1, 2. Ki honor Testigonan di Jehova tin, y kico abo ta pensa di esaki?

 HOPI hende ta sinti nan masha honra ora nan ricibi reconocemento pa un logro special. Algun hende, por ehempel, a ricibi Premio Nobel pasobra nan a yuda dos nacion cu tabata enemigo di otro cera paz. Pero hende por ricibi un honor mucho mas grandi ainda: e honor di por sirbi como representante di e Creador, yudando hende reconcilia, of cera paz, cu ne.

² Como Testigonan di Jehova, nos ta e unico pueblo cu tin e honor special ey. Bou di liderato di Jehova y Cristo, nos ta haci tur nos esfuerso pa yuda hende “reconcilia cu Dios”, esta, bira amigo di Dios. (2 Cor. 5:20) Pues, Jehova ta uza nos pa hala hende cerca dje. Como resultado di esey, awe tin miyones di hende den mas cu 235 pais cu a bira amigo di Dios y cu tin e speransa di bida eterno. (Tito 2:11) Cu celo nos ta invita ‘esnan cu ta desea pa bin tuma e awa di bida pornada.’ (Rev. 22:17) Y debi cu nos ta balora e asignacion precioso aki y ta cumpli cu ne diligentemente, nos por ser yama un pueblo cu “celo pa obranan excelente.” (Tito 2:14) Laga nos analisa awor con nos por demostra celo pa obranan excelente pa asina hala hende cerca Jehova. Un manera ta mediante nos trabou di predica.

3. Ki garantia ‘e celo di Jehova’ ta duna nos?

³ Den un descripcion di loke e Yiu di Dios lo logra pa humanidad bou di su gobernacion, Isaias 9:7 ta bisa: “E celo di e SEÑOR di ehercitonan lo haci esaki.” Siendo cu celo ta un deseo ardiente pa haci algo, e palabranan di Isaias ta garantisa nos cu nos Tata celestial realmente ta desea pa hende ser salba. Anto si Jehova ta desplega celo, esey ta un indicacion cu nos tambe tin cu haci e trabou di predica e Reino cu celo, of entusiasmo. Si, nos deseo ardiente pa yuda hende siña conoce Dios ta un  refleho di Dios su celo. Y manera Bijbel ta bisa, nos ta compañero di trabou di Dios. Awor kico di abo? Bo ta haciendo bo maximo esfuerso pa predica e bon noticia?—1 Cor. 3:9.

4. Con Hesus a pone un ehempel di perseverancia y celo den su sirbishi cristian?

⁴ Awor kico di Hesus? El a pone e ehempel perfecto: El a keda semper celoso den su sirbishi na Dios. Si, a pesar di oposicion cruel, el a keda predica cu celo te na fin di su bida riba tera. (Juan 18:36, 37) Y segun cu e dia pa el a sufri y muri tabata yega cerca, e tabata aun mas determina pa yuda hende siña conoce Jehova.

5. Den ki sentido Hesus tabata mescos cu e trahador den su ilustracion di e palo di figo?

⁵ Den herfst di aña 32 di nos era, Hesus a conta un ilustracion di un homber cu den su cunucu di wendruif tabatin un palo di figo cu tabatin tres aña sin duna fruta. E homber a manda su trahador kap e palo basha abou. Pero e trahador a pidie pa dun’e chens di coba rond di e palo y pone mest pa wak si e ta duna fruta. (Lesa Lucas 13:6-9.) Tempo cu Hesus a conta e ilustracion aki ta un grupo chikito di hende so tabata su discipel. Pero manera e ilustracion ta mustra, Hesus a uza e tiki tempo cu a resta prome cu e muri—un seis luna asina—pa e haci mas den su sirbishi na Judea y Perea. Pero un par di dia prome cu su morto, Hesus a yora pasobra mayoria di hende cu ‘a tende su mensahe no a reacciona’ positivamente.—Mat. 13:15; Luc. 19:41.

6. Dicon ta importante pa nos haci mas den e trabou di predica?

⁶ Awe nos ta masha cerca di e fin, pesey ta masha importante pa nos haci mas den e trabou di predica. (Lesa Daniel 2:41-45.) Corda cu nos tin e gran privilegio di ta Testigo di Jehova! Nos ta e unico hendenan na mundo cu ta bisa hende kico ta berdadero solucion pa e problemanan di humanidad. Recientemente, un periodista a bisa cu no tin contesta pa e pregunta, “Dicon cos malo ta sosode cu bon hende?” Pero Bijbel tin contesta pa preguntanan asina. Pesey como cristian, nos tin e deber y privilegio di mustra e contestanan na tur hende cu kier scucha. Pues, nos tin tur motibo pa “briya cu e spirito di Dios” segun cu nos ta cumpli celosamente cu e asignacion cu Dios a duna nos. (Rom. 12:11) Y cu Jehova su bendicion, nos por yuda otro hende conoc’e y stim’e.

7, 8. Con un spirito di sacrificio propio ta duna honor na Jehova?

⁷ Apostel Pablo a bisa cu el a pasa ‘anochinan sin drumi’ y “varios biaha sin cuminda” pa motibo di e bon noticia. (2 Cor. 6:5) Ora nos ta predica e bon noticia, nos tambe por haya nos cu problemanan similar. Si, nos tin ehempel di pioneronan cu, aunke nan tin cu traha pa mantene nan mes financieramente, ta pone nan sirbishi cristian na prome luga den nan bida. Pensa tambe riba nos misioneronan kendenan, na moda di papia, celosamente ta ‘basha nan mes manera un ofrenda di bibida’ pa sirbi hende den estranheria. (Flp. 2:17) Y kico di nos ancianonan kendenan ta traha duro? Tin biaha, nan ta keda sin come of ta perde soño pa cuida Jehova su carnenan. Ademas, nos tin nos rumannan di edad y esnan malo cu ta haci nan best pa asisti na e reunionnan y pa participa den sirbishi di veld. Nos tin masha aprecio pa tur e rumannan aki cu ta haci hopi sacrificio pa sirbi Jehova. Nan esfuersonan ta yuda esnan pafo di e congregacion cristian mira con importante sirbishi na Jehova ta pa nos.

⁸ Un persona cu no ta Testigo a skirbi un carta na Boston Target, un corant den Reino Uni (Gran Britania y Noord Irlanda), den cua el a bisa: ‘Hende a cuminsa perde fe den religion. Mi tin gana di sa kico e lidernan  religioso ta haci henter dia. Un cos ta sigur: Nan no ta sali bay cerca hende manera Cristo a haci. Ta Testigonan di Jehova ta e unico religion cu ta parce di ta interesa den hende. Nan ta sali bay cerca hende; nan si ta haci e trabou di predica e berdad.’ Hopi hende den mundo en berdad no ta dispuesto pa haci sacrificio na beneficio di otronan. Pero e echo cu nos si ta haci sacrificio pa predica e bon noticia sigur ta duna honor na Jehova Dios.—Rom. 12:1.

9. Kico por motiva nos pa sigui haci obranan excelente den nos sirbishi na Jehova?

⁹ Awor, kico nos mester haci si nos celo pa e sirbishi cristian a cuminsa mengua? Wel, nos tin cu reflexiona riba loke Jehova ta logrando pa medio di e trabou di predica. (Lesa Romanonan 10:13-15.) Pa hende por ser salba, nan mester tin fe y nan mester invoca e nomber di Jehova. Pero pa nan por tin fe y invoca e nomber di Jehova, nos mester predica na nan. Ora nos realisa esey, nos lo sinti nos motiva pa sigui haci obranan excelente y pa ta diligente den e trabou di proclama e bon noticia di e Reino.

10. Dicon nos por bisa cu nos bon conducta ta atrae hende na Jehova?

¹⁰ Aunke ta importante pa nos tin celo pa nos sirbishi, esey so no ta suficiente pa atrae hende na Dios. Nos mester tin bon conducta tambe. Pues, un otro manera cu nos por demostra celo pa bon obra ta mediante nos bon conducta. Pablo a mustra bon cla pakico esey ta importante ora el a skirbi: “Nos no kier haci nada cu ta duna otro hende motibo pa trompica, pa hende no critica nos sirbishi.” (2 Cor. 6:3) Ora nos ta papia cosnan edificante y ta comporta nos mes bon, esakinan lo sirbi como un adorno pa Dios su siñansanan y lo atrae mas hende na e adoracion di Jehova. (Tito 2:10) Hopi bes nos ta tende relatonan animante di hende cu a acepta e berdad debi na nos conducta cristian.

11. Dicon nos mester haci oracion y pensa seriamente riba nos conducta y e efecto cu esaki tin riba otro hende?

 ¹¹ Pero nos tin cu reconoce cu mescos cu bon conducta por tin bon influencia riba otro hende, mal conducta tambe por tin mal influencia riba nan. Pesey, sea cu nos ta na trabou, na cas of na scol, nos mester comporta nos mes di tal manera cu hende no ta haya motibo pa critica nos sirbishi ni nos conducta. Bijbel ta mustra cu si nos ta practica pica deliberadamente, e consecuencianan lo ta desastroso pa nos. (Heb. 10:26, 27) Esaki mester motiva nos pa haci oracion y pensa seriamente riba nos conducta y e efecto cu esaki tin riba otro hende. Segun cu e moral di e mundo aki ta sigui degenera, mas y mas hende sincero lo ‘distingui esun cu ta sirbi Dios for di un cu no ta sirbie.’ (Mal. 3:18) Si, nos conducta ta hunga un papel importante den yuda hende reconcilia cu Dios.

12-14. Ki efecto e echo cu nos ta para firme durante prueba tin riba otro hende? Duna un ehempel.

¹² Den su di dos carta na e Corintionan, Pablo a skirbi cu el a pasa den tribulacion, dificultad, cu el a wanta golpi y cu el a ser encarcela. (Lesa 2 Corintionan 6:4, 5.) Ora nos ta pasa den prueba, nos perseverancia por yuda observadornan acepta e berdad. Algun aña pasa, algun hende a purba di elimina e Testigonan di Jehova cu tabata biba den un area na Angola. Nan a gara un pareha Testigo y 30 otro persona interesa cu tabata asisti na nos reunionnan y a suta nan te habri nan curpa na sanger. Si, hasta hende muher y mucha nan a suta. Y pa intimida tur hende pa nan no scucha e Testigonan di Jehova, nan a forsa e pueblo pa bin wak con nan tabata maltrata e personanan inocente aki. Pero e resultado tabata net contrario, pasobra despues di a mira e trato cruel aki, hopi hende den e comunidad a acerca e Testigonan y pidi un estudio di Bijbel. Desde e tempo ey, e trabou di predica e Reino a sigui avansa; mas y mas hende a bin den e berdad, y e rumannan a ricibi hopi bendicion.

¹³ E ehempel aki ta mustra cu ora nos para firme durante prueba, esaki por tin un bon efecto riba otro hende. Pesey, nos por imagina nos mes cu hopi hende lo a reconcilia cu Dios debi na e curashi cu Pedro y e otro apostelnan a demostra. (Echo. 5:17-29) Den nos caso, compañeronan di scol, coleganan di trabou of miembronan di nos famia lo por acepta e berdad ora nan mira cu nos ta para firme pa loke ta corecto.

¹⁴ Semper lo tin algun di nos rumannan cu ta ser persigui. Na Armenia, por ehempel, un 40 ruman homber ta den prizon pa motibo di nan neutralidad. Y probablemente, hopi ruman mas den e pais ey lo ser encarcela den e binidero lunanan. Na Eritrea, tin 55 Testigo, tanto homber como muher, den prizon, y algun di nan tin mas cu 60 aña di edad. Na Sur Korea, alrededor di 700 Testigo di Jehova ta den prizon pa motibo di nan fe. E situacion aki ta andando pa 60 aña caba. Pesey, laga nos sigui haci oracion pa nos rumannan cu ta ser persigui na diferente parti di mundo por keda fiel y asina duna gloria, of honor, na Dios y yuda stimadonan di husticia acepta adoracion berdadero.​—Sal. 76:8-10.

15. Conta un experencia cu ta mustra con e echo cu nos ta hende honesto por atrae hende na e berdad.

¹⁵ E echo cu nos ta hende honesto tambe por atrae otro hende na e berdad. (Lesa Hebreonan 13:18.) Ata aki un ehempel: Un ruman muher cu tabata den bus tabata preparando pa paga e chauffeur ora cu un conoci di dje a bis’e pa warda su cen pasobra e no tin nodo di paga pa e ruta cortico cu el a core den e bus. E ruman muher a bis’e cu ta corecto pa paga hasta si ta un ruta cortico. Despues cu e conoci a baha for di e bus, e chauffeur di bus a puntra e ruman: “Testigo di Jehova bo ta?” E ruman muher a contest’e: “Si, dicon meneer ta puntra?” E chauffeur a bis’e: “Mi a scucha boso combersacion tocante pagamento di bus, y mi sa cu  Testigonan di Jehova ta un di e poco gruponan cu ta haci esey y cu nan ta honesto den tur cos.” Un par di luna despues, un homber a acerca e ruman muher na reunion y a puntr’e: “Bo ta corda mi? Mi ta e chauffeur di bus cu a papia cu bo tocante pagamento di bus. Bo bon conducta a pone mi dicidi di cuminsa studia Bijbel cu Testigonan di Jehova.” Si, ora hende mira cu nos ta hende honesto, nan ta pone confianza tambe den e bon noticia cu nos ta predica.

16. Con bin cualidadnan manera pasenshi, amor y bondad ta conmove curason di hende? Duna un ehempel di loke lidernan religioso falso ta haci.

¹⁶ Un otro manera cu nos por yuda atrae hende na Jehova ta desplegando cualidadnan manera pasenshi, amor y bondad. Ademas, cristiannan berdadero no ta hipocrita; nan actitud y conducta ta honra Dios. Pesey, algun di e hendenan cu ta observa nos ta haya gana di siña di Jehova, di su proposito y di su pueblo. Di otro banda, algun lider religioso ta pretende di tin bon actitud y bon conducta. Pero en realidad, nan ta gaña nan siguidornan y ta ranca placa for di nan. Algun di nan a hasta uza e placa ey pa cumpra cas y auto luho pa nan mes. Un lider religioso a hasta traha un cas di cacho cu airco pa su cacho. Si, hopi hende cu ta pretende di ta siguidor di Cristo no ta obedece e mandamento pa “duna pornada.” (Mat. 10:8) Mas bien, nan “ta instrui pa un prijs”, mescos cu e sacerdotenan infiel di Israel di antiguedad tabata haci. Ademas, hopi cos cu nan ta siña hende no ta basa riba Bijbel. (Mik. 3:11) Cu e conducta hipocrita ey, nan no por yuda niun hende reconcilia cu Dios.

17, 18. (a) Con nos por honra Jehova cu nos conducta? (b) Kico ta motiva abo pa persevera den obranan excelente?

¹⁷ Di otro banda, ora hende mira cu nos ta siña nos prohimo e berdad y ta trata nan bon, esaki por motiva nan pa bira amigo di Dios. Tuma por ehempel e caso di un viuda di edad avansa. Ora cu un pionero a yama na su cas, mesora el a bisa nos ruman cu e no ta interesa pa scucha. Ademas, e señora a bis’e cu ora el a yama na su cas e tabata riba trapi den cushina, purbando di cambia un bombio. E ruman pionero a bis’e ‘cu ta peligroso pa e haci esey su so.’ Nos ruman homber a cambia e bombio p’e y a sigui su caminda. Ora e yiu homber di e señora a tende kico e ruman a haci, el a purba di haya contacto cu nos ruman pa gradicie. Cu tempo, e yiu homber di e señora a cuminsa studia Bijbel.

¹⁸ Dicon abo ta determina pa persevera den obranan excelente? Kisas bo ta haci esey pasobra bo sa cu ora bo demostra celo den bo sirbishi na Dios y actua na harmonia cu su boluntad, bo ta honra Jehova y yuda otronan haya salbacion. (Lesa 1 Corintionan 10:31-33.) Un otro motibo pakico nos ta celoso den e trabou di predica y ta desplega bon conducta ta pasobra nos kier demostra nos amor pa Dios y pa nos prohimo. (Mat. 22:37-39) Ademas, si nos tin celo pa obranan excelente, for di aworaki caba nos lo tin goso y satisfaccion. Y nos por anticipa e tempo ora cu henter humanidad lo mustra celo pa adoracion berdadero y honra nos Creador, Jehova.