FOR di ora cu mi yiu homber Gary a nace na aña 1958, mi a sinti cu algo no tabata bon. Pero a tuma dokternan dies luna pa haya sa ki maleza e tabatin y cinco aña mas pa specialistanan na London confirma e diagnostico. Tempo cu Gary tabatin nuebe aña, mi yiu muher Louise a nace. Ora mi a mira cu su condicion tabata pio cu esun di Gary, mi a bira masha tristo.

Na un manera masha bondadoso, dokternan a bisa mi cu ‘tur mi dos yiunan tin LMBB-syndroom’ * y cu desafortunadamente no tin cura pa e maleza genetico aki. E tempo ey, hende no tabata sa mucho encuanto e maleza raro aki. E caracteristicanan tipico di e maleza aki ta entre otro problema cu bista cu por pone hende bira hasta ciego, obesidad, extra dede na man y/of na pia, retraso den desaroyo, falta di coordinacion, diabetes, artritis y diferente problema cu nier. Pesey, no tabata facil pa mi lanta mi yiunan. Un investigacion recien a mustra cu 1 di cada 125.000 habitante di Gran Britania tin e maleza aki; el a mustra tambe cu kisas tin hopi hende mas cu e maleza aki pero menos grave.

Djis despues cu mi a casa, mi tabatin un combersacion cu un Testigo di Jehova; mesora mi a sinti cu nan ta siña hende e berdad di Bijbel. Pero mi casa si no tabata niun tiki interesa. Y debi cu nos tabatin cu muda constantemente pa motibo di su trabou, mi no por a asisti na e reunionnan. No obstante, mi a sigui lesa Bijbel y haci oracion na Jehova. Ora mi a lesa cu Jehova ‘lo ta un refugio pa e opriminan y un refugio den tempo di angustia’ y cu lo e no ‘bandona esnan cu ta busc’e’, mi a haya berdadero consuelo.—Sal. 9:9, 10.

Gary no por a mira bon. Pesey, for di tempo cu e tabatin seis aña di edad, nos a lag’e bay un internaat situa na costa sur di Inglatera p’e haya educacion special. E tabata yama mi regularmente pa papia di e cosnan cu tabata preocup’e; durante e combersacionnan ey mi por a yud’e compronde principionan basico di Bijbel. Algun aña despues cu Louise a nace, mi tambe a bira malo. Mi a cuminsa sufri di multiple sclerosis y fibromialgia. Cu 16 aña di edad, Gary a sali for di internaat. Pero su bista a sigui bay atras y, na aña 1975, nan a declar’e oficialmente ciego. Y comosifuera esey no tabata suficiente, na 1977, mi esposo a bandona nos.

Despues cu Gary a bin cas bek, nos a cuminsa asisti na e reunionnan di un dushi congregacion, y na aña 1974 mi a batisa. Mi a keda masha contento cu un anciano tabata yuda Gary trata cu e cambionan fisico cu e tabata experencia durante su hubentud. Algun otro ruman tabata yuda mi cu mi trabounan di cas, y, cu tempo, servicio di asuntonan social a contrata cinco di nan pa yuda nos oficialmente cu nos trabounan di cas. Esey si tabata un gran bendicion!

Gary a progresa bon den e berdad y a batisa na 1982. Debi cu e tabatin masha gana di traha pionero auxiliar, mi a dicidi di compañ’e den e trabou y nos a traha pionero auxiliar pa varios aña. Gary mi yiu a keda masha contento ora cu algun aña  despues nos superintendente di circuito a puntr’e: “Gary, dicon bo no ta traha pionero regular?” Esey tabata net e animacion cu e tabatin mester, y na 1990 el a ser nombra como pionero regular.

Gary a haci dos transplante di heup; e prome biaha tabata na aña 1999 y esun di dos na 2008. Pero Louise su problemanan di salud tabata mucho mas serio. El a nace completamente ciego, y ora mi a mira cu e tin un dede di pia extra, mi a compronde cu e tambe tin LMBB-syndroom. Saminacion medico a revela cu varios di su organonan ta afecta. A traves di añanan, el a haci varios operacion grandi, di cua cinco tabata operacion di nier. Y e ta diabetico, mescos cu Gary.

Nos ta consciente cu durante cualkier operacion por surgi complicacion. Pesey, di antemano Louise ta papia cu e ciruhanonan, anestesistanan y tambe cu e personal administrativo di hospital pa splica nan dicon e no ta acepta sanger. Esey a pone cu e tin bon relacion cu tur esnan cu ta cuid’e y yud’e.

Nos ta haci masha hopi actividad teocratico na cas. Prome cu aparatonan electronico a bira disponibel, mi tabata pasa oranan largo ta lesa pa Gary y Louise. Awor cu nos tin varios CD, DVD y tambe otro grabacionnan riba www.pr418.com na nos disposicion, nos cada un por sigui un programa semanal di estudio di Bijbel na e momento cumbiniente; di e manera ey, nos por ta prepara pa duna comentario na e reunionnan.

Tin ora Gary ta duna comentario cu el a siña for di cabes; pero ora e ta duna parti den e Scol di Ministerio Teocratico, e ta hacie na un manera natural, cu su mes palabra. Na 1995, el a ser nombra como sirbidor ministerial. E ta yuda cu zonido, y semper e ta cla pa bisa tur hende bonbini na Salon di Reino.

Hopi biaha, rumannan cu sali den sirbishi cu Gary ta yud’e core su rolstoel. E ta uza rolstoel pasobra e tin artritis. Un ruman homber ta yud’e dirigi un estudio di Bijbel cu un homber interesa. Ademas, Gary a anima un ruman muher cu tabata inactivo pa mas cu 25 aña. Awor, tur e dos personanan aki ta bin Salon.

Na edad di nuebe aña, Louise a siña brey cerca su wela, y ami y un di e personanan cu ta cuid’e a siñ’e borda. Debi cu e ta gusta e cosnan aki, el a cuminsa brey clechi colorido pa baby y tambe pa rumannan di edad den congregacion. Ademas, e ta traha carchi y pega sticker riba nan. Esnan cu ricibi su carchinan ta aprecia esakinan masha hopi. For di teenager, Louise a siña type. Awor, cu un computer special cu ta papia, e ta comunica regularmente cu su amigonan via e-mail. Louise a batisa cu 17 aña di edad. Ora tin campaña special di predica, nos tur ta traha pionero auxiliar hunto. Mescos cu Gary, Louise tambe ta siña texto di Bijbel for di cabes pa e por papia tocante su fe den Dios su promesa di un mundo den cua “wowo di e ciegonan lo mira” y caminda “ningun habitante lo no bisa: ‘Mi ta malo.’”​—Isa. 33:24; 35:5.

Nos ta masha agradecido na Jehova pa e berdadnan precioso cu nos ta haya den su Palabra inspira! Nos ta masha contento tambe cu e yudansa y amor cu nos ta ricibi di nos congregacion, pasobra sin nan yudansa nos lo no por a haci tur loke cu nos ta haciendo. Y ta danki specialmente na Jehova su yudansa cu nos bida a haya berdadero proposito.