1. Con bon comunicacion a yuda hopi pareha casa?

 UN RUMAN homber na Canada a bisa: “Mi ta prefera di ta den compania di mi esposa en bes di ta hunto cu otro hende. Ora mi comparti mi sintimentonan cu ne, mi ta sinti mi mucho mas feliz, y mi dolornan ta bira menos.” Un esposo na Australia a skirbi: “Nos tin 11 aña casa y nunca a pasa un dia cu mi no a papia cu mi casa. Como cu nos tin bon comunicacion cu otro, nos tin pleno confianza den otro y ta disfruta di un matrimonio feliz.” Un ruman muher na Costa Rica a bisa: “E echo cu nos tin bon comunicacion ta beneficia nos hopi: Nos tin un matrimonio feliz; nos tin un mihor relacion cu Jehova; nos por resisti tentacion; nos a bira mas uni como pareha y nos amor pa otro ta sigui crece.”

2. Menciona algun cos cu por stroba bon comunicacion.

² Abo cu bo casa tin bon comunicacion? Of boso tin dificultad pa combersa cu otro? Nos ta compronde cu de bes en cuando por surgi problema. Dicon? Pasobra boso tur dos ta imperfecto, y boso personalidad ta diferente. Podise tambe cu boso no ta di e mesun cultura y cu boso a ser lanta den maneranan distinto. (Rom. 3:23) Ademas, boso cada un por tin boso propio estilo di comunica. Pesey, ta cu bon motibo John M. Gottman y Nan Silver, expertonan riba tereno di matrimonio, a bisa cu “pa bo por tin un matrimonio duradero, bo mester tin curashi y determinacion y ta dispuesto pa adapta.”

3. Kico ta yuda hopi pareha fortalece nan matrimonio?

³ No tin duda, si bo kier tin un matrimonio exitoso, bo tin cu traha duro. Pero e resultadonan ta bale la pena. Si, parehanan cu ta stima otro por tin un matrimonio realmente feliz. (Ecl. 9:9) Tuma por ehempel e matrimonio feliz di Isaak y Rebeca. (Gen. 24:67) Bijbel ta mustra cu nan a sigui stima otro hasta despues cu nan tabatin hopi aña casa. Nos por bisa e mesun cos di hopi pareha awe. Kico ta nan secreto? Nan a siña expresa nan pensamento-  y sintimentonan na otro na un manera honesto y toch bondadoso. Loke ta yuda nan haci esaki ta e echo cu nan ta cultiva y desplega comprondemento, amor, respet profundo y humildad. Si, manera nos lo mira den e articulo aki, ora parehanan ta desplega e cualidadnan aki, semper nan lo tin bon comunicacion.

4, 5. Con comprondemento por yuda parehanan casa compronde otro mihor? Duna ehempel.

⁴ Proverbionan 16:20 ta bisa: “Esun cu paga tino na e palabra lo haya bondad.” Esey ta sigur ora ta trata di matrimonio y bida di famia, pasobra e Palabra di Dios ta duna nos e sabiduria y comprondemento cu nos tin mester pa logra un matrimonio feliz. (Lesa Proverbionan 24:3.) Por ehempel, Genesis 2:18 ta siña nos cu Dios a traha hende muher como complemento di hende homber. Pues, nan no ta mescos, y pesey nan manera di comunica ta diferente. Mayoria di hende muher gusta papia tocante nan sintimentonan, tocante hende y bida matrimonial. Hende muher gusta pa nan casa papia cu un tono lief y dushi cu nan pasobra esey ta un indicacion cu nan casa ta stima nan. Di otro banda, hopi hende homber no ta gusta papia di nan sintimentonan; nan ta prefera di papia tocante cierto actividad, problema y solucion. Ademas, nan kier pa nan casa respeta nan.

⁵ Un ruman muher na Gran Britania a bisa: “Mi esposo ta prefera di soluciona un problema di biaha en bes di sinta scucha mi. Esey ta frustrante, pasobra loke mi kier ta p’e scucha mi y compronde pa mi.” Un esposo a skirbi: “Tempo cu nos tabata recien casa, mi tabatin e tendencia di core soluciona cualkier problema cu mi esposa tabatin. Sinembargo, no a dura hopi tempo cu mi a bin compronde cu loke e tabata kier ta pa mi scuch’e.” (Prov. 18:13; Sant. 1:19) Un esposo cu comprondemento ta purba di compronde loke su esposa ta sinti y ta trat’e di tal manera cu e esposa ta sinti cu e ta stim’e. E ta laga su esposa compronde cu su pensamento- y sintimentonan ta importante p’e. (1 Ped. 3:7) E esposa, na su turno, tambe ta purba di compronde su esposo. Si, ora tanto e esposo como e esposa ta compronde y ta haci loke Jehova ta spera di nan, nan lo traha hunto pa tuma decisionnan sabi y balansa y nan lo tin un matrimonio feliz.

6, 7. (a) Con e principio na Eclesiastes 3:7 ta yuda parehanan casa mustra comprondemento? (b) Con un esposa por mustra comprondemento, y ki esfuerso un esposo mester haci?

⁶ Un pareha cu comprondemento sa tambe cu tin “un tempo pa keda keto y un tempo pa papia.” (Ecl. 3:1, 7) Un ruman muher cu tin dies aña casa a bisa: “Awor mi ta realisa cu tin biaha no ta e momento apropia pa papia di un asunto. Si, tin cierto asuntonan cu mi no ta atende cu mi esposo ora e ta cansa di trabou of ocupa cu otro responsabilidadnan; mi ta laga nan pa un momento mas oportuno. E ora ey, nos por comunica mihor.” Ademas, un esposa cu comprondemento ta papia na un manera cariñoso pasobra e sa cu si e uza palabranan bon scogi “na ora apropia”, su esposo ta aprecia esaki y ta scuch’e cu smaak.​—Lesa Proverbionan 25:11.

⁷ Pa un esposo cristian cumpli cu su papel, e tin cu scucha su esposa y haci esfuerso pa expresa loke e ta sinti na un manera cla pa su esposa compronde. Un anciano cu tin 27 aña casa a bisa: “Mi tin cu haci esfuerso pa bisa mi esposa loke tin den mi curason.” Un ruman homber cu tin 24 aña casa a bisa: “Mi tin e tendencia di tene mi sintimentonan pa mi mes, pensando cu si mi no papia riba un asunto cu ta molestia mi, lo e pasa di su mes. Pero mi a realisa cu si mi expresa mi sintimentonan, esey no ta nifica cu mi ta debil. Pesey, ora mi tin problema pa expresa mi mes, mi ta haci oracion y pidi Jehova yuda mi haya e palabranan y e manera  corecto pa expresa mi mes. Despues, mi ta hala un rosea profundo y cuminsa papia.” Ta importante tambe pa parehanan scoge e momento oportuno pa comunica, kisas ora nan ta nan so, analisando e texto di dia of ora nan ta lesa Bijbel hunto.

8. Kico por yuda parehanan casa cultiva e deseo pa mehora nan comunicacion?

⁸ No ta facil pa hende cambia nan manera di comunica. Pesey, pa un esposo y esposa mehora nan comunicacion, ta masha importante pa nan tin e deseo pa mehora y pa nan haci oracion pidi Jehova pa su spirito santo. Nan lo tin e deseo ey si nan ta stima Jehova, kier agrad’e y ta mira matrimonio como algo sagrado. Un ruman muher cu tin 26 aña casa a skirbi: “Ami cu mi casa ta tuma Jehova su punto di bista relaciona cu matrimonio masha na serio. Pesey, nos no ta ni pensa riba separacion. Mas bien, nos ta haci mas esfuerso pa papia tocante nos problemanan y resolve nan.” Dios ta keda contento cu parehanan cu di e manera ey ta demostra lealtad y devocion na dje, y e ta bendiciona nan ricamente.​—Sal. 127:1.

9, 10. Den ki maneranan practico un pareha por fortalece nan amor pa otro?

⁹ Amor, “e laso perfecto di union”, ta e cualidad di mas importante den un matrimonio. (Col. 3:14) Amor berdadero ta bira mas fuerte, segun cu e pareha ta pasa den tempo bon y malo hunto. Si, segun cu tempo ta pasa, nan ta bira mihor amigo y ta disfruta mas di otro su compania. Loke ta fortalece un matrimonio no ta cosnan grandi—manera nos ta mira y tende via medionan di comunicacion. Mas bien, ta trata di cosnan cu por parce chikito pero cu tin hopi balor, manera un brasa, un palabra of gesto di cariño, un smile amoroso of djis e echo cu un pareha ta puntra otro sinceramente, “Con a bay awe?” Si, e cosnan chikito aki por haci un diferencia grandi den un matrimonio. Un esposo cu ta felizmente casa pa 19 aña caba a bisa cu e cu su esposa ta yama of manda mensahe pa otro durante dia “djis pa sa con ta bay cu otro.”

¹⁰ Ora parehanan ta stima otro, nan ta haci esfuerso tambe pa sigui siña conoce otro. (Flp. 2:4) Anto mas nan conoce otro, mas nan ta stima otro a pesar di nan debilidadnan. Pues, no tin limite pa amor den un matrimonio feliz; segun cu tempo ta pasa, e ta sigui bira mas y mas fuerte. Esey na su turno ta fortalece un matrimonio. Pesey, si bo ta casa, puntra bo mes: ‘Con bon mi conoce mi casa? Mi sa con e ta pensa y sinti tocante cierto asuntonan? Cuanto mi ta pensa riba dje, kisas reflexionando riba e cualidadnan cu a atrae mi na dje na principio?’

11. Dicon respet ta esencial pa un matrimonio feliz? Ilustra.

¹¹ Ni e matrimonionan di mas feliz no ta perfecto. Pues, por sosode cu un pareha no ta di acuerdo cu otro riba cierto asunto. Abraham cu Sara ta un ehempel di esaki. (Gen. 21:9-11) No obstante, nan diferencia di opinion no a debilita nan matrimonio. Dicon no? Pasobra nan a trata otro cu dignidad y respet. Abraham, por ehempel, tabata uza e expresion “pa fabor” ora e tabata papia cu Sara. (Gen. 12:11, 13) Sara, na su turno, tabata obedece Abraham y tabata yam’e “señor.” (1 Ped. 3:6) Ora un pareha no ta respeta otro, por lo general esaki ta bisto na e manera cu nan ta papia cu otro of nan tono di bos. (Prov. 12:18) Y si no tin respet, e matrimonio ta den peliger.—Lesa Santiago 3:7-10, 17, 18.

12. Dicon parehanan recien casa tin cu haci extra esfuerso pa papia na un manera respetuoso cu otro?

¹² Parehanan recien casa mester haci extra esfuerso pa papia cu otro na un manera bondadoso y respetuoso. Di e manera ey, nan ta crea un ambiente den cua nan por comunica libremente y honestamente cu otro. Segun un esposo, “aunke e prome añanan di matrimonio ta dushi, tin biaha nan por ta dificil tambe. E situacion por bira hopi fastioso ora abo cu bo esposa no ta compronde otro su sintimento-, custumber- y necesidadnan. Pero loke por yuda hopi ta si boso tur dos tin un sentido di humor, ta personanan rasonabel, ta confia den Jehova y ta desplega cualidadnan importante manera humildad y pasenshi.” Eseynan lo yuda sigur!

13. Dicon humildad ta masha importante pa logra un matrimonio feliz?

¹³ Bon comunicacion den matrimonio ta manera un riu cu ta core suavemente den un hardin. Pa esey por sigui asina, ta masha importante pa tur dos persona ta ‘humilde.’ (1 Ped. 3:8) Un ruman homber cu tin 11 aña casa a bisa cu “humildad ta e mihor remedi pa soluciona problema pasobra e ta motiva bo pa bisa ‘sorry.’” Un anciano cu tin 20 aña felizmente casa a bisa: “Tin biaha e palabra ‘sorry’ tin mas efecto cu e palabranan ‘mi stima bo.’” El a sigui bisa: “Un cos cu sigur ta yuda ami cu mi casa demostra humildad  ta oracion. Ora nos ta haci oracion hunto, esaki ta yuda nos corda cu nos tur dos ta imperfecto y con Jehova a demostra bondad inmereci na nos. E recordatorionan aki ta yuda nos mira cosnan desde e punto di bista corecto.”

14. Con orguyo por afecta un matrimonio?

¹⁴ Di otro banda, orguyo ta un caracteristica cu ta stroba parehanan di comunica bon y resolve nan problemanan. Dicon? Pasobra un persona orguyoso no tin e curashi ni e deseo pa pidi despensa. En bes di humildemente bisa “sorry” of “pordona mi, por fabor”, un persona asina ta bin cu excuus pa hustifica su mes. En bes di demostra curashi y reconoce su fayonan, e ta busca fout cerca e otro persona. Ora e sintie ofendi, e no ta busca paz; e ta rabia y kisas ta reacciona cu palabranan skerpi of ta keda sin papia cu su casa. (Ecl. 7:9) Si, orguyo por caba cu un matrimonio. Ta bon pa nos corda tambe cu ‘Dios ta opone hende orguyoso, pero ta duna bondad inmereci na hende humilde.’​—Sant. 4:6.

15. Splica con Efesionan 4:26 y 27 por yuda un pareha casa resolve problemanan cu por surgi den nan matrimonio.

¹⁵ Claro cu no ta sabi pa pensa cu nunca nos lo manifesta un actitud orguyoso. Pesey, ora esey sosode, nos mester reconoce esaki y trata cu ne mesora. Pablo a bisa su compañeronan cristian: “No laga solo baha mientras cu ainda boso ta rabia; no duna Diabel un chens cu boso.” (Efe. 4:26, 27) Si nos no cumpli cu e conseho aki, nos por haya nos cu problemanan innecesario. Un ruman muher a lamenta: “Tabatin biaha cu ami cu mi casa no a aplica Efesionan 4:26 y 27. E anochinan ey mi a drumi mas malo cu nunca!” Ta mucho mas mihor pa papia mesora riba un asunto cu e meta pa logra paz, no ta berdad? Ta claro cu tin biaha parehanan casa tin cu duna otro un poco tempo pa calma prome cu nan papia riba cierto problema. Ademas, ta bon pa nan pidi Jehova yuda nan desplega e actitud corecto. Esaki ta encera un actitud humilde cu lo yuda nan enfoca riba e problema y no riba nan sintimentonan pasobra esey lo haci e situacion pio.—Lesa Colosensenan 3:12, 13.

16. Con humildad por yuda un pareha casa balora e puntonan fuerte di otro?

¹⁶ Humildad y modestia ta yuda un persona casa enfoca riba e puntonan fuerte di su casa. Tuma por ehempel e caso di un esposa cu tin cierto talento cu e ta uza na beneficio di su famia. Si su esposo ta humilde y modesto, lo e no sinti cu e mester ta mihor cu su esposa den tur cos. Al contrario, e ta anima su esposa pa sigui uza su talentonan. Asina, e esposo ta demostra cu e ta balora y stima su esposa. (Prov. 31:10, 28; Efe. 5:28, 29) Un esposa modesto y humilde, na su turno, no ta gaba cu su habilidadnan ni menosprecia su esposo pasobra e no ta mes habil cu ne. Al fin y al cabo, nan dos ta “un carni”, y si un ta sufri e otro tambe ta sufri.​—Mat. 19:4, 5.

17. Kico por yuda parehanan casa awe logra un matrimonio feliz cu ta duna honor na Dios?

¹⁷ Sin duda bo kier pa bo matrimonio ta manera esun di Abraham cu Sara y di Isaak cu Rebeca: un matrimonio realmente feliz, duradero y cu ta duna honor na Jehova. Si ta asina, mira matrimonio manera Dios ta mir’e. Acudi na su Palabra pa bo haya sabiduria y comprondemento. Cultiva amor berdadero, “e vlam” di Jehova. (Cant. 8:6) Con bo por haci esey? Balora e puntonan fuerte di bo casa. Haci esfuerso pa bo ta humilde. Trata bo casa cu respet. Si bo haci e cosnan aki, bo matrimonio lo haci tanto abo como bo Tata celestial feliz. (Prov. 27:11) Y e ora ey, bo por tin e mesun sintimentonan cu un ruman homber cu tin 27 aña casa, kende a skirbi: “Mi no por imagina mi un bida sin mi casa. Tur dia nos matrimonio ta bira mas y mas fuerte. Esaki ta resultado di nos amor pa Jehova y di e echo cu ami cu mi casa ta comunica regularmente cu otro.”