa boso.” (Sant. 4:10) Kico ta e honor, of gloria, cu Jehova ta duna hende? Kico por stroba nos di ricibi e honor aki? Y con nos por yuda otro hende ricibi honor?

3-5. Ki honor Jehova por duna nos?

³ Un di e escritornan di e Salmonan a expresa e confianza cu Jehova lo tene su man drechi y gui’e na berdadero gloria. (Lesa Salmo 73:23, 24.) Con Jehova ta guia su sirbidornan humilde na gloria? Wel, e ta haci esaki mustrando nan honor na varios manera. Por ehempel, e ta yuda nan compronde su boluntad. (1 Cor. 2:7) Anto hende cu ta scucha su palabra y obedec’e, e ta duna e honor di por tin un amistad intimo cu ne.—Sant. 4:8.

⁴ Tambe Jehova ta confia su siguidornan cu e  sirbishi cristian cu ta un tesoro glorioso. (2 Cor. 4:1, 7) Esnan cu ta uza nan privilegio di sirbishi pa alaba Jehova y pa beneficia otro hende lo ricibi honor. Jehova ta priminti: “Esnan cu honra mi, lo mi honra.” (1 Sam. 2:30) E personanan ey ta haya un bon nomber cerca Jehova, y otro sirbidornan di Dios tambe lo papia bon di nan.—Prov. 11:16; 22:1.

⁵ Kico lo ta e futuro di esnan cu ta ‘spera riba Jehova y sigui su caminda’? Bijbel ta priminti cu ‘Jehova lo halsa nan pa hereda e tera; ora cu e malbadonan wordo corta kita afo, nan lo mira esaki.’ (Sal. 37:34) Nan ta anticipa tambe e honor sin igual di ricibi bida eterno.—Sal. 37:29.

6, 7. Dicon hopi hende no kier a kere den Hesus?

⁶ Kico lo por stroba nos di ricibi e honor, of gloria, cu Jehova ta dispuesto pa duna nos? Un factor ta si nos ta duna demasiado importancia na opinion di hende cu no tin un bon relacion cu Dios. Esaki ta loke algun gobernante den tempo di Hesus a haci. Apostel Juan a skirbi tocante nan: “Hasta hopi lider di e Hudiunan a pone fe den [Hesus], ma pa motibo di e fariseonan, nan no tabata reconoc’e publicamente pa nan no keda expulsa for di [sinagoga]; pasobra nan tabata stima e gloria for di hende hasta mas cu e gloria for di Dios.” (Juan 12:42, 43) E lidernan ey lo a beneficia mas si nan no a duna asina tanto importancia na loke e fariseonan tabata pensa.

⁷ Hesus a splica bon cla na un ocasion anterior dicon hopi hende lo no a acept’e ni kere den dje. (Lesa Juan 5:39-44.) E nacion di Israel tabatin siglonan ta warda riba yegada di e Mesias. Ora Hesus a cuminsa predica, tabatin hende cu a compronde for di e profecia di Daniel cu e tempo a yega pa e Mesias, of Cristo, aparece. Algun luna prome, ora cu Juan Bautista a cuminsa predica, hopi hende a puntra: “Acaso e ta e Cristo?” (Luc. 3:15) Pero awor cu porfin e Mesias tan spera tabata meymey di nan ta predica, e Hudiunan versa den e Ley no a acept’e. Hesus a indica e motibo di esey ora el a puntra nan: “Con boso por kere mi, ora cu boso ta acepta gloria for di otro y boso no ta busca e gloria cu ta bin di e unico Dios?”

8, 9. Uzando e ilustracion di luz, splica con gloria di hende por bira mas importante pa nos cu gloria for di Jehova.

⁸ Nos por compronde mihor con gloria di hende por bira mas importante pa nos cu gloria for di Jehova si nos compara gloria cu luz. Nos universo ta yen di luz, hopi glorioso. Bo ta corda e ultimo biaha cu bo a wak cielo riba un anochi sin nubia y bo por a mira miles di strea ta briya? E bunitesa, of “gloria”, di e streanan ta masha impresionante mes. (1 Cor. 15:40, 41) Pero si bo wak e mesun cielo ey ora bo ta para den caya di un stad bon ilumina, lo bo mira e streanan? Wel, cu e luznan di stad ta casi imposibel pa bo mira nan! Acaso ta asina pasobra e luznan di caya, di stadion y di edificio ta mas fuerte of mas bunita cu luz di strea? No! Esaki ta sosode pasobra e luznan di stad ta mas cerca di nos y nan ta stroba nos di mira e creacion di Jehova. Pa nos por disfruta di e bunitesa di e streanan, nos mester ta un caminda leu for di luz di stad.

⁹ Di e mes manera, si e gloria, of honor, di hende ta e cos cu ta mas importante pa nos, esaki lo por stroba nos di aprecia y busca e gloria duradero cu Jehova ta dispuesto pa duna nos. Hopi hende ta keda sin acepta e bon noticia pasobra nan tin miedo di loke nan famia of conocinan lo  pensa di nan. Acaso e deseo di ricibi honor cerca hende por influencia hasta sirbidornan dedica na Dios? Supone cu un yoncuman ser asigna pa predica den un bario caminda e ta bon conoci, pero mayoria di hende ainda no sa cu e ta Testigo di Jehova. Lo e keda sin predica eynan pasobra e tin miedo? Of kico si un ruman tin metanan teocratico, pero otronan ta haci bofon di su metanan? Lo e haci caso di e rumannan ey cu no tin asina tanto aprecio pa e sirbishi di Jehova? Of kico di un ruman cu a comete un pica serio? Lo e sconde su pica pasobra e tin miedo di perde su responsabilidadnan den congregacion of pasobra e no kier decepciona su sernan keri? Si e ruman su preocupacion principal ta pa drecha su relacion cu Jehova, lo e “manda yama e ancianonan di congregacion” y pidi nan yud’e.—Lesa Santiago 5:14-16.

10. (a) Kico lo por pasa si nos ta mucho preocupa cu loke otro hende ta pensa di nos? (b) Di kico nos por ta sigur si nos ta humilde?

¹⁰ Kisas bo ta trahando duro pa bira un cristian maduro, pero cada bes un ruman ta duna bo conseho. Bo por acepta su observacionnan honesto y beneficia di nan. Of bo por ignora su consehonan debi na orguyo of pasobra bo ta mucho preocupa cu bo reputacion of pasobra bo kier hustifica loke bo a haci. Awor, supone cu bo ta trahando riba un proyecto cu otro ruman. Lo bo keda sin duna pleno cooperacion pasobra bo no sa ken lo haya elogio pa bo bon ideanan y bo trabou duro? Si bo haya bo den un di e situacionnan aki, corda cu ta “esun cu ta di spirito humilde lo ricibi honor.”—Prov. 29:23.

11. Con nos mester reacciona den nos curason ora nos haya elogio, y dicon?

¹¹ Ancianonan y rumannan homber cu ta “haci esfuerso” pa haya mas responsabilidad den congregacion tambe mester tene cuidou cu buscamento di elogio di hende. (1 Tim. 3:1; 1 Tes. 2:6) Con un ruman homber mester reacciona ora e haya palabranan sincero di elogio pa un bon trabou cu el a haci? Claro cu e lo no lanta un monumento pa su mes, manera Rey Saul a haci. (1 Sam. 15:12) Pero e ta cla pa reconoce cu loke el a haci tabata debi na Jehova su bondad inmereci y cu lo e tin exito den futuro solamente si Jehova sigui bendicion’e y yud’e? (1 Ped. 4:11) E manera cu nos ta reacciona den nos curason ora nos haya elogio ta revela ki sorto di honor nos ta busca.—Prov. 27:21.

12. Dicon algun Hudiu no a scucha e mensahe di Hesus?

¹² Un otro cos cu por stroba nos di ricibi honor cerca Jehova ta nos mal deseonan. Nan por pone cu nos no kier tende nada di e berdad. (Lesa Juan 8:43-47.) Hesus a bisa cierto Hudiu cu nan no kier a scucha su mensahe pasobra ‘nan kier cumpli cu e deseonan di nan tata, e Diabel.’

13, 14. (a) Kico investigadornan ta bisa tocante e manera cu nos celebro ta procesa stem di hende? (b) Kico ta determina ken nos lo scucha?

¹³ Tin biaha, nos ta scoge pa scucha solamente loke nos kier tende. (2 Ped. 3:5) Jehova a crea nos cu e capacidad remarcabel di por ignora zonido cu nos no kier tende. Para un rato y concentra riba cuanto diferente zonido bo por tende na e momento aki. Probablemente, hopi di nan bo no tabata tende mes un rato pasa. Dicon? Wel, aunke nos celebro tin e capacidad di tende tur e diferente zonidonan ey pareu, e sistema limbico (un parti di e celebro) ta yuda nos concentra riba un cos so. Pero investigadornan a descubri cu ta bira mas dificil pa nos celebro distingui varios zonido pareu ora ta trata di stem di hende.  Esaki ta nifica cu ora bo tende dos stem pareu, bo tin cu scoge riba cua bo ta bay concentra. Lo bo scoge esun cu bo kier scucha. E Hudiunan cu tabata kier cumpli cu e deseonan di nan tata, e Diabel, no a scucha Hesus.

¹⁴ Bijbel ta bisa cu nos ta haya mensahe for di ‘e cas di sabiduria’ y for di ‘e cas di bobedad.’ (Prov. 9:1-5, 13-17) Tanto sabiduria como bobedad constantemente ta yama nos, na moda di papia. Pues, nos tin cu scoge. Ken nos lo scucha? Esey ta depende di ken su boluntad nos kier haci. E carnenan di Hesus ta scucha su bos y ta siguie. (Juan 10:16, 27) Nan ta “na banda di e berdad.” (Juan 18:37) “Nan no conoce e stem di hende straño.” (Juan 10:5) Esnan cu sigui Hesus humildemente lo ricibi honor cerca Dios.—Prov. 3:13, 16; 8:1, 18.

15. Den ki sentido e tribulacionnan di Pablo a “nifica gloria” pa otro hende?

¹⁵ Con nos por yuda otro hende ricibi honor cerca Dios? Un manera ta pa medio di nos perseverancia. Pablo a skirbi e congregacion na Efeso: “Mi ta pidi boso pa no entrega pa motibo di e tribulacionnan cu mi ta sufri pa boso, pasobra nan ta nifica gloria pa boso.” (Efe. 3:13) Den ki sentido e tribulacionnan di Pablo a “nifica gloria” pa e Efesionan? Pablo tabata dispuesto pa sigui sirbi e Efesionan a pesar di dificultad, y esey a laga nan mira cu sirbi Dios ta e cos di mas valioso pa un cristian. Pero si Pablo lo a entrega ora el a pasa den tribulacion, su rumannan lo por a pensa cu nan relacion cu Jehova, nan sirbishi y nan speransa no tabata dje importante ey. Pablo su ehempel di perseverancia a duna honor y importancia na cristianismo y a demostra e rumannan cu ser un discipel di Cristo ta bal cualkier sacrificio.

16. Ki tribulacion Pablo a experencia na Listra?

¹⁶ Pensa riba e efecto cu Pablo su celo y perseverancia tabatin. Echonan 14:19 y 20 ta conta nos kico a pasa cu Pablo na Listra, bisando: “Algun Hudiu cu a bin di Antiokia y Iconio a convence e multitud pa lanta contra nan, y nan a piedra Pablo y a lastr’e hiba pafo di stad, pensando cu e tabata morto. Ma ora e discipelnan a bin para rond di dje, el a lanta para y a drenta e stad. Su manece e cu Barnabas a sali bay Derbe.” Nos por imagina con dificil mester tabata pa Pablo biaha 100 kilometer na pia, un dia despues cu casi nan a piedr’e mata!

17, 18. (a) Dicon Timoteo lo por tabata sa di Pablo su sufrimento na Listra? (b) Ki efecto e perseverancia di Pablo tabatin riba Timoteo?

¹⁷ Acaso Timoteo tabata un di “e discipelnan”  cu a bin yuda Pablo? Probablemente, pero e buki di Echonan no ta bisa esey. Pero Timoteo tabata sa di e suceso, pasobra Pablo a skirbi den su di dos carta na Timoteo: “Abo a presta bon atencion na mi siñansa, mi manera di biba, ... y e persecucion- y sufrimentonan cu mi a pasa aden na Antiokia [caminda nan a core cu ne for di e stad], Iconio [caminda nan a purba di piedr’e] y Listra [caminda nan a piedr’e]. Mi a wanta e persecucionnan aki, y Señor a libra mi for di nan tur.”—2 Tim. 3:10, 11; Echo. 13:50; 14:5, 19.

¹⁸ Timoteo “a presta bon atencion” na e sucesonan ey y tabata bon na altura di Pablo su perseverancia. Esaki a haci un impresion profundo riba Timoteo. Ora Pablo a bolbe bishita Listra, el a nota cu Timoteo tabata un cristian ehemplar y cu “e rumannan di Listra y Iconio tabata papia bon di Timoteo.” (Echo. 16:1, 2) Cu tempo, Timoteo a cualifica pa ricibi responsabilidadnan mas pisa.—Flp. 2:19, 20; 1 Tim. 1:3.

19. Con nos perseverancia por yuda otro hende?

¹⁹ Si nos persevera den haci e boluntad di Dios, nos ehempel por yuda otro hende tambe, specialmente hobennan, pa nan bira sirbidornan di Dios mas valioso ainda. Hobennan ta observa nos y ta siña di e manera cu nos ta papia cu hende den sirbishi di veld. Nan ta beneficia tambe di mira con nos ta trata cu situacionnan dificil den bida. Pablo a bisa cu el a “wanta tur cos” pa asina tur cu keda fiel ‘por haya salbacion hunto cu gloria eterno.’—2 Tim. 2:10.

20. Dicon nos tin cu sigui busca e gloria cu ta bin di Dios?

²⁰ Nos tin bon motibo anto pa sigui “busca e gloria cu ta bin di e unico Dios.” (Juan 5:44; 7:18) Jehova ta duna ‘bida eterno na esnan cu ta busca su gloria y honor.’ (Lesa Romanonan 2:6, 7.) Ademas, nos “perseverancia den obra cu ta bon” por anima otro rumannan pa keda fiel y asina haya bida eterno. Pues, no laga nada stroba bo di ricibi e gloria y honor cu Dios ta duna.