1, 2. (a) Kico a yuda bo tuma e decision pa sirbi Dios? (b) Ki pregunta tocante nos herencia spiritual e articulo aki lo contesta?

 MIYONES di hende a tuma e decision sabi pa sirbi Jehova Dios y imita e ehempel di Hesucristo. (Mat. 16:24; 1 Ped. 2:21) Y dedicacion na Dios ta un asunto masha serio. Nos decision pa dedica nos mes na Jehova no ta basa riba conocemento superficial di un par di texto biblico; mas bien, nos a tuma e decision aki despues di a haci un estudio profundo di e Palabra di Dios. Durante e estudio di Bijbel aki, nos a siña hopi cos tocante e herencia cu Jehova a priminti tur hende cu ‘siña conoc’e y esun cu el a manda, cu ta Hesucristo.’ Y tur eseynan a fortalece nos fe.​—Juan 17:3; Rom. 12:2.

² Pero pa nos por keda cu un bon relacion cu Jehova, nos mester sigui tuma decisionnan cu ta agrad’e. Pesey, e articulo aki lo contesta algun pregunta masha importante. Nan ta: Kico ta nos herencia? Ki balor nos mester dun’e? Con nos por haci sigur cu nos ta ricibi nos herencia? Y kico lo yuda nos tuma decisionnan sabi?

3. (a) Ki herencia e unginan lo ricibi? (b) Ki herencia e ‘otro carnenan’ lo ricibi?

³ Un grupo di cristian relativamente chikito tin e speransa di ricibi bida inmortal den cielo como nan herencia. Nan lo tin e privilegio special di por reina hunto cu Cristo den cielo. (1 Ped. 1:3, 4) Pa ricibi e herencia ey, e personanan aki mester “nace di nobo.” (Juan 3:1-3) Awor, kico ta e herencia di Hesus su miyones  di ‘otro carnenan’, kendenan ta traha hunto cu e rumannan ungi den e trabou di predica e bon noticia di e Reino di Dios? (Juan 10:16) Wel, e otro carnenan lo ricibi e herencia cu Adam cu Eva nunca a ricibi, esta, bida eterno den Paradijs aki riba tera, caminda lo no tin sufrimento, morto ni tristeza mas. (Rev. 21:1-4) Esey ta loke Hesus a priminti e malhechor cu tabata colga banda di dje. El a bis’e: “Di berdad mi ta bisa bo awe: Lo bo ta cu mi den Paradijs.”​—Luc. 23:43.

4. Ki bendicionnan nos ta disfruta di dje for di aworaki?

⁴ For di aworaki caba, nos ta disfruta di cierto aspecto di nos herencia spiritual. Por ehempel, debi cu nos ta pone fe den “e rescate cu Cristo Hesus a paga”, nos ta disfruta di paz mental y di un bon relacion cu Dios. (Rom. 3:23-25) Ademas, nos tin bon comprondemento di loke Bijbel ta priminti pa futuro. Y e echo cu nos ta forma parti di un hermandad internacional cu ta stima otro ta haci nos masha feliz. Nos tin tambe e gran honor di por papia cu otro hende tocante Jehova. Pues, nos tin bon motibo pa balora nos herencia.

5. Kico Satanas semper ta purba di haci cu e pueblo di Dios, y con nos por evita di cay den su trampanan?

⁵ Pero, pa nos por disfruta di nos maraviyoso herencia, nos mester keda alerta pa nos no cay den e trampanan di Satanas. Semper el a purba di influencia e pueblo di Dios pa nan tuma mal decision y asina perde nan herencia. (Num. 25:1-3, 9) Y debi cu e sa cu su fin ta cerca, e ta traha mas duro ainda pa desvia nos for di e berdad. (Lesa Revelacion 12:12, 17.) Si nos kier sigui “para firme contra e trampanan di Diabel”, nos mester sigui balora nos herencia spiritual. (Efe. 6:11) Pesey, laga nos wak ki les importante nos por siña for di e manera cu Esau, e yiu homber di e patriarca Isaak, a trata cu su herencia.

6, 7. Ken Esau tabata, y ki herencia e por a ricibi?

⁶ Un 4.000 aña pasa, Rebeca, casa di Isaak, a duna luz na un morocho, Esau y Jacob. E dos ruman hombernan aki tabata masha distinto for di otro. Por ehempel, “Esau a bira un bon jaagdo, un homber di cunucu”, mientras cu “Jacob tabata un homber trankil [“sin culpa”, NW] cu tabata biba den tent.” (Gen. 25:27) Segun Robert Alter, un traductor di Bijbel, e palabra Hebreo traduci aki como “sin culpa” ta referi “na un hende integro”, cu no ta practica pica.

⁷ Ora Esau y Jacob tabatin 15 aña di edad, nan welo Abraham a muri, pero Jehova no a lubida e promesa cu el a haci na Abraham. Con nos por sa esey? Wel, Jehova a ripiti e mesun promesa ey na Isaak, esta, cu tur nacion riba tera lo bendiciona nan mes pa medio di e descendiente, of simia, di Abraham. (Lesa Echonan 3:25; wak nota.) Di e manera aki, Jehova a revela cu un di Abraham su descendientenan lo ta e Mesias, e “simia” fiel cu Genesis 3:15 ta papia di dje. Y como cu Esau tabata yiu homber mayo di Isaak, e tabatin e derecho legal di ricibi e promesa ey. Pues, e Mesias lo mester a bin di su liña di descendencia. Ki un herencia maraviyoso esaki lo tabata! Pero, Esau a apreci’e?

8, 9. (a) Ki decision Esau a tuma relaciona cu su herencia? (b) Kico Esau a realisa añanan despues, y con el a reacciona?

⁸ Un dia cu Esau a sali for di cunucu, el a mira Jacob ta “cushina stoba.” El a bisa Jacob: “Pa fabor, duna mi di e stoba cora ey pa mi come, pasobra mi ta morto di hamber.” Jacob a bis’e: “Bende mi bo derecho di primogenitura prome.” Con Esau  a reacciona? El a bisa Jacob: “Di kico anto e derecho di primogenitura ta sirbi mi?” Increibel! Esau a prefera un tayo di stoba en bes di su derecho como yiu primogenito! Awor, pa haci sigur cu Esau ta bend’e su derecho di yiu mayo, Jacob a bisa Esau: “Hura mi prome!” Mesora Esau a pasa su derecho di yiu mayo pa Jacob. Despues di esey, “Jacob a duna Esau pan y stoba di lenteha, y el a come y bebe y a lanta bay. Asina Esau a desprecia su derecho di primogenitura.”​—Gen. 25:29-34.

⁹ Añanan despues, ora cu Isaak a sinti cu e tabata cerca di muri, Rebeca a haci loke tabata necesario pa Jacob por a ricibi e derecho di yiu mayo cu Esau a desprecia. Ora tabata laat caba, Esau a realisa cu el a tuma un mal decision, y el a roga su tata Isaak: “Bendiciona mi, ami tambe, o mi tata ... Bo no a warda un bendicion pa mi?” Ora Isaak a bis’e cu e no por a cambia e bendicion cu el a duna Jacob, Esau “a yora” amargamente.—Gen. 27:30-38.

10. Ki sintimento Jehova tabatin pa Esau y Jacob, y dicon?

¹⁰ Ki actitud Esau a manifesta segun e relato aki? Wel, el a demostra cu su deseonan di carni tabata mas importante cu e bendicionnan cu su herencia lo a trece den futuro. Esau no a balora su derecho di yiu mayo y obviamente e no tabata stima Dios di berdad. Ademas, Esau no a tene cuenta cu su decision lo a afecta su descendientenan. Jacob si a balora su herencia. Por ehempel, aunke esaki no tabata facil p’e, el a sigui instruccion di su mayornan ora di scoge un esposa. (Gen. 27:46–28:3) Y Jehova a bendicion’e pa su obediencia: El a bira antepasado di e Mesias. Ki sintimento Dios tabatin pa Esau y Jacob? Mediante profeta Malakias, Jehova a bisa: “Mi a stima Jacob; ma Esau mi a odia.”​—Mal. 1:2, 3.

11. (a) Dicon e relato di Esau ta importante pa cristiannan awe? (b) Dicon Pablo a relaciona fornicacion cu loke Esau a haci?

¹¹ Awor, e relato di Esau ta importante pa nos awe? Sigur cu si. Apostel Pablo a spierta su compañeronan cristian pa tene cuidou pa no ‘tin den nan ningun hende cu ta comete fornicacion ni ningun cu no ta aprecia cosnan sagrado, manera Esau, kende a entrega su derecho di yiu mayo a cambio di un cuminda.’ (Heb. 12:16) E spiertamento aki ta conta awe tambe pa tur cristian. Nos mester sigui balora cosnan sagrado pa nos no permiti deseonan di carni pone nos cay den tentacion y perde nos herencia spiritual. Pero, dicon Pablo a relaciona fornicacion cu loke Esau a haci? Pasobra si un hende laga deseo di carni domin’e mescos cu Esau a haci, muy probablemente lo e desprecia cosnan sagrado  pa sigui tras di placernan ilicito, manera fornicacion.

12. (a) Con Satanas ta purba di hinca nos den tentacion? (b) Duna algun ehempel biblico cu por yuda nos ora nos haya nos den tentacion pa haci malo.

¹² Como sirbidor di Jehova, nos ta haci tur loke nos por pa evita situacionnan cu por pone nos cay den tentacion pa comete inmoralidad sexual. Y si un hende purba di hinca nos den tentacion pa desobedece Dios, nos ta pidi Jehova yuda nos para firme. (Mat. 6:13) Nos sa cu constantemente Satanas ta purba di pone nos haci cosnan cu por daña nos relacion cu Jehova, pesey nos ta haci nos best pa mantene nos integridad den e mundo malbado aki. (Efe. 6:12) Como cu Diabel ta e dios di e mundo aki, e sa ki tentacionnan e tin cu uza pa pone hende bay tras di nan deseonan pecaminoso y cay den su trampanan. (1 Cor. 10:8, 13) Supone cu bo haya bo den un situacion caminda bo tin chens di satisface un cierto deseo na un manera inmoral. Kico lo bo haci? Lo bo haci manera Esau, kende a sucumbi mesora na tentacion? Of lo bo resisti e tentacion y huy manera Jozef, yiu di Jacob, a haci ora e casa di Potifar a purba di seducie?​—Lesa Genesis 39:10-12.

13. (a) Den ki sentido, hopi di nos rumannan a actua manera Jozef, y otronan manera Esau? (b) E echo cu algun ruman ta actua manera Esau ta haci nos consciente di ki necesidad importante?

¹³ Hopi ruman a yega di haya nan den situacion den cua nan tabatin cu scoge pa ser sea manera Esau of manera Jozef. Mayoria di nan a actua na un manera sabi y a haci Jehova su curason contento. (Prov. 27:11) Pero algun di nos rumannan a actua manera Esau, poniendo asina nan herencia spiritual na peliger. De echo, tur aña tin hopi caso hudicial y expulsion pa motibo di inmoralidad sexual. Pesey ta masha importante pa nos prepara nos curason for di awor pa por resisti cualkier tentacion cu nos por haya nos cu ne den futuro. (Sal. 78:8) Tin por lo menos dos cos cu nos por haci pa prepara nos mes pa resisti tentacion y tuma bon decision.

14. Meditacion riba ki preguntanan por yuda nos “odia loke ta malo” y “pega na loke ta bon”?

¹⁴ E prome cos cu nos por haci ta pensa riba ki consecuencia nos actonan por tin. Nos aprecio pa nos herencia spiritual ta depende di nos amor pa Jehova, e Dunador di e herencia. Ora nos ta stima un persona, nos no kier hacie dolor, no ta berdad? Mas bien, nos ta haci tur nos esfuerso pa e ta contento. Pesey, ta bon pa nos tuma tempo pa pensa kico por ta e posibel consecuencianan pa nos y pa otronan si nos sucumbi na deseonan inmoral. Nos por puntra nos mes: ‘Mi decision egoista lo afecta mi relacion cu Jehova? Con e acto robes aki lo afecta mi famia? Y con lo e afecta mi rumannan den congregacion? Mi por pone otronan trompica?’ (Flp. 1:10) Ademas, nos por puntra nos mes: ‘Un rato di placer inmoral ta bal e prijs cu lo mi tin cu paga despues? Mi kier ta manera Esau, kende a yora amargamente despues cu el a realisa kico el a haci?’ (Heb. 12:17) Si nos ta reflexiona riba preguntanan asina, esaki lo yuda nos “odia loke ta malo” y “pega na loke ta bon.” (Rom. 12:9) Anto si nos ta stima Jehova di berdad, nos lo traha duro pa proteha nos herencia spiritual.​—Sal. 73:28.

15. Con nos por prepara nos mes pa resisti cualkier tentacion y alabes proteha nos relacion cu Dios?

¹⁵ E di dos cos cu nos por haci ta prepara nos mes pa resisti tentacion. Jehova a percura pa tur loke nos mester pa prepara  nos mes pa resisti tentacion y proteha nos relacion cu ne. Su provisionnan ta, entre otro, estudio di Bijbel, reunionnan cristian, sirbishi di veld y oracion. (1 Cor. 15:58) Cada bes cu nos haci oracion y desahoga nos mes cerca Jehova y cada bes cu nos participa plenamente den sirbishi cristian, nos ta preparando nos mes pa resisti tentacion. (Lesa 1 Timoteo 6:12, 19.) Pues, pa nos por resisti tentacion, nos tin cu sigui haci bon uzo di e provisionnan aki. (Gal. 6:7) Proverbionan capitulo 2 ta enfatisa esaki bon cla.

16, 17. Con nos por adkiri e capacidad di tuma bon decision?

¹⁶ Proverbionan capitulo 2 ta anima nos pa adkiri sabiduria y comprondemento. Esakinan ta regalonan for di Dios cu ta yuda nos discerni bon for di malo y disciplina propio for di satisfaccion propio. Pero ta solamente si nos ta dispuesto pa haci esfuerso, nos lo tin exito. Bijbel ta confirma e berdad fundamental aki, bisando: “Mi yiu, si bo kier ricibi mi palabranan y warda mi mandamentonan den bo, haci bo horea atento na sabiduria, y inclina bo curason na comprondemento; pasobra si bo sclama pa discernimento, halsa bo bos pa comprondemento, si bo busc’e manera plata, y rondi’e manera tesoro scondi, e ora ey lo bo discerni e temor di SEÑOR, y descubri e conocemento di Dios. Pasobra SEÑOR ta duna sabiduria; for di su boca ta sali conocemento y comprondemento.”—Prov. 2:1-6.

¹⁷ No tin duda, si nos kier tin e capacidad di tuma bon decision, nos mester cumpli cu loke Proverbionan capitulo 2 ta bisa. Pues, nos por resisti tentacion si nos ta laga Jehova su palabranan moldea nos, si nos ta sigui haci oracion y pidi Dios su guia y si nos ta sigui busca e conocemento di Dios manera nos lo busca tesoronan scondi.

18. Kico bo ta determina pa sigui haci, y dicon?

¹⁸ Jehova ta duna conocemento, comprondemento, discernimento y sabiduria na esnan cu ta haci esfuerso pa adkiri e regalonan aki. Mas nos busca y uza nan, mas nos lo hala cerca Jehova. Y e relacion intimo cu nos lo tin cu Jehova Dios e ora ey lo proteha nos y yuda nos resisti tentacion ora esakinan presenta. Si nos ta mantene un bon relacion cu Jehova y tin un temor saludabel p’e, nos lo evita di haci loke ta malo. (Sal. 25:14; Sant. 4:8) Si, nos amistad cu Jehova y e sabiduria cu e ta duna nos ta yuda nos tuma decisionnan sabi cu lo haci su curason contento y yuda nos proteha nos herencia spiritual.