1, 2. (a) Kico nos mester haci pa nos por tin un bon relacion cu Jehova? (b) Con nos lo beneficia di un analisis di relatonan biblico cu ta mustra con hende a reacciona na disciplina di Dios?

 “PA LOKE ta ami, ta bon pa mi keda cerca di Dios; mi a haci Señor DIOS mi refugio.” (Sal. 73:28) Con bin e salmista a yega na e conclusion aki? Mas prome, e salmista tabata amarga pasobra e tabata mira cu e malbadonan tabata prospera. Y el a lamenta: “Ta en vano mi a tene mi curason puro, y a laba mi mannan den inocencia.” (Sal. 73:2, 3, 13, 21) Pero ora el a drenta “e santuario di Dios”, esaki a yud’e cambia su manera di pensa y mantene un bon relacion cu Jehova. (Sal. 73:16-18) E experencia aki a siñ’e un les masha importante: Pa un hende por tin un bon relacion cu Jehova, e mester ta entre Dios su pueblo y e mester acepta y sigui Dios su consehonan.—Sal. 73:24.

² Nos tambe kier tin un bon relacion cu Jehova, e Dios bibo y berdadero. Pesey, ta masha importante pa nos sigui su consehonan y laga su disciplina forma nos pa nos por ta personanan cu ta agrad’e. Den pasado, Dios a mustra misericordia na hende individual y, algun biaha, na nacionnan completo, dunando nan oportunidad pa acepta su disciplina. E manera cu nan a reacciona ta registra den Bijbel y ta sirbi como “instruccion” y “spiertamento pa nos cu ta biba na final di e tempo aki.” (Rom. 15:4; 1 Cor. 10:11) Analisando e relatonan aki, nos lo haya sa con Jehova ta pensa y sinti y con nos por beneficia di su disciplina.

3. Con Isaias 64:8 y Jeremias 18:1-6 ta ilustra e autoridad cu Jehova tin riba hende? (Wak e plachi na cuminsamento di e articulo aki.)

³ Isaias 64:8 ta uza un comparacion pa ilustra e autoridad cu Jehova tin riba hende individual y riba  nacionnan. E ta bisa: “O SEÑOR, abo ta nos Tata, nos ta e klei y abo ta nos Alfarero; y nos tur ta e obra di bo man.” Un alfarero por forma un pida klei manera e kier y traha loke e ta desea cu ne. E klei no tin ningun control riba loke ta pasa cu ne. Asina ta cu hende y Dios. Mescos cu un pida klei no por bisa e alfarero con e tin cu form’e, asina hende tampoco no tin derecho di bisa Dios con e tin cu forma nan.—Lesa Jeremias 18:1-6.

4. Dios ta obliga hende of nacionnan pa obedec’e? Splica.

⁴ Den pasado, Jehova a demostra cu e tambe por haci loke un alfarero ta haci cu klei; el a haci esey cu e nacion di Israel. Pero tin un diferencia masha grandi entre Jehova y un alfarero humano. Un alfarero ta uza su habilidad pa traha loke e kier cu un pida klei. Pero kico di Jehova? E ta uza su autoridad pa forma e hendenan of e nacionnan cu e kier y na e manera cu e kier, sea pa nan ta bon hende of mal hende? Bijbel su contesta ta no. Jehova a duna humanidad un regalo masha precioso: boluntad liber. Y e no ta eherce su autoridad na un manera cu ta haci e regalo ey perde su balor. Ta cada hende tin cu dicidi si nan ta laga nan Creador, Jehova, forma nan of no.—Lesa Jeremias 18:7-10.

5. Con Jehova ta eherce su autoridad riba hende cu ta nenga di lag’e forma nan?

⁵ Kico ta pasa si un hende ta nenga obstinadamente di laga e Gran Alfarero form’e? Con Jehova ta eherce su autoridad divino e ora ey? Wel, pensa kico ta sosode cu un pida klei cu no ta sirbi mas pa e proposito cu e alfarero tabatin p’e. Si, e alfarero por dicidi di traha un otro cos cu ne of simplemente tir’e afo. Pero generalmente, ora un pida klei no ta sirbi mas, ta e alfarero su falta. Pero esey nunca lo ta e caso cu nos Alfarero. (Deu. 32:4) Ora un persona no kier laga Jehova form’e, semper e falta ta cerca e persona mes. Jehova ta eherce su autoridad riba hende y ta forma nan segun e manera cu nan ta reacciona na su disciplina. Si nan reacciona bon, Jehova por uza nan bon den su sirbishi. Por ehempel, cristiannan ungi ta “pochinan di misericordia”; Jehova ta forma nan y nan ta bira “pochi pa uzo honorabel.” Di otro banda, hende cu ta nenga di obedece Dios ta bira ‘pochi di rabia prepara pa destruccion.’—Rom. 9:19-23.

6, 7. Con Rey David y Rey Saul a reacciona ora Jehova a disciplina nan?

 ⁶ Un manera cu Jehova ta forma hende ta mediante conseho of disciplina. Pa nos por compronde con e ta uza su autoridad, laga nos tuma como ehempel e prome dos reynan di Israel—Saul y David—y wak con Jehova a forma nan. Ora Rey David a comete adulterio cu Betsabe, su mal echo a afecta tanto e como otronan. Maske David tabata rey, Jehova a disciplin’e severamente. Dios a manda profeta Natan cerca dje, kende a dun’e un mensahe fuerte. (2 Sam. 12:1-12) Con David a reacciona? El a sinti hopi duele di loke el a haci y a arepenti. Y Dios a tene misericordia di dje.—Lesa 2 Samuel 12:13.

 ⁷ Rey Saul si a reacciona completamente diferente ora Jehova a disciplin’e; e no a acepta e disciplina. Ta asina cu Jehova, pa medio di profeta Samuel, a duna Saul instruccion specifico: E mester a destrui tur Amalekita y nan bestianan. Pero Saul a desobedece e instruccion di Dios. El a laga Rey Agag y e mihor bestianan keda na bida. Dicon? Un di e motibonan ta cu e tabata kier gloria pa su mes. (1 Sam. 15:1-3, 7-9, 12) Ora Samuel a trata di rasona cu ne, e no a scucha. E no a laga e Gran Alfarero form’e; mas bien, el a hustifica su conducta, rasonando cu loke el a haci  tabata bon pasobra nan por a uza e bestianan pa haci sacrificio. Como cu Saul a nenga di haci cambio, Jehova a rechas’e como rey, y nunca mas el a drecha su relacion cu e Dios berdadero.—Lesa 1 Samuel 15:13-15, 20-23.

8. Ki les nos por siña for di e manera cu e nacion di Israel a reacciona ora Jehova kier a forma nan?

⁸ No ta hende individual so Jehova ta duna oportunidad di acepta su disciplina, pero nacionnan completo tambe. Na aña 1513 prome cu nos era, despues cu Jehova a libra e Israelitanan for di sclavitud na Egipto, el a cera un pacto cu nan. E nacion di Israel a bira Jehova su pueblo special, y nan tabatin e privilegio di laga e Gran Alfarero forma nan. Pero e pueblo a sigui haci loke tabata malo den bista di Jehova y a hasta cuminsa adora e diosnan di e nacionnan bisiña. Bes tras bes, Jehova a manda su profetanan pa yuda nan cambia nan conducta, pero nan no a scucha. (Jer. 35:12-15) Como cu nan tabata asina cabesura, Jehova a disciplina nan severamente. Manera un pochi di klei prepara pa destruccion, e reino di dies tribu di Israel a cay den man di e Asirionan y e reino di dos tribu di Juda, den man di e Babilonionan. Esaki mester siña nos un les masha importante: Jehova su disciplina ta beneficia nos solamente si nos acept’e y laga Jehova forma nos.

9, 10. Con e Ninivitanan a reacciona ora nan a haya spiertamento divino?

⁹ Jehova a duna e habitantenan di Ninive,  e capital di Asiria, tambe oportunidad di reacciona na su spiertamento. Jehova a bisa Jonas: “Lanta, bay Ninive, e stad grandi, y predica contra dje, pasobra nan maldad a yega te mi dilanti.” Jehova kier a destrui Ninive pasobra e hendenan tabata haci hopi maldad.—Jon. 1:1, 2; 3:1-4.

¹⁰ Pero ora Jonas a bisa e pueblo kico Jehova lo a bay haci, “e hendenan di Ninive a kere den Dios, y nan a proclama un yunamento y a bisti paña-di-saco, for di esun di mas halto te na esun di mas humilde.” Nan rey “a lanta for di su trono, a kita su mantel, a bisti paña-di-saco, y a bay sinta den shinishi.” Pues, e Ninivitanan a haci caso di Jehova su spiertamento, a permiti Jehova forma nan y a arepenti. Pesey, Jehova no a destrui e stad mas.—Jon. 3:5-10.

11. Ki caracteristica di Jehova su personalidad ta ser resalta den su trato cu Israel y Ninive?

¹¹ Manera nos a mira, maske e Israelitanan tabata Jehova su nacion scogi, e tabatin cu disciplina nan. Di otro banda, e Ninivitanan no tabatin un relacion special cu Dios. Toch, Jehova a declara un mensahe di huicio contra nan y a tene misericordia di nan ora nan a demostra cu nan por a ser forma mescos cu klei. E dos casonan aki ta mustra bon cla cu nos Dios Jehova “no ta haci distincion di persona.”—Deu. 10:17.

12, 13. (a) Dicon Dios ta cambia su decision ora un persona acepta su disciplina? (b) Kico e echo cu Jehova a sinti ‘duele’ of a “arepenti” den caso di Saul y di Ninive ta nifica?

¹² E manera cu Dios ta forma nos ta mustra cu e ta rasonabel y flexibel. Esaki ta bisto den casonan cu Jehova a yega di cambia di idea of keda sin tuma cierto accion cu el a proclama debi na e manera cu e hendenan a reacciona. Por ehempel, den caso di Saul, e prome rey di Israel, Bijbel ta bisa cu a “duel” Jehova cu el a haci Saul rey. (1 Sam. 15:11) Ademas, Bijbel ta bisa cu ora e habitantenan di Ninive a arepenti y a bira bek for di nan mal caminda, “Dios a arepenti di e calamidad cu el a declara cu e lo trece riba nan. Y e no a hacie.”—Jon. 3:10.

¹³ E echo cu Bijbel ta bisa cu algo a “duel” Jehova of cu Jehova “a arepenti” ta indica un cambio di opinion of di intencion. Tuma por ehempel e caso di Saul. Prome, e tabatin Jehova su aprobacion, ma despues Jehova a rechas’e como rey. Jehova no a cambia di opinion pasobra el a tuma un mal decision ora el a scoge Saul como rey, pero debi cu Saul a demostra falta di fe y a bira desobediente. Den caso di e Ninivitanan, Jehova Dios a cambia su intencion, of decision, y no a destrui nan. Ta un gran consuelo pa sa cu Jehova, nos Alfarero, ta rasonabel, flexibel, bondadoso y misericordioso y cu e ta cla pa cambia su decision ora hende bira di nan mal caminda.

14. (a) Kico Jehova ta uza pa forma nos awe? (b) Con nos mester reacciona ora Jehova ta forma nos?

¹⁴ Awe Jehova ta forma nos principalmente pa medio di su Palabra, Bijbel, y su organisacion. (2 Tim. 3:16, 17) Pesey, nos mester acepta cualkier conseho of disciplina cu nos ta ricibi via e medionan aki. Sin importa cuanto aña nos tin batisa of cuanto privilegio nos tin den Jehova su sirbishi, semper nos mester sigui obedece Jehova su consehonan. Ora nos ta haci esey, nos ta permiti Jehova forma nos di manera cu nos ta bira pochinan pa uzo honorabel.

15, 16. (a) Con un persona lo por sinti ora e perde su privilegionan den congregacion? Duna un ehempel. (b) Kico por yuda nos trata cu sintimentonan negativo ora nos ser disciplina?

 ¹⁵ Tin biaha, nos ta haya disciplina den forma di instruccion of coreccion pa nos cambia nos manera di pensa. Pero tin biaha, nos ta haya disciplina pasobra nos a haci algo cu no tabata bon. Esey por encera cu nos por hasta perde cierto privilegio. Tuma por ehempel e caso di Dennis, * kende tabata sirbi como anciano. El a ser reprende pa motibo di mal decision cu el a tuma den asuntonan di negoshi. Con Dennis a sintie e anochi cu nan a anuncia den congregacion cu lo e no sirbi mas como anciano? El a bisa: ‘Mi a sinti cu mi a fracasa. E ultimo 30 añanan, mi tabatin hopi privilegio. Mi a traha pionero regular, sirbi na Betel, mi a ser nombra como sirbidor ministerial y despues como anciano. Ademas, mi a caba di duna mi prome parti na congreso di districto. Y diripiente, mi a perde tur cos. Mi tabatin masha berguensa, y mi a pensa cu kisas nunca mas lo mi por ta util den e organisacion di Jehova.’

¹⁶ Dennis mester a bira bek di su mal caminda y stop cu e mal echo cu a pon’e haya coreccion. Pero kico a yud’e trata cu sintimentonan negativo? El a splica: “Mi tabata determina pa sigui cu un bon rutina spiritual. Loke a yuda mi masha hopi tambe tabata e sosten cu mi tabata haya di mi rumannan den fe y e animacion for di nos publicacionnan. E articulo ‘Bo tin gana di haya bo privilegionan di sirbishi atrobe?’ den La Atalaya di 15 di augustus 2009 tabata manera un carta dirigi na mi cu a contesta mi oracionnan. E conseho cu mas mi a balora tabata: ‘Awor cu bo no tin mucho responsabilidad den congregacion, probecha di e tempo ey pa haci bo mes fuerte spiritualmente.’” Con Dennis a beneficia di e disciplina cu el a ricibi? Despues di algun aña, el a bisa: “Jehova a bendiciona mi atrobe cu e privilegio di por sirbi como sirbidor ministerial.”

17. Con expulsion por yuda un pecador? Duna un ehempel.

¹⁷ Expulsion ta un otro medida cu Jehova a percura pa disciplina un persona. Expulsion ta proteha e congregacion cristian contra mal influencia y por yuda e pecador arepenti di su pica. (1 Cor. 5:6, 7, 11) Tuma por ehempel Robert, kende tabata expulsa pa casi 16 aña. Durante e tempo ey, su mayornan y su ruman hombernan a cumpli fielmente cu e mandato biblico pa no anda cu hende cu ta haci malo, ni cuminda nan. Awor tin varios aña cu Robert a ser restaura y e ta progresa bon den e berdad. Ora a puntr’e kico a motiv’e despues di asina tanto tempo pa bolbe cerca Jehova y Su pueblo, el a bisa cu en parte tabata e manera cu su famia a trat’e. “Si mi famia a anda cu mi djis un tiki so, of a djis puntra mi con ta bay, lo mi no a sinti nan falta asina tanto. Y probablemente e deseo pa anda cu nan lo no tabata un motivacion pa mi bolbe cerca Dios.”

18. Ki tipo di klei nos mester ta den man di e Gran Alfarero?

¹⁸ Podise nos no tin mester di un disciplina asina severo, pero ki tipo di klei nos lo ta den man di e Gran Alfarero? Con nos lo reacciona ora nos haya disciplina? Nos lo reacciona manera David of manera Saul? E Gran Alfarero ta nos Tata. Laga nos semper keda corda ‘cu e ta reprende esun cu e ta stima, manera un tata ta reprende e yiu cu e tin delicia den dje.’ Pesey, ‘no rechasa disciplina di Jehova, ni aborece su reprendemento.’—Prov. 3:11, 12.