TA MASHA emocionante pa mira con mas y mas hoben Testigo di Jehova ta simplifica nan bida pa nan por haci mas den sirbishi na Dios. (Mat. 6:⁠22) Ki cambionan nan ta haci? Ki obstaculonan nan ta confronta? Pa contesta e preguntanan aki laga nos cera conoci cu algun di e rumannan cu actualmente ta sirbi na Mexico.

Dustin y Jassa a casa na januari 2007 y tabata biba na Merca. Un poco despues, un soño cu nan tabatin pa hopi tempo a bira realidad: Nan a cumpra un boto di bela pa biba aden. Nan tabata mara nan boto den bisindario di Astoria, Oregon, Merca. Astoria ta un stad masha bunita cu no ta keda mucho leu di Ocean Pacifico; e ta rondona cu seronan berde y algun cubri cu sneeuw. Dustin a bisa: “Unda cu bo wak bo ta mira un paisahe impresionante.” Segun Dustin cu Jassa, nan tabatin un bida simpel y tabata confia den Jehova pasobra nan tabata ‘biba riba un boto di 26 pia, traha part-time, asisti na un congregacion di idioma stranhero y sirbi de bes en cuando como pionero auxiliar.’ Pero despues di tempo, nan a realisa cu nan tabata gaña nan mes. Dustin a bisa cu “en bes di yuda e congregacion, mayoria di tempo nos tabata drecha nos boto. Nos tabata sa cu nos mester a haci cambio si di berdad nos kier a pone Jehova na prome luga den nos bida.”

Jassa a bisa: “Prome cu nos a casa, mi tabata biba na Mexico y tabata den un congregacion di habla Ingles. Mi tabata gusta sirbi na Mexico y mi tabatin hopi gana di bay bek.” Durante nan adoracion como famia, Dustin cu Jassa tabata lesa storia di bida di rumannan cu a muda bay biba caminda tabatin mas necesidad di publicador di Reino. Esaki a duna nan mas curashi pa bay sirbi den exterior. ( Juan 4:⁠35) Dustin a bisa: “Nos tambe tabata kier a experencia e mesun goso cu e rumannan ey.” Ora cu nan amigonan na Mexico a bisa nan cu un grupo nobo tabatin mester di yudansa, Dustin cu Jassa a tuma nan decision. Nan a kita for di trabou, bende nan boto y a muda bay Mexico.

Dustin cu Jassa a bay biba den e stad Tecomán cu ta keda cerca di Ocean Pacifico y un 4.345 kilometer zuid di Astoria. Dustin a bisa: “En bes di biento fresco y un paisahe yen di sero, awor nos tin solo cayente y palo di lamunchi tur caminda.” Na prome instante, nan no por a haya trabou. Como cu nan no tabatin placa, varios siman tras di otro nan a come aros cu bonchi, dos biaha pa dia. Jassa a bisa: “Net ora a parce cu nos no tabata por mas, nos studiantenan di Bijbel a cuminsa duna nos mango, bacoba, papaya y di mes saconan yen di lamunchi.” Cu tempo, nan a haya trabou na un compania cu tabata situa na Taiwan; nan a cuminsa duna les pa un scol di idioma via Internet. Cu e trabou ey, nan tabata gana suficiente placa pa cubri tur nan gastonan facilmente.

Kico Dustin cu Jassa ta pensa di nan bida nobo? Nan a bisa cu e decision pa muda ta “e mihor decision cu nos por a tuma. Nos relacion cu Jehova y cu otro a bira mas fuerte cu nos por a kere. Tur dia nos ta haci hopi cos hunto: Nos ta bay sirbishi, analisa con pa yuda nos studiantenan di Bijbel y prepara pa reunionnan. Ademas, nos no tin e preo­cupacionnan cu nos tabatin antes.” Nan a sigui bisa: “Awor nos sa kico realmente ta nifica ‘purba y mira cu Jehova ta bon’, manera Salmo 34:⁠8 ta bisa.”

Mas cu 2.900 ruman⁠—⁠tanto homber como muher, casa of soltero⁠—⁠a muda bay Mexico pa sirbi caminda tin necesidad grandi di publicador di Reino. Mayoria di e rumannan aki tin 20 pa 30 y pico aña di edad. Kico a motiva nan pa acepta e desafio aki? Con algun di nan a contesta e pregunta ey? Basicamente, nan a menciona tres cos.

Amor pa Jehova y pa prohimo. Leticia, kende a batisa cu 18 aña di edad, a bisa: “Ora mi a dedica mi bida na Jehova, mi tabata sa cu esey ta encera sirbie cu henter mi alma y curason. Pues, pa demostra mi amor pa Jehova, mi kier a uza mas di mi tempo y energia den su sirbishi.” (Mar. 12:⁠30) Hermilo, kende awor ta casa cu Leticia, tabatin mas o menos 20 aña di edad tempo cu el a muda bay sirbi caminda tabatin mas necesidad di predicador di Reino. El a bisa: “Mi a realisa cu e mihor manera pa demostra mi amor pa mi prohimo ta yudando nan satisface nan necesidad spiritual.” (Mar. 12:⁠31) Pesey el a bandona Monterrey, un stad prospero, caminda e tabatin un bon trabou na banco y un bida comodo, pa bay biba den un stad chikito.

E deseo pa haya berdadero goso, cu ta dura pa semper. Un poco despues cu Leticia a batisa, el a bay predica hunto cu un ruman muher pionero cu tin hopi experencia na un pueblito isola. Nan a predica un luna largo eynan. Leticia a bisa: “Mi a keda masha impresiona. E hendenan tabata reacciona masha bon mes na e mensahe di Reino, y esey a laga mi sinti bon. Na final di e luna ey, mi a bisa mi mes: ‘Esaki ta loke mi kier sigui haci.’ ” Essly, un ruman muher soltera di 20 y pico aña, a bisa cu ta e goso cu e trabou aki ta duna ta loke a anim’e pa e tambe bay sirbi caminda tin mas necesidad di predicador. Tempo cu e tabata bay scol secundario, e tabata conoce varios Testigo cu tabata sirbi celosamente caminda tin mas necesidad di predicador. El a bisa: “E goso cu e rumannan aki tabata refleha a conmove mi asina tanto cu mi tambe tabata kier un bida asina.” Hopi ruman muher a haci mescos cu Essly. En realidad, na Mexico, tin mas cu 680 ruman muher soltera cu ta sirbi caminda tin mas necesidad di predicador di Reino. Nan a pone un excelente ehempel pa tanto hoben como hende grandi.

Nan kier tin un bida cu proposito y cu ta duna satisfaccion. Despues cu Essly a caba scol secundario, nan a ofrec’e un beca pa bay universidad. Su pareunan a anim’e pa acepta esaki y hiba un “bida normal”, esta, caba universidad, cuminsa un carera, cumpra un auto y biaha. Pero, e no a sigui nan conseho. Essly a bisa: “Varios di mi amigonan cristian a sigui tras di e cosnan aki, y mi a ripara cu metanan spiritual no tabata importante mas pa nan. Mi a ripara tambe cu mas nan a sigui envolve nan mes den cosnan di mundo, mas problema nan a haya nan cu ne. Pero ami kier a uza mi hubentud pa sirbi Jehova cu henter mi ­curason.”

Essly a sigui algun curso cu a yud’e haya trabou pa e por sostene su mes financieramente mientras cu e ta traha pionero. Despues, el a muda bay un area caminda tabatin un necesidad grandi pa mas publicador di Reino. El a hasta acepta e desafio pa siña idiomanan indigena di e pueblonan Otomi y Tlapaneco. Despues di a predica tres aña den regionnan isola, Essly a bisa: “Sirbi caminda e necesidad ta mas grandi a duna mi satisfaccion y berdadero proposito den bida. Mas importante ainda, esaki a fortalece mi relacion cu Jehova.” Phillip y Racquel, un pareha di Merca, kendenan tin 30 y pico aña di edad, ta di acuerdo cu Essly. Nan a bisa: “Situacion di mundo ta cambiando asina lihe cu hopi hende ta sinti cu bida ta insigur. Pero sirbiendo den teritorionan caminda asina tanto hende ta scucha e mensahe di Bijbel ta duna nos satisfaccion y berdadero proposito den bida.”

Ta claro cu sirbi den areanan caminda tin mas necesidad di publicador tin su desafionan. Un di e desafionan ey ta con pa sostene bo mes financieramente. Pa haci esey, bo mester ta dispuesto pa adapta bo mes na e circunstancianan local. Verónica, un pionero experencia, a bisa: “Den un teritorio caminda nos a sirbi, mi tabata prepara y bende cuminda barata. Na un otro luga, mi tabata bende paña y corta cabey pa hende. Actualmente, mi ta haci trabou di cas pa hende y duna curso na mayornan pa siña nan comunica cu nan yiunan.”

Pa adapta na cultura y custumbernan diferente por ta un desafio, specialmente ora bo ta biba den pueblonan indigena y areanan isola. Esey ta loke Phillip y Racquel a experencia tempo cu nan tabata sirbi den e teritorio di habla Nahuatl. Phillip a bisa cu “e diferencianan di cultura tabata enorme.” Kico a yuda nan adapta na e situacion? El a bisa: “Nos tabata enfoca riba e cosnan positivo di e pueblo Nahuatl: Nan famianan tabata uni, nan tabata sincero cu otro y nan tabata masha generoso.” Racquel a agrega: “Nos a siña masha hopi bibando eynan y sirbiendo Jehova hunto cu nos rumannan den e comunidad indigena ey.”

Kico bo por haci for di awor pa prepara bo mes si bo tin gana di bay sirbi den areanan isola caminda tin mas necesidad di predicador? Rumannan cu tin experencia den esaki a bisa: Prome cu bo muda, cuminsa simplifica bo bida y siña keda contento cu loke bo tin. ( Flp. 4:​11, 12) Kico mas bo por haci? Leticia a conta: “Mi a evita trabounan cu lo por a mara mi pa largo tempo na un luga. Mi kier tabata liber pa muda bay unda cu ta necesario y ki ora cu ta.” Hermilo a bisa: “Mi a siña cushina, laba paña y strica.” Verónica a bisa: “Tempo cu mi tabata biba hunto cu mi mayornan y mi rumannan, mi a siña limpia cas y prepara cuminda barata pero nutritivo. Mi a siña spaar tambe.”

Levi y Amelia, un pareha di Merca cu tin ocho aña casa, a conta con oracion specifico a yuda nan prepara pa bay sirbi na Mexico. Levi ta bisa: “Nos a calcula cuanto placa nos lo tabatin mester pa sirbi den exterior durante un aña largo. Despues, nos a haci oracion pidi Jehova yuda nos spaar e montante exacto ey.” Den algun luna, nan a logra cera e montante ey y mesora nan a muda. Levi a bisa: “Jehova a contesta nos oracion specifico, pesey tabata nos turno pa cumpli cu nos parti.” Amelia a agrega: “Nos intencion tabata pa keda un aña so, pero ya nos tin shete aña akinan y nos no tin pensa di bay niun otro caminda. Bibando akinan, nos ta experencia Jehova su yudansa personalmente. Tur dia nos ta mira con bon Jehova ta.”

Oracion a hunga un papel importante tambe den bida di Adam y Jennifer, un pareha di Merca cu ta sirbi den teritorio di habla Ingles na Mexico. Nan conseho ta: “No sinta warda riba e circunstancia perfecto. Si bo tin deseo di sirbi den exterior, haci oracion tocante e asunto y actua na harmonia cu bo oracion. Simplifica bo bida, skirbi e sucursal di e pais caminda bo kier bay sirbi y unabes bo a calcula bo gastonan, tuma bo decision y muda.” * Si bo haci esey, lo tin un bida interesante y rico den sentido spiritual ta spera bo.