1, 2. Na contraste cu e iglesianan di cristiandad, con Testigonan di Jehova ta mira e nomber di Dios?

 POR LO GENERAL, iglesianan di cristiandad ta evita di uza e nomber di Dios. Por ehempel, e Bijbel na Ingles, Revised Standard Version, ta bisa den su prologo: “Pa e fe universal di e Iglesia Cristian ta completamente inapropia pa uza e nomber di e unico Dios.”

² Testigonan di Jehova, di otro banda, ta orguyoso di por carga e nomber di Dios y glorific’e. * (Lesa Salmo 86:12; Isaias 43:10.) Ademas, e echo cu nos por compronde e nificacion di e nomber ey y sa pakico ta asina importante pa santific’e ta un privilegio. (Mat. 6:9) Pero esey no ta cualkier privilegio! Pesey, laga nos considera tres pregunta importante: Kico ta nifica conoce e nomber di Dios? Con Jehova a demostra cu e ta digno di su gran nomber? Y con nos por cana den e nomber di Jehova?

3. Kico ta nifica conoce e nomber di Dios?

³ Conoce e nomber di Dios ta encera hopi mas cu simplemente sa cu su nomber ta “Jehova.” E ta encera sa ki clase di Dios Jehova ta, kico ta su cualidadnan, kico ta su proposito, kico e ta haci y specialmente e manera cu e ta trata hende. Segun cu Jehova a cumpli cu su proposito, el a revela gradualmente ki clase di Dios e ta. (Prov. 4:18) Jehova a revela su nomber na e prome pareha humano. Nos sa esey pasobra Eva a uz’e despues cu el a duna luz na Cain. (Gen. 4:1) E patriarcanan fiel manera Noe, Abraham, Isaak y Jacob tambe tabata sa e nomber di Dios. Ademas, nan a siña mas tocante e clase di Dios cu Jehova ta segun cu nan a mira con el a bendiciona nan, percura pa nan y revela varios aspecto di su proposito na nan. Mas despues Dios a  revela algo special na Moises tocante e nificacion di su nomber.

4. Dicon Moises a puntra Dios pa su nomber, y dicon Moises tabatin motibo pa ta un poco preocupa?

⁴ Lesa Exodo 3:10-15. Ora Moises tabatin 80 aña di edad, Dios a dun’e un mandamento importante: “Saca mi pueblo, e yiunan di Israel, for di Egipto.” E ora ey Moises a haci Dios un pregunta cu un nificacion profundo: ‘Si e Israelitanan puntra mi con ta bo nomber, kico mi mester bisa nan?’ Pakico Moises a haci e pregunta ey, siendo cu e nomber di Dios tabata conoci pa hopi tempo caba? Evidentemente, Moises kier a sa mas tocante e persona cu e nomber ey a representa. Asina e lo por a convence e Israelitanan cu di berdad Dios por a libra nan. Y nos por compronde dicon Moises tabata un poco preocupa. E Israelitanan tabata esclavo pa hopi tempo, y kisas nan a duda cu e Dios di nan antepasadonan lo por a libra nan. En realidad, algun di nan hasta tabata adora e diosnan di Egipto!—Eze. 20:7, 8.

5. Kico Jehova a revela tocante su nomber na Moises?

⁵ Kico Jehova a contesta Moises? Segun e Traduccion di Mundo Nobo, el a bisa Moises: “Esaki ta loke bo tin cu bisa e yiunan di Israel: ‘LO MI RESULTA DI TA a manda mi cerca boso.’” * Anto el a agrega: “Jehova e Dios di boso antepasadonan ... a manda mi cerca boso.” Cu e palabranan ey, Jehova a revela algo importante tocante su mes. E lo bira loke sea ta necesario of haci loke sea e mester haci pa e por cumpli cu su proposito, y cu e ta un Dios cu semper ta cumpli cu su palabra. Pesey, den versiculo 15 nos ta lesa cu Jehova a bisa di su mes: “Esaki ta mi nomber te na tempo indefini, y esaki ta e memoria di mi pa generacion tras di generacion.” E palabranan ey sigur lo mester a impresiona Moises profundamente y fortalece su fe.

6, 7. Con Jehova a demostra cu e ta digno di su nomber?

⁶ Un poco despues cu Jehova a papia cu Moises, el a demostra cu e ta digno di su nomber, ‘resultando di ta’ un Libertador pa e pueblo di Israel. El a humilia Egipto cu dies plaga devastador, cu alabes a demostra cu Farao y e diosnan di Egipto tabata impotente. (Exo. 12:12) Despues di esey Jehova a habri Lama Cora, laga e pueblo di Israel pasa door di dje, pa despues hoga Farao y su ehercito den dje. (Sal. 136:13-15) Den e “desierto grandi y teribel”, Jehova a  “resulta di ta” un Salbador di bida ora el a duna su pueblo, cu tabata consisti di miyones di hende, cuminda y awa. Hasta el a percura pa nan paña- y sandalianan no gasta. (Deu. 1:19; 29:5) Si, no tin nada cu por stroba Jehova di cumpli cu loke el a priminti y asina demostra cu e ta digno di su nomber incomparabel. Mas despues, el a bisa Isaias: “Ami, si, ami mes, ta [Jehova], y no tin otro salbador fuera di mi.”—Isa. 43:11.

⁷ Un otro homber cu tabata testigo di e obranan poderoso cu Jehova a realisa na Egipto y den desierto tabata Josue, sucesor di Moises. Pesey, ora Josue tabata yegando na fin di su bida, e por a bisa e Israelitanan cu conviccion: “Boso sa di henter boso curason y di henter boso alma cu ni un palabra di tur e bon palabranan cu [Jehova] boso Dios a papia tocante di boso no a faya; tur a keda cumpli pa boso, ni un di nan no a faya.” (Jos. 23:14) Si, Jehova no a laga ningun duda cu e ta un Dios di su palabra.

8. Con Jehova ta demostrando cu e ta digno di su nomber den nos tempo?

⁸ Awe tambe Jehova ta demostrando cu e ta digno di su nomber. El a profetisa pa medio di su Yiu cu durante e ultimo dianan e mensahe di Reino lo ser predica “den henter e tera habita.” (Mat. 24:14) Ta Jehova so por a papia adelanta di un obra asina, haci sigur cu e ta tuma luga y uza principalmente ‘hende gewoon sin mucho educacion’ pa realis’e. (Echo. 4:13) Pues, ora nos ta predica e bon noticia, nos ta yuda profecia di Bijbel cumpli. Nos ta honra nos Tata y ta demostra cu nos ta para tras di e palabranan cu nos ta pidi den oracion: “Bo nomber sea santifica. Laga bo Reino bin. Laga bo boluntad sosode, mescos cu den cielo, tambe riba tera.”—Mat. 6:9, 10.

9, 10. Kico mas nos ta siña tocante Jehova for di su manera di trata Israel?

⁹ Un poco despues cu Israel a sali for di Egipto, Jehova a revela mas cos tocante su mes na nan. Jehova a cera e pacto di Ley cu nan y a priminti nan cu e lo percura pa nan mescos cu un esposo ta percura pa su esposa. E Israelitanan, na nan turno, a bira su esposa figurativo, un pueblo pa su nomber. (Isa. 54:5, 6) Si nan a somete nan mes na dje y obedece su mandamentonan, lo el a resulta di ta, na moda di papia, e Esposo perfecto pa nan. Lo el a bendiciona nan, proteha nan y duna nan paz. (Num. 6:22-27) E nacionnan lo a sa e ora ey cu no tin ningun Dios manera Jehova y lo glorifica su nomber. (Lesa Deuteronomio 4:5-8; Salmo 86:7-10.) Si, a traves di e historia di Israel, hopi stranhero a cuminsa adora Jehova. Den un sentido, nan a bisa loke Ruth, e Moabita, a bisa Noemi: “Bo pueblo  lo ta mi pueblo, y bo Dios, mi Dios.”—Ruth 1:16.

¹⁰ Pa mas o menos 1.500 aña, Jehova su manera di trata cu Israel a revela hopi aspecto nobo di su personalidad. A pesar cu e nacion a desobedec’e bes tras bes, Jehova a resulta di ta ‘un Dios yen di compasion, cu no ta rabia lihe.’ E tabatin gran pasenshi cu nan. (Exo. 34:5-7) Pero Jehova su pasenshi tabatin un limite, y e limite ey a yega ora e nacion Hudiu a rechasa su Yiu y a mat’e. (Mat. 23:37, 38) E descendientenan natural di Israel ya no tabata e pueblo cu Dios a scoge pa carga su nomber. Den bista di Jehova, nan tabata morto spiritualmente, manera un mata cu a seca. (Luc. 23:31) Ki efecto esaki tabatin riba nan actitud pa cu e nomber di Dios?

11. Dicon e nacion Hudiu a stop di uza e nomber di Dios?

¹¹ Cu tempo, e Hudiunan a haya un idea incorecto encuanto e nomber di Dios. Nan a pensa cu e nomber di Dios ta asina santo cu nan no mester a ni pronunci’e. (Exo. 20:7) Pocopoco pero sigur, nan a stop di uza e nomber di Dios. Jehova lo mester a sintie tristo pa e falta di respet cu nan a mustra pa su nomber. (Sal. 78:40, 41) Sinembargo, Dios, “kende su nomber ta Jaloers, sigur lo no a sigui conecta su nomber cu un pueblo cu a rechas’e y cu e, na su turno, a rechasa. (Exo. 34:14) E echo aki ta siña nos cu ta sumamente importante pa trata e nomber di nos Creador cu respet profundo.

12. Con Jehova a produci e pueblo pa carga su nomber cu el a profetisa di dje?

¹² Pa medio di Jeremias, Jehova a revela su proposito pa cera “un alianza [of, pacto] nobo” cu un nacion nobo, esta, Israel spiritual. Manera Jeremias a profetisa, tur su miembronan, “for di esun di mas menos te na esun di mas grandi”, lo ‘conoce Jehova.’ (Jer. 31:31, 33, 34) E profecia ey a cuminsa cumpli na Pentecoste di aña 33 di prome siglo ora Dios a cera e pacto nobo. E nacion nobo, “e Israel di Dios”, cu a inclui tanto Hudiu como hende cu no tabata Hudiu, a bira “un pueblo pa carga [Dios] su nomber”, manera Jehova a bisa.—Gal. 6:16; lesa Echonan 15:14-17; Mat. 21:43.

13. (a) E prome cristiannan tabata uza e nomber di Dios? Con nos por sa esey? (b) Con abo ta mira e privilegio di por uza e nomber di Jehova den bo sirbishi?

¹³ Como e ‘pueblo cu ta carga Dios su nomber’, e miembronan di e nacion spiritual ey a uza e nomber divino. Por ehempel, nan a haci esey ora nan a cita for di e Scritura Hebreo. * Pues na Pentecoste di aña 33, ora apostel Pedro tabata papia cu un grupo grandi di Hudiu y hende cu a comberti y bira Hudiu, el a uza e nomber di Dios varios biaha. (Echo. 2:14, 20, 21, 25, 34) Como cu e prome cristiannan a honra Jehova, el a bendiciona nan trabou di predica. Awe tambe, Jehova ta bendiciona nos sirbishi ora nos ta proclama su nomber y mustra su nomber na otro hende, si ta posibel, den nan mes Bijbel. Asina nos ta laga nan cera conoci cu e Dios berdadero. Esey ta un gran privilegio, tanto pa nan como pa nos! Pa esnan cu siña conoce Dios, esey por ta comienso di un amistad maraviyoso cu Jehova cu lo crece bira fuerte y dura pa semper.

14, 15. A pesar cu apostasia a plama, kico Jehova a haci tocante su nomber?

¹⁴ Mas despues, principalmente despues di morto di e apostelnan, apostasia a cuminsa corumpi e congregacion cristian di prome siglo. (2 Tes. 2:3-7) Maestronan falso a bay asina leu di adopta e tradicion  Hudiu di no uza e nomber di Dios. Pero Jehova lo a laga su nomber bay perdi? Hamas! Ta berdad cu kisas nos no sa exactamente con nan tabata pronuncia e nomber di Dios den pasado, pero su nomber a sobrevivi. A traves di siglonan, e nomber di Dios a aparece den hopi traduccion di Bijbel y tambe den obranan skirbi di eruditonan di Bijbel. Por ehempel, na aña 1757, Charles Peters a skirbi cu e nificacion di e nomber di Dios ta describi e clase di Dios cu Jehova ta mihor cu cualkier titulo. Den un buki di 1797 tocante adoracion di Dios, Hopton Haynes a cuminsa capitulo 7, bisando: “JEHOVA ta e nomber apropia di DIOS entre e Hudiunan; e so nan tabata adora, mescos cu Cristo y su Apostelnan tambe a haci.” Henry Grew (1781-1862) no solamente a uza e nomber di Dios, sino a reconoce tambe cu hende a trece reproche riba su nomber y cu mester a santific’e. Asina tambe, George Storrs (1796-1879), un socio intimo di Charles T. Russell, a uza e nomber di Dios, mescos cu Russell mes tambe.

¹⁵ Aña 1931 tabata particularmente notabel, pasobra e aña ey e Studiantenan Internacional di Bijbel, manera Dios su pueblo tabata ser yama e tempo ey, a adopta e nomber biblico Testigonan di Jehova. (Isa. 43:10-12) Di e manera ey nan a anuncia na mundo cu nan ta orguyoso di por ta sirbidor di e unico Dios berdadero, di por ta “un pueblo cu ta carga su nomber”, pa alaba su nomber. (Echo. 15:14) E desaroyonan aki ta laga nos corda e palabranan di Jehova cu nos por haya na Malakias 1:11: “For di ora solo sali te ora cu e drenta, mi nomber lo ta grandi meymey di e nacionnan.”

16. Dicon ta un honor di por cana den e nomber di Jehova?

¹⁶ Profeta Mikeas a skirbi: “Tur e pueblonan ta cana cada un den e nomber di su dios, ma pa loke ta nos, nos si lo cana den e nomber di [Jehova] nos Dios pa semper y semper.” (Mik. 4:5) E echo cu Jehova a laga e Studiantenan di Bijbel adopta su nomber tabata mas cu simplemente un gran honor. Esey a duna nan e confianza tambe cu nan tabatin su aprobacion. (Lesa Malakias 3:16-18.) Pero kico di abo mes? Bo ta haci esfuerso pa ‘cana den e nomber di Jehova’? Bo ta compronde kico esey ta encera?

17. Kico cana den e nomber di Dios ta encera?

¹⁷ ‘Cana den e nomber di Jehova’ ta encera por lo menos tres cos. Di prome, nos mester proclama e nomber ey na otro hende, reconociendo cu ta solamente esnan cu “invoca e nomber di Jehova lo ser salba.” (Rom. 10:13) Di dos, nos tin cu imita Jehova su cualidadnan, specialmente su amor. (1 Juan 4:8) Y di tres, nos ta cana den e nomber di Dios ora cu nos ta somete nos mes boluntariamente na e normanan husto di Dios, y di e manera ey ta honra nos Tata su nomber santo. (1 Juan 5:3) Abo ta determina pa ‘cana den e nomber di Jehova nos Dios pa semper y semper’?

18. Pakico tur hende cu ta honra e gran nomber di Jehova por wak futuro cu confianza?

¹⁸ Pronto tur hende cu no ta haci caso di Jehova of cu ta rebela contra dje lo haya nan forsa ta reconoce ken e ta. (Eze. 38:23) Den nan lo tin hende cu ta manera Farao, kende a bisa: ‘Ta ken ta Jehova cu mi mester obedece su bos?’ No a dura mucho pa el a haya sa esey! (Exo. 5:1, 2; 9:16; 12:29) Pero nos si a scoge pa siña conoce Jehova. Nos ta orguyoso di ta parti di e pueblo obediente cu ta carga su nomber. Pesey, nos ta wak futuro cu confianza den e promesa cu ta para skirbi na Salmo 9:10: “Esnan cu conoce bo nomber lo pone nan confianza den bo, pasobra abo, o [Jehova], no a bandona esnan cu ta busca bo.”