1. Con un coredo a demostra cu e no ta entrega?

 MARY DECKER tabata un teenager ora el a bira un di e mihor coredonan na mundo. Na e Olimpiada di 1984, e tabata e faborito pa gana medaya di oro den e careda di 3.000 meter. Pero e no a logra yega e liña final. El a trompica riba pia di un otro coredo y a cay. Ora nan a carg’e bah’e for di e pista, e tabata yen di dolor y cu awa na wowo. Pero Mary no a entrega. Den menos cu un aña, e tabata riba pista atrobe y a pone un record mundial riba e distancia di 1,6 kilometer na 1985.

2. Den ki sentido cristiannan berdadero ta den un careda, y kico ta importante den e careda aki?

² Como cristian, nos tambe ta den un careda—un careda figurativo. Y nos mester core di tal manera pa nos gana e careda aki. Sinembargo, e no ta manera un careda di distancia cortico den cua velocidad ta e cos di mas importante ni un jogmento unda bo por para ora bo kier. Mas bien, e ta manera un marathon den cua perseverancia ta importante pa yega final. Den su carta na e cristiannan na Corinto, un stad conoci pa su competencianan di atletismo, apostel Pablo a uza ilustracion di un coredo. El a skirbi: “Boso no sa cu den un careda tur coredo ta core, ma cu ta un so ta ricibi e premio? Core di tal manera cu boso por gana e premio.”—1 Cor. 9:24.

3. Dicon tur coredo por gana e careda pa bida eterno?

³ Bijbel ta bisa nos pa core e careda figurativo aki. (Lesa 1 Corintionan 9:25-27.) E premio ta bida eterno den cielo pa e unginan y pa e otro coredonan bida eterno riba tera. Esaki ta e unico careda den cua e premio ta bida eterno. Ademas, distinto for di mayoria di  competencia atletico, tur hende cu participa den e careda aki y persevera te na fin ta gana e premio ey. (Mat. 24:13) Un coredo ta perde solamente si e no core segun e reglanan of no persevera te na fin.

4. Dicon no ta facil pa core e careda pa bida eterno te na final?

⁴ No ta facil pa core e careda pa bida eterno te na final. E ta exigi disciplina y determinacion. E unico persona cu a yega di persevera te na final sin trompica nunca ta Hesucristo. Discipel Santiago a skirbi cu tur siguidor di Cristo “ta trompica hopi biaha.” (Sant. 3:2) Y esey ta un realidad! Debi cu nos ta pecador, nos imperfeccion y esun di otronan por pone cu tin biaha nos por trompica, perde nos balansa y baha nos velocidad. Nos por hasta cay, pero nos ta lanta y sigui core. Tin ruman ta cay asina duro cu nan mester di yudansa pa lanta y sigui den e careda. Pesey, nos no mester keda sorprendi si de bes en cuando nos trompica of hasta cay.—1 Rey. 8:46.

5, 6. (a) Den ki sentido nada no ta pone un cristian “trompica”, y kico por yud’e “lanta atrobe”? (b) Dicon algun no ta lanta ora nan trompica?

⁵ E manera cu nos ta reacciona ora nos trompica of cay ta mustra ki clase di persona nos ta. Algun ruman cu trompica of cay ta arepenti y sigui sirbi Dios, pero otronan no ta arepenti. Proverbionan 24:16 ta bisa: “Un hende husto ta cay shete bes, y ta lanta atrobe, ma e malbadonan ta trompica den tempo di calamidad.”

⁶ Pues, maske nos trompica of cay debi na problema of debilidad, cu yudansa di Jehova nos por recobra nos balansa spiritual. Si, nos ta sigur cu Jehova lo yuda nos “lanta atrobe” y sigui sirbie cu henter nos curason. Esey ta un gran consuelo pa esnan cu ta stima Jehova. Di otro banda, hende malbado no kier lanta. Nan no ta busca yudansa di e spirito santo di Dios ni di Su pueblo; nan ta rechasa e yudansa aki  ora e ser ofreci na nan. Pues, na contraste cu hende malbado, pa hende ‘cu ta stima Jehova su ley’, no tin nada cu por pone nan trompica y keda pa semper for di e careda pa bida.—Lesa Salmo 119:165.

7, 8. Con por ta cu un hende ta “cay” y toch keda cu Jehova su aprobacion?

⁷ Debi na debilidad, algun cristian sa comete fayonan chikito, tin biaha hasta bes tras bes. Pero tanten cu nan bolbe “lanta”, esta arepenti y haci esfuerso pa sigui sirbi Jehova fielmente, nan ta husto den su bista. E manera cu Jehova a trata e nacion di Israel ta comproba esey. (Isa. 41:9, 10) E texto di Proverbionan 24:16 cu nos a cita anteriormente no ta enfoca riba nos fayonan; mas bien, e ta resalta e echo cu Jehova ta cla pa yuda nos “lanta atrobe.” (Lesa Isaias 55:7.) Jehova Dios y Hesucristo ta anima nos pa “lanta atrobe”, pasobra nan tin confianza den nos.—Sal. 86:5; Juan 5:19.

⁸ Den un marathon, si un coredo trompica of cay, e por lanta y core te final basta e actua mesora. Pa loke ta e careda pa bida eterno, nos no sa ni ‘e dia ni e ora’ cu esaki lo termina. (Mat. 24:36) No obstante, nos mester haci nos maximo esfuerso pa core sin trompica pa nos por tin mas chens di caba e careda cu exito. Awor, con nos por evita di trompica?

9. Menciona algun cos cu por pone nos trompica.

⁹ Laga nos trata awor cinco cos cu por pone nos trompica. Nan ta: nos debilidadnan, deseo di carni, inhusticia di parti di nos compañeronan cristian, tribulacion of persecucion y imperfeccion di otro hende. Si nos trompica, ta bon pa nos corda cu Jehova tin hopi pasenshi y no ta lihe pa pensa cu nos ta un caso perdi.

10, 11. Ki debilidad David tabatin?

¹⁰ Nos por compara nos debilidadnan cu piedra riba un pista di atletismo. Si nos analisa bida di Rey David y esun di apostel Pedro, nos por identifica dos debilidad: falta di dominio propio y miedo di hende.

¹¹ Rey David, por ehempel, a desplega falta di dominio propio ora el a peca cu Betsabe. Y na un otro ocasion, ora cu Nabal a insult’e, e tabata cla pa ataca Nabal. A pesar di e debilidad aki, nunca David a stop di haci esfuerso pa agrada Jehova. Cu yudansa di otronan, e por a recobra su balansa spiritual.—1 Sam. 25:5-13, 32, 33; 2 Sam. 12:1-13.

12. Dicon Pedro por a keda den e careda pa bida a pesar cu el a trompica?

¹² Den caso di Pedro miedo di hende a pon’e trompica na varios ocasion. No obstante, el a keda leal na Hesus y na Jehova. Por ehempel, tres biaha el a nenga cu e conoce su Maestro. (Luc. 22:54-62) Mas despues, Pedro no a actua manera un cristian; e tabata trata personanan cu no tabata Hudiu cu a bira cristian comosifuera nan tabata menos importante cu e Hudiunan cu a bira cristian. Sinembargo, Apostel Pablo si tabatin e punto di bista corecto: Den congregacion no tin luga pa haci distincion di persona. Pedro su actitud tabata robes. Pesey, prome cu Pedro su comportacion a afecta henter e hermandad, Pablo a reprend’e. (Gal. 2:11-14) Con Pedro a reacciona? El a sintie asina ofendi cu el a stop di core e careda pa bida? No. El a acepta e disciplina, cambia su actitud y a sigui padilanti.

13. Con problema cu salud por pone nos trompica?

¹³ Tin biaha, nos salud ta bira nos debilidad. Esaki tambe por pone nos trompica y hasta stop di core e careda pa bida. Tuma por ehempel e caso di un ruman muher Japones cu a bira malo despues cu e tabatin  17 aña batisa. E tabata asina preocupa cu su salud cu el a bira spiritualmente debil. Y cu tempo, el a bira inactivo. Dos anciano a bishit’e, nan a anim’e y el a cuminsa asisti atrobe na e reunionnan. Ora el a bolbe, e rumannan a dun’e un bonbini asina caluroso cu awa a basha for di su wowo. Awor nos ruman ta riba caminda pa bida atrobe.

14, 15. Ki medidanan drastico nos tin cu tuma ora deseonan robes ta hinca nos den tentacion? Duna un ehempel.

¹⁴ Deseo di carni a pone hopi hende trompica. Ora nos deseonan ta hinca nos den tentacion, nos tin cu tuma medidanan drastico pa keda mentalmente, moralmente y spiritualmente limpi. Corda cu Hesus a conseha nos pa den sentido figurativo benta of tira afo tur loke por pone nos trompica, hasta si ta cosnan importante manera nos man of wowo. E cosnan ey ta inclui pensamento- y actonan inmoral cu a pone algun ruman stop di core e careda pa bida.—Lesa Mateo 5:29, 30.

¹⁵ Un ruman homber cu a lanta den e berdad a skirbi cu, te caminda cu e ta corda, semper e tabatin un lucha cu sintimentonan homosexual. El a bisa: “Semper mi tabata sinti mi diferente for di otronan y incomodo.” Ora e tabatin mas o menos 20 aña, el a bira pionero regular y tabata un sirbidor ministerial. Pero despues, el a comete un pica serio; el a haya disciplina y ancianonan a dun’e yudansa spiritual. Loke a yud’e cuminsa core e careda pa bida atrobe ta oracion, estudio di e Palabra di Dios y sirbishi di veld. Añanan despues, el a admiti: “De bes en cuando, e sintimentonan ey ta lanta, pero mi no ta laga nan domina mi. Awor mi sa cu Jehova no ta laga nos pasa den un tentacion cu nos no por soporta. Mi ta kere cu Dios tin confianza cu mi por wanta.” Na final di su carta, e ruman a bisa: “Maske mi tin cu lucha duro awe, e ta bale la pena. Pasobra den e mundo nobo lo mi ser recompensa. Pesey, lo mi sigui lucha.” Si, nos ruman ta determina pa keda den e careda.

16, 17. (a) Kico a yuda un ruman homber cu a pensa cu inhusticia a ser cometi contra dje? (b) Pa evita cu nos ta trompica, riba ken nos mester enfoca?

¹⁶ Un otro cos cu por pone nos trompica ta inhusticia di parti di nos compañeronan cristian. Na Francia, un ruman cu tabata sirbi como anciano a bira amarga pasobra el a pensa cu un inhusticia a ser cometi contra dje. Esey a pone cu el a stop di asisti na e reunionnan y a bira inactivo. Dos anciano a bishit’e y a scuch’e cu atencion sin interumpie ora e tabata conta loke a sosode cu ne, segun su punto di bista. Nan a anim’e pa tira su carga riba Jehova, y nan a enfatisa cu e cos di mas importante ta pa nos agrada Dios. El a haci caso di nan conseho, y un poco despues e tabata den e careda pa bida atrobe, activo den congregacion.

¹⁷ Nos no mester laga loke hende imperfecto ta haci pone nos trompica; mas bien, nos mester enfoca riba Hesucristo, esun cu Jehova a nombra como Cabes di e congregacion cristian. Hesus, kende su wowonan ta manera “vlam di candela”, ta wak tur cos for di e perspectiva corecto y por mira hopi mas leu cu nos. (Rev. 1:13-16) Pesey, tin biaha, loke pa nos kisas ta un inhusticia, pa Hesus ta un mal comprondemento di nos parti. Y si realmente tin problema den congregacion, Hesus lo resolve esaki perfectamente y na e debido tempo. Pues, nunca nos no mester laga loke otro cristian haci of dicidi pone nos trompica y bandona e careda pa bida.

18. Con nos por soporta prueba of situacionnan dificil?

¹⁸ Dos cos mas cu por pone nos trompica ta tribulacion of persecucion y imperfeccion di otronan den congregacion. Den Hesus  su ilustracion di e sembrador, el a bisa cu “tribulacion of persecucion” pa motibo di e palabra lo pone algun hende trompica. Nos por haya persecucion di parti di nos famia, bisiña of autoridadnan gubernamental. Y si nos ‘no tin raiz den nos curason’, esta, si nos ta spiritualmente debil, nos por trompica. (Mat. 13:21) Sinembargo, si nos ta determina pa keda pega na Jehova, e simia, of mensahe, di Reino lo saca raiz profundo den nos curason y yuda nos keda firme den e berdad. Pues, ora nos ta haya nos den situacionnan dificil, ta bon pa nos haci oracion y medita riba cosnan cu ta digno di elogio. (Lesa Filipensenan 4:6-9.) Cu yudansa di Jehova, nos lo por soporta prueba y lo no permiti situacionnan dificil pone nos trompica.

19. Con nos por evita di trompica ora otro hende ofende nos?

¹⁹ A traves di añanan, lamentablemente algun ruman a laga imperfeccion di otronan stroba nan di sigui core e careda pa bida. Nan a laga diferencia di opinion encuanto asuntonan di consenshi pone nan trompica. (1 Cor. 8:12, 13) Si un ruman a haci algo cu a molestia bo, esaki ta pone bo trompica? Bijbel ta conseha nos pa stop di husga, pa pordona otro y pa no insisti riba nos derecho. (Luc. 6:37) Ora bo sinti bo ofendi of molestia, puntra bo mes: ‘Mi ta husga otronan a base di gusto personal? Sabiendo cu mi rumannan ta imperfecto, lo mi laga un hende imperfecto pone mi bandona e careda pa bida?’ Si nos ta stima Jehova, nos lo no laga nada cu otro hende haci stroba nos di yega e liña final.

20, 21. Kico bo ta determina pa haci den e careda pa bida?

²⁰ Abo ta determina pa “termina e careda”? (2 Tim. 4:7, 8) Si ta asina, ta masha importante pa bo tin un estudio personal. Uza Bijbel y nos publicacionnan pa yuda bo haci investigacion, medita y identifica e cosnan cu por pone nos trompica. Roga Jehova pa spirito santo pa bo por tin e forsa necesario pa persevera. Corda cu ningun coredo no tin nodo di perde e careda pa bida djis pasobra el a trompica of cay. E por lanta y sigui core. Y pa loke ta su fayonan, e por siña for di esakinan pa e por core mihor.

²¹ Bijbel ta mustra cu pa nos por gana e premio di bida eterno nos mester ta activo y no pasivo. Nos no por haci comosifuera nos ta drenta un bus cu ta hiba nos na victoria. Nos mes mester core e careda pa bida. Segun cu nos ta haci esey, e “paz” cu Dios ta duna lo ta manera biento cu ta yuda nos bay dilanti. (Sal. 119:165) Nos por ta sigur di su bendicion awor, y si nos termina e careda, lo e bendiciona nos pa semper.—Sant. 1:12.