1, 2. Ora nos medita riba Jehova su organisacion universal, kico esey ta motiva nos pa haci?

 ORA nos pensa un rato riba e gran organisacion universal cu nos ta forma parti di dje, nos ta keda masha impresiona. E visionnan cu nos ta lesa tocante dje den Ezekiel capitulo 1 y Daniel capitulo 7 ta duna un descripcion fascinante di e manera cu Jehova ta dirigi asuntonan pa realisa su proposito. Hesus ta na cabes di e parti di Jehova su organisacion cu ta riba tera. E ta dirigi e organisacion aki pa concentra riba e predicacion di e bon noticia, pa instrui y anima esnan cu ta haci e trabou ey y pa yuda mas hende bira adorador di Jehova. Esaki ta motiva nos pa confia den Jehova su organisacion.​—Mat. 24:45.

² Abo ta imita e ehempel di e organisacion maraviyoso aki y keda ocupa den e sirbishi di Dios? Bo ta bira dia pa dia mas entusiasma cu e berdad, of bo ta sinti cu bo entusiasmo ta menguando? Podise ora nos pensa riba e preguntanan ey, nos ta ripara cu nos a cuminsa cansa of kisas a perde un poco di nos entusiasmo. Esey por pasa y ta loke a pasa tambe den prome siglo. Apostel Pablo tabatin cu recorda e cristiannan di su tempo pa considera e ehempel y entusiasmo di Hesus. Pablo a bisa cu esaki lo a yuda nan pa nan ‘no cansa y perde animo.’ (Heb. 12:3) Asina tambe, un analisis profundo di e articulo anterior, cu ta mustra kico Jehova su organisacion ta logrando awe, lo mester a stimula nos pa mantene nos entusiasmo y persevera den e sirbishi di Dios.

3. Kico nos mester haci pa nos no cansa, y kico nos lo analisa den e articulo aki?

³ Pero Pablo a indica cu nos tin cu haci mas cu simplemente medita riba e ehempel di Jehova su organisacion si nos no kier “cansa”, of perde nos entusiasmo den nos sirbishi na Dios. El a bisa cu nos mester sigui “haci loke ta bon.” (Gal. 6:9) Laga nos analisa cinco cos cu nos mester haci pa por mantene nos entusiasmo y pa  nos por imita e ehempel di Jehova su organisacion activo. E ora ey nos por evalua si tin cierto aspectonan cu nos of nos famia tin cu traha ariba.

4. Dicon nos por bisa cu nos reunionnan ta un parti integral di adoracion berdadero?

⁴ Semper Jehova su sirbidornan a bin hunto pa ador’e. Esey ta algo masha importante pa nan. Den cielo, e angelnan regularmente ta haya invitacion pa reuni cu Jehova. (1 Rey. 22:19; Job 1:6; 2:1; Dan. 7:10) Den Israel di antiguedad, e nacion mester a reuni “pa nan tende y siña.” (Deu. 31:​10-12) Den prome siglo, e hudiunan tabatin e custumber di bay sinagoga pa lesa for di e Scritura. (Luc. 4:16; Echo. 15:21) Ora e congregacion cristian a ser forma, e reunionnan a keda algo importante y te awe nan ta un parti integral di nos adoracion. Cristiannan berdadero ta ‘presta atencion na otro pa nan por stimula otro pa mustra amor y haci bon obra.’ Nos tin cu sigui “anima otro”, y mucho mas ainda cu nos ta mira e dia di Jehova ta yega cerca.​—Heb. 10:​24, 25.

5. Con nos por anima otro na nos reunionnan?

⁵ Un manera importante cu nos ta anima otro ta ora nos ta participa den e reunionnan. Tin varios manera cu nos por expresa nos fe. Por ehempel, nos por contesta e pregunta di un paragraf, comenta riba un texto biblico of conta un experencia cortico cu ta mustra pakico ta sabi pa sigui principio di Bijbel. (Sal. 22:22; 40:9) Maske cuanto tempo nos tin den e berdad, tur e comentarionan cu nos ta tende na reunion, tanto di hende grandi como di mucha, ta anima nos hopi.

6. Con nos reunionnan ta yuda nos keda spiritualmente activo?

⁶ Pa ki otro motibo ta asina importante pa Dios pa nos no perde nos reunionnan? Pasobra nos reunionnan, asambleanan y congresonan ta yuda nos haya curashi pa predica, hasta ora hende den nos teritorio ta opone nos of no kier scucha nos. (Echo. 4:​23, 31) E discursonan y otro partinan basa riba Bijbel ta fortalece nos fe. (Echo. 15:32; Rom. 1:​11, 12) E siñansa y intercambio di estimulo cu nos ta haya na nos reunionnan ta duna nos berdadero felicidad y “sosiego [of, consuelo] den e dianan di adversidad.” (Sal. 94:​12, 13) E Comite di Siñansa di e Cuerpo Gobernante ta supervisa preparacion di tur programa spiritual pa instrui e pueblo di Jehova rond mundo. Nos ta masha agradecido pa e instruccion excelente cu nos ta haya tur siman na nos reunionnan durante henter aña.

7, 8. (a) Kico ta e motibo principal cu nos ta bay nos reunionnan di congregacion? (b) Con e reunionnan ta yuda bo den sentido spiritual?

⁷ Pero, nos no ta bay reunion solamente pa e beneficionan cu nos ta ricibi. E motibo principal pakico nos ta bin hunto ta pa adora Jehova. (Lesa Salmo 95:6.) Esta un privilegio nos tin di por canta alabanza na nos Dios maraviyoso! (Col. 3:16) Jehova ta merece e adoracion cu nos ta dun’e ora nos ta asisti na reunionnan teocratico y participa den nan. (Rev. 4:11) Ta pesey Bijbel ta urgi nos pa ‘no keda sin bay e reunionnan, manera ta custumber di algun.’​—Heb. 10:25.

⁸ Nos ta mira nos reunionnan como un medio cu Jehova ta uza pa yuda nos persevera te ora e pone fin na e mundo malbado aki? Si esey ta e caso, nos reunionnan lo ta entre “e cosnan mas importante”, y nos lo busca tur manera pa bay reunion maske con druk nos bida ta. ( Flp. 1:10) Mester tin un motibo masha serio pa nos perde un reunion, ya cu ta un oportunidad nos ta perde pa adora Jehova hunto cu nos rumannan.

9. Con nos por sa cu e trabou di predica ta importante?

⁹ Pa nos por imita e ehempel di Jehova su organisacion activo, nos mester participa plenamente den e trabou di predica. Hesus a cuminsa cu e trabou aki tempo e tabata riba tera. (Mat. 28:​19, 20) Djey padilanti, e trabou di predica e Reino y di haci discipel ta un di e actividadnan mas importante di henter e organisacion di Jehova. Tin hopi experencia den nos tempo cu ta duna prueba cu e angelnan ta apoya nos trabou y ta yuda nos haya hende cu ta “dispuesto pa acepta e berdad cu ta hiba na bida eterno.” (Echo. 13:48; Rev. 14:​6, 7) Henter e proposito di e parti visibel di Jehova su organisacion ta pa organisa y apoya e trabou di predica. E trabou aki ta un di e cosnan mas importante den bo bida tambe?

10. (a) Duna un ehempel con nos por keda cu nos entusiasmo pa e berdad. (b) Con sirbishi ta yuda bo pa bo amor pa e berdad keda fuerte?

¹⁰ Ora nos ta predica cu entusiasmo den sirbishi, nos amor pa e berdad ta keda fuerte. Asina Mitchel, un ruman pionero regular y anciano pa hopi tempo, ta sinti. El a bisa: “Mi gusta papia cu hende tocante e berdad. Ora mi pensa riba un articulo nobo di E Toren di Vigilancia of ¡Despertad!, mi ta keda masha impresiona cu e manera asina rasonabel y balansa cu e informacion den cada edicion ta ser presenta y tambe cu e sabiduria y perspicasia cu nan ta refleha. Mi ta keda ansioso pa bay sirbishi pa mira con e hendenan lo reacciona y pa wak  con lo mi por lanta nan interes. Mi sirbishi ta duna mi bida stabilidad. Si mi tin otro cos di haci, mi ta percura pa haci nan sea prome of despues di e ora cu mi tin reserva pa sirbishi.” Nos amor pa e berdad tambe por keda fuerte den e ultimo dianan aki si nos ta keda ocupa den nos sirbishi sagrado.​—Lesa 1 Corintionan 15:58.

11. Dicon nos mester haci bon uzo di e alimento spiritual cu nos ta ricibi for di Jehova?

¹¹ Jehova a percura un abundancia di alimento spiritual mediante nos publicacionnan pa fortalece nos. Sin duda, bo por corda cu bo a yega di lesa un publicacion y pensa: ‘Esaki ta net loke mi tin mester! Ta comosifuera ta pa mi Jehova a laga skirbi esaki!’ Esey no ta un coincidencia. Jehova ta uza e publicacionnan ey pa siña nos y guia nos. El a bisa: “Lo mi instrui bo y siña bo e caminda cu bo tin cu cana.” (Sal. 32:8) Nos ta haci nos best pa lesa tur e publicacionnan cu nos ta ricibi? Nos ta medita riba loke nos a lesa? Esey lo yuda nos sigui persevera y mantene nos entusiasmo den e sirbishi di Dios durante e ultimo dianan dificil aki.​—Lesa Salmo 1:​1-3; 119:97.

12. Kico por duna nos mas aprecio pa nos publicacionnan?

¹² Ta bon pa nos pensa un rato riba cuanto trabou ta ser haci pa percura e suministro regular aki di alimento spiritual saludabel. Esey lo duna nos mas aprecio pa nos publicacionnan. E Comite di Redaccion di e Cuerpo Gobernante ta supervisa tur e trabou di investiga, skirbi, controla, scoge plachi y traduci tur publicacion cu nos ta imprimi of pone riba nos website. E sucursalnan cu ta imprimi e publicacionnan ta manda nan e ora ey na congregacionnan cu ta keda den cercania y tambe esnan mas leu. Dicon nos rumannan ta haci tur e trabou aki? Pa e pueblo di Jehova por ta bon alimenta den sentido spiritual. (Isa. 65:13) Pesey, laga nos beneficia plenamente di tur instruccion y guia cu nos ta ricibi mediante e organisacion di Jehova.​—Sal. 119:27.

13, 14. Ken den cielo ta apoyando e organisacion di Jehova, y con nos riba tera tambe por demostra cu nos ta haci esey?

¹³ Den e vision cu apostel Juan a haya, el a mira Hesus ta core riba un cabay blanco, bayendo pa vence e hendenan cu ta rebela contra Jehova. (Rev. 19:​11-15) Anto el a mira tambe e angelnan fiel hunto cu e unginan fiel cu a resucita pa biba den cielo ta sigui Hesus riba nan cabay. Esaki ta indica cu nan ta apoya Hesus como nan Lider. (Rev. 2:​26, 27) Nan ehempel excelente ta siña nos cu nos mester demostra cu nos ta apoya esnan cu ta dirigi e organisacion di Jehova.

¹⁴ E multitud grandi tambe ta duna tur nan apoyo na e trabou cu e rumannan ungi di Cristo cu ta riba tera ainda ta haci y kendenan ta dirigi e organisacion awe. (Lesa Zacarias 8:23.) Con abo por demostra cu bo ta apoya e organisacion di Jehova? Un manera cu bo por haci esey ta ‘obedeciendo esnan cu ta dirigi nos.’ (Heb. 13:​7, 17) Esaki ta cuminsa den congregacion. Nos por puntra nos mes: Loke nos ta bisa di e ancianonan den nos congregacion ta anima otro hende pa respeta nan y tambe e trabou cu nan ta haci? Nos ta siña nos yiunan pa respeta e hombernan fiel aki y pa bay cerca nan pa haya conseho basa riba Bijbel? Ademas, nos ta analisa como famia con nos lo por uza nos recursonan financiero pa apoya e obra mundial? (Prov. 3:9; 1 Cor. 16:2; 2 Cor. 8:12) Nos ta yuda limpia y mantene e Salon di Reino y ta considera esey un privilegio importante? Jehova ta duna nos su spirito santo libremente ora e mira nos apoya e organisacion den e maneranan aki. Y su spirito  ta duna nos e fortaleza cu nos mester pa nos no cansa den e ultimo dianan aki.​—Isa. 40:​29-31.

15. Dicon nos tin cu lucha constantemente pa biba na harmonia cu Jehova su proposito?

¹⁵ Por ultimo, si nos kier persevera y sigui e ehempel di Jehova su organisacion activo, nos tin cu percura pa nos mes biba na harmonia cu e mensahe cu nos ta predica. Pa logra esey, nos tin cu “haci sigur di loke ta agrada Señor.” (Efe. 5:​10, 11) Satanas, e mundo malbado aki y nos curpa imperfecto ta pone cu constantemente nos tin cu lucha contra influencianan negativo den nos bida. Algun di boso, nos rumannan stima, tin un lucha pisa tur dia pa mantene boso amistad cu Jehova. Jehova ta stima boso pa e esfuerso cu boso ta haci. No stop di haci loke ta bon! Ora nos ta biba na harmonia cu e proposito di Jehova, nos lo sinti un gran satisfaccion y nos por tin sigur cu nos adoracion no ta envano.​—1 Cor. 9:​24-27.

16, 17. (a) Kico nos mester haci si nos comete un pica serio? (b) Kico nos por siña for di e ehempel di Annie?

¹⁶ Pero kico bo mester haci si bo comete un pica serio? Busca yudansa mas pronto posibel. E situacion lo bira pio si bo sconde bo pica. Corda cu David a bisa cu ora el a keda keto tocante su picanan, ‘su curpa a para caba na nada door di su kehamento henter dia.’ (Sal. 32:3) Pues, si nos purba di sconde pica serio, nos lo perde nos goso y kisas hasta nos amistad cu Jehova, “ma esun cu confesa y laga nan lo haya misericordia.”​—Prov. 28:13.

¹⁷ Considera e ehempel di Annie. * Tempo Annie tabata teenager, e tabata un pionero regular. Pero el a cuminsa haci malo na scondi, y esaki tabata molestia su consenshi. El a conta: “Tur ora mi tabata infeliz y deprimi.” Un dia na reunion, nan a analisa Santiago 5:​14 y 15. Esaki a pone Annie realisa cu e tabatin mester di yudansa, y el a bay papia cu e ancianonan. Despues el a bisa: “E versiculonan ey ta un recept cu Jehova a skirbi pa bo haya curacion spiritual. E remedi no ta facil pa guli, pero e ta cura bo si. Mi a sigui e conseho di e versiculonan ey, y nan a duna bon resultado.” Awor, despues di algun aña, Annie ta sirbiendo Jehova atrobe cu entusiasmo y cu un consenshi limpi.

18. Nos mester ta dicidido pa haci kico?

¹⁸ Esta un gran privilegio nos tin cu nos ta biba den e ultimo dianan aki y forma parti di Jehova su organisacion maraviyoso! Sea dicidido pa nunca desprecia e gran honor aki. Mas bien, hunto cu nos famia, laga nos haci esfuerso pa asisti cu regularidad na nos reunionnan, pa busca diligentemente den nos teritorio hende cu tin curason sincero y pa beneficia di e alimento spiritual cu nos ta haya regularmente. Ademas, laga nos demostra cu nos ta apoya esnan cu ta dirigi e organisacion, y laga nos biba na harmonia cu e mensahe cu nos ta predica. Si nos haci e cosnan aki, nos lo ta imitando e ehempel di Jehova su organisacion activo y nos lo no cansa di haci loke ta bon.