HESUS a profetisa cu ni un piedra di e tempel di Jehova lo no keda riba otro. E profecia aki a cumpli na aña 70 di nos era ora e ehercito Romano⁠—⁠bou di mando di Tito⁠—⁠a destrui Jerusalem. (Mat. 24:⁠2) Mas despues, Emperador Flavio Claudio Juliano a plania pa reconstrui e tempel.

Nan ta bisa cu Juliano tabata e ultimo Emperador pagano di Roma. E tabata subrino di Constantino e Grandi. Aunke el a haya un supuesto educacion cristian, despues cu nan a proclam’e emperador na aña 361 di nos era, el a rechasa publicamente e cristianismo corupto di su tempo y a bira pagano. Bukinan di historia ta referi na dje como “e Apostata.”

Juliano tabata odia hende cu tabata yama nan mes cristian. Dicon? Un motibo kisas tabata e echo cu tempo e tabatin seis aña di edad, el a mira con algun supuesto cristian a mata su tata y otro miembronan di su famia. Segun historiadornan, Juliano a encurasha e hudiunan pa reconstrui nan tempel pasobra el a pensa cu esey lo a proba cu Hesus tabata un profeta falso. *

No tin duda cu Juliano tabata kier a reconstrui e tempel di Jerusalem. Pero loke historiadornan no ta sigur di dje ta si realmente el a cuminsa reconstrui e tempel aki. Y si el a cuminsa, nan no sa dicon e trabou di reconstruccion a para. Pero loke si hende ta sigur di dje ta cu Juliano a ser mata den menos cu dos aña despues cu el a bira emperador y cu nunca e tempel a ser reconstrui.